Ժողովրդական պոեզիա ու մեղեդի՝ մեր եթերում։ «Աշնան գիշեր»․ կարդում է Հրանտ Ղազումյանը։ Տեսանյութում կանաչ Դիլիջանն է։

ԱՇՆԱՆ ԳԻՇԵՐ

Էս գիշեր, աշնան գիշեր
Շաղն իջեր` զգետին նախշեր,
Առնոսա նախշուն հավքեր
Խեթ յարիս քուն են մըտեր:

Իմ յարոջ կապա կարեք
Արևից երեսն արեք
Լուսնակից աստառ ձևեք
Աստղերից կոճակ շարեք․․․



Դիլիջանը և սևակյան տողերը՝ մեկ տեսանյութում։ Պարույր Սևակ․ «Երբ աչքերն են սառում»․ կարդում է Հրանտ Ղազումյանը։

ԵՐԲ ԱՉՔԵՐՆ ԵՆ ՍԱՌՈՒՄ

…Երբ աչքերն են սառում՝
Ասում են, թե՝ ա՛յ-ա՛յ՝ մարդ է գալու:
Բայց դա եթե սուտ չէ,
Ապա բարություն է,
Որ ծնվել է միայն խեղճությունից:
Իմոնք էլ են սառում:
Սակայն դու չե՜ս գալու:
Դու չե՜ս կարող: Գիտե՜մ:
Եվ օդը սենյակիս
Պիտի շարունակի մենակություն բառից անվերջ դողալ՝
Հարուցելով իմ մեջ այն միտքը հին,
Թե վիհերը գուցե նրա համար են լոկ,
Որ մարդ ներքև նետվի:

Իսկ թե վիհերն իրոք նրա համար են լոկ,
Որ մարդ ներքև նետվի՝
Այդ դեպքում ես
Ինչպե՞ս անեմ.
Կո՛ւժ չեմ,
Կուժկոտրո՜ւկ եմ.
Չե՛մ կոտըրվում, միայն փետըրվո՜ւմ եմ,
Եվ դրանից արդեն ես հոգնել եմ,
Ինչպես թուղթն է հոգնել իմ ջանքերից՝
Հեռվից-հեռու ասել քեզ երկու բառ,
Որ կարող է նո՛ւյնքան ինձ թարգմանել,
Որքան թարգմանում է ինքնաթիռին հավը…

Սուտ կա, որ ճիշտ արժե:
Ու ես հավատում եմ մեր հնարած ստին,
Թե չենք կորցնի իրար:

Վախ կա, որ մահ արժե:
Ու ես վախենում եմ, թե կհաղթի կյանքը,
Եվ կմնամ ցավի խեղճ պատմաբան միայն:

Ու, վերջապես, քայլ կա, որ հենց թռիչք արժե:
Եվ ինձ դուրս եմ քաշում իմ մտքերի միջից,
Ինչպես առողջ ակռան բերանից են քաշում:

Բայց հոգնել եմ արդեն
Եվ հոգնել եմ այնքան,
Որ չեմ զգում ոչի՜նչ,
Ցա՛վ չեմ զգում անգամ:

Ա՜յ թե հնար լիներ չզգալ նաև,
Որ աչքերն են մարդու ամենաթաց տեղը…



Դիլիջանի մանկական գեղարվեստի դպրոցն ամփոփեց անցնող ուսումնական տարին. հուլիսի 4-ին Դիլիջանի մշակույթի պալատում կայացավ 2021-2022 ուսումնական տարվա դպրոցի հաշվետու համերգը:

Դիլիջանի Հովհաննես Շարամբեյանի անվան մանկական գեղարվեստի դպրոցը վերջին տարիներին ընդլայնել է իր գործունեությունը, լայնորեն ընդգրկելով Դիլիջան խոշորացված համայնքի գյուղական բնակավայրերը: Գյուղական բնակավայրերում ստեղծված խմբակներում ընդգրկված են շուրջ 120 դպրոցականներ:



Հուլիսի 10-ին Դիլիջանում մեկնարկեց «Գործընկերություն հանուն Հայաստանում գյուղական բարգավաճման»՝ «LEADER» / Համայնքի կողմից առաջնորդվող տեղական զարգացման մեթոդաբանությամբ միջազգային միջոցառումը, որը կազմակերպվել է ԵՄ ֆինանսավորմամբ իրականացվող «Տեղական դերակատարների զորեղացում հանուն զարգացման Լոռու և Տավուշի մարզերում» ծրագրի շրջանակներում՝ ՀՀ էկոնոմիկայի ու տարածքային կառավարման և ենթակառուցվածքների նախարարությունների հետ համագործակցությամբ։

Միջոցառմանը մասնակցում էին ծրագրի շրջանակում ձևավորված նորաստեղծ «Տեղական ակտիվ խմբերը»՝ ներկայացնելով իրենց տեղական արտադրանքը։

Միջոցառման նպատակն է գործընկերության համաձայնագրի ստորագրությամբ պաշտոնապես ազդարարել հինգ նորաստեղծ Տեղական ակտիվ խմբերի մասին ՝ «Տաշիր +», «Լոռվա Ձոր», «ԳանՁոր», «Աղստևի հովիտ» և «Ծիլի Ծով», որոնք ստեղծվել են ԵՄ «Տեղական դերակատարների զորեղացում հանուն զարգացման Լոռու և Տավուշի մարզերում» ծրագրի շրջանակներում՝ «LEADER» / Համայնքի կողմից առաջնորդվող տեղական զարգացման մեթոդաբանության հիման վրա, հետևելով տարածքային ներառական զարգացման սկզբունքին և տեղական հանրային ու մասնավոր հատվածի և քաղ․ հասարակության ներկայացուցիչների գործընկերությամբ։

Միջոցառումը նաև հարթակ էր դոնորների, միջազգային և ազգային գործընկերների, «LEADER» գյուղական զարգացման մեթոդաբանության գծով ԵՄ և տեղական փորձագետների ու ծրագիրն իրականացնող գործընկերների համար՝ ծրագրի առաջընթացի և հաջորդող քայլերի ներկայացման, պանելային քննարկումների, փորձի փոխանակման, կապերի հաստատման և շփումների համար։



Ձյունոտ Տավուշը և սահյանական պոեզիան։ Համո Սահյան․ «Ի՞նչ անեմ, մայրիկ»․ կարդում է Հրանտ Ղազումյանը։ Կադրերը M4 միջպետական մայրուղու Դիլիջան-Իջևան հատվածից են։

Ի՞ՆՉ ԱՆԵՄ, ՄԱՅՐԻԿ

Մայրիկ, ինձ հաճախ
Ապտակում էիր
Սխալիս համար
Եվ սաստում էիր,
Որ լաց չլինեմ։
Բայց ցաված տեղըս
Համբուրում էիր
Եվ իմ փոխարեն
Ինձանից թաքուն
Լաց էիր լինում:
Ախ, վերջին անգամ,
Չեմ իմանում ո՞ր
Սխալիս համար
Ինձ ապտակեցիր
Կորուստով քո մեծ…
էլ սաստող չեղավ,
Որ լաց չլինեմ,
Եվ ցաված տեղըս
Համբուրող չեղավ,
Եվ իմ փոխարեն
Իմ ցավն զգացող
Ու լացող չեղավ։
Ի՞նչ անեմ, մայրիկ:

Կենսատու գարնան շնչով՝ Տավուշից։ Համո Սահյան․ «Գնամ մխրճվեմ խորքերն անտառի»․ կարդում է Հրանտ Ղազումյանը։ Տեսանյութում երևում են Գանձաքարի ու Դիլիջանի կողմերի սարերը։

Գնամ մխրճվեմ խորքերն անտառի,
Մոլորվեմ մեռնող տերևների մեջ,
Գլուխս դնեմ մամռած մի քարի,
Մի պահ մոռանամ աղաղակ ու վեճ:
Բույն տամ սրտիս մեջ բույն փնտրող հավքին,
Ննջած անտառի ականջը դառնամ,
Շնչառությունը լսեմ մեղմագին
Տերևների տակ խոր քնած գարնան:

Հրանտ Ղազումյանի հեղինակային ստեղծագործությունը՝ Տավուշի բարբառով։ Կարդում է հեղինակը։ Տեսանյութի կադրերում Դիլիջանն է։

ԼԵՄ, ԼԵՍ, ԼՅՑՎԵՆՔ
Որ մնեմին խռովըմ ես,
Հաշվի սիրտըս խրովըմ ես,
Ինձ ռյաստվիլիս դժգոհըմ ես,
Հաշվի սիրտըս պլոկըմ ես։

Մնեմին էլ լյաջու ընգյած,
Որ ուրիշին լեն ժխտըմ ես
Անդեր սրտիս պյաց լած յարեն
Մի պյուռ աղով ըղաղըմ ես։

Մի օր տյու լի ես,
Ես լեմ տյու,
Համա էդ վախտ կլխի կընգնյես տյու,
Թե ինչ ա զգըմ անդեր սիրտըս,
Թե որդի ա ուշք ու միտքս․․․

Լեմ, լես, լցվենք, տյառնանք,
Լի, որ լիսնյակով լիանանք,
Լի որ լիլըս ես մոռանամ,
Լի, որ ռանգռուշովդ հիանամ։

Դիլիջանի նախկին կարի ֆաբրիկան և դրա հարակից տարածքը կվերածվի ժամանակակից և բազմաֆունկցիոնալ տարածքի, որը կծառայի որպես փոքր բիզնեսի և համայնքի բնակիչների գործունեության հարթակ։ Ծրագիրն ուղղված է նաև ստեղծարար արդյուանբերության զարգացմանը համայնքային և մարզային ազգաբնակչության ակտիվ ներգրավմամբ և մասնակցությամբ։

«Դիլիջանում և հարակից համայնքներում մասնավոր ոլորտի կողմից ուղղորդվող տնտեսական աճի խթանում» ծրագրի մեկնարկի հանդիսավոր արարողությունը տեղի ունեցավ հունիսի 7-ին, Դիլիջանի համայնքապետարանում:

Ծրագրի շրջանակներում նախատեսվում է հիմնադրել բիզնեսի աջկացման և ստեղծարար արդյունաբերության կենտրոններ, սպասարկման ոլորտի աջակցման ասոցիացիա, ինչպես նաև նպաստել համայնքում գործող զբաղվածության կենտրոնի ընդլյանմանը:

Եվրոպական միության կողմից համաֆինանսավորվող (1 մլն Եվրո) ծրագիրն իրականացվում է Դիլիջան համայնքի կողմից՝ IDeA բարեգործական հիմնադրամի (համաֆինանսավորող), Տուրիզմի և քաղաքաշինության հիմնադրամի և Դիլիջանի համայնքային կենտրոնի հետ գործընկերությամբ: Ծրագիրն իրականացվում է ԵՄ՝ «Համայնքի ղեկավարներ՝ հանուն տնտեսական զարգացման» տարածաշրջանային նախաձեռնության շրջանակում:

Դիլիջանի թիվ 1 մանկապարտեզը նոր խաղահրապարակ ունի. հունիսի 1-ին` երեխաների իրավունքների պաշտպանության միջազգային օրը, Դիլիջանի թիվ 1 մանկապարտեզում կայացավ խաղահրապարակի բացման արարողությունը:

Ծրագիրը կյանքի է կոչվել «Ֆոքըս օն Չիլդրեն Նաու» բարեգործական կազմակերպության և Դիլիջանի համայնքապետարանի համագործակցության շնորհիվ։ Խաղահրապարակի տեղադրման ծրագրին աջակցել է նաև Դիլիջանի համայնքապետարանը՝ ծրագրի ընդհանուր արժեքի 10 %-ի չափով, որը վճարվել է համայնքային բյուջեից:

Մանկապարտեզի սաները օրվա խորհրդին համահունչ և խաղահրապարակի բացմանն ընդառաջ պատրաստել էին գեղեցիկ միջոցառում:

«Ֆոքըս օն Չիլդրեն Նաու» բարեգործական կազմակերպությունը տարիներ շարունակ զբաղվում է ՀՀ և Արցախի մանկապարտեզների կահավորմամբ,նախակրթարանի առողջ սննդի ապահովմամբ և խաղահրապարակների կառուցմամաբ: Նմանատիպ խաղահրապարակներ կառուցվել են նաև Տավուշի մարզի մի շարք այլ համայնքներում:

Մեր տաղավարում այս անգամ քննարկումը Տավուշի մարզում ֆիզիկական դաստիարակության և սպորտի մասին է՝ ոլորտում մեր հաջողությունների և խնդիրների մասին։ Քննարկման հյուրերն են Պրոֆեսիոնալ ԱրմՖայթինգ ֆեդերացիայի Բերդի մասնաճյուղի մարզիչ Համլետ Աթոյանը, «Դիլիջան ՋԻՄ» մարզական ակումբի հիմնադիր Գարիկ Թովմասյանը, «Ուտիք» ֆուտբոլային ակումբի գլխավոր մարզիչ Վահե Խաչատրյանը և «ՏաՈւժ Իջևան» դպրոցի մարզիչ Մհեր Պետրոսյանը։