Հունգարիայի Էստերգոմ քաղաքը մայիսի 2-3-ը հյուրընկալել էր Կիոկուշին կարատեի Եվրոպայի առաջնությունը, որին մասնակցում էին հարյուրավոր մարզիկներ Եվրոպայի տարբեր երկրներից։ Հայ մարզիկները մասնակցելով առաջնությանը, գրանցել են ոգևորող արդյունքներ՝ 5 չեմպիոն, 2 փոխչեմպիոն, 5 բրոնզե մեդալակիր։

Առաջնության Եվրոպայի չեմպիոնների շարքում են նաև տավուշցի տղաները՝ Նոյեմբերյան համայնքի Բագրատաշեն գյուղից Գոռ Կիրակոսյանը և Դեբեդավան գյուղից Արեն Խուդյանը։

Հայաստանից, Վրաստանից ու Ռուսաստանից հայ ու արտասահմանցի մարզիկները սպորտային երկու հագեցած օր ունեցան Ենոքավանում։ 2-րդ անգամ է Ենոքավանը հյուրընկալում մարզիկներին՝ Յելլ սպորտ ֆեստթի շրջանակում։

«Երկրորդ տարին ենք անցկացնում այս փառատոնը, արդյունքները տպավորիչ են ու ոգևորող։ Փորձում ենք փառատոնը դարձնել գեղեցիկ ավանդույթ՝ ամեն տարի կազմակերպելով և նոր մարդկանց ներգրավելով»,- նշում է միջոցառման կազմակերպիչ Իլյա Ցիգանգովը։

Սպորտային փառատոնը շատերին էր գրավել իր բազմազանությամբ ու առաջարկվող ժամանցային ծրագրերով․ ներառվել էին տարբեր հետաքրքրություններ՝ արկածային տուրեր, մրցավազք, թիմային այլ խաղեր։ Երկորդ օրը Իջևանի գինու և կոնյակի գործարանից մասնակից մարզիկները հեծանիվով հաղթահարցին Իջևան-Ենոքավան ճանապարհը։

Հաղթող ու լավագույն արդյունքներ գրանցած հեծավորդների համար խրախուսական նվերներ էին նախատեսել Իջևանի գինու և կոնյակի գործարանն ու Յելլ էքստրիմ պարկը։ Վրաց հեծանվորդ Նիկա Ցիրեկիձեն առաջինը հատեց սպասված վերջնակետը:

«Մեր ճանապարհը հետաքրքիր փորձություն էր՝ վերելքներ ենք հաղթահարել ու անցել ոլորաններով։ Երկրորդ անգամ եմ Հայաստանում, կարող եմ ասել, որ այստեղ հեծանվավազքը կարող է զարգանալ՝ պայմաններ կան։ Ուզում եմ շնորհակալություն հայտնել մեր հայ ընկերներին ջերմության և հյուրընկալության համար։ Այս փառատոնը սպորտի միջոցով նպաստում է ժողովուրդների կապի ամրապնդմանը»,- մեզ հետ զրույցում ասաց հեծանվավազքի հաղթող Նիկա Ցիրեկիձեն։

«Յելլ սպորտ ֆեսթը» առողջ ու ակտիվ ժամանցի, սպորտային բարիքների շուրջ՝ առողջ ու մարզական միջավայրում, մարդկանց կհամախմբի արդեն հաջորդ տարի։

Դիտեք նաև՝

Ապրիլի 5-ին լրանում է Դիլիջանի մարզական ակումբի գործունեության 20 ամյակը, շաբաթը խորհրդնշական է նաև Դիլիջանի քառամարտի խմբակի համար, քանի որ լրանում է խմբակի ստեղծման 3-րդ տարին: Օրվա առիթով «Դիլիջան ՋԻՄ» մարզական ակումբը նախաձեռնել է տոնական միջոցառում, որի ընթացքում նվերներ ու անակնալներ են նախատեսվում «Լավագույն մարզական ընտանիք», «Լավագույն երիտասարդ երաժիշտ, նկարիչ, մարզիկ» անվանակարգերում:
Ապրիլի 5-ին, ժամը 16:00-ին «Դիլիջան ՋԻՄ»-ը հրավիրում է մարզվելու, և իհարկե շնորհավորելու մարզական ակումբի գործունեության 20-ամյակի առիթով:

Հարգելիներս, ուղիղ մեկ շաբաթից մեզ մոտ ՏՈՆԱԿԱՏԱՐՈւԹՅՈւՆ է:
Մի կողմից մեր մարզական ակումբը դառնում է 20 տարեկան, մյուս կողմից քառամարտի խմբակը դառնում է 3 տարեկան: Նշելու առիթները երկուսն են, բայց ունենալու ենք 4 տորթ։ Կհարցնեք`էն 2-ը ինչի համար են, չեմ ալարում և պատասխանում եմ՝
1-ին տորթը ԱՊԱԳԱ մարզական ակումբի լոգոյով է լինելու (2004 թվականին մեր մարզասրահը հիմնադրվել է ԱՊԱԳԱ անունով)
2-րդը՝ «Դիլիջան ՋԻՄ»-ի լոգոյով։
3-րդը «Լավագույն մարզական ընտանիքի» տորթն է, այդ օրը լինելու են խաղեր ընտանիքների համար, և հաղթող ընտանիքը կստանա նվեր-տորթ։
Իսկ 4-րդ տորթը մեր քաղաքի «լավագույն երիտասարդ երաժշտի, նկարչի և մարզիկի» համար է, որոնք բացի համով տորթից կպարգևատրվեն նաև դրամական պարգևներով:
Այսպես, մնաց իմանաք օրակարգը:
4:04 Բացման խոսք
4:14 Խաղերի մեկնարկ, այդ թվում՝ ընտանիքով մրցույթ (ընտանիքից 3 հոգի), ֆուտբոլի, բասկետբոլի և վոլեյբոլի (թիմի կազմը՝ 4 հոգի) խմբային մրցումներ
5:44 Մրցանակաբաշխություն, բացի դրամական պարգևներից և նվերներից հաղթողները կստանան նաև Yell extreme park -ի նվեր քարտեր:
Արդեն 20 տարի բոլորիդ սիրով հրավիրում ենք մեզ մոտ մարզվելու, իսկ ապրիլի 5-ին հրավիրում ենք ոչ միայն մարզվելու, այլև մեզ շնորհավորելու և մեզ հետ միասին տորթ ու սուրճ վայելելու։ Եթե որոշեք դատարկաձեռն չգալ, կխնդրեի բերել միայն այնպիսի նվերներ, որոնք կարող եք նվիրել մրցանակակիրներին։ Թող նվերներն այնքան առատ լինեն, որ ուրախությունն ու մարզվելու ոգևորությունը մեր մարզիկներին բավարարի ամբողջ տարին:
Դե ինչ` միացեք մեր ուրախությանը ապրիլի 5-ին Դիլիջան Ջիմում։ Ամեն տարի չէ, որ դառնում ես 20 տարեկան:

Դիլիջանի մարզական ակումբի հիմնադիր Գարիկ Թովմասյան

Մարտի 24-ին Մոսկվայում ընթացող EBP բռնցքամարտի առաջնությունում այգեհովիտցի Վաղինակ Թամրազյանը, ով IBA վարկածով աշխարհի չեմպիոն է, հաղթանակ տոնեց Բրենդոն Դենեսի հետ մենամարտում և նվաճեց EBP վարկածով Եվրոպայի չեմպիոնի տիտղոսը։

Տավուշի մարզում մեկնարկում է «Հույսի կամուրջ» հասարակական կազմակերպության «Ֆուտբոլը՝ հանուն հավասար հնարավորությունների» ծրագրի 2-րդ մրցաշրջանը։ Նախագիծը նախորդ տարի իրականացվել է միայն մարզկենտրոն Իջևանում,իսկ այս տարի ընդգրկում է արդեն Տավուշի բոլոր համայնքները:

Ծրագրի շրջանակում հաշմանդամություն ունեցող երեխաներին հնարավորություն է տրվելու զբաղվել սպորտով, ինչն էականորեն կբարելավի նրանց ֆիզիկական ու մտավոր կարողությունները, կնպաստի սոցիալական հմտությունների ձևավորմանը ու զարգացմանը։
Ներառական ֆուտբոլային թիմերի ստեղծման միջոցով ծրագիրը կնպաստի նաև հանարկրթական դպրոցների երեխաների և պատանիների ինքնագնահատականի, ինքնավստահության բարձրացմանը, նոր ընկերների ձեռքբերմանն ու իրենց առջև դրված նպատակների իրականացմանը: Կբարելավվեն ֆիզկուլտուրայի ուսուցիչների և մարզիչների գիտելիքներն ու հմտությունները ներառական ֆուտբոլի վերաբերյալ:

«Ֆուտբոլը՝ հանուն հավասար հնարավորությունների» ծրագիրը իրականացնում է «Հույսի կամուրջ» ՀԿ-ը՝ «Երեխաների համար ՈՒԵՖԱ հիմնադրամի» ֆինանսական աջակցությամբ։

2024 թվականին լրանում է ԵՊՀ Իջևանի մասնաճյուղի հիմնադրման 30-ամյակը։ Այս առիթով մասնաճյուղում ընթացիկ ուսումնական տարվա ընթացքում մի շարք միջոցառումներ են նախատեսվում, որոնցից մի քանիսը արդեն ընթացքի մեջ են։ Մասնաճյուղի հիմնադրման 30-ամյակին նվիրված միջոցառումների շրջանակում մարտի 7-ին ԵՊՀ Իջևանի մասնաճյուղում տեղի ունեցավ բադմինթոնի բաց առաջնություն։

Բաց առաջնության կազմակերպման նպատակն էր ոգևորել Տավուշի մարզի երիտասարդներին՝ վարելու առողջ ապրելակերպ, բարձրացնել նրանց ֆիզիկական պատրաստությունը, մասսայականացնել սպորտը Տավուշում: Առաջնության մասնակիցների շարքում մասնաճյուղի ուսանողներ էին և երիտասարդներ Տավուշի համայնքներից, ովքեր սիրողական զբաղվում են բադմինթոն սպորտաձևով։ Անիտան, ով տարիքով կրտսեր մասնակիցն էր, բադմինթոնի Հայաստանի մինչև 13 տարեկանների մրցապայքարում առաջին հորիզոնականն է գրավել և առաջիկայում իր ուժերը կփորձի Չեխիայում։

ԵՊՀ Իջևանի մասնաճյուղի հիմնադրման 30-ամյակին նվիրված մարզական ևս մեկ միջոցառման ավարտին լավագույն արդյունքներ ցուցաբերած մասնակիցները պարգևատրվեցին խրախուսական նվերներով։

Իջևանի «Նիկարմ» ֆուտբոլային ակումբը ֆուտբոլային պատմության մեջ առաջին անգամ մասնակցում է Հայաստանի ֆուտբոլի պրոֆեսիոնալ առաջնությանը։ Բարեհաջող անցնելով Ֆուտբոլի ֆեդերացիայի արտոնագրման փուլը, «Նիկարմ» ակումբին հնարավորություն է տրվել մասնակցելու Ֆուտբոլի Առաջին խմբի մրցաշարին։ Պրոֆեսիոնալ ֆուտբոլի մրցաշարին մասնակից դառնալը եղել է «Նիկարմի» կարևորագույն նպատակներից։
«Նիկարմ» ակումբի կազմում հիմնականում տավուշցիներ են․ ակումբը հնարավորություն է տալիս այս միջոցով զբաղվել պրոֆեսիոնալ ֆուտբոլով և գնալ իրենց ֆուտբոլային կարիերայի հետևից։

Թիմի կազմում կան նաև երևանաբնակ ու արտերկրից ժամանած ֆուտբոլիստներ, ովքեր իրենց փորձառությամբ են կիսվում։
Տոմոյա Շիմամուրան, ով թիմի հարձակվողն է, եկել է Ճապոնիայից։
-Նիկարմը լավ թիմ է, նոր է ձևավորվել թիմը, ու բոլորս ձգտում ենք հասնել առավելագույնին, և հավատում ենք, որ քայլ առ քայլ կարող ենք ունենալ առաջընթաց ու ձեռքբերում։ Գիտեք, ֆուտբոլում կարևոր է թիմային աշխատաքը, որը մեզ մոտ ստացվում է։ Հայաստանը ինձ շատ է դուր եկել, ու այստեղ ինձ լավ եմ զգում, հատակապես մարդկանց շնորհիվ, – նշում է ճապոնացի ֆուտբոլիստը։

Որն է հաջողության հասնելու ճանապարհը․ մեր հարցին ի պատասխան թիմի մարզիչը նշում է անդադար աշխատելը։ Վերջին տարիներին «Նիկարմ» ակումբը աննախադեպ թվով թիմեր է ձևավորվել Տավուշի մարզի տարբեր քաղաքային ու գյուղական բնակավայրերում, ովքեր խաղում են Սիրողական լիգայում, ներկայացված են մանկապատանեկան առաջնություններում, կանանց ֆուտբոլում․ այժմ նաև՝ ֆուտբոլի պրոֆեսիոնալ Առաջին խմբի առաջնությունում։
«Նիկարմ» ակումբը զարգացնում է ֆուտբոլը Տավուշում։ «Տավուշի մարզում ֆուտբոլի զարգացումը անխուսափելի է»․ այս կարգախոսն Նիկարմի ավելի քան 23 տարվա գործունեության նպատակակետը։

Հունիսի  6-ին ՀՖՖ գրասենյակում կայացավ ՀՖՖ Ակումբների Արտոնագրման կոմիտեի (1-ին ատյանի մարմնի) հերթական նիստը՝ ՀՀ Առաջին խմբի առաջնության ակումբների արտոնագրման վերաբերյալ:

Նիստի ընթացքում քննության էին դրվել արտոնագրման գործընթացին դիմած 8 թեկնածուների՝ «Գանձասար ՖԱ» ՀԿ-ի, «Լեռնային Արցախ ՖԱ» ՍՊԸ-ի, «ՍԱ Միկա» ՀԿ-ի, «Հայասա ՖԱ» Մարզական ՀԿ-ի, «Նիկարմ ՖԱ» ՍՊԸ-ի, «Օնոր» ՍՊԸ-ի, «Սյունիք ՖԱ» ՍՊԸ-ի և «Անդրանիկ ՖԱ» ՀԿ-ի արտոնագրային փաստաթղթային փաթեթները, որոնցով նրանք դիմել էին Առաջին խմբի արտոնագիր ստանալու համար:

Արտոնագրման գործընթացին դիմած ակումբների թվում էին նաև «Դովեղ ՖԱ» ՀԿ-ն և «Աղբյուրակ ՄՄ» ՀԿ-ն, որոնք, սակայն, արտոնագրման գործընթացի ընթացքում հետ էին վերցրել իրենց դիմումները` չներկայացնելով որևէ արտոնագրային փաստաթուղթ։

Քննելով ՀՀ Առաջին խմբի առաջնության ակումբների արտոնագրման համար դիմած 8 թեկնածու ակումբների դիմումները՝ Արտոնագրման կոմիտեն կայացրեց միաձայն որոշում, ըստ որի Առաջին խմբի արտոնագրեր շնորհվեցին բոլոր 8 թեկնածու ակումբներին՝ «Գանձասար ՖԱ» ՀԿ-ին, «Լեռնային Արցախ ՖԱ» ՍՊԸ-ին, «ՍԱ Միկա» ՀԿ-ին, «Հայասա ՖԱ» Մարզական ՀԿ-ին, «Նիկարմ ՖԱ» ՍՊԸ-ին, «Օնոր» ՍՊԸ-ին, «Սյունիք ՖԱ» ՍՊԸ-ին և «Անդրանիկ ՖԱ» ՀԿ-ին:

Այդ արտոնագրերը նրանց իրավունք կընձեռեն մասնակցելու 2023/2024թթ․ մրցաշրջանի ՀՀ Ֆուտբոլի Առաջին խմբի առաջնությանը:

Բեզուն սկսում է նոր սեզոնը շատ հաճելի միջոցառումներով: Մենք ներկայացնում ենք հեծանիվները մարզային քաղաքներում:

Այսպես, ապրիլի 8-ին ուղևորվում ենք Իջևան՝ Տավուշի մարզ։ Հրավիրում ենք բոլոր տավուշեցիներին Իջևանի քանդակների այգի՝ հեծանիվ քշելու և լավ ժամանակ անցկացնելու։

Մենք նաև հետաքրքիր առաջարկ ունենք քաղաքային առաքմամբ զբաղվողների, ինչպես նաև հյուրատների համար, այնպես որ եթե այս ոլորտներում զբաղված եք, ապա առանց մտածելու եկեք:

Գալու է նաև Տավուշ ՀԸ նկարահանող խումբը, այնպես որ հեռուստացույցով էլ մեզ կտեսնեք
Կհանդիպենք այս շաբաթ օրը՝ Ապրիլի 8-ին, ժամը 13։00 Իջևանի քանդակների այգում։

Մեզ գտնելու համար զանգեք 098 222 389 հեռախոսահամարով։

Մինչ հանդիպում

Շոտոկան Կարատե-դո մարտարվեստի՝ Երևան քաղաքի 10-րդ բաց առաջնությունում Բերդ համայնքի պատանի մարզիկները տպավորիչ հաջողություններ են արձանագրել՝ վերադառնալով 24 մեդալով:

Այսօր՝ մարտի 24-ին, կայացել է մրցանակային տեղեր զբաղեցրած մարզիկների պարգևատրման արարողությունը:
Շնորհավորելով մարզիկներին՝ Բերդի տարածաշրջանի հոգևոր հովիվ Տեր Արամ քահանա Միրզոյանը նշել է. «Այսօր ներկա ենք ուրախալի իրադարձության. Բերդ համայնքի տարբեր բնակավայրերից մեր զավակները մասնակցել են խոշորագույն մրցաշարերից մեկին, որին մասնակցել է 400-ից ավելի մարզիկ և վերադարձել մեդալներով: Սա անչափ կարևոր է մեզ համար: Ամեն կերպ խրախուսում և ողջունում ենք, որովհետև շատ հստակ է. թե ինչպիսին է լինելու մեր վաղվա օրը, մեծապես կախված է նրանից, թե ինչպիսին է մեր վերաբերմունքը պատանիների, երիտասարդների հանդեպ… »:

Մարզիկները հանդես են եկել ցուցադրական ելույթներով:
Գոտու որակավորման քննություն հանձնած երեխաները ստացել են վկայականներ:

Այնուհետև կայացել է Շոտոկան Կարատե-դո մարտարվեստի՝ Երևան քաղաքի 10-րդ բաց առաջնությունում մրցանակային տեղեր զբաղեցրած մարզիկների պարգևատրման արարողությունը:

Շոտոկան Կարատե-դո մարտարվեստի՝ Բերդ համայնքի մարզիչ Արամ Աղաբաբյանը, Տիգրան և Մովսես Քալանթարյանները(Չորաթան), Վահագն Շառյանը(Բերդ), Այգեձորի միջն. դպրոցի 2005թ.-ի շրջանավարտները, ռուսաստանաբնակ չինարեցիները, նորաշենցիները և մովսեսցիները Բերդ համայնքի ղեկավարի կողմից պարգևատրվել են շնորհակալագրերով՝ համայնքում սպորտի զարգացման գործում ունեցած ներդրման համար:

Շնորհակալագրերը հանձնել են Բերդ համայնքի ղեկավարի խորհրդականներ Սամվել Հովսեփյանը և Լեռնիկ Բաբայանը: