Իջևանի մի խումբ երիտասարդներ վերջերս պատրաստել են մշակութային, գեղարվեստական տեսաֆիլմ, որը կոչվում է «Անտեսանելի թելեր». գրական տեսաֆիլմի ստեղծագործական անձնակազմը Տավուշ TV-ի տաղավարում է։

Տեսաֆիլմի գաղափարի, ստեղծման, ընթացքի, մի խոսքով՝ «Անտեսանելի թելերի» տեսանելի պատմության մասին Էռնեստ Խանումյանը զրուցել է տեսաֆիլմի ռեժիսոր-օպերատոր Ռազմիկ Անտոնյանի, ստեղծագործական կազմի անդամներ Վահե Շահենցի ու Արև Խաչատրյանի հետ:

«Անտեսանելի թելեր» տեսաֆիլմը ադեցիկ, միևնույն ժամանակ հուզող, մշակութաստեղծ ու նորարար գաղափարներով հագեցած հոլովակ է, որը կարող եք դիտել Տավուշ ՀԸ եթերում և սոցիալական հարթակներում։



«Քաղաքացիական երիտասարդական կենտրոն» համայնքային զարգացման ՀԿ-ն Ժուռնալիստների «Ասպարեզ»  ակումբի հետ համագործակցությամբ իրականացնում է հանրային իրազեկման ծրագիր, որի նպատակն է Հայաստանի հինգ մարզերում (Տավուշ, Գեղարքունիք, Վայոց Ձոր, Սյունիք, Արմավիր) քննարկել մանկապարտեզահասակ երեխաների համար մանկապարտեզների հասանելիության հիմնախնդիրը, լուծումներ գտնել այդ խնդրին և լուծման առաջարկություններ ներկայացնել ՀՀ կառավարությանը և ՀՀ ԿԳՄՍ նախարարությանը:

Համաձայն կառույցի նախնական ուսումնասիրությունների արդյունքների՝ մանկապարտեզների հասանելիությունը խիստ խտրական է Հայաստանում և խախտում է մանկապարտեզահասակ երեխաների գրեթե կեսի կրթության իրավունքը: Այսպես. Հայաստանում այդ տարիքի երեխաների 1/3-ը մանկապարտեզ հաճախում է անվճար (Երևանում), մյուս 1/3-ը մանկապարտեզ հաճախում է վճարովի հիմունքներով, ընդ որում ուսման վարձը տարբեր համայնքներում 2000-8500 դրամ է՝ կախված համայնքի բյուջետային հնարավորություններից: Այդ տարիքի երեխաների 1/3-ը մանկապարտեզ չի հաճախում, որովհետև այդ կամ մոտակա բնակավայրերում մանկապարտեզ չկա, կամ՝ ընտանիքը ուսման վարձ վճարել չի կարող: Ստացվում է, որ առաջին դասարան հաճախող երեխաների մի մասը նախնական կրթություն ունի, իսկ մյուս մասը՝ չունի, ինչը ազդում է դպրոցում ուսումնառության որակի և ուսման առաջադիմության վրա, դրանից բխող այլևայլ հետևանքներով:

Սրա հետ մեկտեղ մանկապարտեզից զրկված երեխաների ընտանիքներում ծնողներից մեկը, սովորաբար դա մայրն է, ստիպված է լինում մնալ տանը երեխային խնամելու՝ աշխատելու կամ լիարժեք աշխատելու փոխարեն: Փաստորեն, քիչ է, որ այդ ընտանիքի երեխան զրկված է նախնական կրթության հնարավորությունից, նաև այդ ընտանիքը զրկված է հնարավոր այլ եկամտից:

Անշուշտ,  Հայաստանի տարբեր մարզերում և համայնքներում դրությունը այս ոլորտում տարբեր է: Քաղաքացիական երիտասարդական կենտրոնը այդ տարբերությունները, իրադրությունը և լուծման ուղիները քննարկելու համար, կազմակերպում է հանրային քննարկում, որտեղ հրավիրվել են համայնքային և մարզային պաշտոնյաներ, կրթության ոլորտի մասնագետներ, ծնողներ, հասարակական գործիչներ, լրագրողներ և այլք:

Քննարկումը տեղի կունենա հուլիսի 20-ին, ժամը՝ 15:00-ին Իջևանի միջնակարգ երաժշտական դպրոցի դահլիճում (հասցե՝ ք. Իջևան, Ա.Մելիքբեկյան 1):

Վարդավառին ընդառաջ Իջևանում  նախատեսվում է եռօրյա մշակութային փառատոն-միջոցառում։ Ստեղծարար մոտեցմամբ ու տնտեսական մոտիվացիաներով համայնքային տոնակատարությունը ընդգրկելու է Իջևան քաղաքն ու Խաշթառակ, Աչաջուր, Բերքաբեր  բնակավայրերը։

Համաիջևանյան մշակութային միջոցառման նպատակների, ընթացքի և շատ այլ մանրամասների մասին Էռնեստ Խանումյանը զրուցել է Իջևանի համայնքապետարանի կրթության, մշակույթի, սպորտի ու երիտասարդության բաժնի ղեկավար Լիլիթ Ղալումյանի հետ։

Հրավիրում ենք բոլորին Իջևան՝ հուլիսի 20-ին մեկնարկող եռօրյա փառատոնին մասնակցելու և վայելելու մշակութային տոնակատարությունները։ 



«Հայաստանի էլեկտրական ցանցեր» փակ բաժնետիրական ընկերությունը տեղեկացնում է, որ հուլիսի 17-ին պլանային նորոգման աշխատանքներ իրականացնելու նպատակով ժամը 10:00-13:00 ժամանակավորապես կդադարեցվի Տավուշի մարզի Արծվաբերդ, Չինարի գյուղերի էլեկտրամատակարարումը: Սպառած էլեկտրաէներգիայի, անջատումների, Ձեր իրավունքներին կամ պարտականություններին վերաբերող, ինչպես նաև այլ հարցերի առնչությամբ կարող եք զանգահարել 1-80 և 0 8000 0 180 շուրջօրյա գործող հեռախոսահամարներով: «Հայաստանի էլեկտրական ցանցեր» ընկերությո…

«Պարն արտահայտում է յուրաքանչյուր ազգի բնորոշ գծերը, մանավանդ բարքն ու քաղաքակրթության աստիճանը». հույզեր, որ դառնում են բեմադրություններ. հետադարձ հայացք կամ համերգ-պատմություն: Հուլիսի 10-ին Իջևանում տեղի ունեցավ Դիլիջանի համայնքային կենտրոնի «Նազանի» համույթի Իջևանի մասնաճյուղի ամփոփիչ համերգը։ 

Համույթի սաները ազգային, հայկական-ժողովրդական, ինչպես նաև այլազգի բազմատեսակ պարերով զարդարեցին Իջևանի մշակույթի տունը, իսկ հուլիսի 13-ին Դիլիջանի ամֆիթատրոնը: Նազանի պարի համույթը հիմնադրվել է 2012 թվականին․ շուրջ 11 տարի է համույթն իր գործունեությունն է ծավալում Դիլիջան համայնքում, արդեն 2 տարի գործում է նաև Իջևանում: 

Երեխաները հաճախում են պարի Իջևան քաղաքից եւ հարակից գյուղերից: Համույթի ուսումնական ծրագիրը հնարավորություն է տալիս ուսման ողջ ընթացքում սովորել տարրական վարժություններ, բարդ ու ռիթմիկ պարեր:

Սաներն այս տարիների ընթացքում մասնակցել են բազմաթիվ միջոցառումների, միջազգային մրցույթ-փառատոնների եւ վերադարձել մրցանակներով:



Հայաստանի նկարիչների միության Տավուշի մասնաճյուղը բազմիցս նախաձեռնել և իրականացրել է տարբեր մշակութային ծրագրեր, միջազգային նկարչական սիմպոզիում և ցուցահանդեսներ թե Իջևանում, թե Դիլիջանում և թե Երևանում։ Միության կողմից կազմակերպված մանկական մրցույթների հաղթողների ցուցահանդեսն անց է կացվել Զվարթնոց օդանավակայանի պատկերասրահում։ Բոլոր միջոցառումներին մասնակցություն են ունեցել Տավուշի մարզի շնորհալի, տարբեր տարիքի ստեղծագործողներ։

Այս անգամ​ ևս ազդարարում ենք​ շատ կարևոր ցուցահանդեսի մասին, որի բացումը տեղի կունենա հուլիսի 19-ին, ժամը 15։00, Իջևան քաղաքում։ Տավուշի մարզի նկարիչների միասնական ցուցահանդեսին մարզի 4 տարածաշրջանների​ ստեղծագործող նկարիչ – արվեստագետներին կտրվի միմյանց հետ հանդիպելու և​ միասին​ ցուցադրվելու​ հնարավորություն։
Իսկ վայրը՝ շատ սպասված​ Իջևանի Վերնատուն​ պատկերասրահն է, որը վերանորոգումից հետո կրկին բացել է իր դռները նկարիչների առջև։​

Ցուցահանդեսը նվիրվում է Հայաստանի նկարիչների միության Տավուշի​ մասնաճյուղի​ բացման 4 – ամյակին, որտեղ 2019թ․ հուլիսի 19-ին կայացել է առաջին միասնական ցուցահանդեսը, որի կազմակերպիչն էր մասնաճյուղի հիմնադիր նախագահ Արմինե Թումանյանը։

Ցուցահանդեսի բացմանը ներկա կլինեն Հայաստանի նկարիչների միության նախագահ Սուրեն Սաֆարյանը և այլ հարգարժան հյուրեր։

ՀՕՖ-ի «Մարդիգյան կրթավճար» ծրագրին Իջևան և Նոյեմբերյան համայնքներից ՀՀ բուհեր ընդունված ուսանողների համար դիմումներն արդեն բաց են:

Մրցույթին կարող են մասնակցել բուհերի բակալավրի 1-ին կուրսի այն ուսանողները, որոնք,

ա) ընդունվել են՝

ԵՊՀ և մասնաճյուղեր – ֆիզիկայի, քիմիայի, ֆարմացիայի, կենսաբանության, սոցիոլոգիայի, ինֆորմատիկայի և կիրառական մաթեմատիկայի, մաթեմատիկայի և մեխանիկայի, հայ բանասիրության ֆակուլտետներ:

ՀԱՊՀ-Քոմփյութերային համակարգերի և ինֆորմատիկայի, մաթեմատիկայի ֆակուլտետներ:

ՀԱԱՀ-Ագրոբիզնեսի և շուկայաբանության, տնտեսագիտական, անասնաբուժական բժշկագիտության և անասնաբուծության, ագրոնոմիկայի, պարենամթերքի տեխնոլոգիաների ֆակուլտետներ:

ՀՊՄՀ- Սկզբնական կրթության, բանասիրական, պատմության և հասարակագիտության, կենսաբանության, քիմիայի և աշխարհագրության, կրթության հոգեբանության և սոցիոլոգիայի, մաթեմատիկայի, ֆիզիկայի և ինֆորմատիկայի, հատուկ և ներառական կրթության, օտար լեզուների ֆակուլտետներ:

բ) ունեցել են բարձր առաջադիմություն դպրոցում, միասնական և ԲՈՒՀ-ի քննությունները հանձնել են բարձր գնահատականներով և ընդունվել վճարովի ուսուցման համակարգ

գ) սոցիալապես անապահով ընտանիքներից են

դ) պարտավորվում են ուսման ավարտից հետո նվազագույնը 3 տարի ապրել և աշխատել Տավուշի մարզում:

Վերոհիշյալ պայմաններին համապատասխանող ուսանողները պետք է քննությունների ավարտից հետո`

2023թ. հուլիսի 18-ից օգոստոսի 10-ը ներառյալ ք. Երևան, Մովսես Խորենացի 2 հասցեում գտնվող ՀՕՖ-ի Հայաստանի մասնաճյուղ ներկայացնեն կամ էլ. փոստով edik.karapetyan@far.am և mane.khachatryan@far.am ուղարկեն հետևյալ փաստաթղթերը.

Դիմում (ձևը ստանալու համար կարող եք դիմել վերոհիշհայ հասցեներով կամ գրել ՀՕՖ-ի ֆեյսբուքյան էջին

• անձնագրի պատճեն, 1 լուսանկար (3×4 սմ չափսի)
• միջնակարգ կրթության վկայականի պատճեն
• միասնական քննությանների գնահատականի մասին տեղեկանք
• ԲՈՒՀ ընդունվելու մասին ՀՀ ԿԳՄՍ նախարարության ԳԹԿ-ի կողմից հաստատված ցուցակի պատճեն կամ ԲՈՒՀ-ի տեղեկանքը
• ընտանիքի անապահովության միավորի մասին տեղեկանք (առկայության դեպքում)
• տեղեկանք ծնողների աշխատավայրից` նրանց աշխատանքի և աշխատավարձի վերաբերյալ, եթե չեն աշխատում՝ տեղեկանք զբաղվածության տարածքային կենտրոնից կամ աշխատանքային գրքույկի պատճենը ծնողի կողմից գրված պարզաբանումով ներկա զբաղվածության կամ չաշխատելու պատճառի մասին
• հակիրճ ինքնակենսագրություն` նշելով, թե ինչու եք դիմել տվյալ ծրագրին

Թերի փաստաթղթերը չեն դիտարկվի:

Շահառուների ընտրությունը տեղի է ունենալու 2 փուլով.

Ներկայացված փաստաթղթերի դիտարկում:

Ուսանողների տուն կատարած այցերի արդյունքների ամփոփում:

Անհրաժեշտության դեպքում կիրականացվի հարցազրույց։ Ծրագրում ուսանողի ընդգրկման որոշումը կայացնելու է 0%-ի կրթական ծրագրերի հանձնաժողովը — օգոստոսի 29-ից 31-ը:

Լրացուցիչ տեղեկությունների համար կարող եք զանգահարել 060526660 հեռախոսահամարով:

Ավարտին է մոտենում Տավուշի մարզի «Լաստիվեր» տեղանքում Վեոլիա Ջուր ընկերության կողմից նոր ջրի մատակարարման համակարգի կառուցման աշխատանքները, ինչի շնորհիվ Իջևանը կստանա վայրկյանում 30 լիտր հավելյալ ջուր:

Ընդհանուր առմամբ քաղաքը ջուր է ստանում 28 մեծ ու փոքր աղբյուրներից, սակայն ամռան ու ձմռան սակավաջուր ամիսներին աղբյուրներից ջրի ելքը մեծ տատանումների է ենթարկվում: Օրինակ՝ Իջևանը սնող հիմնական «Անապատ» աղբյուրից ջրառը վայրկյանում 60 լիտրից կարող է նվազել մինչև 5 լիտրի, ինչը բնականաբար հանգեցնում է ջրամատակարարման անկանոնության ու անկայունության: Դրա համար ջրի սպառման պիկերին քաղաքին մատակարարվող ջրաքանակը ավելացնելու և Իջևանում հաստատուն ջրամատակարարում ապահովելու համար Վեոլիա Ջուրը քաղաքից 8 կմ հեռավորության վրա՝ Լաստիվերի «Պաղ ջուր» կոչվող գետակի վրա նախ կառուցեց նոր ջրընդունիչ, ապա չնայած լեռնային բարդ պայմաններին՝ կառուցեց նաև 2300 մետրանոց խողովակաշար, որով ջուրը գետակից հասցնելու է ջրի մաքրման կայան (ՋՄԿ)՝ վերամշակման և քլորացման: Նոր կառուցված համակարգը կհամարվի պահուստային նաև եղանակային արտակարգ իրավիճակների ժամանակ, ինչպիսին եղավ օրեր առաջ Իջևանում։

60 լիտր վայրկյան հզորությամբ Ջրի մաքրման կայանի շենքի շինարարական աշխատանքներն ավարտված են: Տեղադրված են արտասահմանից ներկրված գործարանային արտադրության մաքրման կառուցվածքները և ներկայումս ընթանում են դրանց կարգաբերման աշխատանքները: Ջրի նոր մաքրման կայանում կգործեն 30 լիտր վայրկյան հզորությամբ կվարցային ավազով մաքրող 2 ավտոմատ ֆիլտրեր, որոնցից մեկը մշտապես կգտնվի աշխատանքային վիճակում, իսկ երկրորդը կլինի պահուստային և կգործարկվի «Անապատ» աղբյուրից հոսող ջրերի պղտորման դեպքում:

Այս ամենի արդյունքում Իջևան քաղաքի բնակիչը կստանա որակյալ և մաքուր ջուր՝ անկախ եղանակային պայմաններից։ Ծրագրի իրականացման համար Վեոլիա ջուր ընկերությունը ծախսել է 205 մլն դրամ:

Ընկերության՝ Պարտադիր կապիտալ աշխատանքների 2023 թվականի ծրագրի հաջորդը կարևոր բաղադրիչը Իջևան քաղաքի Ասլանյան փողոցի և 13 փակուղիների ջրամատակարարման ցանցի վերակառուցումն է։ Ընդհանուր 1100 գծամետր ջրագծի փոխարինման աշխատանքներից հետո՝ 140 բաժանորդի ջրաչափեր կվերատեղադրվեն սահմանազատման կետում կառուցված ջրաչափական հորերում:

Շինաշխատանքները կավարտվեն օգոստոսի մեկին, ծրագրի ընդհանուր արժեքը կազմում է 49 մլն դրամ։ Վեոլիա Ջուր ընկերությունը վստահ է, որ համակարգի նորացման ու բարելավման արդյունքում բաժանորդները կունենան կայուն ու հուսալի ջրամատակարարում։

Հուլիսի 6-ին, ժամը 10:00-ից 15։00-ն ընկած ժամանակահատվածում, Տավուշի մարզի Իջևան համայնքի Կիրանց բնակավայրում անցկացվելու է «Օդային տագնապ ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում գործարկվելու է էլեկտրական շչակ: Խնդրում ենք չանհանգստանալ։

Իջևան քաղաքի «M» պարային համույթի սաները մասնակցում են   «Նոր ութերորդ հնչյուն 2023» արվեստի ու երաժշտության ամենամյա միջազգային մրցույթ-փառատոնին։

Քաղաքային լսումներից հետո պարզ դարձավ, որ ժամանակակից պարային ոճում «Մ» պարային համույթը 73 միավորով անցել է միջազգային փուլ։

Ընդհանուր հաշվով միջազգային փուլ է անցել պարային 4 համար, որոնցից երեքը պատկանում է այլ խմբի, իսկ ժամանակակից ոճից միջազգային փուլ է անցել ընդամենը մեկ համար, որը ներկայացնում է  «M» պարային համույթը։