Տավուշեցի շնորհալի երեխաներին շարունակեք դիտել ՏավուշTV-ի եթերում

Այս անգամ ձեզ ենք ներկայացնում Էրիկա Խաչատրյանին, ով նվագում է Խաչատուր Ավետիյանի «Անընդհատ շարժում» ստեղծագործությունը։

Ի դեպ՝ Էրիկան համահայկական ու միջազգային մրցույթ-փառատոների դափնեկիր է։ 

Հիշեցնենք, որ Ձեր շնորհալի երեխան ևս կարող է հայտնվել մեր եթերում․ պարզապես ուղարկե՛ք երեխայի հմտությունները ներկայացնող տեսանյութը մեր info@tavushmedia.am հասցեին։ Նախնական ընտրությունն անցնելու դեպքում այն կհայտնվի մեր եթերում, յութուբյան էջում և կայքում։

Հունիսի 29-ին, Տավուշի մարզի Բերդ-Մովսես ավտոճանապարհին՝ տեղանքի առավել վտանգավոր հատվածներում, մարզային փրկարարական վարչության ծառայողների կողմից իրականացվելու են հարկադիր քարաթափման աշխատանքներ։

Աշխատանքներով պայմանավորված ժամը 13։00-ից մինչև 14։00-ն ավտոճանապարհը փակ է լինելու։

«Կյանքն էնքան շուտ փոխվեց, որ չհասկացանք՝ ինչ կատարվեց․․․»

Այգեձորցի Ջուլետիա Սարգսյանը պատմում է իր կյանքի հարուստ փորձի մասին՝ դժվարություններով, փորձություններով, ուրախ ու տխուր ակնթարթներով հանդերձ։

 Մենք «միանում ենք» անկեղծ զրույցին՝ Տավուշ Մեդիայի թղթակից Անահիտ Մակյանի տեսանյութով:

Այս տարվա մայիսի 18-ին Հայ Առաքելական եկեղեցին նշել է Համբարձման տոնը: Այգեձորի Մշակույթի տան նախաձեռնությամբ, հավատարիմ մնալով ավանդույթներին նշել են Համբարձման տոնը` մասնակից դարձնելով գյուղի փոքրերին ու մեծահասակներին: 

Այգեձորում Համբարձման տոնախմբության մասին Տավուշ Մեդիայի թղթակից Անահիտ Մակյանի տեսանյութում:

Մեր եթերում կրկին խոսք ու զրույցի ժամ էր, իսկ տաղավարում մեզ հետ էր Բերդ խոշորացված համայնքի ղեկավար Աստղիկ Հակոբյանը։

Սոցիալական աշխատանքի ոլորտից՝ քաղաքականություն, ընտանիքից՝ հանրային գործունեություն․ տիկին Հակոբյանի հետ խոսել ենք իր կյանքի ճանապարհի կարևոր որոշումների, արժեքներից ծնվող գործունեության, և, իհարկե, Տավուշը սիրելու մասին։ 

Մեր հյուրն ընդգծում է՝ ցանկացած իրավիճակում լավատեսությունն է լուծումներ փնտրելու իր շարժիչ ուժը․ «Ուզում եմ լավ բան անել․ այդ լավ բանի միտումն է, որ մղում է ինձ ցանկացած ասպարեզում նույն տեղում չմնալ»։

Մաղթում ենք ձեզ բարի դիտում և հրավիրում՝ գրելու մեկնաբանություններում, թե հաջորդիվ ում կցանկանայիք տեսնել Տավուշ ՀԸ տաղավարում։

Տավուշի մարզի Բերդ քաղաքում մեկ օրում անվճար հետազոտվել են ավելի քան 450 տավուշցիներ։

Մայիսի 27-ին ՈՒԱԿ-ի և գործընկեր այլ ԲԿ-ների մասնագետները Բերդում էին: Մեկ օրում 10-ից ավելի մասնագետներ հետազոտեցին և նեղ մասնագիտական խորհրդատվություններ տրամադրեցին Բերդի և հարակից տարածքների բնակիչներին:

Անցկացվեցին կրծքագեղձի, վահանաձև գեղձի, որովայնի օրգանների և փոքր կոնքի սոնոգրաֆիկ, ինչպես նաև դուպլեքս հետազոտություններ:

Հետամուտ լինելով երկրի քաղաքացիների կանոնավոր հետազոտվելուն և հաշվի առնելով որոշ բնակիչների՝ մայրաքաղաք գալու բարդությունները՝ ՈՒԱԿ-ը պարբերաբար կազմակերպում է անվճար հետազոտություններ հատկապես սահմանամերձ մարզերում։

Կենտրոնի կողմից անցկացվող ակցիաները պարբերաբար են:

Հայ օգնության ֆոնդի նախաձեռնությամբ անցկացվել է միջկրթօջախային սպորտային մրցաշար՝ Բերդ համայնքի 16 միջնակարգ և ավագ դպրոցների 10-12-րդ դասարանների շուրջ 80 աշակերտի մասնակցությամբ՝ նվիրված Մարդիգյան ընտանիքին։

Մարդիգյան սպորտային խաղերը Բերդի տարածաշրջանում իրականացվում են արդեն երրորդ անգամ: Մրցումների նպատակն է ձևավորել առողջ ապրելակերպ երիտասարդների շրջանում, արդար մրցակցային մթնոլորտ դպրոցականների միջև, ինչպես նաև նոր կապեր և ընկերություն, թիմային աշխատանք ու թիմային պատկանելություն:

Աշակերտներն իրենց ուժերը փորձել են 5 մարզաձևում`
Հեռացատկ (աղջիկներ)
Սեղմումներ մարմնամարզական նստարանից (աղջիկներ)
Ձգումներ պտտաձողից (տղաներ)
Կշռաքարի բարձրացում (տղաներ)
Հրաձգություն (տղաներ և աղջիկներ)

Թիմային հաշվարկով առաջին պատվավոր հորիզոնականը զբաղեցրել է Արծվաբերդի միջնակարգ դպրոցը, երկրորդ և երրորդ հորիզոնականները` Բերդի ավագ և Այգեձորի միջնակարգ դպրոցները:

Լավագույն 3 տեղերը զբաղեցրած աշակերտները պարգևատրվել են մեդալներով, պատվոգրերով, նվերներով, մրցավարները` շնորհակալագրերով և նվերներով: Բերդի ավագ դպրոցն արժանացել է շնորհակալագրի` համագործակցելու և սպորտային խաղերի կազմակերպմանն աջակցելու համար:

Բերդ համայնքի բնակավայրերում շարունակվում են ներբնակավայրային ճանապարհների բարեկարգման, խմելու ջրագծերի ընթացիկ վերանորոգման աշխատանքները:

Բերդում
Իրականացվում են երկրորդային(թաղամասային) ճանապարհների բարեկարգման՝ հարթեցման և խճապատման աշխատանքներ:

Պառավաքարում
Իրականացվել են խմելու ջրագծի ընթացիկ վերանորոգման աշխատանքներ:

Վարագավանում
Իրականացվել են ոռոգման ջրագծի ընթացիկ վերանորոգման աշխատանքներ:
_______
Աշխատանքներն իրականացրել է «Բերդի կոմունալ ծառայություն» ՀՈԱԿ-ը(Վարագավանում՝ «Տավուշ» ՋՕԸ-ի հետ համագործակցությամբ):

Դրա հետ մեկտեղ ՀՀ Կառավարության սուբվենցիոն ծրագրով և Դիլիջանի համայնքապետարանի համաֆինանսավորմամբ Հաղարծին գյուղական բնակավայրում մեկնարկել է բնակավայրի 2-րդ, 7-րդ և 10-րդ փողոցների հիմնանորոգման նախագիծը:

Վերականգնվող տեղամասի ընդհանուր երկարությունը 1,5 կմ է: Նախատեսվում է տուֆապատել ճանապարհը: Այս պահին իրականացվում են հողահարթեցման աշխատանքներ, որից հետո կմեկնարկեն սալարկման աշխատանքները:

Աշխատանքները կավարտվեն մինչև 2023 թվականի նոյեմբերը: Առավել մանրամասն տեղեկատվություն կհրապարակենք ավելի ուշ: