Ձեզ համար ամանորյա «պայոկ» ենք բերել՝ «Մեր բարբառն ու բարքերը» հաղորդաշարի Նոր տարվա՝ մադարինի բույրով թողարկումը։

Տավուշ TV-ի եթերում Հրանտ Ղազումյանի հետ քննարկում ենք ամանորյա լեգենդար արտահայտությունները, սնահավատությունները, ընդունված «ձևերը» և տոնի իրական բովանդակությունը։ Միանում եք, չէ՞։

Տարին ավանդաբար ամփոփում ենք նաև հաղորդաշարի չստացված (կամ էլ՝ ամենաստացված) կադրերով։

«Արմավիրի զարգացման կենտրոն» հասարակական կազմակերպությունը Տավուշի և Գեղարքունիքի մարզերում իրականացնում է «Կանայք, խաղաղություն և անվտանգություն» օրակարգի հանրայնացման բարձրացում՝ միջոլորտային գործընկերության և համայնքային ներգրավվածության միջոցով» ծրագիրը։ Ծրագիրն իրականացվում է Մեծ Բրիտանիայի և Հյուսիսային Իռլանդիայի Միացյալ Թագավորության կառավարության ֆինանսական աջակցությամբ՝ «Պատերազմի և խաղաղության լուսաբանման ինստիտուտի» կողմից տրամադրված ենթադրամաշնորհի միջոցով: 

Հայաստանի Հանրապետությունը մշակել է Միավորված ազգերի կազմակերպության Անվտանգության խորհրդի 1325 բանաձևի իրականացման վերաբերյալ գործողությունների ազգային երկրորդ ծրագիրը` դրանով իսկ վերահաստատելով իր պատրաստակամությունը՝ շարունակելու աշխատանքները «Կանայք, խաղաղություն և անվտանգություն» թեմայով: ՄԱԿ -ի Անվտանգության խորհրդի կողմից 1325 բանաձևն ընդունվել է 2000թ․ հոկտեմբերի 31 -ին՝ միաձայն։ Այս բանաձևը վերահաստատում է կանանց կարևոր դերը հակամարտությունների կանխարգելման և լուծման, բանակցային, խաղաղաշինական, մարդասիրական օգնության տրամադրման, որոշումների կայացման և հետպատերազմական վերակառուցման գործընթացներում։

Արմավիրի զարգացման կոնտրոնի կողմից իրականացվող ծրագրի հիմնական նպատակն է նպաստել «Կանայք, խաղաղություն և անվտանգություն» օրակարգի հանրայնացմանը  նաև մարզային մակարդակում։ 

Ծրագրի շրջանակում Իջևան և Վարդենիս համայնքներում կատարվել է կարիքների վերհանում՝ ֆոկուս խմբային քննարկման միջոցով, որից հետո նոյեմբերի 24-ից մեկնարկել է Իջևանի և Վարդենիսի համայնքապետարանների աշխատակիցների, քաղհասարակության ու մեդիա ոլորտի ներկայացուցիչների հանդիպումը Հանքավանում՝ եռօրյա դասընթացի շրջանակներում: Հաշվի առնելով համայնքների սահամանամերձ լինելու փաստը՝ Իջևանն ու Վարդենիսը  ներգրավվել են ծրագրում։ Սա պիլոտային ծրագիր է նշված երկու համայքների համար, որոնք «Կանայք, խաղաղություն և անվտանգություն» օրակարգում կունենան մշակված ռազմավարություն՝ կանանց համար համայնքն ավելի անվտանգ դարձնելով։

Եռօրյա հանդիպման առաջին օրը մասնակիցներին ողջունեց Հայաստանում Միացյալ Թագավորության դեսպանը: Ջոն Գալագերն իր խոսքում կարևորեց «Կանայք, խաղաղություն և անվտանգություն» օրակարգում գենդերային հավասարությունը, բռնության դեմ պայքարը և կանանց ներգրավումը Կ«Կանայք, խաղաղություն և անվտանգություն» օրակարգում: Դեսպանն ընդգծեց նաև մարդու իրավունքների պաշտպանության, հակամարտությունների կարգավորման, բռնությունների կանխարգելման ու ճգնաժամային կառավարման գործընթացներում տեղական ինքնակառավարման մարմինների, քաղհասարակության ու լրատվամիջոցների համատեղ աշխատանքի կարևորությունը:  Եռօրյա դասընթացի նպատակն էր ամրապնդել ծրագրի մասին մասնակիցների գիտելիքները, խթանել համայնքներում օրակարգի իրականացումը:

Դասընթացի ընթացքում մասնակիցները ծանոթացան և ամրապնդեցին  իրենց գիտելիքները մարդու իրավունքների, տեղական և միջազգային փաստաթղթերում կանանց իրավահավասարության դրույթների մասին: Դասընթացն ուղեկցվել է ինչպես տեսական, այնպես էլ գործնական վարժություններով:

Ծրագրի ղեկավարի խոսքով՝ տեղական ինքնակառավարման մարմինները, քաղհասարակության ու մեդիա ոլորտի աշխատակիցները մարզերում կարևոր դերակատարություն ունեն:

Դասընթացի ավարտից հետո Իջևան և Վարդենիս համայնքներում կազմակերպվելու են հանրային լսումներ՝ «Կանայք, խաղաղություն և անվտանգություն» օրակարգի տեղայնացման թեմայով: 

Այս տարվա վերջին և նախաամանորյա «Մակարդակով կոֆե»-ին հրավիրված են Տավուշում գործունեություն ծավալող յուրահատուկ անունով և ասելիքով Հատիկ բենդի անդամները։ 

Աշոտ Մանուչարյանը, Մխիթար Ամիրխանյանը, Գուրգեն Դալյանը և Արտակ Մադաթյանը պատմում են ինչպես բենդի, խնջույքներին միշտ «լսվող» երաժշտությանն այլընտրանք դառնալու, այնպես էլ մարզում արվեստի զարգացման, կարծրատիպեր կոտրելու և Տավուշի՝ «թունելից դեսը աշխարհի» մասին։ 

Իջևանից մինչև Ֆրանսիա, երգչից մինչև դիզայներ. սա Միքայել Սիմոնյանի ճանապարհն է իր մասնագիտական ու աշխարհագրական կողմնորոշումներով։ Միքայելը կամ, ինչպես իրեն հաճախ դիմում են, Միշան ծնունդով Իջևանից է, կարծրատիպեր կոտրել ու գնալ սեփական որոշման հետևից սկսել է դեռ մանկուց։ Միշան  հենաշարժողական խնդիր ունի, և դեռ մանկուց հասակակիցների հայացքներն ու երբեմն հարցերը իրեն սովորեցրել են լինել ուժեղ ու առավել նպատակասլաց։

«Եթե չունես ներքին ընկալում, այսինքն՝ չես ճանաչում ու ընդունում ինքդ քեզ, մարդկանց կարծիքները կարող են անիրական պատկերացումներ տան ինքդ քո մասին։ Երբ ես փոքր էի՝  4-6 տարեկան, հիշում եմ՝  հասակակիցներիս հարցերն ու հետաքրքրությունը կոմպլեքսներ էին ստեղծում այդ տարիքում, ես ինձ տարբեր էի զգում իրենցից. երևի այդպես է՝ մինչև մարդուն չես ասում իր՝ «ոչ սովորական» լինելու մասին, ինքն այդ ուղղությամբ չի էլ մտածում։ Կոմպլեքսները առավել կարծրանում են հասարակության կողմից ցուցաբերվող ավելորդ խղճահարության, նաև անհասկանալի էմոցիաների արդյունքում: Կյանքի որակը ևս ազդում է ինքնագնահատականի վրա, օրինակ՝  չունենալ հասանելիություն  տրանսպորտի կամ շատ այլ բաների, որոնք մյուսների համար սովորական են»,- նշում է Միքայելը։ 

Հասարակական ոլորտը սկզբնակետերից է եղել, որտեղից էլ սկսել է բացահայտել աշխարհն ու ինքն իրեն. նշում է Միքայելը։ Սկսել է երգարվեստով զբաղվել ու մասնակցել փառատոնների՝ այսպիսով կոտրելով հարազատ քաղաքում՝ Իջևանում եղած կարծրատիպերը։

«Մարդիկ տեսնում էին հենաշարժողական խնդրով երեխայի, իսկ մյուս կողմից մարդը,  որը կարող է երգել, այսինքն՝  մարդուն նոր կարողությամբ։ Չնայած իմ բնավորությունն է հենց այդպիսին. ես պետք է միշտ բեմում՝ ուշադրության կենտրոնում լինեմ կամ ինչ-որ արվեստի ճյուղով զբաղվեմ, ստեղծեմ ինչ-որ նոր բան։ Հանրային ելույթները ևս այս ամենի անբաժանելի մասն են կազմել, ես դեռ 15-16 տարեկան էի, երբ առաջին անգամ մասնակցեցի երկրից դուրս միջազգային կոնֆերանսի ՅՈՒՆԻՍԵՖ-ի կողմից կազմակերպված երեխաների իրավունքները թեմայով, որտեղ պետք է ներկայացնեի իմ իրավունքներն ու խոսեի իմ մասին»:

Ինչպես ինքն է նշում՝ բոլոր այն կազմակերպությունները, որտեղ պետք էր խոսել հաշմանդամություն ունեցող անձանց իրավունքների ու կարծրատիպերի դեմ պայքարի մասին, ուրեմն, Միքայելն այնտեղ էր։ Բայց այս ամենն իրականություն դարձնելը առավել բարդ է լինում, եթե չկա աջակցություն ընտանիքի կողմից. նշում է Միքայելը։

«Ինձ թվում է՝ հենց ամենակարևոր ու դրական ազդեցություններից մեկը հենց ընտանիքում եղածն է։ Ես նաև երկու ավագ քույր ունեմ, նրանցից մեկը հիմա ներառական ոլորտում է աշխատում։ Կարծրատիպային ու սահմանափակ մտածելակերպը երբեք մեր ընտանիքում չի եղել, որ այս կամ այն բանը դու չես կարող անել, ինձ վերաբերվել են ինչպես հավասարը հավասարին։ Նույնիսկ երբ ես 11 տարեկանում առաջին անգամ ստացա հրավեր Ավստրիա գնալու, շատ ծնողների համար, անկախ նրանից, երեխան հաշմանդամություն ունի թե ոչ, ճանապարհել օտար երկիր շատ մեծ խնդիր է։ Նույնիսկ այդ տարիքում ծնողներիս ու իմ մեջ եղած վստահությունը թույլ տվեց ինձ շրջագայել Հայաստանից դուրս։  Իրենց վստահությունը ինձ շատ օգնեց, սովորեցրեց անկախ ու ինքնուրույն լինել։ Օգնություն, իհարկե, բոլորին ու տարբեր տարիքում պետք է, բայց պետք չէ հույս դնել ինչ-որ մեկի վրա ու կախվածություն ունենալ նրանից»:

Փոքր տարիքից անկախ՝ ապրելու փորձը Միքայելին 16 տարեկանում տանում է դեպի միջազգային դպրոց, հետո կրկին հայրենիքի սահմաններից դուրս։ ԱՄՆ-ում սովորում է արվեստի բաժնում չորս տարի և հետ վերադառնում Հայաստան, հիմնում նորաձևության առցանց հարթակը՝ «mischashop.com»-ը։ Դե իսկ, հաջորդ կանգառը աշխարհին հայտնի նորաձևության կենտրոն Ֆրանսիան ու սիրո մայրաքաղաք Փարիզն է, որը թեև դժվարություններով, բայց գրկաբաց է ընդունում Միքայելին, որտեղ էլ իր բրենդը՝ «MISCHA APHRODISIAC»-ը նոր կյանք է ստանում։

«Ես երբեք ինձ չեմ սահմանափակում միայն երգելով, նկարելով կամ ինչ- որ այլ բանով. Կարևորը ստեղծագործելն է, իսկ դա ես կարող եմ. այն ինձ էներգիա է տալիս, ու ես դրանից հաճույք եմ ստանում։ Ֆրանսիայում՝ իմ փոքրիկ աշխատասենյակում, մոդելավորեցի ու կարեցի նոր «Omission»-ը՝ 20 կտորից բաղկացած հավաքածուն։ Այստեղ հայելիներով դահլիճ կար, խնդրեցի տրամադրել ցուցադրության համար, և ոչ մի հավելյալ գովազդ այդ մասին, ընդամենը մեկ համեստ պաստառ ունեի։ Երբ դեռ հետնաբեմում մոդելներին էին պատրաստում ներկայանալուն, ընկերներից մեկը մոտեցավ ու ասաց՝ դու չես պատկերացնում ինչ է կատարվում այնտեղ՝ դահլիճում։ Երբ դուրս եկա, տեսա դահլիճը լեփ-լեցուն էր, 300 տեղ ունեցող դահլիճում արդեն տեղ չկար, իսկ դրսում 100-ից ավելի մարդիկ կային, որոնք չէին կարողանում ներս մտնել»,- նշում է Միքայելն ու համեստորեն պատճառաբանում, թե դա այն պատճառով էր, որ Ֆրանսիայում բոլորն են տրված նորաձևության մոլուցքով։

Իր խոսքով՝  այն պատկերացումները, թե Եվրոպան շատ ներառական է, հարկ է նշել, որ նորաձևություն մուտք գործել, ունենալով հաշմանդամություն, այդքան էլ հեշտ չէ, քանի որ այս ոլորտում ամեն ինչ հիմնված է չակերտավոր, ֆանտաստիկ ստանդարտների ու կատարելության վրա, որն իրականում գոյություն չունի։

Ամփոփելով զրույցը՝  Միքայելին հարցնում եմ , թե ի՞նչ խորհուրդ կտա հասարակությանն ու բոլոր այն մարդկանց, որոնք ունեն հաշմանդամություն  ու կամա թե ակամա անցնելու են, եթե ոչ գրեթե նույն, գոնե նման ճանապարհով։

Ֆրանսիա, Փարիզ։ Լուսանկարում Միքայելի մոդելավորած հագուստների ցուցադրությունն է

«Հաշմանդամություն ունեցողն էլ, չունեցողն էլ պետք է հասկանա, որ մենք նույն մարդիկն ենք ու ունենք նույն ապրելու, երազելու, սովորելու ու երջանիկ լինելու իրավունքը,  այսինքն՝  մենք տարբեր մոլորակներից չենք, և տեղափոխվելով Ֆրանսիա ու շարունակելով հաղթահարել տարբեր դժվարություններ՝  ես ունեմ մեկ կարգախոս՝ ես ընտրում եմ ինքս»։

Ընտանիքի կողմից աջակցությունը, Միքայելի ունեցած նպատակասլացությունը և կամքը այս հաջողված պատմության հիմքն ու կոտրվող կարծրատիպերի գրավականն են, ինչն էլ հույս է հայտնում, որ մի օր հասարակության կողմից ստեղծված կարծրատիպերի բուրգը կփլուզվի։

Սկզբնաղբյուր ՝ Ներառական իրավական բարեփոխումների կոալիցիայի կայք

Տավուշի, Լոռու և Շիրակի մարզերում աղքատության, սոցիալական ծառայությունների բյուջետային քաղաքականության վերաբերյալ իրականացված հետազոտությունների արդյունքները դեկտեմբերի 9-ին ներկայացվեցին Տավուշի մարզպետարանում՝ «Բազմաչափ աղքատություն. թվեր, համայնքներ, պատկերներ» տվյալների ցուցահանդեսին:

Եվրոպական միության ֆինանսավորմամբ իրականացվող «Աղքատության նվազեցում համայնքներում. կիրառական մոտեցումներ» եռամյա ծրագրի միջոցով փորձ է արվում որոշարկել աղքատության բազմաչափ դրսևորումները` նպաստելով տեղական ինքնակառավարման մարմինների եւ համայնքային կազմակերպությունների` աղքատությունը հասցեագրելու կարողությունների զարգացմանը: Ծրագիրը հետազոտահեն միջամտություն է, որի նպատակն է մեղմել աղքատության պատճառները և հետևանքները Լոռու, Շիրակի եւ Տավուշի մարզերում: Ծրագիրը նպատակ ունի նաև, հյուսիսային երեք մարզերի համայնքային փորձը հաշվի առնելով, առաջարկել աղքատության նվազեցմանն ուղղված մոտեցումներ ողջ հանրապետության համար: 

Ներկայացվող հետազոտությունները կատարված են «Հետազոտական ռեսուրսների կովկասյան կենտրոն-Հայաստան» հիմնադրամի կողմից իրականացված «Համայնքային մակարդակում բազմաչափ աղքատությունը Հայաստանում» նախագծի շրջանակներում, որի ընտրության ծավալը թույլ է տալիս հանրապետությունում առաջին անգամ կառուցել բազմաչափ աղքատության ինդեքսը համայնքային մակարդակում:

Ծրագիրն իրականացվում է «Հետազոտական ռեսուրսների կովկասյան կենտրոն-Հայաստան» հիմնադրամի, «Եվրասիա» համագործակցության հիմնադրամի, «Տնտեսական զարգացման եւ հետազոտությունների կենտրոնի» և «Հրանտ Մաթևոսյան» հիմնադրամի կողմից:

Դեկտեմբերի 8-ից 21-ն ընկած ժամանակահատվածում ցուցահանդեսը կայանալու է նաև Վանաձորում, Գյումրիում եւ Երևանում։

Դեկտեմբերի 5-10-ը ԱԻՆ ՓԾ Ճգնաժամային կառավարման ազգային կենտրոնում ստացվել է 6 ահազանգ՝ հանրապետության տարբեր տարածքներում տեղի ունեցած ճանապարհատրանսպորտային պատահարների վերաբերյալ:

Մասնավորապես՝ Երևանում, Տավուշի մարզի Իջևան քաղաքում, Դիլիջան-Վանաձոր և Մարտունի-Վարդենիս ավտոճանապարհներին։

Դեպքի վայր ժամանած փրկարարները հոսանքազրկել են ավտոմեքենաները, փակել գազի բալոնների փականները, կատարել ճանապարհի լվացման աշխատանքներ և սահմանազատել տարածքը։

Եվ այսպես՝ էսօր նորից պիրել ենք մեր թափ-թյազա թողարկումը ծեզ պահ տանք։ Չհասկացա՞ք՝ հոգ չէ, հաղորդման մեջ ամեն ինչ կբացատրենք։

Իսկ եթե հասկացաք՝ ավելի լավ, շարունակե՛ք դիտել, քանի որ արդեն եթերում է Հրանտ Ղազումյանի հեղինակային «Մեր բարբառն ու բարքերը» հաղորդաշարի հերթական թողարկումը։

Դե, իսկ այսօրվա թողարկմանը խոսելու ենք տրամաբանականի ու անտրամաբանականի, կարելիի ու չի կարելիի, հայկականի ու օտարի՝ մեր բարքերում տեղ գտած «սահմանների» մասին։ Կարճ ասած՝ այս մեկը երկար մտածելու թողարկում է։

Հաղորդման ընթացքում ծանոթանալու ենք նաև Հրանտենց տան ավանդական «փաստաթղթերի դարակի» պարունակությանն ու սպասենք, որ ձերի մասին էլ դուք պատմեք մեզ։

Գնացի՞նք․․․

Կարևոր զրույցներ հույսի, կամքի և գործի մասին. նոյեմբերի 22-ին ԵՊՀ Իջևանի մասնաճյուղում կազմակերպվեց համայնքային միջոցառում ՝ TED զրույցների ֆորմատով: «Ամերիկյան գրադարան և դասընթացների կենտրոնի» գործունեության շրջանակում արդեն 2-րդ անգամ է կազմակերպվում նման միջոցառում:

Միջոցառման խոսնակներն իրենց ելույթների ժամանակ անդրադարձան հիմնականում 2 թեմաների՝ խոսելով սոցիալական ներառման և հավասարության կարևորության ու անհատի նախաձեռնության կարևորության մասին:

Հրավիրված էին կյանքում դժվարությունների հանդիպած ու կայացած անձինք, ովքեր ունեն հանրային մեծ ճանաչում։ Խոսնակներն էին Լադիսլավ Բերանեկը, Գևորգ Սիմոնյանը, Նարինե Գրիգորյանը, Սարգիս Ստեփանյանը, Սիրարփի Մուղդուսյանը: 

Միջոցառմանը ներկա էին ԵՊՀ ԻՄ ուսանողները, ովքեր իրենց հետաքրքրող հարցերն ուղղեցին խոսնակներին: Հանդիպման վերջում շնորհակալագրեր հանձնվեցին խոսնակներին:

«Ամերիկյան գրադարն և դասընթացների կենտրոնը» գործում է արդեն 3 տարի․ կենտրոնը հարթակ է սոցիալական ու տեխնիկական հմտությունների զարգացման և նոր կարողությունների ձեռքբերման համար:

ՄԱԿ-ի Պարենի և գյուղատնտեսության կազմակերպությունը շարունակում է Եվրոպական միության ֆինասավորմամբ աջակցել հայ ընտանիքներին: Դեկտեմբերի 2-ին փոքր գյուղատնտեսական տեխնիկա է տրամադրվել Տավուշի մարզի Իջևան ու Բերդ համայնքների 25 բնակավայրերի տնտեսվարողներին, ովքեր ներգրավված են տեղական ակտիվ խմբերում: Տրամադրված տեխնիկան ներառում է երկանիվ տրակտորներ, հողաֆրեզներ, ռոտացիոն հնձիչներ, էլեկտրական սրսկիչներ, դիզելային գեներատորներ և եռակցման սարքեր:

Աջակցությունը ցուցաբերվել է «Տեղական դերակատարների զորողացում՝ հանուն զարգացման Լոռու և Տավուշի մարզերում» ծրագրի շրջանակում, որն իրականացվում է Եվրոպական Միության ֆինասավորմամբ և ՄԱԿ-ի Զարգացման ծրագրի հետ համատեղ: Աջակցությունը միտված է փոքր ֆերմերների դիմակայության բարձրացմանը։

Ցուցաբերված աջակցությունը համապատասխանում է տնտեսվարողների կարիքներին. տեխնիկայի ցուցակը կազմվել է տեղական ակտիվ խմբերի կողմից: Սարքավորումները հանձնվեցին տեղի համայնքապետարաններին նրանց կողմից կառավարման համար և կօգտագործվեն գյուղատնտեսական ծառայություններ մատուցելու նպատակով:

«Ծրագրի շրջանակում կատարված ուսումնասիրության արդյունքները ցույց են տվել, որ միջպետական սահմաններին կիրառված սահմանափակումները, մատակարարման շղթաների խափանումներն ու առողջապահական համատարած խնդիրները սրել են գյուղմթերքի արժեշղթայում առկա բացերն ու մարտահրավերները՝ հատկապես փոքր ֆերմերների համար»,- նշում է Հայաստանում ՄԱԿ-ի Պարենի և գյուղատնտեսության կազմակերպության ներկայացուցչի տեղակալը:

Ծրագիրն իրականացվում է Տավուշի և Լոռու մարզերում՝ որպես համայնքի կողմից առաջնորդվող տեղական զարգացման հայեցակարգի մաս և նպատակ է հետապնդում տեղական դերակատարներին ու բնակչությանն ակտիվորեն ներգրավվել զարգացման գործընթացներում՝ ստեղծելով տեղական զարգացմանն օժանդակող ենթակառուցվածքներ և բարելավելով համապատասխան նախարարությունների ու մարմինների կարողությունները:

1992 թվականից ի վեր ՄԱԿ-ը դեկտեմբերի 3-ը հռչակել է Հաշմանդամություն ունեցող անձանց միջազգային օր. օրվան ընդառաջ «Հույսի կամուրջ» հասարակական կազմակերպության Իջևանի մասնաճյուղը նախաձեռնել էր հաշմանդամության վերաբերյալ դաս-քննարկում: «Ի՞նչ է հաշմանդամությունը» թեմայով դաս-քննարկմանy մասնակցում էին Իջևանի հանրակրթական դպրոցների 9-11-րդ դասարանների աշակերտները: Քննարկման ընթացքում խոսվեց հաշմանդամության մոդելների, հաշմանդամություն ունեցող անձանց հետ հաղորդակցման և նրանց իրավունքների մասին:

Իրազեկման ակցիաներ են իրականացվել նաև համանքի հանրակրթական դպրոցներում, իսկ դեկտեմբերի 2-ին «Հույսի կամուրջի» Իջևանի կենտրոնում կազմակերպվել էր հանդիպում տարբեր ոլորտների ներկայացուցիչների ու որոշում կայացնողների հետ. նպատակը հասարակության իրազեկման բարձրացնումն էր հաշմանդամության ընկալման շուրջ:

«Հույսի կամուրջ» կենտրոնում հաճախ են կազմակերպվում բարության դասեր, քննարկումներ, ֆիլմի դիտումներ. Աննան, ով մանկուց ընդգրկված է «Հույսի կամուրջի» տարբեր միջոցառումներում, իր ընկերների հետ մեր նկարահանման ընթացքում դիտում էր «Հրաշքը» ֆիլմը:

«Հույսի կամուրջը» Տավուշի մարզում իրականացնում է կրթությանն աջակցող մանկավարժահոգեբանական ծառայություններ, որոնք տրամադրվում են երեխաներին, ծնողներին և ուսուցիչներին: Այն իր մեջ ներառում է նաև վերականգնողական կենտրոն՝ տեղաշարժման խնդիրներ ունեցող երեխաների համար:

«Հույսի կամուրջը» զբաղվում է հաշմանդամություն ունեցող երեխաների և երիտասարդների իրավունքների պաշտպանությամբ: Կառույցի առաքելությունն է պաշտպանել նրանց իրավունքներն ու արժանապատվությունը և նպաստել սոցիալական ներառմանը Հայաստանի Հանրապետությունում: Այս ներառմանն աջակցում են կրթություն ստանալու, համայնքային ծառայությունների և ինքնուրույն ապրելու հավասար հնարավորությունների գաղափարների քարոզումը: Կազմակերպությունը գործում է 1996 թվականից և այժմ ունի կենտրոններ Երևանում ու Տավուշի մարզի Իջևան, Դիլիջան, Բերդ, Նոյեմբերյան համայնքներում: