Հայ Առաքելական եկեղեցին փետրվարի 11-ին նշել է Բարեկենդանի տոնը։ Բարեկենդան, որ բառացի նշանակում է բարի կենդանություն, ուրախություն, մարդու երջանկության հիշատակն է, որը դրախտում վայելում էին Ադամն ու Եվան: Այն նաև դրախտային կյանքի օրինակն է, որտեղ մարդուն արտոնված էր ճաշակել բոլոր պտուղները, բացառությամբ բարու և չարի գիտության ծառի պտղից, որը պահքի խորհրդանիշն է: Այդ օրը մարդիկ սգից անցնում են ուրախության, չարչարանքից` խաղաղության: Այս ընկալմամբ է, որ յուրաքանչյուր քրիստոնյա հոգու խոնարհումով, ապաշխարությամբ, պահքով և ողորմության հույսով սկսում է Մեծ պահքի ճանապարհը: Որպես ժողովրդական տոնախմբության օր` Բուն Բարեկենդանին, բնորոշ է կերուխում, տարբեր խաղեր՝ ձիարշավ, սրախաղ, թատերախաղ, տարբեր կենդանիների դիմակներով տոնախմբություն։

Իջևանում՝ համայնքի բնակիչները ու այլ մարզերից Տավուշ այցելած հյուրերի հետ միասին նշել են Բարեկենդանի տոնը «Թամզարա» մշակութային նախաձեռնության հերթական միջոցառման կյանքի կոչմամբ, որն ուղեկցվել է ազգային երգուպարով, խաղերով։

«Մընք մըրունցով հվաքվիցինք գյուղամիջումը, հըրսանիք արինք, ազգային պարեր պար եկանք, երգեցինք, հաղ-մաղ արինք, վերջում Խանփաշային էլ մի լավ տաս տըվինք։ Ամենավերջում էլ մըր տատըրի ու մամանըրի սարքած փսալին, խավիծը, կյաթեն, փախլավըն ու էլի լիքը լավ պաներ կըրանք․»

Սահմանամերձ Այգեձոր գյուղում ևս նշել են Բարեկենդանի տոնը։ Օրվա մասին մեզ պատմելու է Տավուշ Մեդիայի թղթակից Անահիտ Մակյանը։

Սիրելի հետևորդներ, կարող եք մեզ ուղարկել Բարեկենդանի տոնից լուսանկարներ ու տեսանյութեր, և դրանք կհայտնվեն մեր եթերում ու էջերում:

Բարեկենդանը ազգային ուրախ տոնակատարությամբ՝ երգերով, պարերով և իհարկե հետաքրքիր խաղերով նշելու նպատակով, փետրվարի 11-ին Իջևանում նախաձեռնվել է տոնին համահունչ միջոցառում։

Ազգային տոնը կնշվի «Վարը Վարենկ» համույթի և Իջևանի երիտասարդների կողմից ստեղծված «Թամզարա» մշակութային նախաձեռնության մասնակցությամբ։
Մեկնարկը ՝ ժամը 13։30-ին՝ Իջևանի Սուրբ Ամենափրկիչ եկեղեցու բակից, անմիջապես Սուրբ Պատարագից հետո։
Մուտքն ԱԶԱՏ է

Տավուշի մարզի Իջևան համայնքի Ազատամուտ բնակավայրի հարակից տարածքում հայտնաբերել են տասից ավելի ածխահորեր, 83 խմ տարբեր տեսակի հատված ծառեր, 335 պարկ արդեն պատրաստի վիճակում փայտածուխ։ Խախտումները հայտնաբերվել են Շրջակա միջավայրի նախարարության Էկոպարեկային ծառայության ներքին անվտանգության վարչության, Տավուշի մարզային վարչության Իջևանի տեղամասի և Ներքին գործերի նախարարության ոստիկանության Տավուշի մարզային վարչության ծառայողների կողմից իրականացված համատեղ աշխատանքների արդյունքում: Այս մասին տեղեկացնում է Շրջակա միջավայրի նախարարությունը:

Ըստ հաղորդագրության՝ հայտնաբերված փայտանյութի, ինչպես նաև ածխահորերի գործունեության օրինականությունը հավաստող փաստաթղթեր առկա չեն եղել: Ըստ Բնապահպանության և ընդերքի տեսչաական մարմնի Տավուշի տարածքային բաժնի կողմից կազմված արձանագրության՝ պետությանը պատճառված վնասի չափը նախնական տվյալներով կազմել է 3 միլիոն 287 հազար 990 դրամ:

Նախապատրաստված նյութերը փոխանցվել են Քննչական կոմիտեի Տավուշի մարզային քննչական վարչություն:

Փետրվարի 5-ին, ողբերգական ավտովթար է տեղի ունեցել Տավուշի մարզում։ Ժամը 09։00-ի սահմաններում Տավուշի մարզի բնակիչ 60-ամյա Ժորա Գ․-ն իր վարած Mitsubishi մակնիշի ավտոմեքենայով Ենոքավան բնակավայրի վերջնամասում, դեռևս անհայտ հանգամանքներում դուրս է եկել երթևեկելի գոտուց և մոտ 100 մետր գլորվելով բախվել ծառերին և հայտնվել ձորում, այս մասին հայտնում է ֆոտոլրագրող Գագիկ Շամշյանը։ Վթարի հետևանքով Ժորա Գ․-ն տեղում մահացել է։ Նրա դին դուրս են բերել գյուղացիները և մեծ դժվարությամբ պատգարակով մոտեցրել դիատարին։

Դեպքի վայր են ժամանել ՀՀ ներքին գործերի նախարարության ոստիկանության Տավուշի մարզային վարչության պետ Արթուր Մկրտչյանը, ոստիկանության Իջևանի բաժնի պետ Եփրեմ Գալստյանը։ Ժամանել են նաև ՀՀ ՆԳՆ ոստիկանության Պարեկային ծառայության Տավուշի մարզի գումարտակի 1-ին վաշտի պարեկները՝ գումարտակի հրամանատար Լևոն Մարտիրոսյանի գլխավորությամբ։ Տեղում ծառայություն են կատարել նույն վաշտի պարեկներ Մնացականյանը ու Գուլքանյանը։

Վթարի մասին ոստիկանության Իջևանի բաժնից տեղեկությունը փոխանցել են Հայաստանի Քննչական կոմիտեի Տավուշի մարզային քննչական վարչություն, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ։ Վթարի փաստով քննչական վարչությունում նախաձեռնվել է քրեական վարույթ:
Մահացածն աշխատում էր Ենոքավան բնակավայրի հիմնական դպրոցում՝ որպես ռազմագիտության ուսուցիչ։

Լուսանկարները՝ Եղիշե Պետրոսյանի

Սիրելի՛ տավուշցիներ, Տավուշ Մեդիան նախաձեռնել է նոր հաղորդաշար՝ «Քո իրավունքը»
Հետաքրքրաշարժ ու շատերիդ շահերն արտացոլող հաղորդաշարի շրջանակներում կներկայացվեն իրավունքի տարբեր ճյուղեր, դրանց մեջ կատարվելիք փոփոխություններ, իրավունքի բացեր, պրակտիկ իրավիճակներ, իրավական խնդիրներ (այդ թվում` Ձեր բարձրաձայնած) կտրվեն համապատասխան լուծումներ` իրավական նորմերի վերլուծության և հստակ մեկնաբանման համատեքստում։

Ձեզնից յուրաքանչյուրը պետք է գիտակցի, որ իրավունքը բարու և արդարության արվեստ է, Ձեր անքակտելի մասնիկը, ազատության, արդարության հավասարության համակցությունը։
Հաղորդաշարը կվարի տավուշցի իրավաբան-փաստաբան Վիկտորյա Սիմոնյանը, ով ավարտել է ԵՊՀ իրավագիտության ֆակուլտետը, ՀՀ պետական կառավարման ակադեմիան, ՀՀ փաստաբանների պալատի անդամ է, ունի պետական հիմնարկներում աշխատանքի փորձ:

Դուք պետք է իմանաք Ձեր իրավունքները, նաև՝ պարտականությունները: Կարող եք գրել՝ head@tavushmedia.am հասցեներին կամ զանգահարել՝ 055 01 04 01 հեռախոսահամարով:

Ձմեռը հալվել դարձել է առու,

Դարձել է առու, դարձել է վտակ․․․ Համո Սահյան

Փետրվարի 2-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Կիրանց բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում գործարկվելու է էլեկտրական շչակ:

Խնդրում ենք չանհանգստանալ։

Փետրվարի 1-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Աճարկուտ բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում գործարկվելու է էլեկտրական շչակ:

Խնդրում ենք չանհանգստանալ։

Հունվարի 31-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Լուսաձոր բնակավայրում անցկացվելու է ««Օդային տագնապ» ազդանշանի դեպքում բնակչության պատսպարումը» թեմայով վարժանք, որի ընթացքում գործարկվելու է էլեկտրական շչակ:

1992-ի այս օրը՝ հունվարի 28-ին, նորանկախ Հայաստանի Հանրապետության կառավարությունը ընդունեց «Հայաստանի Հանրապետության Պաշտպանության նախարարության մասին» որոշումը` դրանով իսկ իրավականորեն ազդարարելով Հայոց Ազգային բանակի կազմավորումը: Արդեն 32-րդ տարին է՝ Հայկական բանակը անցնելով փորձություններով, շարունակում է լինել Հայաստանի Հանրապետության անվտանգության երաշխավորը:

ՀՀ Զինված ուժերի կազմավորման 32-րդ տարեդարձի առթիվ հունվարի 27-ին Իջևանի քաղաքային Մշակույթի տունը նախաձեռնել էր միջոցառում։ Միջոցառումը մեկնարկեց 1 րոպե լռությամբ՝  ի հիշատակ բոլոր ժամանակներում իրենց կյանքը Հայրենիքի պաշտպանության համար զոհած տղաների։

Հայրենիքի պաշտպանության գործը անմնացորդ նվիրումով իրականացնելու համար Իջևանի համայնքապետի կողմից շնորհակալագրերով ու խրախուսական նվերներով պարգևատրվեցին ՀՀ ՊՆ N զորամասի մի շարք սպաներ ու զինծառայողներ։
Միջոցառմանը ներկայացվեց Հայոց բանակի կազմավորման ուղին, բանակի կերտած հաղթական ու փառապանծ դրվագները, ազգային, հայրենասիրական երգերով ու պարային ելույթներով հանդես եկան Իջևանի կրթամշակույթային կառույցների սաները: