Իջևանի «Բենտոնիտ կոմբինատի» մի խումբ աշխատակիցներ պնդում են, որ իրենց անձնական տվյալների օգտագործմամբ, առանց իրենց գիտության և համաձայնության, տարբեր վարկային կազմակերպություններում իրենց անուններով առցանց վարկեր են ձևակերպվել։

Աշխատակիցների փոխանցմամբ՝ 13 անձի անունով ձևակերպված վարկերի չափերը տատանվում են շուրջ 160 հազարից մինչև 720 հազար դրամի սահմաններում։ Նրանց խոսքով՝ դեպքի հետևանքով արդեն հարկադիր գանձումներ են իրականացվում, ինչի արդյունքում իրենք զրկվել են իրենց աշխատավարձերից օգտվելու հնարավորությունից։

Զեղծարարը, աշխատելով Կոմբինատում որպես փաթեթավորող բանվոր, օգտվել է գործընկերների վստահությունից։ Նա խնդրել է նրանց տրամադրել բջջային հեռախոսները՝ իբր Idram և Armed հավելվածներն ակտիվացնելու նպատակով, ապա նույնականացրել է նրանց և նրանց անունից տարբեր վարկային կազմակերպություններում ձևակերպել վարկեր, որոնց գումարները ստացել և տնօրինել է։

Հանցավոր գործողություններն իրականացվել են աշխատանքային առօրյայի և գործընկերական, ընկերական շփումների պայմաններում, ինչի հետևանքով նրա վարքագիծը կասկած չի հարուցել, իսկ տուժածները վստահել են նրան։

Աշխատակիցները նշում են, որ արդեն ճանաչվել են տուժող, սակայն, իրենց խոսքով, մինչ օրս խնդիրը լիարժեք լուծում չի ստացել, իսկ որոշ դեպքերում հարկադիր գանձումները շարունակվում են։

Տավուշ Մեդիային ՀՀ Քննչական կոմիտեից հայտնեցին, որ դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 257-րդ հոդվածի 1-ին մասով (համակարգչային հափշտակություն) և 457-րդ հոդվածի 1-ին մասով (փաստաթղթեր, դրոշմներ, կնիքներ, ձևաթղթեր կեղծելը կամ կեղծ փաստաթղթեր, դրոշմներ, կնիքներ, ձևաթղթեր իրացնելը, պատրաստելը կամ օգտագործելը)։

Նախաքննությունը շարունակվում է։

Մանրամասները՝ հաջորդիվ։

Աշխարհում հուլիսի 20-ին նշվում է Շախմատի միջազգային օրը։ Տոնի առթիվ Հայաստանի շախմատի ակադեմիայի Իջևանի մասնաճյուղի նախաձեռնությամբ Իջևանում անցկացվեցին շախմատային միջոցառումներ՝ համախմբելով տարբեր տարիքի շախմատասերների։

Իջևանի քանդակների այգում կազմակերպված բաց մրցաշարին մասնակցեցին տասնյակ պատանիներ ու երիտասարդներ։ Բացօթյա մրցաշարը նաև շախմատի շուրջ համախմբվելու և ժամանցն օգտակար անցկացնելու հարթակ էր։

Շախմատի միջազգային օրվան նվիրված ևս մեկ մրցաշար անցկացվեց «Լոֆթ Իջևան» երիտասարդական կենտրոնում։ Մրցաշարի մասնակիցները հնարավորություն ունեցան ցուցադրելու իրենց խաղային հմտություններն ու մրցելու հասակակիցների հետ։ «Լոֆթ Իջևան» երիտասարդական կենտրոնում գործում է նաև շախմատի ակումբ, որտեղ երիտասարդները պարբերաբար մասնակցում են դասընթացների և զարգացնում իրենց կարողությունները։

Միջոցառումների նպատակն էր խթանել շախմատի նկատմամբ հետաքրքրությունը, նպաստել մտավոր խաղի տարածմանը, առողջ մրցակցային միջավայրի ձևավորմանը և համայնքում ակտիվ ժամանցի մշակույթի զարգացմանը։ Միջոցառումների իրականացմանն աջակցել է Իջևանի համայնքապետարանը։

Հուլիսի 9-ին՝ ժամը 11։53-ին, Տավուշ մարզային օպերատիվ կառավարման կենտրոն տեղեկություն է ստացվել, որ Իջևան քաղաքում ժամը 03։30-ի սահմաններում քաղաքացին դուրս է եկել տնից և չի վերադարձել։

Դեպքի վայր են մեկնել ՆԳՆ փրկարար ծառայության և ոստիկանության օպերատիվ խմբեր։

Պարզվել է, որ քաղաքացին իջել է դեպի Աղստև գետը։

Քաղաքացու դին հայտնաբերվել է ընկնելու հավանական վայրից մոտ 7 կմ հեռավորության վրա` Խաշթառակ գյուղի տարածքում:

Փրկարարները դին դուրս են բերել գետից։

Հուլիսի 8-ին Իջևանում կայացավ «Երևանից անդին՝ փաստահենք մամուլ մարզային համայնքների համար» ծրագրի շրջանակում կազմակերպված հանրային հանդիպումը, որը համախմբել էր Տավուշ Մեդիայի աշխատակազմին, տեղական ինքնակառավարման մարմինների և քաղաքացիական հասարակության ներկայացուցիչներին։

Հանդիպման նպատակն էր նպաստել խմբագրությունների կարողությունների զարգացմանը, փաստահենք լրագրության գործիքների կիրառմանը և ապատեղեկատվության դեմ պայքարի արդյունավետ մեխանիզմների քննարկմանը՝ հատկապես առաջիկա քաղաքական գործընթացների նախաշեմին (ԱԺ և ՏԻՄ ընտրություններ)։

Բացման խոսքով հանդես եկավ Երևանի մամուլի ակումբի ծրագրի տնօրեն Վիգեն Սարգսյանը՝ ներկայացնելով ծրագրի նպատակներն ու մարզային գործընկերների դերը տեղեկատվական միջավայրի ամրապնդման գործում։

Հանրային հանդիպման առաջին հատվածում Երևանի մամուլի ակումբի պատվավոր նախագահ Բորիս Նավասարդյանը ներկայացրեց Ազգային ժողովի ընտրությունների լուսաբանման մշտադիտարկման արդյունքները՝ անդրադառնալով լրատվամիջոցների աշխատանքում արձանագրված հիմնական միտումներին, մարտահրավերներին և մասնագիտական առաջարկություններին։

Այնուհետև Բազմակողմանի տեղեկատվության ինստիտուտի ծրագրերի ղեկավար Սեդա Առաքելյանը խոսեց Հայաստանում հետընտրական շրջանում ապատեղեկատվական միջավայրի առանձնահատկությունների, տեղեկատվական մանիպուլյացիաների տարածման մեխանիզմների և դրանց հակազդելու գործիքների մասին։

Օրվա երկրորդ կեսին Մեդիա նախաձեռնությունների կենտրոնի մեդիագրագիտության ծրագրի տնօրեն Անի Եղիազարյանը ներկայացրեց մեդիայի և մեդիագրագիտության հիմնական սկզբունքները, ինչպես նաև լրագրողների և տեղեկատվություն սպառողների համար նախատեսված գործնական գործիքները, որոնք կարող են նպաստել տեղեկատվության ստուգման և վստահելի բովանդակության ստեղծմանը։

Հանդիպումն ավարտվեց բաց քննարկմամբ, որի ընթացքում ներկաները կարծիքներ են փոխանակել ներմարզային համագործակցության հնարավորությունների, խմբագրությունների միջև փորձի փոխանակման և փաստահեն լրագրության զարգացման ուղղությամբ համատեղ նախաձեռնությունների շուրջ։

«Երևանից անդին՝ փաստահենք մամուլ մարզային համայնքների համար» ծրագիրն իրականացվում է մարզային լրատվամիջոցների մասնագիտական կարողությունների զարգացման նպատակով։ Ծրագրում ընդգրկված են Տավուշի, Վայոց ձորի, Արմավիրի, Գեղարքունիքի, Սյունիքի և Շիրակի մարզերը, ինչպես նաև ոլորտում ակտիվ գործունեություն ծավալող քաղաքացիական հասարակության կազմակերպությունները։

Տավուշի մարզում շարունակվում են 2024 թվականի ջրհեղեղի հետևանքով վնասված Մ4, Դիլիջան-Իջևան միջպետական ավտոճանապարհի 10 ճանապարհահատվածների վերակառուցման աշխատանքները։ Վերականգնվող տեղամասերը ներառում են նաև Թեղուտ և Հաղարծին բնակավայրերի առանձին հատվածները։ Ծրագրի շրջանակում իրականացվում են հենապատերի կառուցման և վերականգնման, գետի հունի մաքրման, ինչպես նաև վնասված ճանապարհահատվածների ասֆալտբետոնե ծածկի վերականգնման աշխատանքներ։

«Վերակառուցման ծրագիրն իրականացվում է ՀՀ տարածքային կառավարման և ենթակառուցվածքների նախարարության պատվերով, իսկ շինարարական աշխատանքներն իրականացնում է «Մոստկոնտրակտ» ՍՊԸ-ն», – այս մասին տեղեկացնում են Դիլիջանի համայնքապետարանից։

Հիշեցնենք, որ 2024 թվականի մայիսի 26-ին տեղացած հորդառատ անձրևների հետևանքով Տավուշի և Լոռու մարզերում վարարել էին Դեբեդ, Աղստև և Տաշիր գետերը՝ առաջացնելով բազմաթիվ արտակարգ իրավիճակներ։ Դիլիջան համայնքի Հաղարծին բնակավայրում Աղստև գետի վարարումը փլուզել էր երեք բնակելի տուն, ջրածածկել գետի ափամերձ տներն ու շինությունները, ինչպես նաև վնասել Մ4 Իջևան-Դիլիջան-Երևան միջպետական ավտոճանապարհի Հաղարծինի հատվածը։

Կարդացեք նաև՝

Հուլիսի 5-ին՝ ժամը 21։40-ին, Տավուշի մարզային օպերատիվ կառավարման կենտրոն ահազանգ է ստացվել, որ Գետահովիտ բնակավայրում տուն է այրվում։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ:

Հրդեհը մեկուսացվել է ժամը 22:03-ին, մարվել՝ 22:34-ին։ Այրվել է տան տանիքը՝ մոտ 80 քմ։

Հրշեջ-փրկարարները կանխել են հրդեհի տարածումը դեպի հարակից տան տանիք:

Հուլիսի 3-ին տեղի ունեցավ ԵՊՀ Իջևանի մասնաճյուղի 2025-2026 ուստարվա շրջանավարտների ավարտական հանդիսավոր միջոցառումը, որին մասնակցում էին Երևանի պետական համալսարանի ռեկտոր Հովհաննես Հովհաննիսյանը, ռեկտորի աշխատակազմի ղեկավար Դավիթ Հովհաննիսյանը, ռեկտորի խորհրդական Վիգեն Խալատյանը, Տավուշի մարզպետ Հայկ Ղալումյանը, ԵՊՀ ԻՄ վարչական և պրոֆեսորադասախոսական անձնակազմի անդամներ, ուսանողներ, շրջանավարտներ, ծնողներ, մարզի տարբեր ոլորտների և ԶԼՄ-ների ներկայացուցիչներ, հյուրեր: Այս մասին հայտնում են ԵՊՀ Իջևանի մասնաճյուղից։

«Ձեր կրթությունը ձեզ տվել է մասնագիտություն, բայց կյանքը ձեզանից կպահանջի նաև կամք, բնավորություն, ազնվություն և պատասխանատվություն։ Հավատացե՛ք ձեր ուժերին, աշխատե՛ք համառորեն, մի՛ վախեցեք սխալվելուց և երբեք մի՛ դադարեք առաջ շարժվել, որովհետև հաջողությունը միշտ չէ, որ բաժին է հասնում ամենախելացիներին։ Շատ հաճախ այն հասնում է նրանց, ովքեր, անկախ ամեն ինչից, չեն դադարում քայլել»,- իր շնորհավորական խոսքում նշել է ԵՊՀ Իջևանի մասնաճյուղի տնօրեն Մհեր Օթարյանը։

Այս տարի ԵՊՀ Իջևանի մասնաճյուղը դեպի մեծ կյանք էր ճանապարհում 301՝ բակալավրիատի 276 (առկա ուսուցմամբ՝ 165, հեռակա ուսուցմամբ՝ 111) և մագիստրատուրայի (հեռակա ուսուցմամբ) 25 շրջանավարտների, որոնց պատվին կազմակերպվել էր տոնական միջոցառում՝ դիպլոմների հանձնման հանդիսավոր արարողություն և ավարտական երեկույթ:

Ճանապարհային երթևեկության անվտանգությունն ու կազմակերպվածությունը բարելավելու նպատակով Երևան–Սևան–Իջևան միջպետական ավտոճանապարհի Իջևան քաղաքի Երևանյան փողոցում՝ շուկայի հարևանությամբ, տեղադրվել է լուսացույց։

Նպատակն է ապահովել հետիոտների և տրանսպորտային միջոցների անվտանգ ու կանոնակարգված տեղաշարժը, ինչպես նաև կարգավորել տվյալ հատվածում առկա ինտենսիվ երթևեկությունը։

Վարորդներին և հետիոտներին հորդորում ենք լինել ուշադիր, պահպանել ճանապարհային անվտանգության կանոնները։

Տավուշի մարզի դատախազության կողմից պետական (համայնքային) շահերի պաշտպանության հայց հարուցելու լիազորության շրջանակում կատարված ուսումնասիրություններով պարզվել է՝

• Աչաջուր բնակավայրի Մշակույթի տան առաջին հարկի 31,9 քմ մակերեսով տարածքը, «Գնահատման գործունեության մասին» ՀՀ օրենքի պահանջների խախտմամբ, ամսական 2000 դրամով հանձնվել է վարձակալության:
• Գետահովիտ բնակավայրի Մշակույթի տան 9,2 քմ մակերեսով տարածքը, «Գնահատման գործունեության մասին» ՀՀ օրենքի պահանջների խախտմամբ, ամսական 5000 դրամ վարձավճարով հանձնվել է վարձակալության:

Դատախազական ներգործության արդյունքում՝ Իջևան համայնքի կողմից վարձակալության պայմանագրերը լուծվել են, վարձակալության իրավունքի պետական գրանցումները չեղարկվել են և Իջևան համայնքի տիրապետմանն ու օգտագործմանն են վերադարձվել Աչաջուր և Գետահովիտ բնակավայրերի մշակույթի տներում գտնվող՝ 31,9 քմ և 9,2 քմ մակերեսով անշարժ գույքերը: