Հայաստանի ֆուտբոլի մանկապատանեկան 2022-23 թվականի առաջնությունները ավարտված են․ Տավուշի մարզի ֆուտբոլային ակումբների ֆուտբոլիստները առաջնության ընթացքում գրանցել են հաջողություններ՝ արժանանալով մրցանակների։ 

Առաջնությանը մինչև 16 տարեկանների B խմբի լավագույն խաղացող է ճանաչվել Պավել Մելիքջանյանը, լավագույն ռմբարկու՝ Յուրի Հակոբյանը, իսկ մինչև 14 տարեկանների C խմբի լավագույն խաղացող է ճանաչվել Վալերի Դավթյանը։ Պատանի ֆուտբոլիստները մեզ հետ կիսվեցին իրենց տպավորություններով։ 

ՀՖՖ հատուկ մրցանակները լավագույններին հանձնեց անկապատանեկան մրցումների անցկացման պատասխանատուն․ Բաբկեն Ղալոյանի կարծիքով առաջնություններում մարզերի ներգրավման արդյունքում նոր ֆուտբոլային տաղանդներ են բացահայտվում։

Տավուշի ֆուտբոլային ակումբների տղաներն ու աղջիկները շարունակելու են մասնակցել ֆուտբոլային առաջնություններին․ պատանիները խոստանում են՝ գրավելու են ֆուտբոլային նոր բարձունքներ։

Հունիսի 30-ին տեղի ունացավ ԻննոԻջևան հանգույցի բացման պաշտոնական արարողությունը InnoFest 3-օրյա միջոցառման շրջանակում։
Բացմանը ներկա էին ՀՀ Տավուշի մարզպետ Հայկ Ղալումյանը, ՀՀ տարածքային կառավարման և ենթակառուցվածքների նախարար Գնել Սանոսյանը, ՀՀ էկոնոմիկայի նախարար Վահան Քերոբյանը, Իջևանի համայնքապետ Արթուր Ճաղարյանը, մարզպետի տեղակալ Նարեկ Ղուշչյանը, պաշտոնատար այլ անձինք, բազմաթիվ հյուրեր:

Պաշտոնական բացմանը և հանգույցի տարածքում շրջայցին հաջորդեց պանելային քննարկում՝ «Պետություն – մասնավոր երկխոսություն/Տավուշի մարզի տնտեսական արդիականացման հնարավորություններ և առկա խնդիրներ» խորագրով, որին մասնակցում էին միջազգային, պետական և մասնավոր հատվածի ներկայացուցիչներ։

Միջոցառման հիմնական նպատակն էր պետական և մասնավոր հատվածների միջև արդյունավետ երկխոսության միջոցով բացահայտել Տավուշի մարզի տնտեսական արդիականացման հեռանկարներն ու առկա խնդիրները, ինչպես նաև հանրայնացնել բիզնեսին ուղղված պետական աջակցության ծրագրերի շրջանակն ու հնարավորությունները։

ԻննոԻջևան ծրագիրն իրականացվում է Իջևանի համայնքապետարանի, ԱՏՁՄ-ի և COWO-ի կողմից՝ ԵՄ ֆինանսավորմամբ։

Իջևանի երաժշտական միջնակարգ դպրոցը ամփոփել է 2022-2023 ուսումնական տարին՝ ավանդույթ դարձած հաշվետու համերգ-միջոցառմամբ։

Անցնող տարվա ընթացքում երաժշտական դպրոցի սաները մասնակցել են մրցույթների ու փառատոնների, որոնց ընթացքում նշանակալից հաջողություններ են արձանագրել։ 

Միջոցառման ընթացքում հնչեց ազգային, ժողովրդական, հայրենասիրական երգ ու երաժշտություն՝ աշակերտների և ուսուցիչների կատարմամբ։ 

Անցող ուսումնական տարվա ընթացքում Իջևանի երաժշտական դպրոցը արժանացել է պատվոգրերի ու հատուկ մրցանակների՝ տարբեր միջոցառումների ժամանակ լավագույնս ներկայանալու համար

Հավատարիմ մնալով կարպետ կտրելու ավանդույթի արարողությանը, հունիսի 23-ին Տավուշի թեմի առաջնորդարանում գործող «Թելիկ» կենտրոնում տեղի ունեցավ գորգ կտրելու խորհրդավոր արարողղությունը։ Հերթական գորգը «Թելիկ» կենտրոնի ստեղծագործող կանանց ձեռքի աշխատանքն էր։ 

Գորգ կտրելու արարողությանը հաջորդեց տավուշյան գինու ավանդական խմորեղենի համտեսը, երեկոյի հատուկ հյուրն էր «Հատիկ» բենդը։ 

Թելիկ կենտրոնը ավանդական ձեռագործի ճյուղերի ուսուցման և զարգացման միջոցով տեղացի կանանց համար ապահովում է արժանապատիվ աշխատանք։ Կենտրոնում արարվում են կարպետներ, որոնք ունեն դարերի պատմություն։ «Թելիկի» աշխատանքի շնորհիվ մոռացության մատնված կարպետները վերածնվում և ներկայանում են նորովի։

Տավուշի թեմի առաջնորդ Տեր Բագրատ արքեպիսկոպոս Գալստանյանի «Ավետյաց երկրի տեսիլքով» գրքի երկրորդ՝ իջևանյան շնորհանդեսը տեղի ունեցավ հունիսի 25-ին։ Գիրքը պարզ և անկեղծ զրույցների շարք է՝ այժմյան դառն իրականության և գողացված ուրախության ժամանակաշրջանում՝ մեր անցած ճանապարհի և անելիքների մասին՝ հիմնված Աստվածաշնչի պատգամների վրա։ Շնորհանդեսը գրքի պանելային քննարկման ձևաչափով էր․ քննարկման բանախոսներն էին բանասիրական գիտությունների թեկնածու Մուշեղ Սարուխանյանը և պատմաբան Վլադիմիր Պողոսյանը։ 

Ներկաները իրենց մտքերը կիսեցին գրքի վերաբերյալ,կրկին արձանագրելով՝ այսօրվա ինքնության ճգնաժանի մեջ այս գիրքը մեր երազների երկիրը կառուցելու մեծ ճանապարհի առաջին քայլը կարող է դառնալ։Ավետյաց Երկիրը մեր բոլոր իղձերի և ձգտումների, երջանկության և անսպառ ուրախության մեծ տունն է, որը կառուցելու ճանապարհի մեջ կոչված է լինել յուրաքանչյուր հայ՝ որպես առանձին անձ, և որպես հավաքականություն՝ ազգ ու ժողովուրդ: Գրքում ուրվագծվում են մեր իսկատիպ նկարագիրը, բացառիկ ինքնությունը և մղում մեզ ապրելու Ավետյաց Երկիրը կառուցելու տեսիլքով, որը հայ ժողովրդի երազանքն ու ձգտումն է: 

Գրքի քննարկումները հաջորդաբար կայանալու են Տավուշի բոլոր համայնքներում․ գիրքը վաճառվում է Իջևանի Սուրբ Ներսես Շնորհալի եկեղեցում և առցանց գրախանութներում։

Արտահերթ նիստի օրակարգի հարցերը վերաբերում էին Իջևան համայնքի վարչական տարածքում գտնվող հողամասերի նշանակության փոփոխությանը, ինքնակամ շինությունների և ինքնակամ օգտագործվող հողամասերին իրավական կարգավիճակի տրմանը,
համայնքի վարչական և ֆոնդային բյուջեներում փոփոխություն կատարելուն:

Համայնքի ավագանին նիստում որոշեց նաև աջակցել «Հույսի կամուրջ» հասարակական կազմակերպության Իջևանի մասնաճյուղին` հենաշարժողական խնդիրներ ունեցող երեխաներին ֆիզիկական վերականգնողական և օկուպացիոն թերապիաներից օգտվելու հնարավորություն ստանալու համար: «Հույսի կամուրջ» ՀԿ Իջևանի մասնաճյուղի տնօրենը ավագանու անդամներին տեղեկացրեց, որ Իջևան համայնքի քաղաքային և գյուղական բնակավայրերի 111 երեխա ճանապարհածախսի պատճառով զրկված է վերականգնողական թերապիաներ ստանալու հնարավորությունից:

Ավագանու որոշմամբ` համայնքի բյուջեից 500 000 դրամ (հինգ հարյուր հազար դրամ) հատկացվեց երեխաների տեղափոխման խնդիրները լուծելու նպատակով:

Հայաստանի Հանրապետությունում մեկնարկել է 2023 թվականի ամառային զորակոչը: Իջևանից պարտադիր ժամկետային զինվորական ծառայության մեկնեց նորակոչիկների հերթական խումբը` համալրելու հայոց բանակի շարքերը, պարտքը տալու սրբազան հայրենիքին և կատարելու սահմանադրորեն ամրագրված իրենց պարտականությունը:

Նրանց բանակ ճանապարհելու էին եկել Իջևանի համայնքապետարանի աշխատակիցները, ովքեր առաջին անհրաժեշտության պարագաներով լի փաթեթներ հանձնեցին նորակոչիկներին։

Իջևանում հորդառատ անձրևի, երկարատև կարկտահարության ու ուժգին քամու հետևանքով ստեղծված իրավիճակի հետևանքների վերացման նպատակով Իջևանի համայնքապետարանի Կոմունալ ծառայության ողջ անձնակազմը երրորդ օրն է շարունակում է ինտենսիվ աշխատանքները։ բնական երևույթների վտանգավոր զարգացումների հետևանքով իրավիճակի, ինչպես նաև ֆիզիկական և իրավաբանական անձանց պատճառված վնասների ու կարիքների գնահատման գործընթացի շրջանակում համայնքապետարանի աշխատանքային խմբերը շրջում են Իջևանի թաղամասերում, կատարում վնասների հավաքագրում:

Վնասները հատկապես եղել են Իջևան քաղաքի Սահմանադրության հրապարակում, Վալանսի, Իջևանյան, Մելիքբեկյան, Օհանյան, Սպանդարյան ու Ասլանյան փողոցներում։ Վնասվել են բնակիչների բերքատու տնամերձ այգիները, մշակաբույսերի ցանքատարածություններ, վթարներ են գրանցվել կոմունալ-էներգետիկ համակարգերում:

Այս արտակարգ օրերին Տավուշ Մեդիան համագործակցելով մարզային և համայնքային իշխանությունների հետ, ձեզ համար պատրաստել է օպերատիվ, անհրաժեշտ, հավաստի և օգտակար տեղեկություններ պարունակող Արտակարգ տեղեկագիր՝ տեքստային, ֆոտո ու տեսա շտեմարան:Ստեղծված Իրավիճակի, հետևանքների, կարիքների, կատարած ու կատարելիք աշխատանքների մասին տեղեկանալու, և Տավուշի մարզին սպառնացող աղետների ու դրանց ռիսկերի նվազեցմանը կարող եք ծանոթանալ այցելելով www.tavushmedia.am կայք: Դիտեք, լսեք, կարդացեք ու եղեք իրազեկված: Ով իրազեկված է, նա պաշտպանված է:

Հունիսի 22-ին, ժամը 13։57-ին Ճգնաժամային կառավարման ազգային կենտրոն ահազանգ է ստացվել, որ Երևան-Նոյեմբերյան ավտոճանապարհին՝ Ներքին Ծաղկավան գյուղի մոտակայքում, տեղի է ունեցել ՃՏՊ. կան տուժածներ:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Իջևան-Նոյեմբերյան ավտոճանապարհի 21-րդ կմ-ին բախվել են «Mercedes-Benz» մակնիշի ավտոմեքենան (վարորդ՝ Ն. Մ., ծնված 1993 թ.) և «Volkswagen» մակնիշի միկրոավտոբուսը (վարորդ՝ Կ. Հ., ծնված 1965 թ․). վերջինիս ուղևորներ Հ. Մ.-ն (ծնված 1972 թ․), Ա. Ն.-ն (ծնված 1982 թ․), Կ. Մ.-ն (ծնված 1979 թ․), Է. Ու.-ն (ծնված 1983 թ․), Լ. Ո.-ն (ծնված 2003 թ․) և «Mercedes-Benz» մակնիշի ավտոմեքենայի ուղևոր Ռ. Շ.-ն (ծնված 1969 թ․) հոսպիտալացվել են Իջևանի ԲԿ, որտեղ բժիշկները տուժածների առողջական վիճակը գնահատել են բավարար:

Փրկարարները հոսանքազրկել են ավտոմեքենաները, փակել «Mercedes-Benz» մակնիշի ավտոմեքենայի գազի բալոնի փականը և սահմանազատել տարածքը: