«Պատերազմից հետո մոտ երկու տարի է անցել, ու շատ հերոսների ընտանիքներում զավակներ են ծնվում, շատ աղջիկներ փորձում են նոր ընտանիքներ կազմել, շատ մայրիկներ փորձում են ապրել այս դժվար ժամանակներում, և դա ինձ համար վերածննդի լավագույն օրինակն է․․․»․ պարուսույց Մերի Չիբուխչյանի նոր ներկայացումը կրում է «44-ի Վերածնունդը» խորագիրը։

Սա Մերիի և M Dance Studio-ի երկրորդ ներկայացումն է, որ կայանում է Իջևանի Մշակույթի պալատում։ Նախորդ տարի նույն վայրում բեմին էր մեկ այլ՝ «Չբացված հույսի առավոտը» խորագրով պարային ներկայացումը։

Մերին պատմում է, որ կան զգացմունքներ, որոնք հնարավոր է արտահայտել միայն արվեստի լեզվով, և այդ զգացմունքերից կազմված պատմության մասերից էլ ծնվել են երկու ներկայացումները։ 44-օրյա պատերազմում անմահացած Մանվելի նորածին եղբորը՝ Էմանուելին և նրա՝ կրկին ապրող ընտանիքը տեսնելով է Մերին հասել վերածննդի պատկերին, որին էլ նվիրված է նոր ներկայացումը։

«Ինձ համար ամենակարևոր խորհուրդն այն է, որ յուրաքանչյուրիս մեջ էլ տղերքն ապրում են․ այսինքն՝ քանի դեռ մենք կանք, քանի դեռ հիշում ենք, խոսում իրենց մասին՝ իրենց պատմություններն անավարտ չեն մնացել»․ ասում է Մերին։

«Կատարյալ օրինակ»․ այս բառերն են անընդմեջ հնչում «Տղերքը» հաղորդաշարի մեր այսօրվա հերոսի՝ կապիտան Արմեն Սահակյանի մասին պատմողների խոսքում։
«Որ վիրավորվել էր հոկտեմբերի 16-ին, եկել էր, ասում եմ՝ Արմեն, գոնե մի երկու օր մնա, բուժվես՝ նոր, բա՝ չէ, զինվորներիս մոտ մարդ չկա, ես ոնց թողնեմ իրենց, գամ․․․ ու էլի հետ գնաց՝ մնաց ընդամենը մի օր»․
Արմեն Սահակյանը ծնվել է 1994 թ. մարտի 31-ին, Տավուշի մարզի Իջևան քաղաքում: Սովորել է Իջևանի թիվ 3 միջնակարգ դպրոցում։ 2002 թ.-ից հաճախել է մարզադպրոց՝սամբոյի դասընթացների:
2010թ. ընդունվել է Երևանի պետական համալսարանի Իջևանի մասնաճյուղի բնագիտական ֆակուլտետ՝ անվճար հիմունքներով: Սակայն Արմենի որոշումն էր, որ պետք է սպա դառնա: 2010 թ. ընդունվել է Վ. Սարգսյանի անվան ռազմական համալսարան:
Ուսումը նրան բանակի իսկական նվիրյալ էր դարձրել։ Համալսարանն ավարտելուց հետո ցանկություն է հայտնել ծառայել Ջրականում․ այստեղ ծառայությունն անց է կացրել հինգ տարի:
Մասնակցել է Ապրիլյան քառօրյա պատերազմին և ոչ մի պարագայում իր զորքին թույլ չի տվել նահանջել իրենց դիրքերից:
2019թ. սեպտեմբերից տեղափոխվել է Իջևանի N զորամաս, որպեսզի լինի ընտանիքի կողքին: Սեպտեմբերի 30-ից մասնակցել է Արցախյան 44-օրյա պատերազմին:
Առանց երկմտելու և նույնիսկ ընտանիքի անդամներին հրաժեշտ տալու մեկնել է Արցախ՝ պաշտպանելու հյուսիսային հատվածի՝ Մատաղիսի դիրքերը: Մոտ մեկ ամիս հրամանատարին վայել հզորությամբ պահել է դիրքերը: Հոկտեմբերի 16-ին ստացել է բեկորային վնասվածքներ, սակայն հոսպիտալում անմիջապես հեռացնել է տվել բեկորներն ու վերադարձել դիրք՝ իր զինվորների մոտ:
Արմեն Սահակյանը զոհվել է Դրմբոնը պաշտպանելիս՝ հոկտեմբերի 28-ին, անօդաչու թռչող սարքի հարվածից:
Որպես հրամանատարի՝ նրա մասնագիտական ունակությունների ու նվիրման մեծագույն վկայությունը մնաց առարկայապես՝ կապիտան Սահակյանի ստորաբաժանումն իր խնդիրը կատարեց լիովին։ Իսկ Արմենը միացավ հանուն Հայրենիքի անմահացածների բանակին՝ իր մշտական ներկայութամբ մնալով մեր կողքին՝ որպես օրինակ և ուղեցույց․․․

«Մեր բարբառն ու բարքերը» հաղորդման երկրորդ երաժշտական պրեմիերան՝ Իտալիաներում ապրող իջևանցի Միզատելլայի, կամ էլ ոչ մի բանի ու ամեն ինչի՝ «մի զատ էլ ա»-ի մասին։

Ստեղծագործական թիմը՝ Հրանտ Ղազումյան և «Հատիկ բենդ»։

«Մեր բարբառն ու բարքերը» հաղորդման ընթացքում անդրադարձել ենք իջևանյան ամենահամապարփակ բառին՝ «պյան»-ին։

Ստեղծագործական թիմը՝ Հրանտ Ղազումյան և «Հատիկ բենդ»։

Մի րոպե՜․․․ «Էդ ըյո՞ւր․․․վիի, էդ ի՞նչ կա տըհեե», ասում ենք՝ որտե՞ղ առանց «Մեր բարբառն ու բարքերը» հաղորդաշարի նոր թողարկման․ արի՛, միացի՛ր․ քեզ ենք սպասում։

«Չամչով բուլկի» մեր այս թողարկմանը քեզ սպասում է բարբառով նոր երգի պրեմիերա, վերևում մեր տված խիստ իջևանյան հարցերի քննարկում, ինչպես նաև բազմաթիվ այլ լեգենդար արտահայտություններ ու հայտնի իրավիճակներ, դե, որովհետև, ինչպես կհասկանանք հաղորդման ընթացքում՝ «լակոնիկը մեզ հըմար չի»։

Նորաստեղծ «Երազանքի երիտասարդություն» ՀԿ-ն հուլիսի 30-ին Իջևանում կազմակերպել էր սեմինար՝ «Տեղական ինքնակառավարման համակարգը Հայաստանում և արդի հիմնախնդիրները» թեմայով։

Դասընթացի նպատակն էր մասնակից երիտասարդներին, ՀԿ-ներին ծանոթացնել տեղական ինքնակառավարման համակարգի կառուցվածքին և գործառույթներին, ուսումնասիրել և վերհանել այն հիմնախնդիրները, որոնց բախվում են ՏԻՄ-երը և առաջարկել հնարավոր լուծումներ։

«Դասընթացը հնարավորություն է տալիս մեզ ավելի ծանոթանալ ներկայիս համակարգերին, ավելի շատ գիտելիքներ ունենալ և դրանք հետագայում օգտագործել համայնքները շենացնելու, զարգացնելու համար»։ – Էդիտա Էլլարյան

Սեմինարը վարեց ԼՀԿ կառավարման խորհրդի, Երևանի ավագանու, ԵԽ տեղական իշխանությունների կոնգրեսի անդամ Դավիթ Խաժակյանը։

«Մենք պետք է երիտասարդներին թևեր տանք, որպեսզի ունենանք ծաղկող հասարակություն»․ նորաստեղծ կազմակերպության կարգախոսներից մեկն է։

«Երազանքի երիտասարդություն» ՀԿ նպատակն է երիտասարդների համար ստեղծել հարթակ՝ ինքնաբացահայտման, կարողությունների, հմտությունների զարգացման, փորձի փոխանակման, շրջակա միջավայրի պահպանման ու բնական ռեսուրսների կառավարման համար։ Կազմակերպությունը նաև պատրաստ է աջակցել մարզաբնակ երիտասարդներին իրենց գաղափարները զարգացնելու և կյանքի կոչելու գործում։

Հայաստանում 18-րդ անգամ մեկնարկեց «Ռոլան» մանկապատանեկան ֆիլմերի միջազգային փառատոնը։

Հուլիսի 29-ին Տավուշի թեմի առաջնորդարանում Իջևան համայնքի բնակավայրերի երեխաները, պատանիները, ծնողները հնարավորություն ունեցան դիտել միջազգային մրցանակների դափնեկիր ֆիլմարտադրողների ֆիլմեր։

Տավուշի թեմի «Արևիկ» սոցիալ-կրթական կենտրոնի տնօրեն Մերի Գևորգյանի խոսքերով՝ «Իջևանի հանդիսատեսը մեծ ոգևորությամբ և ակտիվությամբ է մասնակցել դիտումներին, հատկապես՝ ամառային, արձակուրդային այս շրջանում։ Փառատոնի շրջանակներում ընդգրկված կինոշարքը մեծ հնարավորություն էր ընտանիքով գեղեցիկ ժամանակ անցկացնելու համար»։

Կինոփառատոնի շրջանակում Տավուշի մարզի սահմանամերձ բնակավայրերում բնակվող երեխաները և պատանիներն ակտիվորեն ներգրավվեցին և մասնակից եղան նախատեսված ծրագրին։

«Մեզ համար շատ կարևոր է, որ երեխաները ֆիլմերի և անիմացիայի միջոցով կարողանում են նոր աշխարհներ ճանաչել։ Դա այլոց մշակույթն է, սեփական մշակույթն է և այն ամենը, ինչ որ այսօր իրենց հետաքրքրելու է։ Եթե երեխաները մանկուց կարողանում են հետաքրքիր սյուժեներով ապրել այն, ինչ կոչվում է և ինչ որ իրենց համար լինելու է կյանքը, նրանք արդեն պատրաստ են լինելու․․․»․ նշում է Պատանեկության ստեղծագործական կենտրոնի տնօրեն Նարե Արամյանը։

«Ռոլան» մանկապատանեկան ֆիլմերի միջազգային կինոփառատոնի շրջանակներում այս տարի ցուցադրվել է 75 ֆիլմ՝ 28 երկրներից։

Փառատոնի նպատակն է երեխաների, պատանիների և երիտասարդների ակտիվ ներգրավվածությամբ և մասնակցությամբ ստեղծել նպաստավոր պայմաններ՝ օգտագործելով այն որպես կայուն և վստահելի միջազգային հարթակ։

Շուրջ 1 տարի ակտիվ գործունեություն ծավալող Arm Studio թատերական խմբակի սաների համար հուլիսի 18-ը քննական օր էր. սաներն իրենց ստացած գիտելիքների և ձևավորված դերասանական կարողությունների շնորհիվ հանդես եկան թատերական ներկայացմամբ և մենախոսական կատարումներով։

Սաների հետ մասնագիտական խորհուրդներով կիսվելու և գնահատելու էին եկել Գ. Սունդուկյանի անվան ազգային ակադեմիական թատրոնի դերասաններ Նարեկ Հայկազյանը և Ծովիկ Մարտիրոսյանը։

ԵՊՀ ԻՄ-ում կայացավ շրջանանավարտների ամենասպասված՝ դիպլոմների հանձման հանդիսավոր արարողությունը։ Հուլիսի 16-ին տեղի ունեցավ մասնաճյուղի 2021-2022 ուս. տարվա ավարտական միջոցառումը՝ 232 շրջանավարտներ ստացան իրենց դիպլոմները։

Միջոցառմանն ելույթներով հանդես եկան ԵՊՀ ռեկտորը և Իջևանի մասնաճյուղի տնօրենի ժ/պ-ը` իրենց խոսքում կարևորելով մասնաճյուղի դերն ինչպես Տավուշում, այնպես էլ մայր բուհի կառուցվածքում։

ԵՊՀ ռեկտորը և մասնաճյուղի տնօրենի ժամանակավոր պաշտոնակատարը հանձնեցին գերազանց առաջադիմությամբ շրջանավարտների կարմիր դիպլոմները, ապա ֆակուլտետների դեկանները, ըստ մասնագիտությունների, առկա և հեռակա ուսուցման շրջանավարտների դիպլոմները:

ԵՊՀ Իջևանի մասնաճյուղը այս տարի ավարտում է 232 համալսարանական, առկա ուսուցման 79, հեռակա ուսուցման 153 շրջանավարտ։

Հանդիսավոր միջոցառումն ուղեկցվեց Կիրառական արվեստի ֆակուլտետի շրջանավարտների աշխատանքների ցուցահանդեսով, փոխադարձ շնորհավորանքներով և տոնական երաժշտությամբ։

Տավուշի Գիտելիքի նորարարական հաբը մեկ տարեկան է. հուլիսի 13-ին հաբի գործընկերները, կամավորները, շահառուները միասին տոնեցին գործունեության միամյակը։

Միջոցառման սկզբում ներկայացվեց նորարարական հաբի գործունեությունն ու արձանագրած հաջողությունները, հաբի կամավորները և շահառուները կիսվեցին իրենց ձեռքբերումներով:

Միջոցառման երկրորդ հատվածը կապված էր Գիտելիքի նորարարական հաբի հետագա գործունեության հետ: Ներկաներն իրենց առաջարկներով ու դիտարկումներով կիսվեցին` կապված հաբի հետագա գործունեության հետ, մաղթելով նորանոր հաջողություններ:

Տավուշի Գիտելիքի նորարարական հաբը ստեղծվել է 2021 թվականին` «Կանաչ արահետ» ՀԿ-ի և ԵՊՀ Իջևանի մասնաճյուղի համագործակցության արդյունքում. այն կրթական-զարգացնող բնույթի հարթակ է, որի գոյությունը միտված է խթանելու երիտասարդների հմտությունների զարգացումը և զբաղվածությունը: ՀԱԲ-ն ունի ֆիլմասերների, կամավորների և ակտիվ երիտասարդների ակումբ:

Գիտելիքի նորարարական հաբը ֆինանսավորվել և իրականություն է դարձել Եվրոպական միության աջակցությամբ իրականացվող «Սոցիալական ձեռներեցության էկոհամակարգի զարգացում սահմանամերձ շրջաններում կանաչ առաջընթացի համար» ծրագրի շրջանակներում։ Ծրագիրը Հայաստանում իրականացնում է «Կանաչ արահետ» ՀԿ-ն։