Իջևան համայնքի տիրապետմանն են վերադարձվել 2 մշակույթի տների 2 տարածքներ
Տավուշի մարզի դատախազության կողմից պետական (համայնքային) շահերի պաշտպանության հայց հարուցելու լիազորության շրջանակում կատարված ուսումնասիրություններով պարզվել է՝
Աչաջուր բնակավայրի Մշակույթի տան առաջին հարկի 31,9 քմ մակերեսով տարածքը, «Գնահատման գործունեության մասին» ՀՀ օրենքի պահանջների խախտմամբ, ամսական 2000 դրամով հանձնվել է վարձակալության:
Գետահովիտ բնակավայրի Մշակույթի տան 9,2 քմ մակերեսով տարածքը, «Գնահատման գործունեության մասին» ՀՀ օրենքի պահանջների խախտմամբ, ամսական 5000 դրամ վարձավճարով հանձնվել է վարձակալության:
Դատախազական ներգործության արդյունքում՝ Իջևան համայնքի կողմից վարձակալության պայմանագրերը լուծվել են, վարձակալության իրավունքի պետական գրանցումները չեղարկվել են և Իջևան համայնքի տիրապետմանն ու օգտագործմանն են վերադարձվել Աչաջուր և Գետահովիտ բնակավայրերի մշակույթի տներում գտնվող՝ 31,9 քմ և 9,2 քմ մակերեսով անշարժ գույքերը:
Տավուշցիների ձայնը ուղիղ եթերում | Ժողովրդական խոսափողն Իջևանում
«Տավուշն է խոսում – ժողովրդական խոսափող» բաց հանրային հարթակն այսօր` մայիսի 27-ին, տեղակայվել էր Իջևանի Քանդակների այգում՝ դառնալով բնակիչների ձայնը լսելի դարձնելու կարևոր հարթակ։ Այստեղ հնչեցին Տավուշի մարզին հուզող ամենատարբեր հարցերը՝ սոցիալ-տնտեսական խնդիրներից ու անվտանգությունից մինչև կրթություն, երիտասարդության ներգրավվածություն, զբաղվածություն և համայնքային զարգացման այլ թեմաներ։
Բաց ձևաչափի շնորհիվ յուրաքանչյուր քաղաքացի հնարավորություն ունեցավ բարձրաձայնելու իր մտահոգությունները, առաջարկներն ու ակնկալիքները:
1 ից 14
-+
1.
2.
3.
4.
5.
6.
7.
8.
9.
10.
11.
12.
13.
14.
Դիլիջան-Իջևան ճանապարհից Պարզ լիճ տանող հատվածում երթևեկությունը կսահմանափակվի
Մայիսի 30-ին անցկացվելիք «ՀՀ վարչապետի գավաթ» խճուղավազքի մրցաշարի շրջանակում ժամը 8-ից մինչև ժամը 13․00-ն Դիլիջան-Իջևան ավտոճանապարհից դեպի Պարզ լիճ տանող հատվածում երթևեկությունը կսահմանափակվի։
Պատճառված անհարմարությունների համար հայցում ենք քաղաքացիների ներողամտությունը։
Իջևան քաղաքում գործարկվելու է էլեկտրական շչակ
Մայիսի 27-ին` ժամը 10։00-ից մինչև 15:00-ն ընկած ժամանակահատվածում, Տավուշի մարզի Իջևան քաղաքում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում՝ ժամը 12։00-ին, գործարկվելու է էլեկտրական շչակ։ Խնդրում ենք չանհանգստանալ։
Տավուշեցի գրող Աշոտ Աղաբաբյանը հանդիպել է Իջևանի ընթերցողների հետ
Մեր ժամանակների ամենաընթերցվող հեղինակներից մեկը՝ տավուշեցի գրող Աշոտ Աղաբաբյանը, հանդիպել էր Իջևանի իր ընթերցողների հետ։ «Իրական դպրոցում» հեղինակի գրքերը վաղուց դարձել են ուսանողների ամենօրյա ընթերցանության մասը։ Գրադարաններում և ուսանողների սեղաններին հաճախ կարելի է տեսնել «Ռեզիդենտը», «Մենակը», «Թակարդը», «Գաղտնիքների տիրակալը» վեպերը, որոնք երիտասարդները կարդում են և որպես գեղարվեստական ստեղծագործություններ, և պատմական ու փաստագրական բացահայտումների համար։
Հանդիպումն անցավ անմիջական ու ջերմ մթնոլորտում։ Ուսանողները հնարավորություն ունեցան անձամբ հարցեր ուղղել հեղինակին՝ հետաքրքրվելով նրա ստեղծագործական ճանապարհով, վեպերի հերոսների իրական նախատիպերով, ինչպես նաև այն գաղտնի պատմություններով, որոնք հաճախ դառնում են Աղաբաբյանի ստեղծագործությունների հիմքը։ Գրողը խոսեց նաև իր ամենահայտնի գործերի ստեղծման պատմության մասին՝ նշելով, որ ընթերցողի վստահությունն ու հետաքրքրությունն իր համար ամենամեծ գնահատականն են։ Վերջին տարիներին նրա գրքերը բազմիցս վերահրատարակվել են և մեծ պահանջարկ ունեն հայ ընթերցողների շրջանում։
Երիտասարդ ընթերցողների հետ հանդիպմանը մեծ հետաքրքրություն առաջացրեց «Նմանակը» վեպի քննարկումը, որը հետախուզության համաշխարհային պատմության մեջ նմանը չունեցող բացառիկ օպերացիայի մասին է, հիմնված իրական փաստերի վրա և պատմում է Իջևանի Աչաջուր գյուղից հայ հետախույզի՝ Սմբատ Խոջոյանի մասին, ով 3 տարի Թուրքիայում փոխարինել է խորհրդարանի թուրք պատգամավորի: Քննարկման ընթացքում անդրադարձ եղավ նաև Աշոտ Աղաբաբյանի նոր՝ «Կարդինալ» գրքին, որը վերջերս է լույս տեսել և արդեն հասցրել է մեծ հետաքրքրություն առաջացնել ընթերցողների շրջանում։ Հեղինակի խոսքով՝ գիրքը լայն արձագանք է ստացել Հայաստանում, այն հետաքրքրել է անգամ Հռոմի պապին։
ժամանակակից գրականությունը շարունակում է մեծ հետաքրքրություն վայելել երիտասարդների շրջանում։ Իսկ հեղինակ–ընթերցող անմիջական շփումը կարևոր հնարավորություն է ոչ միայն գրքերը բացահայտելու, այլև ընթերցանության հանդեպ հետաքրքրությունը խորացնելու համար։
Արտադրված է Տավուշում․ «Էկոտավուշ»-ը բացեց իր ֆիրմային խանութն Իջևանում
«Արտադրված է Տավուշում»․ հենց այս գաղափարով էլ Տավուշի մարզում շարունակում են զարգանալ տեղական արտադրությունները։ Իջևան քաղաքում իր ֆիրմային խանութը բացեց «Էկոտավուշ» ընկերությունը՝ բնական և անարատ կաթնամթերքի սիրահարներին ներկայացնելով տեղական արտադրության լայն տեսականի։ Նորաբաց խանութում ներկայացված են բնական կաթից պատրաստված տարբեր տեսակի պանիրներ և կաթնամթերք՝ ստեղծված տեղական հումքից ու տարիների փորձով համեմված։ Ամեն մի արտադրանքի ակունքներում պատասխանատու աշխատանքն է, հայրենական արտադրողի նվիրումն ու որակի նկատմամբ հոգատար վերաբերմունքը։
Արտադրության ամբողջական շղթայի վերահսկումը՝ սկսած անասնակերի հավաքումից ու ֆերմայից մինչև վերջնական արտադրանք, հնարավորություն է տալիս սպառողին առաջարկել թարմ, բնական և բարձրորակ կաթնամթերք։ Կաթը ստացվում է ընկերության Լուսաձոր գյուղում գտնվող ֆերմայից, որտեղ պահվում են ջերսեյ և սիմենթալ ցեղատեսակի կովեր։ Այս ցեղատեսակները հայտնի են բարձրորակ և սննդարար կաթով, ինչը կարևոր հիմք է ընկերության պանիրների և կաթնամթերքի բնական համի ու որակի համար։
Նորաբաց խանութը կարող է դառնալ նաև Տավուշի այցեքարտերից մեկը՝ ներկայացնելով հայկական պանրագործության ավանդույթներն ու տեղական արտադրության մշակույթը։
Ընկերությունում վստահ են՝ առողջ և անարատ կաթնամթերքը պետք է հասանելի լինի յուրաքանչյուր հայ ընտանիքի։ «Էկոտավուշ»՝ տեղական հումք, բնական կաթ և որակի վերահսկում՝ յուրաքանչյուր արտադրանքի հիմքում։
Բազմաֆունկցիոնալ հանրային նոր տարածք՝ Իջևանի Քանդակների այգում
Իջևանում բացվել է նոր բազմաֆունկցիոնալ հանրային տարածք, որն արդեն իսկ դարձել է համայնքային կյանքի ակտիվ կենտրոն։ Քանդակների այգում ստեղծված նոր միջավայրը նախատեսված է բնակիչների հանդիպումների, շփման, կրթական ու մշակութային նախաձեռնությունների համար։ Այն ներառում է բացօթյա ամֆիթատրոն, խաղային գոտիներ, հանգստի հատվածներ և ներառական ենթակառուցվածքներ՝ նախատեսված համայնքի բոլոր խմբերի համար։
Նախաձեռնությունն իրականացվել է ՄԱԿ-ի Զարգացման ծրագրի «Դիմակայունություն ի սկզբանե» նախագծի շրջանակում՝ Իջևանի համայնքապետարանի ու Սերբիայի կառավարության ֆինանսական աջակցությամբ։ Շուրջ 40 միլիոն դրամ արժողությամբ ծրագրի կարևոր առանձնահատկություններից է բնակիչների անմիջական մասնակցությունը․ համանախագծման գործընթացում ներգրավվել են համայնքի տարբեր բնակավայրերից տասնյակ քաղաքացիներ։
«Մենք լսել ենք համայնքի կարիքները, բնակիչներն իրենք են առաջ բերել այն գաղափարները, որոնք ցանկանում էին տեսնել իրենց համայնքում։ Տավուշի մարզում մենք բազմաթիվ նախգծեր ունենք՝ ուղղված համայնքների զարգացմանը, կանանց ու երիտասարդների զորեղացմանը, սոցիալ-տնտեսական առաջընթացին, և հաջողությամբ իրականացնելով այս նախագծերը, մենք ուրախ ենք տեսնել տեղի կառույցների պատրաստակամությունն ու աջակցությունը նախագծերի կյանքի կոչմանը»,- իր խոսքում նշեց Հայաստանում ՄԱԶԾ մշտական ներկայացուցիչ Հայաստանում Նաթիա Նացվլիշվիլին։
Քանդակների այգին Իջևանի բնակիչների ու քաղաքի հյուրերի ամենասիրելի և ամենաշատ այցելվող վայրերից մեկն է։ Տարիներ շարունակ այն եղել է զբոսանքի ու մշակութային հանդիպումների կարևոր հարթակ։ Այժմ, նոր բազմաֆունկցիոնալ հանրային տարածքի ստեղծմամբ, այգին ստացել է նոր շունչ՝ վերածվելով մարդկանց միավորող, գաղափարների փոխանակման և համայնքային կյանքի աշխուժացման ժամանակակից կենտրոնի։
«2024 թվականին Սերբիայի կառավորությունը 1 մլն եվրո արժողությամբ աջակցություն տրամադրեց Հայաստանին, այստեղ իրականացնելու «Դիմակայունություն ի սկզբանե» ծրագիրը։ Իջևանում իրականացվող այս ծրագիրը Հայաստանում իրականացվող 34 նախագծերից մեկն էր։ Սերբիան ու Հայաստանը երկարաժամկետ գործընկերներ են, և մեր երկու երկների հարաբերություններում բարեկամական ավանդույթներ ունենք։ Սա երկամյա նախագիծ է, և մեր գործընկերությունը Հայաստանի հետ շարունակվում է։ Իջևան համայնքին շնորհավորում եմ այսպիսի գեղեցիկ հանրային տարածք ունենալու համար»,- իր խոսքում նշեց Հայաստանում Սերբիայի արտակարգ և լիազոր դեսպան Տատյանա Պանայոտովիչ-Ցվետկովիչը։
Այս նախաձեռնությունը Տավուշի մարզում իրականացվող ավելի լայն համագործակցության մի մասն է, որի նպատակը համայնքների դիմակայունության և կայուն զարգացման ամրապնդումն է։ Հանրային նոր տարածքի ստեղծմանը զուգահեռ, ծրագրի շրջանակում իրականացվել են նաև մի շարք կարևոր ենթակառուցվածքային նախաձեռնություններ․ Տավուշի մարզային փրկարարական վարչությունում տեղադրվել են արևային ֆոտովոլտային համակարգեր, իսկ Աչաջուր բնակավայրում կառուցվել է նոր ջրամբար՝ ոռոգման արդյունավետությունը բարձրացնելու և գյուղատնտեսական համայնքներին աջակցելու նպատակով։
Էներգաարդյունավետության բարձրացումը բնակելի և հասարակական շենքերում շարունակում է մնալ կլիմայական դիմադրողականության և կայուն զարգացման կարևոր ուղղություններից մեկը։ Հայաստանում այս ոլորտում իրազեկվածության բարձրացման և գործնական հմտությունների զարգացման նպատակով իրականացվում են մի շարք նախաձեռնություններ։ Իջևանում անցկացվել է «Էներգաարդյունավետ լուծումներ» հանրային ցուցահանդեսը, որի ընթացքում ներկայացվել են էներգախնայող և վերականգնվող էներգիայի ոլորտի ժամանակակից տեխնոլոգիաներ ու լուծումներ։
Միջոցառումը մեկ հարթակում համախմբել էր ոլորտի ներկայացուցիչներին, մասնագետներին և հետաքրքրված քաղաքացիներին։ Այցելուները հնարավորություն են ունեցել ծանոթանալու ներկայացված սարքավորումներին, հետևելու դրանց աշխատանքի ցուցադրություններին և մասնագիտական խորհրդատվություն ստանալու էներգիայի արդյունավետ օգտագործման վերաբերյալ։Ցուցահանդեսին մասնակցել են ոլորտի տարբեր ընկերություններ և մասնագետներ՝ ներկայացնելով էներգաարդյունավետ շինարարական նյութեր, ջեռուցման և լուսավորության ժամանակակից համակարգեր, ինչպես նաև արևային և այլ վերականգնվող էներգիայի լուծումներ։
«Էներգաարդյունավետ լուծումներ» հանրային ցուցահանդեսը կազմակերպվել էր GIZ-ի «Կայուն էներգիա հանուն Հայաստանում կլիմայակայուն համայնքային զարգացման» ծրագրի շրջանակում՝ «Ավենյու» խորհրդատվական ընկերության և «Զենիթ» ակադեմիայի նախաձեռնությամբ։ Ցուցահանդեսին նախորդել էր տեղեկատվական սեմինարը, որի ընթացքում քննարկվել էին էներգախնայողության և էներգաարդյունավետության ոլորտում կիրառվող հիմնական լուծումներն ու մոտեցումները։
Գութանից մինչև սուր․ ազգային պարի ոգին Իջևանում
Իջևանի Քանդակների այգում կրկին մշակութային տրամադրություն էր։ Հերթական գրական-գեղարվեստական միջոցառումն այս անգամ նախաձեռնել էին Իջևանի թիվ մեկ հիմնական դպրոցի աշակերտները՝ հանդես գալով «Գութանից մինչև սուր․ հայկական պարերի ոգին» ծրագրով։
Դպրոցականները քաղաքի բնակիչներին ներկայացրին հայկական ավանդական պարերի ու երգերի բեմականացված կատարումները։ Միջոցառման նպատակը նոր սերդին առավել մոտեցնելն էր ազգային պարարվեստին ու երգարվեստին, ինչպես նաև հանրությանը հիշեցնել հայկական մշակութային ժառանգության կարևորության մասին։
Միջոցառման մասնակից երեխաները պատրաստվել են մեծ ոգևորությամբ։ Նրանց համար ազգային պարերն ու երգերը պատմություն են, ուժ ու ինքնություն, որը պետք է ճանաչել ու պահպանել։
Մշակույթը կենդանի է, երբ այն ապրում է հատկապես երիտասարդների միջոցով։ Իսկ նման նախաձեռնությունները հնարավորություն են տալիս, որ ազգային երգն ու պարը դուրս գան դասասենյակներից ու բեմ բարձրանան հենց հանրության առաջ՝ մեկ անգամ ևս ընդգծելով հայկական մշակութային ժառանգության պահպանման կարևորությունը։
Իջևանում կանցկացվի էներգաարդյունավետությանն ու կանաչ տեխնոլոգիաներին նվիրված անվճար աշխատարան
Զենիթ ակադեմիան հրավիրում է մասնակցելու էներգաարդյունավետությանը նվիրված աշխատարանին։
Ժամանակակից էներգախնայող լուծումների և կանաչ տեխնոլոգիաների նկատմամբ հետաքրքրությունն օրեցօր աճում է։ Այդ համատեքստում Զենիթ ակադեմիան կազմակերպում է «Էներգաարդյունավետություն. ինքնագնահատման գործիքներ» խորագրով տեղեկատվական-գործնական աշխատարան, որը նախատեսված է ոլորտի մասնագետների և թեմայով հետաքրքրվող անձանց համար։
Աշխատարանին կարող են մասնակցել ճարտարապետներ, շինարարներ, ոլորտի փորձագետներ, ինչպես նաև բոլոր նրանք, ովքեր ցանկանում են ծանոթանալ էներգաարդյունավետության ժամանակակից մոտեցումներին և կիրառելի գործիքներին։
Միջոցառման ընթացքում մասնակիցները հնարավորություն կունենան լսելու ոլորտի մասնագետների փորձը, ծանոթանալու գործնական լուծումների և ինքնագնահատման մեթոդների, որոնք կարող են կիրառվել թե՛ մասնագիտական գործունեության, թե՛ կենցաղային պայմաններում։ Աշխատարանը համատեղելու է տեսական գիտելիքն ու գործնական կիրառությունը՝ նպաստելով կանաչ տեխնոլոգիաների տարածմանը և ավելի պատասխանատու մոտեցումների ձևավորմանը։
