Ֆուտբոլի աշխարհի առաջնության 2026 թվականի եվրոպական ընտրական մրցաշարի Հայաստան-Պորտուգալիա և Հայաստան-Իռլանդիա հանդիպումների ժամանակ մարզադաշտը նաև երազանքների իրականացման վայր էր «Հույսի կամուրջ» ՀԿ սաների համար։ Կազմակերպության՝ «Ֆուտբոլ` հանուն հավասար հնարավորությունների» նախագծի մասնակից-երեխաները Տավուշից, Հայաստանի այլ մարզերից ներկա գտնվելով ֆուտբոլային հանդիպումներին ուղեկցեցին ֆուտբոլիստներին «Հանրապետական» մարզադաշտ և մասնակցեցին ազգային օրհներգի կատարմանը։

Երեխաների համար սա առաջին անգամն էր, երբ նրանք կանգնեցին նման մեծ խաղադաշտում՝ միասին ազգային հավաքականի ֆուտբոլիստների հետ, այդ թվում նաև աշխարհի հայտնի ֆուտբոլիստների՝ Կրիշտիանու Ռոնալդուի, Բրունո Ֆերնանդեսի, Դիոգո Կոստայի և այլոց կողքին։

«Ես երբեք չէի պատկերացրել, որ կհանդիպեմ Ռոնալդուին ու կանգնած կլինեմ նման  խաղադաշտում, – ասում է 13-ամյա Մանեն Դիլիջան քաղաքից, – դա կարծես երազանք էր, որ դարձավ իրականություն»:

«Անսպասելի էր, ամեն ինչ այնքան իրական թվաց, կարծես ֆիլմում ենք, – պատմում են Վահե և Վոլոդյա եղբայրները, – մենք տեսանք սիրելի ֆուտբոլիստներին ու նրանց հաղթանակ մաղթեցինք»։

Երեխաների մասնակցությունը ավելացրեց հանդիպումների յուրահատուկ մթնոլորտը. դաշտը լցված էր ոգևորությամբ, իսկ մարզադաշտի հանդիսատեսը ևս սկսեց զգալ երեխաների էներգիան և ոգևորությունը։ «Հույսի կամուրջ» կազմակերպության համար  նման նախաձեռնությունները կարևոր են երեխաների սոցիալական ներառման տեսանկյունից, նաև հանրության համար, քանի որ նրանք տեսնում են, թե ինչպես մեծ երազանքները կարող են իրականություն դառնալ։ Երեխաների հուզմունքը, ժպիտները դարձել են գեղեցիկ հիշողություններ, որ ամեն անգամ կամուրջ կլինեն փոքր քայլերից դեպի մեծ երազանքներ տանող ճանապարհին։

Կարդացեք նաև՝

Հունգարիայի Էստերգոմ քաղաքը մայիսի 2-3-ը հյուրընկալել էր Կիոկուշին կարատեի Եվրոպայի առաջնությունը, որին մասնակցում էին հարյուրավոր մարզիկներ Եվրոպայի տարբեր երկրներից։ Հայ մարզիկները մասնակցելով առաջնությանը, գրանցել են ոգևորող արդյունքներ՝ 5 չեմպիոն, 2 փոխչեմպիոն, 5 բրոնզե մեդալակիր։

Առաջնության Եվրոպայի չեմպիոնների շարքում են նաև տավուշցի տղաները՝ Նոյեմբերյան համայնքի Բագրատաշեն գյուղից Գոռ Կիրակոսյանը և Դեբեդավան գյուղից Արեն Խուդյանը։

Հայաստանից, Վրաստանից ու Ռուսաստանից հայ ու արտասահմանցի մարզիկները սպորտային երկու հագեցած օր ունեցան Ենոքավանում։ 2-րդ անգամ է Ենոքավանը հյուրընկալում մարզիկներին՝ Յելլ սպորտ ֆեստթի շրջանակում։

«Երկրորդ տարին ենք անցկացնում այս փառատոնը, արդյունքները տպավորիչ են ու ոգևորող։ Փորձում ենք փառատոնը դարձնել գեղեցիկ ավանդույթ՝ ամեն տարի կազմակերպելով և նոր մարդկանց ներգրավելով»,- նշում է միջոցառման կազմակերպիչ Իլյա Ցիգանգովը։

Սպորտային փառատոնը շատերին էր գրավել իր բազմազանությամբ ու առաջարկվող ժամանցային ծրագրերով․ ներառվել էին տարբեր հետաքրքրություններ՝ արկածային տուրեր, մրցավազք, թիմային այլ խաղեր։ Երկորդ օրը Իջևանի գինու և կոնյակի գործարանից մասնակից մարզիկները հեծանիվով հաղթահարցին Իջևան-Ենոքավան ճանապարհը։

Հաղթող ու լավագույն արդյունքներ գրանցած հեծավորդների համար խրախուսական նվերներ էին նախատեսել Իջևանի գինու և կոնյակի գործարանն ու Յելլ էքստրիմ պարկը։ Վրաց հեծանվորդ Նիկա Ցիրեկիձեն առաջինը հատեց սպասված վերջնակետը:

«Մեր ճանապարհը հետաքրքիր փորձություն էր՝ վերելքներ ենք հաղթահարել ու անցել ոլորաններով։ Երկրորդ անգամ եմ Հայաստանում, կարող եմ ասել, որ այստեղ հեծանվավազքը կարող է զարգանալ՝ պայմաններ կան։ Ուզում եմ շնորհակալություն հայտնել մեր հայ ընկերներին ջերմության և հյուրընկալության համար։ Այս փառատոնը սպորտի միջոցով նպաստում է ժողովուրդների կապի ամրապնդմանը»,- մեզ հետ զրույցում ասաց հեծանվավազքի հաղթող Նիկա Ցիրեկիձեն։

«Յելլ սպորտ ֆեսթը» առողջ ու ակտիվ ժամանցի, սպորտային բարիքների շուրջ՝ առողջ ու մարզական միջավայրում, մարդկանց կհամախմբի արդեն հաջորդ տարի։

Դիտեք նաև՝

Իջևանի բադմինթոնի թիմը հասցրել է գրանցել զգալի հաջողություններ գրանցել ու բարձր պահել համայնքի անունը սպորտային մրցաշարերում:

Մարզական Տավուշ շարքում ներկայացնում ենք բադմինթոնի թիմի պարապմունքներից մի հատված:

«Հույսի կամուրջ» հասարակական կազմակերպության «Սպորտը հանուն հավասար հնարավորությունների» ծրագիրը կրկին ֆուտբոլի դաշտում էր միավորել տավուշեցի երեխաներին՝ պայքարելու մրցաշրջանի մարզային գավաթի համար։ Սպորտային նախագծի հիմքում ֆուտբոլի միջոցով կրթության առանձնահատուկ պայմանների կարիք ունեցող երեխաների սոցիալական ներառմանը նպաստելն է։

Ֆուտբոլային հանդիպման եզրափակիչ փուլում խաղում էին Իջևանի թիվ 4, Բերդի թիվ 1, Դիլիջանի թիվ 4 և Բերդավանի դպրոցների թիմերը։ Նախագիծը երախաներին հնարավորություն է տալիս զբաղվել սպորտով, և այդ միջոցով բարելավել ֆիզիկական ու մտավոր կարողությունները, զարգացնել սոցիալական հմտություններն ու ինքնավստահությունը։

Նախագծի շրջանակում կազմակերպված մրցաշարերին մասնակցել են Տավուշի մարզի 16 հանրակրթական ուսումնական հաստատությունների 240 տղաներ և աղջիկներ, այդ թվում՝ կրթության առանձնահատուկ պայմանների կարիք և հաշմանդամություն ունեցող աշակերտներ։

Մրցապայքարում հաղթող ճանաչվեց Բերդավանի դպրոցը՝ ստանալով Տավուշի մարզային գավաթը։ «Ֆուտբոլը՝ հանուն հավասար հնարավորությունների Հայաստանում» ծրագիրը իրականացնում է «Հույսի կամուրջ» հասարակական կազմակերպությունը՝ «Երեխաների համար ՈՒԵՖԱ հիմնադրամի» ֆինանսական աջակցությամբ։

Ապրիլի 5-ին լրանում է Դիլիջանի մարզական ակումբի գործունեության 20 ամյակը, շաբաթը խորհրդնշական է նաև Դիլիջանի քառամարտի խմբակի համար, քանի որ լրանում է խմբակի ստեղծման 3-րդ տարին: Օրվա առիթով «Դիլիջան ՋԻՄ» մարզական ակումբը նախաձեռնել է տոնական միջոցառում, որի ընթացքում նվերներ ու անակնալներ են նախատեսվում «Լավագույն մարզական ընտանիք», «Լավագույն երիտասարդ երաժիշտ, նկարիչ, մարզիկ» անվանակարգերում:
Ապրիլի 5-ին, ժամը 16:00-ին «Դիլիջան ՋԻՄ»-ը հրավիրում է մարզվելու, և իհարկե շնորհավորելու մարզական ակումբի գործունեության 20-ամյակի առիթով:

Հարգելիներս, ուղիղ մեկ շաբաթից մեզ մոտ ՏՈՆԱԿԱՏԱՐՈւԹՅՈւՆ է:
Մի կողմից մեր մարզական ակումբը դառնում է 20 տարեկան, մյուս կողմից քառամարտի խմբակը դառնում է 3 տարեկան: Նշելու առիթները երկուսն են, բայց ունենալու ենք 4 տորթ։ Կհարցնեք`էն 2-ը ինչի համար են, չեմ ալարում և պատասխանում եմ՝
1-ին տորթը ԱՊԱԳԱ մարզական ակումբի լոգոյով է լինելու (2004 թվականին մեր մարզասրահը հիմնադրվել է ԱՊԱԳԱ անունով)
2-րդը՝ «Դիլիջան ՋԻՄ»-ի լոգոյով։
3-րդը «Լավագույն մարզական ընտանիքի» տորթն է, այդ օրը լինելու են խաղեր ընտանիքների համար, և հաղթող ընտանիքը կստանա նվեր-տորթ։
Իսկ 4-րդ տորթը մեր քաղաքի «լավագույն երիտասարդ երաժշտի, նկարչի և մարզիկի» համար է, որոնք բացի համով տորթից կպարգևատրվեն նաև դրամական պարգևներով:
Այսպես, մնաց իմանաք օրակարգը:
4:04 Բացման խոսք
4:14 Խաղերի մեկնարկ, այդ թվում՝ ընտանիքով մրցույթ (ընտանիքից 3 հոգի), ֆուտբոլի, բասկետբոլի և վոլեյբոլի (թիմի կազմը՝ 4 հոգի) խմբային մրցումներ
5:44 Մրցանակաբաշխություն, բացի դրամական պարգևներից և նվերներից հաղթողները կստանան նաև Yell extreme park -ի նվեր քարտեր:
Արդեն 20 տարի բոլորիդ սիրով հրավիրում ենք մեզ մոտ մարզվելու, իսկ ապրիլի 5-ին հրավիրում ենք ոչ միայն մարզվելու, այլև մեզ շնորհավորելու և մեզ հետ միասին տորթ ու սուրճ վայելելու։ Եթե որոշեք դատարկաձեռն չգալ, կխնդրեի բերել միայն այնպիսի նվերներ, որոնք կարող եք նվիրել մրցանակակիրներին։ Թող նվերներն այնքան առատ լինեն, որ ուրախությունն ու մարզվելու ոգևորությունը մեր մարզիկներին բավարարի ամբողջ տարին:
Դե ինչ` միացեք մեր ուրախությանը ապրիլի 5-ին Դիլիջան Ջիմում։ Ամեն տարի չէ, որ դառնում ես 20 տարեկան:

Դիլիջանի մարզական ակումբի հիմնադիր Գարիկ Թովմասյան

Տավուշի մարզում մեկնարկում է «Հույսի կամուրջ» հասարակական կազմակերպության «Ֆուտբոլը՝ հանուն հավասար հնարավորությունների» ծրագրի 2-րդ մրցաշրջանը։ Նախագիծը նախորդ տարի իրականացվել է միայն մարզկենտրոն Իջևանում,իսկ այս տարի ընդգրկում է արդեն Տավուշի բոլոր համայնքները:

Ծրագրի շրջանակում հաշմանդամություն ունեցող երեխաներին հնարավորություն է տրվելու զբաղվել սպորտով, ինչն էականորեն կբարելավի նրանց ֆիզիկական ու մտավոր կարողությունները, կնպաստի սոցիալական հմտությունների ձևավորմանը ու զարգացմանը։
Ներառական ֆուտբոլային թիմերի ստեղծման միջոցով ծրագիրը կնպաստի նաև հանարկրթական դպրոցների երեխաների և պատանիների ինքնագնահատականի, ինքնավստահության բարձրացմանը, նոր ընկերների ձեռքբերմանն ու իրենց առջև դրված նպատակների իրականացմանը: Կբարելավվեն ֆիզկուլտուրայի ուսուցիչների և մարզիչների գիտելիքներն ու հմտությունները ներառական ֆուտբոլի վերաբերյալ:

«Ֆուտբոլը՝ հանուն հավասար հնարավորությունների» ծրագիրը իրականացնում է «Հույսի կամուրջ» ՀԿ-ը՝ «Երեխաների համար ՈՒԵՖԱ հիմնադրամի» ֆինանսական աջակցությամբ։

Խորհրդային միության ժամանակներից չվերանորոգված Դիլիջանի մարզադպրոցը նոր տեսք է ստացել։ Նորոգված ու արդիականացված Դիլիջանի մարզահամալիրի վերաբացման արարողությունը իրականացավ դեկտեմբերի 9-ին։ Մարզահամալիրը նոր հեռանկարներ կբացի դիլիջանցիների համար: Այստեղ պրոֆեսիոնալ սպորտով կարող են զբաղվել մինչև 500 հոգի։ Շենքն ամբողջությամբ հիմնանորոգվել է և ապահովվել բոլոր անհրաժեշտ հարմարություններով, սպորտով զբաղվելու համար մարզհամալիրում ստեղծվել են հավասար հնարավորություններ բոլորի համար։
Շենքի վերանորոգվել է Green Rock Management Group ընկերության և Դիլիջանի համայնքապետարանի համագործակցության շնորհիվ։ Համատեղ այս գործընկերությունը նաև օրինակ է՝ համայնք-մասնավոր համագործակցության։
Մարզահամալիրում գործելու են ըմբշամարտի, բռնցքամարտի, բազկամարտի, ֆուտբոլի, սեղանի թենիսի եւ գեղարվեստական մարմնամարզության խմբակներ, որոնք անվճար են՝ բոլորի համար։ Վերանորոգումից հետո այստեղ կարող են մարզվել նաև աղջիկները։

Դիլիջանի մարզահամալիրի վերանորոգումն ու հագեցած կահավորումը կխթանի առողջ ապրելակերպը, կրթությունը և կօգնի դիլիջանցի պատանիներին, երիտասարդներին հասնել  աննախադեպ բարձունքների սպորտի ոլորտում: Նոր ենթակառուցվածքները թույլ կտան մարզահամալիրում ունենալ դասավանդվող սպորտաձևերի բազմազանություն, կիրառել նորագույն չափորորոշիչներ՝ ապահովվելով որակյալ, արդյունավետ ու hասանելի կրթություն։

Սեղանի թենիսի բաց առաջնություն՝ ԵՊՀ Իջևանի մասնաճյուղի նախաձեռնությամբ. դեկտեմբերի 2-ին Տավուշի մարզի սեղանի թենիսիստները հնարավորություն ունեցան մրցակցել միմյանց հետ: Հաշվի առնելով ուսանողների սպորտային հետաքրքրությունները, մասնաճյուղը ձեռնամուխ եղավ բաց առաջնության կազմակերպմանը:
Բաց առաջնությանը մասնակցելու համար նախապես գրանցվել էր ավելի քան 60 մասնակից՝ Տավուշի մարզի համայնքներից: Սեղանի թենիսը, ինչպես նաև մասնաճյուղում կազմակերպվող սպորտային միջոցառումները նպատակ ունեն նպաստել ուսանողների սպորտային կարողությունների դրսևորմանն ու զարգացմանը

Մրցաշարը հնարավորություն է տալիս ոչ միայն զբաղվել սիրելի սպորտաձևով, այլ նաև ծանոթությունների ամուր ցանց ստեղծելու հիմք է Տավուշի մարզի համայնքների գաղափարակից պատանիների ու մեծահասակների միջև։ Առաջնության մրցապայքարի արդյունքում հաղթող մասնակիցները պարգևատրվեցին պատվոգրերով ու խրախուսական նվերներով:

Իջևանի «Նիկարմ» ֆուտբոլային ակումբը ֆուտբոլային պատմության մեջ առաջին անգամ մասնակցում է Հայաստանի ֆուտբոլի պրոֆեսիոնալ առաջնությանը։ Բարեհաջող անցնելով Ֆուտբոլի ֆեդերացիայի արտոնագրման փուլը, «Նիկարմ» ակումբին հնարավորություն է տրվել մասնակցելու Ֆուտբոլի Առաջին խմբի մրցաշարին։ Պրոֆեսիոնալ ֆուտբոլի մրցաշարին մասնակից դառնալը եղել է «Նիկարմի» կարևորագույն նպատակներից։
«Նիկարմ» ակումբի կազմում հիմնականում տավուշցիներ են․ ակումբը հնարավորություն է տալիս այս միջոցով զբաղվել պրոֆեսիոնալ ֆուտբոլով և գնալ իրենց ֆուտբոլային կարիերայի հետևից։

Թիմի կազմում կան նաև երևանաբնակ ու արտերկրից ժամանած ֆուտբոլիստներ, ովքեր իրենց փորձառությամբ են կիսվում։
Տոմոյա Շիմամուրան, ով թիմի հարձակվողն է, եկել է Ճապոնիայից։
-Նիկարմը լավ թիմ է, նոր է ձևավորվել թիմը, ու բոլորս ձգտում ենք հասնել առավելագույնին, և հավատում ենք, որ քայլ առ քայլ կարող ենք ունենալ առաջընթաց ու ձեռքբերում։ Գիտեք, ֆուտբոլում կարևոր է թիմային աշխատաքը, որը մեզ մոտ ստացվում է։ Հայաստանը ինձ շատ է դուր եկել, ու այստեղ ինձ լավ եմ զգում, հատակապես մարդկանց շնորհիվ, – նշում է ճապոնացի ֆուտբոլիստը։

Որն է հաջողության հասնելու ճանապարհը․ մեր հարցին ի պատասխան թիմի մարզիչը նշում է անդադար աշխատելը։ Վերջին տարիներին «Նիկարմ» ակումբը աննախադեպ թվով թիմեր է ձևավորվել Տավուշի մարզի տարբեր քաղաքային ու գյուղական բնակավայրերում, ովքեր խաղում են Սիրողական լիգայում, ներկայացված են մանկապատանեկան առաջնություններում, կանանց ֆուտբոլում․ այժմ նաև՝ ֆուտբոլի պրոֆեսիոնալ Առաջին խմբի առաջնությունում։
«Նիկարմ» ակումբը զարգացնում է ֆուտբոլը Տավուշում։ «Տավուշի մարզում ֆուտբոլի զարգացումը անխուսափելի է»․ այս կարգախոսն Նիկարմի ավելի քան 23 տարվա գործունեության նպատակակետը։