Զենիթ ակադեմիան հրավիրում է մասնակցելու էներգաարդյունավետությանը նվիրված աշխատարանին։

Ժամանակակից էներգախնայող լուծումների և կանաչ տեխնոլոգիաների նկատմամբ հետաքրքրությունն օրեցօր աճում է։ Այդ համատեքստում Զենիթ ակադեմիան կազմակերպում է «Էներգաարդյունավետություն. ինքնագնահատման գործիքներ» խորագրով տեղեկատվական-գործնական աշխատարան, որը նախատեսված է ոլորտի մասնագետների և թեմայով հետաքրքրվող անձանց համար։

Աշխատարանին կարող են մասնակցել ճարտարապետներ, շինարարներ, ոլորտի փորձագետներ, ինչպես նաև բոլոր նրանք, ովքեր ցանկանում են ծանոթանալ էներգաարդյունավետության ժամանակակից մոտեցումներին և կիրառելի գործիքներին։

Միջոցառման ընթացքում մասնակիցները հնարավորություն կունենան լսելու ոլորտի մասնագետների փորձը, ծանոթանալու գործնական լուծումների և ինքնագնահատման մեթոդների, որոնք կարող են կիրառվել թե՛ մասնագիտական գործունեության, թե՛ կենցաղային պայմաններում։ Աշխատարանը համատեղելու է տեսական գիտելիքն ու գործնական կիրառությունը՝ նպաստելով կանաչ տեխնոլոգիաների տարածմանը և ավելի պատասխանատու մոտեցումների ձևավորմանը։

Միջոցառման մանրամասները

• Ամսաթիվ՝ մայիսի 18, ժամը՝ 15:30 – 17:00
• Վայր՝ Իջևանի «Վերնատուն» պատկերասրահ (2-րդ հարկ)
• Մասնակցությունն անվճար է, տեղերը՝ սահմանափակ։

Մասնակցելու համար անհրաժեշտ է գրանցվել այստեղ։

Իջևանի շատրվանների հրապարակը մայիսի 12-ին վերածվել էր հայ ազգային պարերի իրական հարթակի․ տեղի ունեցավ ազգային պարերի հանրային միջոցառումը, որն ամփոփեց վերջին ամիսների ընթացքում համայնքի 10 դպրոցներում իրականացված ազգային պարերի ուսուցման ծրագիրը։

Ծրագրին մասնակցել էր շուրջ 550 աշակերտ, ովքեր ամիսներ շարունակ սովորել էին հայկական ավանդական պարեր՝ բացահայտելով ոչ միայն շարժման գեղեցկությունը, այլև ազգային մշակույթի ուժն ու խորքը։ Ամփոփիչ միջոցառումը վերածվել էր իսկական տոնախմբության, որտեղ հնչում էին հայկական մեղեդիներ, իսկ հրապարակը լցված էր պարային եռանդով ու ջերմ տրամադրությամբ։

Միջոցառմանը մասնակցում էին ծրագրում ընդգրկված դպրոցների աշակերտները, ուսուցիչներն ու ծնողները, սակայն ազգային պարի շուրջ համախմբվել էին նաև բազմաթիվ քաղաքացիներ ու հյուրեր։ Բաց պարուսուցման հատվածը հնարավորություն տվեց յուրաքանչյուր ցանկացողի միանալ հայկական շուրջպարին՝ դառնալով տոնի անմիջական մասնակիցը։

Չնայած Իջևանում եղանակային անբարենպաստ պայմաններին, ազգային երգերի հնչյունների ներքո հայկական պարն ապրում ու շնչում էր մեկ միասնական շուրջպարում՝ միավորելով սերունդներին, ժպիտներն ու ազգային ոգին։

Կարդացեք նաև՝

Մայիսի 11-ին, ժամը 20։34-ին Տավուշի մարզային օպերատիվ կառավարման կենտրոն ահազանգ է ստացվել, որ Իջևան քաղաքի Մետաղագործների թաղամասում այրվում է վագոն-տնակ։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։

Հրդեհը մեկուսացվել է ժամը 20:51-ին, մարվել՝ 22:08-ին։ Այրվել է ինքնաշեն, փայտե վագոն-տնակ՝ մոտ 50 քմ։

Ապրիլի 28-ին` ժամը 10։00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Սարիգյուղ բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12։00-ին գործարկվելու է էլեկտրական շչակ։

Խնդրում ենք չանհանգստանալ։

Ապրիլի 25-ին Տավուշի մարզի Իջևան քաղաքում՝ թիվ 5 հիմնական դպրոցում, անցկացվեց Կիոկուշին կարատեի Տավուշի մարզի բաց առաջնությունը։ Մրցաշարին մասնակցեցին 110 մարզիկներ՝ տարբեր համայնքներից։

Առաջնությունն անցավ բարձր մրցակցային մթնոլորտում․ մասնակիցները ցուցադրեցին տեխնիկական պատրաստվածության բարձր մակարդակ, իսկ հանդիսատեսը հնարավորություն ունեցավ ականատես լինել հետաքրքիր և լարված մենամարտերի։

Առաջնության ավարտին հաղթողները և մրցանակակիրները պարգևատրվեցին համապատասխան մեդալներով և պատվոգրերով։ Մրցաշարի կազմակերպիչը Կիոկուշին կարատեի Տավուշի մարզի գլխավոր մարզիչ Ստեփան Սարհատյանն է։

Հայոց ցեղասպանության 111-րդ տարելիցի կապակցությամբ ապրիլի 24-ին Տավուշի մարզկենտրոն Իջևանում մարդկանց բազմությունն առավոտյան լուռ քայլերթով շարժվեց Հայոց Ցեղասպանության հուշակոթող՝ ի հիշատակ և ոգեկոչում մեր զոհերի։

Քայլերթին համընթաց ընթանում էր Սուրբ Պատարագը՝ Ցեղասպանության նահատակներին նվիրված բաց խորանում։

Տավուշ Մեդիայի ֆոտոշարքը Իջևանից։

Բերդ համայնքի բոլոր բնակավայրերում այսօր ծաղիկներ են խոնարհել Հայոց ցեղասպանության զոհերի հիշատակը հավերժացնող հուշակոթողների մոտ: Ժամը 10։30-ին «Սորաններ» դենդրոպարկի մուտքի հարակից տարածքից մեկնարկել է երթը դեպի հուշակոթող։

Լուսանկարները՝ Բերդի համայնքապետարանի։

Նոյեմբերյան համայնքում բնակիչները, համայնքային կառույցների ներկայացուցչները համայնքապետարանի մերձակայքից քայլերթով շարժվել են դեպի Սուրբ Սարգիս եկեղեցի, որտեղ մատուցվել է Սուրբ պատարագ։

Լուսանկարները՝ Նոյեմբերյանի համայնքապետարանի։

Դիլիջանում քաղաքի հուշարձանի հարակից տարածքում տեղի է ունեցել հիշատակի արարողություն։

Լուսանկարները՝ Դիլիջանի համայնքապետարանի։

Իջևան համայնքում ավարտվեց «Իջևան համայնքի ղեկավարի գավաթ» ֆուտբոլային առաջնությունը։ Մրցաշարին մասնակցելու հայտ էին ներկայացրել խոշորացված համայնքի 7 բնակավայրերից թիմեր՝ հանդես գալով 35-ից բարձր տարիքային խմբում։

Ապրիլի 22-ին տեղի ունեցավ առաջնության եզրափակիչ փուլը։ Լարված ու դիտարժան պայքարի արդյունքում երրորդ հորիզոնականը զբաղեցրեց Աչաջուր գյուղի թիմը։ Երկրորդ տեղը՝ Գետահովիտի թիմը, իսկ առաջնության հաղթող ճանաչվեց Իջևան քաղաքի թիմը։

Առաջնությունը կազմակերպել էր «Նիկարմ» ֆուտբոլային ակումբը՝ Իջևանի համայնքապետարանի հետ համատեղ՝ նպատակ ունենալով խթանել ֆուտբոլի զարգացումն ու մասսայականացումը համայնքում։

Տավուշի մարզի դատախազության կողմից իր լիազորությունների իրականացման ընթացքում պարզվել է, որ Ներքին գործերի նախարարության ոստիկանության ՔՈԳՎ Տավուշի մարզային վարչությունից հաղորդում է ներկայացվել այն մասին, որ Աչաջուր բնակավայրի նախկին ղեկավար Կ.Ղ.-ն համայնքային սեփականություն հանդիսացող մարզադաշտի՝ շուրջ 17 միլիոն դրամ շուկայականին մոտարկված կադաստրային արժեքով վարչական շենքն ապօրինի ձևափոխել է, առանձնացրել է 4 տաղավար և 2016 թվականից սկսած՝ տաղավարները վարձակալությամբ տրամադրել է տարբեր անձանց՝ համայնքի փոխարեն ստանալով վարձավճարը: Այս մասին հայտնում են ՀՀ Գլխավոր դատախազությունից։

«Տավուշի մարզի դատախազության կողմից ձեռնարկված ներգործության արդյունքում՝ մարզադաշտի վարչական շենքի տարածքը վերադարձվել է Իջևան խոշորացված համայնքի տիրապետմանը:

Նախաձեռնված քրեական վարույթն ընթացքի մեջ է», – նշված է Դատախազության հայտարարության մեջ։

Ապրիլի 11-ին, ժամը 22։42-ին Տավուշի մարզային օպերատիվ կառավարման կենտրոն ահազանգ է ստացվել, որ Իջևան քաղաքի շենքերից մեկի տանիքում հրդեհ է բռնկվել։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։

Պարզվել է, որ հրդեհը բռնկվել է Վալանսի փողոցի շենքերից մեկի տանիքում:

Հայտարարվել է հրդեհի բարդության «1 Բիս» աստիճան․ դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից ևս երկու մարտական հաշվարկ և ավտոսանդուղք։

Հրդեհը մեկուսացվել է ժամը 23:35-ին, մարվել՝ ապրիլի 12-ին, ժամը 00:30-ին: Այրվել են շենքի տանիքի փայտե կառուցատարրերը (մոտ 150 քմ)․ փրկարարները տարհանել են 25 բնակչի:

ԵՊՀ Իջևանի մասնաճյուղի Կիրառական արվեստի ֆակուլտետի ուսանողների և դասախոսների ստեղծագործությունները մեկ հարկի տակ՝ ստեղծագործական յուրահատուկ մթնոլորտում. Իջևանի «Վերնատուն» պատկերասրահում բացվեց նրանց աշխատանքների ցուցահանդեսը:

Ցուցահանդեսում ներկայացված էին տարբեր ժանրերի և ոճերի աշխատանքներ՝ գեղանկարչություն, դեկորատիվ-կիրառական արվեստ, ինչպես նաև ժամանակակից մոտեցումներով ստեղծված գործեր։ Մասնակիցները հնարավորություն ստացան ցուցադրելու իրենց ստեղծագործական ներուժը և կիսվելու այն լայն հանրության հետ։

Կազմակերպիչների խոսքով՝ նման նախաձեռնությունները կարևոր հարթակ են երիտասարդ արվեստագետների համար՝ ներկայանալու, փորձի փոխանակում իրականացնելու և նոր համագործակցություններ ձևավորելու տեսանկյունից։

Ցուցահանդեսը միավորել է տարբեր սերունդների ստեղծագործողների, ձևավորելով փորձի և գաղափարների յուրահատուկ երկխոսություն, որտեղ զգացվում է ինչպես դասախոսների մասնագիտական ձեռագիրը, այնպես էլ ուսանողների թարմ և համարձակ մոտեցումները։

Ցուցահանդեսը բաց կլինի մեկ ամիս, և արվեստասերները հնարավորություն կունենան այցելել ու ծանոթանալ ներկայացված աշխատանքներին, անմիջական շփման մեջ մտնել հեղինակների հետ և վայելել երիտասարդ արվեստագետների ստեղծագործական ուրույն մթնոլորտը: