Դեկտեմբերի 19-ին, ժամը 20:18-ին Տավուշի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Դիլիջան քաղաքի Շամախյան փողոցում տեղի է ունեցել ՃՏՊ:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:

Պարզվել է, որ «VAZ» մակնիշի ավտոմեքենան դուրս է եկել ճանապարհի երթևեկելի հատվածից և շրջվել:

Փրկարարները հոսանքազրկել են ավտոմեքենան, փակել գազի բալոնի փականը, ուղղել և դուրս բերել ճանապարհի երթևեկելի հատված:

Տավուշի նկարիչների միության նախաձեռնությամբ Դիլիջանի «Ռեստարտ» հյուրանոցում մեկնարկել է «Տավուշը մենք ենք» ցուցադրությունը, որտեղ ներկայացված են 18 արվեստագետների ստեղծագործությունները: Այս անգամ ցուցադրությունը հարմարեցվել է նոր ձևաչափի, որի նպատակն է տարածել արվեստը և բարձրացնել դրա ճանաչելիությունը հանրության շրջանում:

Այս ձևաչափով միջոցառումն արդեն 4-րդն է, որ անցկացվում է Դիլիջանի «Ռեստարտ» հյուրանոցում՝ մաս կազմելով «RestArt» ցուցահանդեսների շարքին: Հյուրանոցն այս կերպ դառնում  է արվեստի ու մշակույթի միջավայր, որտեղ արվեստագետները կարող են ներկայացնել իրենց աշխատանքները, իսկ այցելուները՝ ավելի խորը ընկղմվել արվեստի ու բնության ներդաշնակության մեջ:

«Տավուշը մենք ենք» ցուցադրության մեջ ներկայացված աշխատանքներում մեծ մասամբ տավուշյան բնապատկերներն են՝ ներկայացնելով մարզի բնությունը, մարդկանց ու հետաքրիր անկյունները:

18 արվեստագետների աշխատանքներն այցելուների համար ստեղծում են լավ հնարավորություն՝ գնահատելու տեղական արվեստը և ծանոթանալու Տավուշի բնաշխարհին:

Ավելին՝ մեր տավուշյան ռեպորտաժում։

«Արտակարգ Ալիք» տեղեկատվական հասարակական կազմակերպությունը և Տավուշ Մեդիան՝ Freedom House միջազգային կազմակերպության աջակցությամբ,  իրականացնում են ծրագիր, որի նպատակը Տավուշի մարզում ապատեղեկատվության և կեղծ լուրերի դեմ պայքարն է, մեդիամանիպուլյացիայի կանխարգելումը, մեդիագրագիտության տարածումն ու բարձրացումը, ուսուցողական և խորհրդատվական միասնական տեղեկատվական հարթակի ստեղծումը:

Կեղծ ու սուտ լուրերին դիմակայելը պահանջում է վճռականություն և գիտելիք՝ ճշգրիտ ու վստահելի տեղեկատվական հոսքերի ապահովման համար։ Սա հատկապես կարևոր է Տավուշի մարզի համայնքներում, որտեղ ապատեղեկատվությունը կարող է ապակողմնորոշել բնակչությանը ու առաջացնել բացասական տրամադրություններ, վախ ու անկայունություն։

Նոյեմբերի 18-ին Նոյեմբերյանի համայնքում անցկացվեց հանրային հանդիպում՝ «Մեդիագրագիտություն և ապատեղեկատվության դեմ պայքար» խորագրով։ Հանդիպման ընթացքում հատուկ ուշադրություն դարձվեց մեդիագրագիտության կարևորությանը և դրա հիմնական սկզբունքներին։ Տավուշ Մեդիայի լրագրող Էռնեստ Խանումյանը ներկաներին առաջարկեց քննարկելու մարզում առկա իրական դեպքերը։ Նա ներկայացրեց օրինակներ, որոնք արտահայտիչ կերպով ցույց են տալիս, թե որքան վնասակար կարող են լինել կեղծ լուրերը և ինչ մեխանիզմներով կարելի է կանխարգելել դրանց տարածումը։ Հանդիպման առանցքում էին նաև այն գործիքներն ու մեթոդները, որոնք կարող են օգնել բնակիչներին տարբերակել հավաստի տեղեկությունները կեղծ լուրերից։

Մասնակիցները ակտիվորեն մասնակցեցին հարցուպատասխանին՝  ներկայացնելով Նոյեմբերյանում շրջանառվող ապատեղեկատվության օրինակները։ Դրանք հիմնականում վերաբերում են սահմանային-անվտանգային թեմաներին։  Քննարկվեցին նաև կեղծ լուրերի աղբյուրները, դրանց տարածման հնարավոր դրդապատճառները և դրանց հակազդելու հնարավոր միջոցները։

Սիրելի տավուշեցիներ,

Տավուշի մարզում մեդիագրագիտության մակարդակի գնահատման և բարելավման նպատակով իրականացնում ենք հանրային հարցում․ Ձեր կարծիքը և փորձառությունը չափազանց կարևոր են մեզ համար՝ համայնքներում տեղեկատվական անվտանգության ամրապնդման և ապատեղեկատվության դեմ պայքարի արդյունավետ մեխանիզմներ մշակելու համար։ Խնդրում ենք պատասխանեք նշված հարցերին:

Իսկ հանրային հանդիպումներն իրականացվելու են Տավուշի մարզի բոլոր համայնքներում: Նպատակը նույնն է՝  բարձրացնել Տավուշի բնակչության իրազեկվածությունն ու զարգացնել նրանց կարողությունները՝ դիմակայելու տարատեսակ ապատեղեկատվական վտանգներին։ Մասնակցելու համար դիմեք՝ info@tavushmedia.am հասցեին կամ զանգահարեք 060 460202 հեռախոսահամարով։

Այս հանդիպումն իրականացվել է Freedom House միջազգային կազմակերպության աջակցությամբ։ Այս հոդվածում արտահայտված բովանդակությունը և կարծիքները հեղինակների պատասխանատվությունն են և պարտադիր չէ, որ արտահայտեն Freedom House միջազգային կազմակերպության տեսակետները։

Կարդացեք նաև՝

Նոյեմբերի 3-ին Թումո Դիլիջանում հավաքվել էին անիմացիայի սիրահարների եւ մասնագետների մի խումբ, որոնք համատեղ բացահայտեցին անիմացիայի կախարդական աշխարհը։ Միջոցառումն ընթացավ ստեղծագործական մթնոլորտում՝ համատեղելով քննարկումներ, պրակտիկ աշխատարաններ և անիմացիոն ֆիլմերի ցուցադրություն՝ բոլորին մեկ քայլ մոտեցնելով անիմացիայի արվեստին։

Միջոցառման առանցքային հատվածը Հայկական անիմացիայի զարգացման հեռանկարները թեմայով պանելային քննարկումն էր։ Թեմայի շուրջ զրուցեցին ոլորտի առաջատար մասնագետներ՝ Զաքար Դեմիրճյանը, Նաիրա Մուրադյանը, Արմինե Անդան և Տիգրան Առաքելյանը, ովքեր բացահայտեցին հայկական անիմացիայի առանձնահատկությունները, զարգացումները և ապագայի ուղղությունները։

Քննարկման ընթացքում անդրադարձ կատարվեց նաև մի քանի հաջողված նախագծերի՝ «Սևանիկ», «Թռչող տերևների երգը», «Ամանոր» և «Ֆիրդուս» ֆիլմերի առանձնահատկություններին։ Վեց զուգահեռ աշխատարաններում ոլորտի փորձագետները իրենց գիտելիքները փոխանցեցին բոլորին՝ թե՛ նորեկներին, թե՛ արդեն փորձառու մասնագետներին։ Այստեղ ի վերջո ամեն մեկը կարողացավ ձեռք բերել նոր հմտություններ՝ սկսած շարժվող պատկերներից, մինչև բարձրորակ անիմացիա ստեղծելու ողջ գործընթացը։ Բացի այս, միջոցառման ողջ ընթացքում Թումո Դիլիջանի բոլոր հարկերում ներկայացված էին ուսանողների անիմացիոն աշխատանքները, որոնք զարմացրին մասնակիցներին իրենց ստեղծագործական բովանդակությամբ և նորարարական մոտեցումներով։

Մանրամասները՝ ռեպորտաժում։

«Արտակարգ Ալիք» տեղեկատվական հասարակական կազմակերպությունը և Տավուշ Մեդիան՝ Freedom House միջազգային կազմակերպության աջակցությամբ, միասին իրականացնում են ծրագիր, որի նպատակն է նպատակը Տավուշի մարզում ապատեղեկատվության և կեղծ լուրերի դեմ պայքարն է, մեդիամանիպուլյացիայի կանխարգելումը, մեդիագրագիտության տարածումն ու բարձրացումը, ուսուցողական և խորհրդատվական միասնական տեղեկատվական հարթակի ստեղծումը: Այն կնպաստի Տավուշի մարզում ճշգրիտ, հավաստի, վստահելի տեղեկության տարածմանը՝ նվազեցնելով սուտ ու կեղծ լուրերի բացասական հետևանքները:

Նախագծի շրջանակում նոյեմբերի 8-ին Դիլիջան համայնքում տեղի ունեցավ հանրային հանդիպում «Մեդիագրագիտություն և ապատեղեկատվության դեմ պայքար» թեմայով: Հանդիպումն անցկացրեց Տավուշ Մեդիայի լրագրող Էռնեստ Խանումյանը, ով իր խոսքում շեշտեց մեդիագրագիտության կարևորությունը՝ ներկայացնելով դրա հիմնական սկզբունքները։ Բանախոսը պատմեց նաև Տավուշի մարզում տարածված իրական դեպքերի օրինակներ, որոնք ցույց են տալիս, թե ինչ վնասներ են հասցնում կեղծ տեղեկությունները և ինչպես կարելի է դրանք կանխարգելել։ Դիլիջան համայնքի փորձառությունն օգտագործելով՝ նա բացատրեց, թե ինչպես է մեդիագրագիտությունը պաշտպանում համայնքը՝ ապատեղեկատվության վտանգներից։

Հանդիպումն ավարտվեց հարցուպատասխանով, որի ընթացքում մասնակիցները կիսվեցին Դիլիջան համայնքում տարածված կեղծ լուրերի մասին պատմություններով, ինչն ընդգծեց թեմայի արդիականությունը և կարևորությունը համայնքի համար։

Հանրային հանդիպումներն իրականացվելու են Տավուշի մարզի բոլոր համայնքներում և նպատակ ունեն բարձրացնել Տավուշի բնակչության իրազեկվածությունը և զարգացնել նրանց կարողությունները՝ դիմակայելու տարատեսակ ապատեղեկատվության վտանգներին։

Մասնակցելու համար դիմեք՝ info@tavushmedia.am հասցեին կամ զանգահարեք 060 460202

Այս հանդիպումը իրականացվել է Freedom House միջազգային կազմակերպության աջակցությամբ։ Այս հոդվածում արտահայտված բովանդակությունը և կարծիքները հեղինակների պատասխանատվությունն են և պարտադիր չէ, որ արտահայտեն Freedom House միջազգային կազմակերպության տեսակետները։

«Արտակարգ Ալիք» տեղեկատվական հասարակական կազմակերպության նախաձեռնությամբ Տավուշի մարզում մեկնարկել է հանրային բանախոսությունների շարք, որի նպատակն է բարձրացնել բնակչության իրազեկվածությունն ու դիմակայունությունը հնարավոր արտակարգ իրավիճակների նկատմամբ: Շարքը կրում է «Դիմակայուն Տավուշ. Տավուշի մարզին սպառնացող արտակարգ իրավիճակները, դրանց կանխարգելումն ու կառավարումը» խորագիրը:
Առաջին հանդիպումը տեղի ունեցավ նոյեմբերի 8-ին Դիլիջան համայնքում:

Բանախոսությունը վարեց ճգնաժամային հաղորդակցության և տեղեկատվության կառավարման փորձագետ, լրագրող, փրկարարական ծառայության գեներալ-մայոր, «Արտակարգ Ալիք» տեղեկատվական ՀԿ-ի և Տավուշ Մեդիայի խորհրդի նախագահ Նիկոլայ Գրիգորյանը։ Նա մանրամասնորեն ներկայացրեց Տավուշի մարզին սպառնացող արտակարգ իրավիճակների հիմնական վտանգները՝ ներառյալ բնական և տեխնածին աղետները, և դրանց կանխարգելման ու կառավարման անհրաժեշտ միջոցառումները։

Նիկոլայ Գրիգորյանը շեշտեց համայնքային դիմակայունության ապահովման կարևոր քայլերը՝ առանձնացնելով բնակչության հետ կապի ապահովումը, համախմբվածությունը և գիտելիքի ու հմտությունների զարգացումը: Նա նշեց, որ համայնքների անվտանգությունն ու դիմակայունությունը կառուցվում են ոչ միայն պետական կառույցների, այլ նաև տեղական ինքնակառավարման մարմինների, կրթական և մշակութային հաստատությունների ակտիվ ներգրավմամբ:

Բանախոսության ընթացքում մասնակիցները՝ տեղական ինքնակառավարման մարմինների, համայնքային կառույցների և կրթամշակութային հաստատությունների ներկայացուցիչները, հնարավորություն ունեցան հարցեր տալու և բարձրաձայնելու համայնքում առկա անվտանգային խնդիրները։ Փորձագետը պատասխանեց բնակիչների հարցերին՝ կարևորելով համայնքներում աղետների կանխարգելման և պատրաստվածության ապահովման աշխատանքները։

Այս հանդիպումը մեկնարկային քայլ էր՝ Տավուշի մարզում կազմակերպվող բանախոսությունների շարքում, որը նախատեսվում է շարունակել մարզի մյուս համայնքներում:

Մասնակցելու համար դիմեք՝ info@tavushmedia.am հասցեին կամ զանգահարեք 060 460202

Հոկտեմբերի 30-ին, գիշերվա ժամը 1.15-ին, ոստիկանության Դիլիջանի բաժին է զանգահարել Դիլիջանի Կամոյի փողոցի մի բնակիչ և հայտնել, որ իր ավտոտնակը պայթել է: Մեկնել են բաժնի օպերատիվ խումբը, ոստիկանության Տավուշի մարզային վարչության և Դիլիջանի բաժնի ղեկավարներ ու ծառայողներ:

Ըստ ահազանգող 65-ամյա տղամարդու` կեսգիշերից մոտ 25 րոպե անց իր հարևան 56-ամյա տղամարդը անհայտ պայթուցիչ է նետել իր քարե ավտոտնակ, որտեղ կայանված էր որդուն պատկանող «ՎԱԶ-21010» մակնիշի մեքենան: Ըստ ավտոտնակի տիրոջ` իրենց պատճառվել էր խոշոր չափերի վնաս:
Ոստիկանության Տավուշի մարզային վարչության և Դիլիջանի բաժնի ծառայողների ձեռնարկած օպերատիվ-հետախուզական միջոցառումներով հարևանը հայտնաբերվել, ձերբակալվել և տեղափոխվել է բաժին:
Նույն օրը Դիլիջանի քննչական բաժնում նախաձեռնվել է քրեական վարույթ, 56-ամյա տղամարդը տեղափոխվել է ձերբակալվածների պահման վայր:

Պարզվել է նաև, որ հարևանների միջև հողային հարցի շուրջ ծագած վեճն ունի յոթ տարվա պատմություն: Ու թեև 56-ամյա հարևանը հերքել է իր մասնակցությունը ավտոտնակի պայթեցմանը` օպերատիվ-հետախուզական միջոցառումների և քննչական գործողությունների արդյունքում ձեռք են բերվել հակառակն ապացուցող փաստեր, և նրա նկատմամբ հանրային քրեական հետապնդում հարուցելու միջնորդությունը հսկող դատախազը բավարարել է:

Նույն օրը հարևանին մեղադրանք է առաջադրվել, և քրեական վարույթի շրջանակում նրա բնակության վայրում կատարված խուզարկությամբ հայտնաբերվել են ողորկափող երկու հրացան, մեկ օրինական որսորդական հրացան, որսորդական հրացանի բազմաթիվ փամփուշտ ու պարկուճ, վառոդ, պատրույգ, ինքնաձիգի դատարկ պահունակ, ինքնաձիգի պահունակի լիցքավորիչ, այլ զինամթերք:
56-ամյա տղամարդու նկատմամբ դատարանը խափանման միջոց է կիրառել տնային կալանքը: Դեպքի հանգամանքները նախաքննությամբ պարզվում են:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Մայիսի 26-ին տեղատարափ անձրևից Տավուշի և Լոռու մարզերում Դեբեդ, Աղստև և Տաշիր գետերի վարարումը առաջացրեց մի շարք արտակարգ դեպքեր ու պատահարներ։ Տավուշի մարզային ճգնաժամային կառավարման կենտրոնում բազմաթիվ ահազանգեր էին ստացվել շենք շինություններում, նկուղային տարածքներում ջրալցումների, ջրերի մեջ արգելափակումների վերաբերյալ։ Անհապաղ մեկնարկեցին որոնողափրկարարական և անհետաձգելի վթարավերականգնողական աշխատանքները, որոնցում ներգրավվեցին 324 փրկարարներ։

Մայիսի 26-ի օպերատիվ տեղեկագրի համաձայն աղետի գոտում 4 զոհ կար,  որոնցից մեկը Տավուշի մարզից․ Պտղավան բնակավայրի ֆուտբոլի դաշտի հարևանությամբ գետից դուրս էր բերվել Հաղթանակ գյուղի բնակիչ Ավագ Ավագյանի դին։ Հեղեղումների հետևանքով Տավուշի մարզում փլուզվել է 2 կամուրջ, վնասվել՝ 1-ը, փլուզվել է 3 բնակելի տուն, ջրալցվել՝ 45 տուն, 2 հյուրանոց, 18 հասարակական և այլ նշանակության օբյեկտներ։

Հեղեղումների պատճառով առաջացած արտակարգ իրավիճակի հետևանքով Տավուշի և Լոռու մարզերի մի շարք համայնքներ հայտարարվեցին որպես աղետի գոտի: Աղետի գոտիներում օպերատիվ աշխատանքային խմբերը սկսեցին կազմակերպել բնակչության պաշտպանության անհրաժեշտ հիմնական միջոցառումների իրականացումը:

Դիլիջան համայնքի Հաղարծին բնակավայրում Աղստևի վարարումը 3 տուն փլուզեց, գետի ափամերձ տարածքի տները, շենք-շինությունները ջրալցվեցին, փլուզվեց Մ4 Իջևան-Դիլիջան-Երևան միջպետական ճանապարհի Հաղարծին գյուղի ճանապարհահատվածը։

Հեղեղումները վնասեցին Իջևան քաղաքի Պռոշյան-Ղարագյոզյան փողոցների հատվածի գազատար խողովակը, որն արագորեն վերականգնվեց: Մայիսի 27-ի լույս 28-ի գիշերը վնասվեց Խաշթառակ գյուղի կամրջի հենասյունը և մասնակի փլուզվեց: Անվտանգությունից ելնելով, երթևեկությունը  տվյալ կամրջով դեռ արգելվում է։

Խաշթառակի ու Լուսահովիտի բնակիչները գյուղերից դուրս գալու համար օգտվում են այլընտրանքային-գրունտային ճանապարհից։

Դեբեդ գետի վարարումը վնաս է հասցրել Նոյեմբերյան համայնքի Այրում քաղաքին ու հարակից բնակավայրերին։ Աղետի հետևանքները Նոյեմբերյանում ավելի շատ են՝ փլուզվել է Այրումի կայարանի կամուրջը, որի հետևանքով վնասվել է գազատարը և դադարեցվել գազամատակարարումը, ավերվել են ենթակառուցվածքները, վնասվել հողատարածքները, մարդկանց ավտոմեքենաները։ Ժամերի ընթացքում գետի ջրերը լցվել են տներ, ոչ պիտանի դարձրել մարդկանց գույքը, կենցաղային իրերը` տարիների աշխատանքը: Դեբեդի վարարման հետևանքով վնասներ են հասցվել Բագրատաշեն և Դեբեդավան բնակավայրերի գյուղացիական տնտեսություններին՝ ջրածածկվել են այգիներ, տնամերձ հողատարածքներ: Ոչնչացվել են ընտանի կենդանիներ։ Մեծ վնասներ է կրել Բագրատաշենի մաքսատունը։

Այս արտակարգ օրերին, Տավուշ Մեդիան աշխատելով աղետի գոտիներում, ներկայացրել է իրավիճակի հետևանքները՝ առաջացած խնդիրները, կարիքները, կատարված ու կատարվելիք աշխատանքները։

Սիրելի տավուշցիներ, աննախադեպ աղետից տուժած հայրենակիցներ, հատկապես վնասների ու կարիքների գնահատման խմբերի անդամներ,

Տավուշ Մեդիան մեկ անգամ ևս հիշեցնում է՝ միջազգային հրատապ ու արդյունավետ աջակցություն ստանալու առաջին նախապայմանը տեղի ունեցածի հետևանքների տեսա և ֆոտո վավերագրություններն են, որոնք պիտ կցվեն գրավոր նկարագրերին: Հետամուտ եղեք, որ վնասներն իրենց վավերագրությունն ունենան: Դրանք կարող  եք ուղարկել մեզ՝ նշված հասցեներով։ (Facebook – Տավուշ ՀԸ / Tavush TV կամ info@tavushmedia.am)

Դա պետք է իրականացնել և վթարաորոնողական, և փրկարարական, և անհետաձգելի վթարավերականգնողական, ինչպես նաև՝ վերակառուցման աշխատանքների ժամանակ:

Վերստին տեղեկացնում ենք՝ Տավուշի մարզին սպառնացող աղետների ու դրանց ռիսկերի նվազեցման վարքականոններին կարող եք ծանոթանալ այցելելով tavushmedia.am կայք։ Այցելեք, կարդացեք, դիտեք ու եղեք իրազեկ։ ՈՎ ԻՐԱԶԵԿՎԱԾ Է, ՆԱ ՊԱՇՏՊԱՆՎԱԾ Է։

Հեղինակներ` Էռնեստ Խանումյան, Անգելինա Մանուկյան, Վաղարշակ Ալավերդյան, Արտյոմ Դալյան

«Այս մեդիա արտադրանքը պատրաստված է «Արցախից տեղահանված լրագրողների ադապտացիան հայաստանյան մեդիա միջավայրում» ծրագրի շրջանակներում, որն իրականացնում է Երեւանի մամուլի ակումբը՝ Եվրոպական հանձնաժողովի աջակցությամբ։ Ծրագրի գործընկերը International Alert-ն է: Բովանդակությունը պարտադիր չէ, որ համընկնի ԵՄԱ-ի, Եվրոպական հանձնաժողովի եւ International Alert-ի տեսակետների հետ»։

«Արտակարգ Ալիք» տեղեկատվական ՀԿ-ն և Տավուշ Մեդիան Freedom House-ի հետ սկսում են մի նոր ծրագիր, որի նպատակը Տավուշի մարզում ապատեղեկատվության և կեղծ լուրերի դեմ պայքարն է, մեդիամանիպուլյացիայի կանխարգելումը, մեդիագրագիտության տարածումն ու բարձրացումը, ուսուցողական և խորհրդատվական միասնական տեղեկատվական հարթակի ստեղծումը: Այն կնպաստի Տավուշի մարզում ճշգրիտ, հավաստի, վստահելի տեղեկության տարածմանը՝ նվազեցնելով սուտ ու կեղծ լուրերի բացասական հետևանքները:

Ծրագրի շրջանակում հոկտեմբերի 8-ին Իջևանի «Վերնատուն» պատկերասրահում տեղի ունեցավ դասընթաց՝ «Թվային անվտանգություն, տեղեկատվական դիմակայունություն, անվտանգությունը սահմանին» թեմայով։ Դասընթացն անցկացրին ու իրենց փորձառությամբ կիսվեցին Տավուշ Մեդիայի գործընկներները՝ տեղեկատվական անվտանգության մասնագետ, մեդիա փորձագետ, CyberHUB կիբերանվտանգության ընկերության համահիմնադիր, Ditord.org-ի համահեղինակ և համակարգող Սամվել Մարտիրոսյանն ու Բազմակողմանի տեղեկատվության ինստիտուտի հայաստանյան ծրագրերի համակարգող, մեդիափորձագետ, CyberHUB թիմի համահիմնադիր Արթուր Պապյանը։

Տավուշ Մեդիայի աշխատակազմը, երիտասարդ թղթակիցները, գործընկեր կառույցների աշխատակիցները, ուսանողները, պետական կառավարման ու տեղական ինքնակառավարման մարմինների ներկայացուցիչները, հնարավորություն ունեցան ծանոթանալ կարևոր թեմաների՝ թվային անվտանգությանը, տեղեկատվական դիմակայունությանը և սահմանային անվտանգությանը․ հանդիպման ընթացքում բանախոսները պատասխանեցին մասնակիցների հետաքրքրող հարցերին։

Դասընթացն ու մեկնարկող ծրագիրը կարևոր քայլ են Տավուշում տեղեկատվական անվտանգության և մեդիա կրթության ամրապնդման ուղղությամբ՝ ապահովելով բնակչությանը ճշգրիտ և վստահելի տեղեկատվությամբ՝ հզորացնելով համայնքների դիմակայունությունը ապատեղեկատվության դեմ։

Ճանաչված լուսանկարիչ Քսենիա Յակուտովիչի լուսանկարները առաջիկա շաբաթներին ցուցադրվելու են Դիլիջանի երկրագիտական թանգարանում․ «Վերադարձի կետ՝ Հայրենիք» խորագրով ցուցահանդեսում հիասքանչ բնապատկերներ են Հայաստանից ու մարդկային կերպարներ, ովքեր ունեն կյանքի հետաքրքիր պատմություն։ Քսենիան ծնվել և մեծացել է Գյումրիում։ 15 տարեկանում ծնողների հետ մեկնել է այլ երկիր։ Այնուամենայնիվ, նրա սերն ու հիացմունքը Հայաստանի, մեր երկրի բնական գեղեցկության և մարդկանց հանդեպ չի մարել։ Այս տարի Քսենիան ընտանիքի հետ վերադարձել է Հայաստան՝ ապրելու ու նպաստելու մշակութային աշխուժացմանը։

Ցուցահանդեսի առաջին այցելուներն ընդգծում էին նկարների խորությունն ու ուղերձները՝ սիրել և գնահատել սեփական արմատները։

«Վերդադարձի կետ՝ Հայրենիք» ցուցահանդեսը յուրահատուկ հայացք է դեպի Հայաստան՝ լեռները, արևը, մաքուր օդն ու մարդիկ, ստեղծում են մի ամբողջություն, որտեղ այցելուն կարող է զգալ Հայաստանի ջերմությունը և գեղեցկությունը: