Մարտի 8-ին, ժամը 21։11-ին Տավուշի մարզային օպերատիվ կառավարման կենտրոն ահազանգ է ստացվել, որ Դիլիջան-Իջևան ավտոճանապարհին տեղի է ունեցել ՃՏՊ՝ բախվել են ավտոմեքենաներ, կան տուժածներ․ անհրաժեշտ է փրկարարների օգնությունը։ 

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։ 

Պարզվել է, որ Դիլիջան-Իջևան ավտոճանապարհի 4-րդ կմ-ին բախվել են «Toyota» և «VAZ» մակնիշների ավտոմեքենաները։ 

«VAZ» մակնիշի ավտոմեքենայի վարորդը տեղափոխվել է բժշկական կենտրոն: 

Փրկարարները հոսանքազրկել են «Toyota» մակնիշի ավտոմեքենան և սահմանազատել տարածքը։

Տավուշի մարզի համայնքներում ամփոփվել են «Մասնակցային բյուջետավորում 2026թ.» ծրագրի շրջանակում քաղաքացիների կողմից ներկայացված հայտ-առաջարկների քվեարկության արդյունքները։

Մասնակցային բյուջետավորման գործընթացը քաղաքացիներին հնարավորություն է տալիս անմիջականորեն մասնակցել համայնքային բյուջեի մի մասի բաշխմանը և իրենց համայնքի զարգացմանը վերաբերող որոշումների կայացմանը՝ ձևավորելով ավելի պատասխանատու և ներառական տեղական ինքնակառավարում։

Իջևան համայնքում մասնակցային կառավարման մակարդակի բարձրացման և որոշումների կայացման գործընթացում բնակչության ազդեցության ընդլայնման նպատակով ծրագրի իրականացման համար նախատեսվել էր 65 537 900 ՀՀ դրամ։

Ներկայացված 17 հայտ-առաջարկներից քվեարկության արդյունքներով հաղթող են ճանաչվել հետևյալ ծրագրերը՝

• «Իջևան քաղաքի Մետաղագործների թաղամասի կոյուղու կառուցում» նախագիծը,
• «Ազատամուտ բնակավայրի մշակույթի տան մեծ դահլիճի վերածնունդ» նախագիծը,
• «Աչաջուր բնակավայրի մարզադաշտի վերանորոգում» նախագիծը։

Բերդ համայնքում հաղթող է ճանաչվել առավելագույն ձայներ ստացած «Քաղաքային հրապարակի կառուցում» հայտ-առաջարկը։

Ծրագրի ընդհանուր բյուջեն կազմում է 48 մլն ՀՀ դրամ, որից 38 մլն ՀՀ դրամը՝ ՀՀ կառավարության ներդրումն է, 10 մլն ՀՀ դրամը՝ Բերդի համայնքապետարանի։

«Մասնակցային բյուջետավորում 2026» գործընթացի շրջանակում Նոյեմբերյան համայնքի ավագանին ծրագրային առաջարկների իրականացման համար սահմանել էր 20 000 000 ՀՀ դրամ, իսկ ՀՀ պետական բյուջեով հատկացված սուբվենցիայի չափը կազմում է 38 570 005 ՀՀ դրամ։

Քվեարկության արդյունքներով հաղթող են ճանաչվել՝

• «Կողբ բնակավայրում 11 կմ երկարությամբ փողոցային լուսավորության ցանցի կառուցում» նախագիծը,
• «Բերդավան բնակավայրում ֆուտբոլի դաշտի հիմնանորոգում» նախագիծը։

Դիլիջան համայնքում ներկայացված 3 հայտ-առաջարկներից հաղթող է ճանաչվել «Փոքրիկ հուշաղբյուր Հովք գյուղի դպրոցի մոտ,գյուղի կենտրոնական մասում» ծրագիրը։

Լուսանկարները վերցված են համայնքապետարանների կայք-էջերից։

Կարդացեք նաև՝

Այս տարի լրանում է հայ ժողովրդական մշակույթի պահպանման և զարգացման գործում անգնահատելի ավանդ ունեցած, մշակութային գործիչ Հովհաննես Շարամբեյանի ծննդյան 100-ամյակը։ Հոբելյանական միջոցառումների մեկնարկը վարպետի սիրելի Դիլիջանում էր՝ իր հիմնադրած գեղարվեստի դպրոցում։  Թեպետ նա ծնունդով Դիլիջանից չէր, սակայն կյանքի մի կարևոր շրջափուլ կապվեց հենց քաղաքի հետ։ Առողջական խնդիրների պատճառով տեղափոխվելով այստեղ՝ Շարամբեյանը սիրահարվեց Դիլիջանին,  քաղաքը դարձավ նրա ստեղծագործական ներշնչանքի աղբյուրը։ Դիլիջանցիները Հովհաննես Շարամբեյանին մտերմիկ ու բարեկամաբար Վանիկ էին ասում։

Միջոցառումը նվիրված էր նրա բազմակողմանի գործունեությանը՝ ժողովրդական արվեստի պահպանությունից մինչև թանգարանային գործի զարգացում։ Շարամբեյանի գործունեության առանցքում եղել է ազգային ինքնության պահպանումը՝ մշակույթի լեզվով։

Միջոցառման ընթացքում ներկայացվեցին նրա կյանքի ու գործունեության մասին հետաքրքիր և ուսանելի դրվագներ, ցուցադրվեցին արխիվային լուսանկարներ և տեսանյութեր, շուրջ բոլորը վարպետի հիմնադրած դպրոցի աշակերտների ստեղծագործություններն էին։  Այսօր Դիլիջանի Հովհաննես Շարամբեյանի անվան մանկական գեղարվեստի դպրոցում շուրջ 500 երեխաներ են սովորում։

Դիլիջանում նրա մասին խոսելիս առաջին հերթին հիշում են մարդուն՝ Վանիկին, ով այստեղ գտավ իր երկրորդ տունն ու ինքնամոռաց նվիրվեց քաղաքին։ Մահվանից տասնյակ տարիներ անց էլ նրա անունը շարունակում է հնչել մշակութային շրջանակներում, նաև քաղաքի առօրյայում՝ որպես նվիրվածության, ազգային ինքնության և արվեստին ծառայելու օրինակ։

Տավուշ հեռուստաընկերության եթերը մերթընդմերթ ընդմիջվում և զարդարվում են Հովհաննես Շարամբեյանի արվեստի գործերի ներկայացմամբ։ Մշակութային ժառանգության հանրահռչակման նպատակով մեր եթերում էլ ավելի հաճախ ցուցադրվում են ժողովրդական արվեստի գործերը՝ «կենդանացած», նոր շնչով ու խոսքով։

Դիտեք նաև՝

Հայաստանի Հանրապետության գլխավոր դատախազ Աննա Վարդապետյանի գլխավորությամբ 2026 թվականի փետրվարի 14-ին ամփոփվել են Տավուշի մարզի դատախազության 2025 թվականի աշխատանքները:

Ամփոփմանը ներկա են եղել ՀՀ գլխավոր դատախազի տեղակալ Եղիազար Ավագյանը, Տավուշի մարզպետ Հայկ Ղալումյանը, Տավուշի մարզի դատախազ Գևորգ Սարգսյանը, Դատախազության գլխավոր քարտուղար Մհեր Ափրիկյանը, Ներքին գործերի նախարարության, Ազգային անվտանգության ծառայության, Քննչական կոմիտեի մարզային կառույցների ղեկավարները, մարզի դատախազության դատախազները, այլք:

Գևորգ Սարգսյանը, ներկայացնելով Տավուշի մարզի դատախազության 2025 թվականի աշխատանքների զեկուցագիրը, նշել է, որ 2025 թվականին նախաձեռնվել է 2095 քրեական վարույթ (2024 թվականին՝ 2048 քրեական վարույթ):

Հաշվետու ժամանակահատվածում դատախազների կողմից հաստատված մեղադրական եզրակացությամբ դատարան է հանձնվել 431 քրեական վարույթ՝ 464 անձի վերաբերյալ (2024 թվականին՝ 348 քրեական վարույթ՝ 363 անձի վերաբերյալ):

Դատարաններում ավարտվել է 349 քրեական գործ՝ 359 անձի վերաբերյալ (2024 թվականին՝ 382 քրեական գործ՝ 408 անձի վերաբերյալ):

Քրեական վարույթներով պետությանը պատճառված վնասից վերականգնվել է 54 միլիոն 986 հազար դրամը:

Անդրադառնալով պետական (համայնքային) շահերի պաշտպանության ոլորտում իրականացված աշխատանքներին՝ Տավուշի մարզի դատախազը տեղեկացրել է, որ 2025 թվականի ընթացքում Իջևան և Դիլիջան համայնքներին է վերադարձվել ընդհանուր 162 միլիոն 345 հազար դրամ արժեքով 4 անշարժ գույք:

Մասնավորապես՝

• Դիլիջան համայնքին է վերադարձվել Դիլիջան համայնքի Շահումյան փողոցի թիվ 34 հասցեում գտնվող՝ 891.1 քմ մակերեսով մանկապարտեզի չօգտագործվող մասնաշենքը: Շուկայականին մոտարկված կադաստրային արժեքը՝ 85 միլիոն 935 հազար դրամ:
• Դիլիջան համայնքին է վերադարձվել Դիլիջանի Օրջոնիկիձե փողոցի 63/2 հասցեում գտնվող՝ 1163.3 քմ մակերեսով մանկապարտեզի շենքի մի մասը՝ 286.5 քմ մակերեսով: Շուկայականին մոտարկված կադաստրային արժեքը՝ 30 միլիոն 838 հազար դրամ:
• Իջևան համայնքի տիրապետմանն է վերադարձվել Իջևանի Խաշթառակ բնակավայրի 9 փողոցի 11 հասցեում գտնվող՝ 198.45 քմ մակերեսով համայնքի մանկապարտեզի մասնաշենքը: Շուկայականին մոտարկված կադաստրային արժեքը՝ 44 միլիոն 121 հազար դրամ:
• Իջևան համայնքին է վերադարձվել Իջևանի Սպանդարյան փողոց 1/91 հասցեում (շատրվաններին կից) գտնվող՝ 03265 հա մակերեսով հողամասը: Շուկայականին մոտարկված կադաստրային արժեքը՝ 1 միլիոն 450 հազար դրամ:

Աննա Վարդապետյանը Տավուշի մարզի դատախազին և դատախազության դատախազներին տվել է մի շարք հանձնարարականներ` ուղղված պետական և համայնքային շահերի պաշտպանությանը, մարզում հանցագործությունների՝ այդ թվում անչափահասների շրջանում, կանխարգելմանն ու բացահայտմանը:

Համայնքներում առկա խնդիրները երբեմն տեսանելի են բոլորին, սակայն դրանց համակարգված վերլուծությունն ու առաջնահերթությունների հստակ սահմանումը հաճախ բացակայում են։ Այս նպատակով Տավուշի մարզում «Քաղաքացիական երիտասարդական կենտրոն» հասարակական կազմակերպությունը կազմակերպել էր աշխատաժողով, որը համախմբել էր մարզի մի շարք համայնքների ներկայացուցիչների։

Աշխատաժողովին մասնակցում էին նաև Եվրոպական միության դիտորդական առաքելություն Հայաստանում ներկայացուցիչները, ովքեր ներկայացրին առաքելության մանդատը և գործունեության հիմնական ուղղությունները։ Աշխատաժողովի ընթացքում մասնակիցները յուրաքանչյուրն իր համայնքի օրինակով իրականացրին խնդիրների քարտեզագրում՝ առանձնացնելով սոցիալական, ենթակառուցվածքային և հատկապես անվտանգության ու խաղաղաշինական ոլորտներում առկա մարտահրավերները։ Խմբային քննարկումների արդյունքում սահմանվեցին առաջնահերթությունները և վերհանվեցին այն խնդիրները, որոնք համայնքներում պահանջում են հրատապ լուծում։

Քննարկումների մասնակիցները կարևորեցին նաև կանանց ներգրավվածությունը անվտանգային գործընթացներում՝ ընդգծելով, որ համայնքային զարգացման և կայունության ապահովման գործում նրանց մասնակցությունը պետք է լինի հետևողական և համակարգված։

Տեղական խնդիրների լուծումը սկսվում է հենց համայնքներից՝ մարդկանց ակտիվ մասնակցությունից, պատասխանատվության զգացումից և համատեղ աշխատանքի պատրաստակամությունից։

Փետրվարի 9-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Դիլիջան քաղաքում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12:00–ին գործարկվելու է էլեկտրական շչակ։

Խնդրում ենք չանհանգստանալ։ 

Հովհաննես Շարամբեյանի անվան ժողովրդական արվեստների թանգարանի Դիլիջանի մասնաճյուղը հանդես է գալիս նոր հայեցակարգով՝ որպես Հայկական գործվածքի թանգարան՝ ներկայացնելով հայկական գեղարվեստական գործվածքի բազմադարյա ավանդույթներն ու դրանց շարունակական զարգացումը։

Վերականգնման աշխատանքների ավարտից հետո, փետրվարի 7-ին տեղի է ունեցել թանգարանի պաշտոնական վերաբացումը, որը նշանավորվել է Հայաստանում առաջին գործվածքի թանգարանի գործունեության ազդարարմամբ։ Միջոցառմանը ներկա են եղել ԿԳՄՍ նախարարը, նախարարության, ՏԻՄ ներկայացուցիչներ, Հովհաննես Շարամբեյանի ընտանիքի անդամներ, այդ թվում՝ թոռը՝ Նարեկ Վան Աշուղաթոյանը:

Թանգարանի շենքը վերականգնվել է ՀՀ կրթության, գիտության, մշակույթի և սպորտի նախարարության միջոցներով: Մինչ հիմնանորոգման աշխատանքները պատմության և մշակույթի անշարժ հուշարձանների պետական ցուցակում ընդգրկված թանգարանի շենքը վթարային վիճակում էր։

Հայկական գործվածքի թանգարանը ներկայացնում է գորգն ու կարպետը, ասեղնագործությունը, ժանյակը՝ տարբեր դպրոցներով, տեխնիկաներով, զարգացման փուլերով և կիրառական ձևերով։ Բացի ժողովրդական արվեստների թանգարանի նմուշներից, վերաբացված թանգարանում ցուցադրվում են Հայաստանի պատմության թանգարանի և «Պատմամշակութային արգելոց-թանգարանների և պատմական միջավայրի պահպանության ծառայության» նմուշներ:

Նոր ցուցադրությունում առանձնահատուկ տեղ է հատկացված Հովհաննես Շարամբեյանի դիլիջանյան թեմատիկ գեղանկարներին, որոնք հանդես են գալիս որպես գեղարվեստական վավերագրեր՝ պահպանելով քաղաքի պատմական միջավայրն ու կոլորիտը։

Հայկական գործվածքի թանգարանը նախատեսում է դառնալ ոչ միայն ցուցադրական տարածք, այլև կենդանի մշակութային միջավայր։ Թանգարանի տարածքում կկազմակերպվեն վարպետության դասեր, բացօթյա միջոցառումներ, ցուցահանդես-վաճառքներ՝ ժողովրդական վարպետների մասնակցությամբ, ինչպես նաև ոչ նյութական մշակութային ժառանգության հանրահռչակմանը միտված ավանդական տոներ, ծեսեր, ազգային երգ ու պարի ներկայացումներ։

Կարևոր ուղղություն է նաև կրթական բաղադրիչը․ թանգարանը կհանդիսանա կրթական ռեսուրս դպրոցականների, ուսանողների և լայն հանրության համար՝ նպաստելով մշակութային ժառանգության արժևորմանը։

Նոր մասնագիտացված ցուցադրությունը կխթանի նաև Դիլիջանի զբոսաշրջային գրավչության բարձրացումը։ Վերականգնված շենքի նախագիծը և ցուցադրության հստակ կառուցվածքը հնարավորություն կտան այցելուներին կարճ ժամանակում ամբողջական պատկերացում կազմել հայկական գործվածքի հարուստ ժառանգության մասին։

Հայկական գործվածքի թանգարանը նպատակ ունի դառնալ Դիլիջանի մշակութային ակտիվ կենտրոններից մեկը՝ միավորելով պատմությունը, արվեստը, կրթությունն ու ժամանակակից մշակութային գործընթացները։

Դիլիջանի ժողովրդական արվեստի թանգարանը ստեղծվել է 1979 թվականին՝ վաստակավոր նկարիչ, արվեստի վաստակավոր գործիչ, հայ ժողովրդական մշակույթի հմուտ գիտակ Հովհաննես Շարամբեյանի նախաձեռնությամբ։ Շենքը կառուցել է Սամսոն Բեկ-Հարությունյանը։ Այն եղել է իշխանուհի Մարիամ Թումանյանի ամառանոցը, որը բնակվել է Թիֆլիսում, իսկ ամռան ամիսներն անցկացրել այս շենքում։ Տան վերջին բնակիչը եղել է Հովհաննես Շարամբեյանը, որի նախաձեռնությամբ էլ շենքը վերածվել է Ժողովրդական արվեստի թանգարանի։

Վերականգնումից հետո Դիլիջանի Հովհաննես Շարամբեյանի անվան ժողովրդական արվեստների թանգարանը կներկայանա որպես Հայկական գործվածքի թանգարան

1 ից 9

- +

1.

2.

3.

4.

5.

6.

7.

8.

9.

Փետրվարի 4-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Դիլիջան համայնքի Հովք բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12:00–ին գործարկվելու է էլեկտրական շչակ։

Խնդրում ենք չանհանգստանալ։

Հունվարի 27-ին՝ Հայրենիքի պաշտպանության համար զոհվածների հիշատակի օրվա կապակցությամբ, Տավուշի մարզի համայնքներում տեղի ունեցան հիշատակի և խոնարհման միջոցառումներ։

Իջևանում քաղաքացիները, տեղական ինքնակառավարման մարմինների ներկայացուցիչների մասնակցությամբ, հավաքվել էին «Մայր Հայաստան» հուշահամալիրում, որտեղ մեկ րոպե լռությամբ հարգեցին հայրենիքի պաշտպանության ճանապարհին իրենց կյանքը զոհաբերած հայորդիների հիշատակը, այնուհետև ծաղիկներ խոնարհեցին հուշարձանին։

Դիլիջանում հիշատակի և խոնարհման միջոցառումը կազմակերպվել էր Դիլիջանի համայնքապետարանի նախաձեռնությամբ։ Քաղաքի հուշարձանի հարակից տարածքում քաղաքացիները հարգանքի տուրք մատուցեցին Հայրենիքի համար զոհվածների հիշատակին՝ ծաղիկների խոնարհման արարողությամբ։

Լուսանկարները՝ Դիլիջանի համայնքապետարանի։

Բերդ համայնքում  տեղական ինքնակառավարման մարմինների ներկայացուցիչները, քաղաքացիները հարգանքի տուրք են մատուցել բոլոր ժամանակներում հայրենիքի պաշտպանության մարտերում նահատակված հայորդիների հիշատակին։

Միջոցառման ընթացքում Բերդի տարածաշրջանի հոգևոր հովիվ Տեր Արամ քահանա Միրզոյանն աղոթք է բարձրացրել նահատակների հոգիների հանգստության համար։

Լուսանկարները՝ Բերդի համայնքապետարանի։

Հիշեցնենք, որ օրերս Ազգային ժողովը երկրորդ ընթերցմամբ և ամբողջությամբ ընդունել է «ՀՀ տոների և հիշատակի օրերի մասին օրենքում լրացում կատարելու» նախագիծը, որով հունվարի 27-ը սահմանվել է որպես հայրենիքի պաշտպանության համար զոհվածների հիշատակի օր։

«Դիլիջան» ազգային պարկը տեղեկացնում է, որ վայրի բնություն բաց թողնված կովկասյան ազնվացեղ եղջերուները կարող են ժամանակ առ ժամանակ հայտնվել բնակավայրերի հարակից տարածքներում կամ նույնիսկ մասնավոր բակերում։ Սա կենդանիների բնական տեղաշարժի և նոր միջավայրին հարմարվելու գործընթացի բնական դրսևորում է։

Մարդու ցանկացած միջամտություն կարող է վտանգ ներկայացնել թե՛ կենդանու, թե՛ մարդու համար։ Այդ իսկ պատճառով քաղաքացիներին կոչ է արվում պահպանել անվտանգության և վարքագծի համապատասխան կանոնները։

Մասնավորապես՝

• չի թույլատրվում մոտենալ եղջերուին կամ փորձել դիպչել նրան,
• արգելվում է կենդանուն կերակրել, քանի որ դա խաթարում է նրա բնական վարքն ու սննդային ռեժիմը,
• պետք է խուսափել բարձր ձայներից, հանկարծակի շարժումներից, ինչպես նաև կենդանուն վախեցնելուց լուսանկարելիս կամ տեսանկարելիս։

Ճանապարհային երթևեկության ընթացքում եղջերու նկատելու դեպքում անհրաժեշտ է նվազեցնել արագությունը և ցուցաբերել առավելագույն զգուշություն՝ ճանապարհատրանսպորտային պատահարներից խուսափելու համար։

Տեղեկացվում է նաև, որ եղջերուների տեղաշարժը վերահսկվում է ռադիոհսկման միջոցով, իսկ կենդանիները գտնվում են պետական պահպանության ներքո։

Եղջերու նկատելու կամ միջադեպի դեպքում խնդրում ենք կապ հաստատել «Դիլիջան» ազգային պարկի հետ հետևյալ հեռախոսահամարներով՝ +374 268 27 171, +374 60 71 71 21

Հիշեցնենք, որ ազնվացեղ եղջերուին վնասելու կամ ոչնչացնելու դեպքում պետությանը պատճառված վնասը գնահատվում է 15 միլիոն դրամ, ինչպես նաև կիրառվում են պատասխանատվության միջոցներ՝ համաձայն ՀՀ Քրեական օրենսգրքի 386-րդ հոդվածի։

«Դիլիջան» ազգային պարկը կոչ է անում ցուցաբերել պատասխանատու վերաբերմունք և աջակցել բնության պահպանմանն ուղղված միջոցառումներին։