Հայաստանի Հանրապետության օրհներգի հնչյունների ներքո Բերդ համայնքում մեկնարկեց համայնքային «Վերջին զանգի» միջոցառումը։ Մայիսի 25-ին Բերդի մշակույթի տանը տեղի ունեցած տոնական միջոցառումը համախմբել էր համայնքի բոլոր հանրակրթական դպրոցների շրջանավարտներին, ուսուցիչներին, ծնողներին ու բնակիչներին։ Այս տարի Բերդ համայնքում դպրոցին հրաժեշտ է տվել 297 շրջանավարտ։

Տոնական միջոցառման ընթացքում համայնքի բոլոր դպրոցների շրջանավարտները հանդես եկան պարային, երաժշտական և գեղարվեստական կատարումներով՝ ստեղծելով ջերմ ու տոնական մթնոլորտ։ Միջոցառումը շարունակվեց հյուրասիրությամբ և երիտասարդական ժամանցային ծրագրով։

Միասնական «Վերջին զանգ» միջոցառմամբ համայնքը շրջանավարտներին ճանապարհեց լավագույն մաղթանքներով՝ վստահ լինելով, որ այսօրվա շրջանավարտներն են վաղվա պատասխանատու ու արժանապատիվ քաղաքացիները։

Բերդ համայնքի մշակութային կյանքում նորություններ կան․ սահմանամերձ համայնքում՝ Բերդի մշակույթի տանը բացվել է համայնքային պատկերասրահ, որտեղ մեկ հարկի տակ ցուցադրվում են Տավուշի մարզի արվեստագետների աշխատանքները։ Տավուշեցի նկարիչ Ռոմեո Մելիքյանի տարիներ շարունակ երազանք թվացող գաղափարն այսօր արդեն իրականություն է։

Պատկերասրահի բացման արարողությանը ներկա էին արվեստագետներ, մշակույթի գործիչներ և համայնքի բնակիչներ։ Պատկերասրահի ստեղծմամբ Բերդում մշակութային կյանքը նոր մակարդակի է բարձրանում։ Այսուհետ այստեղ կանցկացվեն ցուցահանդեսներ, ստեղծագործական հանդիպումներ և մշակութային տարբեր միջոցառումներ՝ և տեղացի արվեստագետների, և հանրապետության տարբեր մարզերից ժամանած հեղինակների մասնակցությամբ։

Նորաբաց սրահում արդեն ծրագրվում են հաջորդ ցուցահանդեսներն ու մշակութային հանդիպումները։ Արվեստագետների կարծիքով՝ պատկերասրահը նախ և առաջ վայր է որտեղ մարդիկ կարող են հանդիպել ու հաղորդակցվել արվեստին։

Նորաստեղծ պատկերասրահը կնպաստի նաև համայնքի տաղանդավոր արվեստագետների բացահայտմանն ու առաջմղմանը՝ Բերդում ձևավորելով ավելի ակտիվ և ստեղծագործ մշակութային միջավայր։

1945 թվականի մայիսի 9-ին Ռայխսթագի պատերի տակ հնչած ինքնաշեն զուռնան այսօր պահպանվում և ցուցադրվում է Բերդի պատմության և կենցաղի թանգարանում։

Երաժշտական գործիքը պատկանել է Թամանյան դիվիզիայի հետախույզ, Հայրենական մեծ պատերազմի մարտական գործողությունների մասնակից, ավագ սերժանտ Արշալույս Չիլինգարյանին՝ Տավուշի մարզի Նավուր գյուղից։

Զուռնան հնչել է Հայրենական պատերազմի հաղթանակի օրերին՝ խորհրդանշելով պատերազմի ավարտն ու խաղաղության սպասումը։ Պատերազմից հետո Արշալույս Չիլինգարյանը խնամքով պահպանել է երաժշտական գործիքը, իսկ տարիներ անց այն փոխանցել Բերդի պատմության և կենցաղի թանգարանին, որտեղ այն այսօր ներկայացվում է որպես պատերազմի տարիների հիշողություն և արժեքավոր մասունք։

Հայոց ցեղասպանության 111-րդ տարելիցի կապակցությամբ ապրիլի 24-ին Տավուշի մարզկենտրոն Իջևանում մարդկանց բազմությունն առավոտյան լուռ քայլերթով շարժվեց Հայոց Ցեղասպանության հուշակոթող՝ ի հիշատակ և ոգեկոչում մեր զոհերի։

Քայլերթին համընթաց ընթանում էր Սուրբ Պատարագը՝ Ցեղասպանության նահատակներին նվիրված բաց խորանում։

Տավուշ Մեդիայի ֆոտոշարքը Իջևանից։

Բերդ համայնքի բոլոր բնակավայրերում այսօր ծաղիկներ են խոնարհել Հայոց ցեղասպանության զոհերի հիշատակը հավերժացնող հուշակոթողների մոտ: Ժամը 10։30-ին «Սորաններ» դենդրոպարկի մուտքի հարակից տարածքից մեկնարկել է երթը դեպի հուշակոթող։

Լուսանկարները՝ Բերդի համայնքապետարանի։

Նոյեմբերյան համայնքում բնակիչները, համայնքային կառույցների ներկայացուցչները համայնքապետարանի մերձակայքից քայլերթով շարժվել են դեպի Սուրբ Սարգիս եկեղեցի, որտեղ մատուցվել է Սուրբ պատարագ։

Լուսանկարները՝ Նոյեմբերյանի համայնքապետարանի։

Դիլիջանում քաղաքի հուշարձանի հարակից տարածքում տեղի է ունեցել հիշատակի արարողություն։

Լուսանկարները՝ Դիլիջանի համայնքապետարանի։

Ապրիլի 7-ին Բերդի մշակույթի տանը անցկացվեց միջոցառում, որը նվիրված էր Մայրության և գեղեցկության օրվան։ Այս տարի համայնքում տոնը նշվեց առանձնահատուկ՝ մարտի 8-ի փոխարեն որպես մեծարում ընտրվեց ապրիլի 7-ը՝ Մարիամ Աստվածածնի Ավետման տոնը, որպես հայկական և հոգևոր արժեքների օր։

Կազմակերպիչների խոսքով՝ այս փոփոխությունը խորհրդանշական է. այն ընդգծում է, որ ամենակարևոր ավետումները տրված են կանանց, որոնք իրենց սիրով, հոգատարությամբ և նվիրումով կարողանում են դրանք կյանքի կոչել։ Օրը նաև ծառայեց որպես յուրահատուկ արտահայտություն՝ հայ կանանց հանդեպ երախտագիտության։

Միջոցառման կարևոր հատվածներից մեկը ցուցահանդեսն էր, որտեղ ներկայացված էին տաղանդաշատ երեխաների բազմազան և գունեղ ստեղծագործություններ։ Միջոցառումը համախմբել էր Բերդ քաղաքի և տարածաշրջանի գյուղերի ներկայացուցիչներին, իսկ Բերդի մանկապարտեզների փոքրիկները իրենց հուզիչ ելույթներով ջերմություն հաղորդեցին երեկոյին։

Երեկոն շարունակվեց տոնական համերգով, որի ընթացքում հնչեցին երգեր, ներկայացվեցին պարային համարներ և բեմականացված ելույթներ՝ նվիրված մայրերին։ Մասնակիցների ելույթները փոխանցում էին մայրական սիրո կարևորությունը և անսահման ուժը՝ դարձնելով երեկոն ևս մեկ առիթ շնորհակալություն հայտնելու մայրերին՝ իրենց հոգատարության, նվիրումի և սիրո համար։

Հեղինակ՝ Անահիտ Մակյան

Ապրիլի 2-ին, ժամը 14։35-ին Տավուշի մարզային օպերատիվ կառավարման կենտրոն ահազանգ է ստացվել է, որ Մովսես բնակավայրի սկզբնամասում տեղի է ունեցել քարաթափում, ինչի հետևանքով ժայռաբեկորը հարվածել է ճանապարհին կայանված ավտոմեքենային, որը բախվելով ծառերին ու քարերին հայտնվել է ձորում։

Դեպքի վայր է մեկնել ՆԳՆ ՓԾ Տավուշի մարզային փրկարարական վարչության հրշեջ-փրկարարական ջոկատի օպերատիվ խումբը։

Փրկարարները պարեկային ծառայողների հետ համատեղ հեռացրել են թափված քարերը ճանապարհի երթևեկելի հատվածից։ Քարաթափման հետևանքով տուժածներ չկան։

Մարտի 19-ին Տավուշի մարզի Այգեձոր գյուղում գործող «Էկո գարդեն» գործարանում անցկացվել է ուսուցողական դասընթաց՝ SIGMA ծրագրի հետ համագործակցության շրջանակում։

Դասընթացն ուղղված էր մարզում պտղաբուծության զարգացման հեռանկարներին՝ կլիմայական փոփոխությունների պայմաններում։ Մասնակիցներին ներկայացվել են ոլորտի արդի մարտահրավերները, զարգացման հնարավորությունները, ինչպես նաև մշակության արդյունավետ կազմակերպման և ժամանակակից տեխնոլոգիաների կիրառման մոտեցումները։

Միջոցառմանը մասնակցել են ոչ միայն Այգեձորի բնակիչները, այլև հարակից բնակավայրերի ներկայացուցիչներ, ինչը նպաստել է փորձի փոխանակման և մասնագիտական քննարկումների ընդլայնմանը։ Դասընթացն անցել է ակտիվ և փոխգործակցային մթնոլորտում․ մասնակիցները ներգրավված են եղել քննարկումներում, ուղղել են հարցեր և կիսվել իրենց գործնական փորձով։ Այս ձևաչափը հնարավորություն է տվել առավել խորությամբ ընկալելու ներկայացված թեմաները և ամրապնդելու ձեռք բերված գիտելիքները։

Մասնակիցները կարևորել են նման նախաձեռնությունների անցկացումը՝ ընդգծելով, որ հատկապես կլիմայական փոփոխությունների պայմաններում անհրաժեշտ է շարունակական կրթություն և արդիական գիտելիքների փոխանցում։ Նրանք նաև նշել են, որ նման դասընթացները նպաստում են գյուղատնտեսության արդյունավետության բարձրացմանը և համայնքների զարգացմանը։

Դասընթացը կարևոր քայլ է հանդիսանում համայնքներում իրազեկվածության բարձրացման և գյուղատնտեսության կայուն զարգացման խթանման ուղղությամբ։

Հեղինակ՝ Անահիտ Մակյան։

Տավուշի մարզի Բերդ քաղաքում ապրող 89-ամյա Ջուլիետա Սարգսյանը տարիների ընթացքում չի կորցրել ստեղծագործելու իր ցանկությունը։ Տիկին Ջուլիետան ունի 33 տարվա աշխատանքային փորձ։ Երկար տարիներ նա աշխատել է սոցիալական ապահովության բաժնում՝ որպես գլխավոր հաշվապահ։ Միևնույն ժամանակ ընտանիքի հետ ակտիվորեն մասնակցել է նաև գյուղատնտեսական աշխատանքներին։ Սակայն այսօր արդեն տարիքային պատճառներով նա ի վիճակի չէ զբաղվել այդ աշխատանքներով, և ձեռագործությունն է դարձել նրա առօրյայի կարևոր ու անբաժան մասը։

Տիկին Ջուլիետան պատմում է, որ ձեռարվեստի հանդեպ սերը ձևավորվել է դեռ մանկուց։ Տարիների ընթացքում նա յուրացրել է ձեռագործության տարբեր տեսակներ՝ ասեղնագործություն, հելունագործություն, շյուղագործություն, գորգագործություն, ինչպես նաև կանվայի վրա կատարվող նուրբ ասեղնագործություն։

Տիկին Ջուլիետայի տուն մտնելուն պես առաջինն աչքի են ընկնում նրա ձեռքի աշխատանքները։ Տան գրեթե յուրաքանչյուր անկյունում կարելի է տեսնել գունավոր ու խնամքով պատրաստված գեղեցիկ իրեր, որոնք ոչ միայն զարդարում են տունը, այլև յուրահատուկ ջերմություն են հաղորդում միջավայրին։
Նրա խոսքով՝ ձեռագործությունը պարզապես զբաղմունք չէ։ Այն իրեն տալիս է հոգեկան հանգստություն, օգնում է օրը լցնել օգտակար աշխատանքով և պահպանել ստեղծագործելու ցանկությունը։

Չնայած իր պատրաստած աշխատանքների մեծ պահանջարկին՝ տիկին Ջուլիետան դրանք չի վաճառում։ Նա նախընտրում է իր ստեղծած իրերը նվիրել հարազատներին, հարևաններին և հյուրերին։ Նրա համար ամենամեծ ուրախությունը այն է, երբ իր աշխատանքները ուրախություն են պարգևում ուրիշներին։

Տիկին Ջուլիետայի համոզմամբ՝ մարդը պետք է զբաղվի այնպիսի աշխատանքով, որը ոչ միայն հաճելի է, այլև օգտակար իր ընտանիքի համար։ Նրա խոսքով՝ աշխատասիրությունն ու ստեղծագործելու ցանկությունը մարդուն ուժ ու կյանքին հետաքրքրություն են տալիս կյանքի ցանկացած փուլում։

Հեղինակ՝ Տավուշ  Մեդիայի թղթակից Անահիտ Մակյան։

Մարտի 4-ին ՀՀ Տավուշի մարզի Բերդ քաղաքում բացվել է ՀՀ փաստաբանների պալատի հանրային պաշտպանի գրասենյակի նոր նստավայրը։

Բերդ քաղաքի և հարակից բնակավայրերի շահառուներն այսուհետ հնարավորություն կունենան տեղում ստանալու անվճար իրավաբանական օգնություն՝ ապահովելով արդյունավետ իրավական պաշտպանություն ունենալու իրենց իրավունքը:

«ՀՀ փաստաբանների պալատի հանրային պաշտպանի գրասենյակը շարունակաբար ընդլայնում է իր ներկայությունը մարզերում՝ ապահովելու իրավական աջակցությունը յուրաքանչյուր քաղաքացու համար՝ անկախ բնակության վայրից», — հայտնում են ՀՀ փաստաբանների պալատից։

Գրասենյակի նստավայրը հիմնվել է Եվրոպական միության ֆինանսական աջակցությամբ եւ ՄԱԶԾ-ի, ՅՈՒՆԻՍԵՖ-ի եւ ՄԱԲՀ-ի կողմից իրականացվող «Մարդու իրավունքների պաշտպանության խթանում եւ ազգային հաստատությունների հզորացում» ծրագրի շրջանակներում։

Հանրային պաշտպանի գրասենյակի Բերդի նստավայրը գտնվում է Լևոն Բեկի 5 հասցեում (համայքնապետարանի շենք, 4-րդ հարկ):

Հանրային պաշտպանի գրասենյակը ՀՀ փաստաբանների պալատի կազմում գործող կառուցվածքային ստորաբաժանում է, որը ՀՀ օրենսդրությամբ սահմանված դեպքերում անձանց տրամադրում է անվճար իրավաբանական օգնություն՝ իրականացնում է հանրային պաշտպանություն: Իրավաբանական օգնությունը տրամադրվում է գրասենյակում աշխատող փաստաբանների՝ հանրային պաշտպանների միջոցով:

Անվճար իրավաբանական օգնությունը ներառում է`

1. խորհրդատվությունը` հայցադիմումների, դիմումների, բողոքների և այլ իրավաբանական բնույթի դատավարական փաստաթղթերի կազմում, ներառյալ` իրավաբանական տեղեկատվության տրամադրում,
2. ներկայացուցչությունը կամ պաշտպանությունը` քրեական, քաղաքացիական, վարչական և սահմանադրական գործերով:

Տավուշի մարզի համայնքներում ամփոփվել են «Մասնակցային բյուջետավորում 2026թ.» ծրագրի շրջանակում քաղաքացիների կողմից ներկայացված հայտ-առաջարկների քվեարկության արդյունքները։

Մասնակցային բյուջետավորման գործընթացը քաղաքացիներին հնարավորություն է տալիս անմիջականորեն մասնակցել համայնքային բյուջեի մի մասի բաշխմանը և իրենց համայնքի զարգացմանը վերաբերող որոշումների կայացմանը՝ ձևավորելով ավելի պատասխանատու և ներառական տեղական ինքնակառավարում։

Իջևան համայնքում մասնակցային կառավարման մակարդակի բարձրացման և որոշումների կայացման գործընթացում բնակչության ազդեցության ընդլայնման նպատակով ծրագրի իրականացման համար նախատեսվել էր 65 537 900 ՀՀ դրամ։

Ներկայացված 17 հայտ-առաջարկներից քվեարկության արդյունքներով հաղթող են ճանաչվել հետևյալ ծրագրերը՝

• «Իջևան քաղաքի Մետաղագործների թաղամասի կոյուղու կառուցում» նախագիծը,
• «Ազատամուտ բնակավայրի մշակույթի տան մեծ դահլիճի վերածնունդ» նախագիծը,
• «Աչաջուր բնակավայրի մարզադաշտի վերանորոգում» նախագիծը։

Բերդ համայնքում հաղթող է ճանաչվել առավելագույն ձայներ ստացած «Քաղաքային հրապարակի կառուցում» հայտ-առաջարկը։

Ծրագրի ընդհանուր բյուջեն կազմում է 48 մլն ՀՀ դրամ, որից 38 մլն ՀՀ դրամը՝ ՀՀ կառավարության ներդրումն է, 10 մլն ՀՀ դրամը՝ Բերդի համայնքապետարանի։

«Մասնակցային բյուջետավորում 2026» գործընթացի շրջանակում Նոյեմբերյան համայնքի ավագանին ծրագրային առաջարկների իրականացման համար սահմանել էր 20 000 000 ՀՀ դրամ, իսկ ՀՀ պետական բյուջեով հատկացված սուբվենցիայի չափը կազմում է 38 570 005 ՀՀ դրամ։

Քվեարկության արդյունքներով հաղթող են ճանաչվել՝

• «Կողբ բնակավայրում 11 կմ երկարությամբ փողոցային լուսավորության ցանցի կառուցում» նախագիծը,
• «Բերդավան բնակավայրում ֆուտբոլի դաշտի հիմնանորոգում» նախագիծը։

Դիլիջան համայնքում ներկայացված 3 հայտ-առաջարկներից հաղթող է ճանաչվել «Փոքրիկ հուշաղբյուր Հովք գյուղի դպրոցի մոտ,գյուղի կենտրոնական մասում» ծրագիրը։

Լուսանկարները վերցված են համայնքապետարանների կայք-էջերից։

Կարդացեք նաև՝