Իջևանի համայնքապետարանը «EU4Culture» ծրագրի աջակցությամբ և «Ուրբան» կայուն զարգացման հիմնադրամի հետ համագործակցությամբ մշակել է «Մենք ենք, մեր սարերը» խորագիրը կրող մշակութային զարգացման ռազմավարությունը, որն իրականացնելու է 2023-2024թթ․ ընթացքում։ Իջևան համայնքը, հաղթելով «EU4Culture» ծրագրի մրցույթում, Եվրոպական միկության կողմից ստացել է 300 հազար եվրո դրամաշնորհ՝  նախապես մշակված մշակութային ռազմավարությունը կյանքի կոչելու համար։ Մարտի 24-ին պաշտոնապես տրվեց «Մենք ենք, մեր սարերը» համագործակցային, մշակութահեն ստեղծարար տնտեսության խթանում Իջևանում ծրագրի մեկնարկը։ 

Մշակված ռազմավարության նպատակն է շարունակական ստեղծագործական գործունեության միջոցով բարելավել համայնքի մշակութային ենթակառուցվածքները, ապահովել տնետսական զարգացման հետ սերտորոն փոխկապակցված աշխույժ մշակութային կյանք` նպաստելով պատմամշակութային ժառանգության պահպանմանը, մշակութային զարգացման կարողությունների բարելավմանը և մշակութային հատվածի արդյունավետ կառավարմանը:

Ծրագիրը եռաբաղադրիչ է․ ներկաներին ծրագրային գործողությունների ու անելիքների մասին ներկայացրեց Իջևանի համայնքապետարանի կրթության, մշակույթի և սպորտի բաժնի ղեկավար Լիլիթ Ղալումյանը։ Առաջին բաղադրիչով նախատեսվում է բարելավել մշակույթի ոլորտի կառավարումը՝ մեծացնելով Իջևանի մշակութային ժառանգության տեսանելիությունը և ճանաչելիությունը։ Երկրորդ բաղադրիչով կխթանվի ակտիվ մշակութային և տնտեսական կյանքը՝ տեղական ստեղծարար մշակութային նախաձեռնությունների միջոցով։ Երրորդ բաղադրիչի շրջանակում կխթանվի համագործակցային, մշակութահեն տնտեսական զարգացումը՝ ամենամյա փառատոների կազմակերպմամբ։

Ծրագրի առանցքային մոտեցումներից է լինելու ապակենտրոնացված զարգացումը և կենտրոնացումն Իջևանի բնակավայրերի վրա։

«EU4Culture» ծրագիրը ֆինասավորվում է Եվրոպական միության կողմից՝ աջակցելու մշակույթին և ստեղծագործ հատվածին՝ հատուկ ուշադրություն դարձնելով Արևելյան գործընկերության երկրների մարզային քաղաքներին ու բնակավայրերին։



«Նպատակը, նվիրումը մեկն է՝ լինել մշակույթի հետ, լինել մշակույթի մեջ և մարդկանց, ժողովրդի, հայրենակիցների հետ հարաբերվել, խոսել մշակույթի լեզվով։ Դա աստվածային է․․․դա անփոխարինելի զգացողություն է»։

Թատրոնի օրվա առթիվ մեր մշակութային «Տավուշյան զրույց»-ը արվեստագետ, ռեժիսոր, դերասան, գրող Սամվել Բեգլարյանի հետ է։ Նա պատմում է Նոյեմբերյանի Մշակույթի կենտրոնին շաղկապված իր կյանքի և մարզում մշակույթի հեռանկարների մասին։

Ու թեև, ինչպես ինքն է ասում՝ Նոյեմբերյանում «վերջին մոհիկանն» է, սակայն «մեկն էլ լինի՝ դա կայծ է լինելու, որ մշտավառ է պահելու այս բեմի լույսը»։



Երկար տարիների դադարից հետո Իջևանը կրկին կինոթատրոն ունի․ գործունեության մեկնարկը տրվեց մարտի 3-ին։

«Իջևան» կինոթատրոնն իր այցելուներին առաջարկում է հայկական և արտասահմանյան ֆիլմացանկ՝ ավելացնելով ևս մեկ ժամանցի վայր թե՛ պատանիների, թե՛ մեծահասակների համար։ 

Մանրամասները՝ մեր Տավուշյան ռեպորտաժում․



«Մինչև չսկսես՝ չես կարող հաստատ իմանալ՝ կարո՞ղ ես, թե՞ ոչ». վստահեցնում է շեփորահար, կոմպոզիտոր Տիգրան Սուչյանը՝ պատմելով իր աշխատանքային ճանապարհի, սեփական նախագիծը՝ Dialog Music Project-ը ստեղծելու, «Արցախիկներ» խմբի, ապա՝ Արցախի պետական ջազ նվագախումբը ղեկավարելու մասին։ 

Ներկա իրավիճակում, երբ «իր նվագախումբը» շրջափակված Արցախում է, իսկ ինքն այստեղ, նա շարունակում է հավատալ, որ անկախ դժվարություններից, երաժշտությունը պիտի շարունակվի․ «Երաժշտությունը միշտ պետք է հնչի, որովհետև երաժշտությունը հենց այն դեղամիջոցն է, որ մարդկանց դեպրեսիայից և դժվար ժամանակներից կարողանում է թեթևացնելով՝ դուրս հանել»։ 

Տիգրան Սուչյանի դիմանկարը՝ Տավուշ Մեդիայի թղթակից Հրանուշ Անանյանի տեսանյութում։



Գիրք նվիրելու օրը՝ փետրվարի 19-ին, Բերդի Ժիրայր Անանյանի անվան համայնքային մշակույթի տանը կայացավ վաստակաշատ մանկավարժ, մտավորական Ալբերտ Պապյանի մեծարման երեկոն։ Միջոցառումը նվիրված էր անվանի տավուշեցու ծննդյան 75-ամյակին։

«Մենք հպարտ ենք, որ ժամանակակիցն ենք մի մտավորականի, ում ամենակարևոր արժանիքներից մեկը ոգեշնչելն է»,- նշում է Բերդի համայնքապետը։

Հոբելյանի կապակցությամբ Ալբերտ Պապյանին իրենց բարեմաղթանքներն են հղել նաև Բերդի տարածաշրջանի հոգևոր հովիվ Տեր Արամ քահանա Միրզոյանը, Բերդի համայնքային մշակույթի տան տնօրենը, անվանի մանկավարժներ, մտավորականներ, մշակույթի և հասարակական գործիչներ։

Բերդի տարածաշրջանի բարբառի, ժողովրդական բանահյուսության, ավանդույթների պահպանման, մատաղ սերնդի կրթության, դաստիարակության գործում նշանակալի ավանդի համար Ալբերտ Պապյանը Բերդ համայնքի ղեկավարի կողմից միջոցառման վերջում պարգևատրվեց պատվոգրով:



Գիրք նվիրելու տոնին ընդառաջ Նոյեմբերյանի մշակույթի կենտրոնի մանկական գրադարանը հյուրընկալել է Բաղանիսի մանկապարտեզի սաներին։

Նոյեմբերյանի Իգնատ Մամյանի անվան քաղաքային գրադարանն իր հերթին գրադարանի ֆոնդից պատրաստել է մի քանի կապոց գրքեր՝ Ջուջևանի և Դովեղի գրադարանների, ինչպես նաև Կարմիր գյուղի սարվորների գրադարանի համար։

Տեսանյութը՝ Տավուշ Մեդիայի թղթակից Հրանուշ Անանյանից։



«Հայրենասիրությունը սկսվում է հայրենաճանաչությունից, իսկ մեզ ճանաչելու առաջին ճանապարհը ազգային մշակույթի մեջ է»։

Տավուշ Մեդիայի թղթակից Հրանուշ Անանյանի տեսանյութում արվեստաբան Անուշ Հակոբյանն է, ով իր առաքելությունն է համարում հայ մշակույթն ու արվեստը բոլորի ու նախ և առաջ՝ ինքներս մեզ համար ճանաչելի, մոտ և հասկանալի դարձնելը։ 

Անուշ Հակոբյանի Art Discovery նախագիծը ներկայացնում է դասընթացների շարքեր բոլորի համար՝ հայ և համաշխարհային մշակույթն ուսումնասիրելու և ճանաչելու ուղղությամբ: 

Համո Սահյանի շամշադինյան այցը, խորհրդային ու հետխորհրդային տարիներին արվածն ու չարվածը, կյանքը, ստեղծագործելն ու սերունդներ կրթելը․ Ալբերտ Պապյանը պատմելու և սովերեցնելու իսկապես շատ բան ունի, իսկ մենք էլ հյուրընկալվել էինք՝ ունկնդիր լինելու նրա տավուշյան զրույցին։

Գրող, մանկավարժ Ալբերտ Պապյանը սովորել է Խ․ Աբովյանի անվան մանկավարժական ինստիտուտի հայ բանասիրության ֆակուլտետում։ Աշխատել է Արծվաբերդի, Ներքին Կարմիրաղբյուրի և Բերդի դպրոցներում՝ ուսուցիչ, ուսմասվար, տնօրեն։ Հետագայում աշխատել է ժողկրթբաժնում՝ վարիչ, մշակույթի բաժնի վարիչ։

1993 թվականին՝ պատերազմական թեժ տարիներին հիմնադրել է Բերդի 4-րդ դպրոցը, ուր աշխատել է մինչև 2011 թվականը, այնուհետև իր կամքով հեռացել աշխատանքից։

Բանաստեղծություններ գրել է երբեմն-երբեմն, ավելի շատ է սկսել ստեղծագործել արդեն հանգստի անցնելուց հետո։



Թամզարան հայկական պարատեսակ է, ավելի կոնկրետ՝ հարսանեկան պարերգ։ Իջևանում, սակայն, այս անգամ այն դուրս էր եկել պարի սահմաններից ու մի ամբողջ միջոցառում դարձել։

Մի խումբ երիտասարդների նախաձեռնությամբ և Hatik ու Shushiki band – երի հետ համագործակցությամբ Իջևանի Քաղաքական սրճարանում երեկոն նվիրված էր ազգայինը պահպանելուն, գնահատելուն և պարզապես վայելելուն։

Ինչպես միշտ՝ «դեպքի վայրից» իր տեսանյութով մեզ հայկական տրամադրություն է բերել Հրանտ Ղազումյանը։



Արվեստը, Դիլիջանն ու հին և նոր ժամանակները․ այս անգամ Հրանտ Ղազումյանն ու մեր թիմն այցելել են Դիլիջան՝ նկարիչ-ոճավորող Հասմիկ Սողոմոնյանի հետ մակարդակով կոֆե խմելու։

Հասմիկի հետ զրույցն իր մանկության Դիլիջանի, մարզում արվեստ արարելու, դասավանդելու, երեխաների հետ աշխատելու և անդադար սովորելու մասին է։ 

«Դիլիջանն ինձ համար երևի թե լռությունն է։ Բոլորս գիտենք, որ ժամը 7-ից հետո Դիլիջանում անհատակ լռություն է, և դա շատ հետաքրքիր է նրանով, որ դու քեզ հետ մենակ ես մնում․․․Ստեղծագործական առումով նման վայրում ամենալավ պայմաններն են»։