Օգոստոսի 14-ին Հայ առաքելական եկեղեցին տոնեց Աստվածամոր Վերափոխման տոնը։ Տավուշում այս տոնի օրն արդեն ավանդաբար հաստատվել է նաև որպես Հաղարծին վանքի ուխտի օր։

Տոնի առթիվ վանական համալիրում մատուցվել է սբ․ Պատարագ, և ապա կատարվել Խաղողօրհնեքի կարգ՝ Տավուշի թեմի առաջնորդ Բագրատ Սրբազանի ձեռամբ։

Ավանդությունը պատմում է, որ երբ Սուրբ Աստվածամայրը ննջեց, Բարդուղիմեոս առաքյալը ներկա չէր՝ Հայաստանում էր: Երբ վերադարձավ Երուսաղեմ, խորապես վշտացավ, որ չէր արժանացել Սուրբ Աստվածածնին վերջին հրաժեշտը տալուն: Առաքյալներին խնդրեց բացել Տիրամոր գերեզմանը, որպեսզի ինքն էլ կարողանա վերջին անգամ տեսնել նրան և մխիթարվել: Առաքյալներն աղոթք արեցին ու հոժարեցին եղբոր փափագը կատարել: Երբ բացեցին գերեզմանը, Սուրբ Կույսի մարմինն այնտեղ չգտան, այլ միայն պատանքները: Եվ նրանք փառավորեցին Աստծուն՝ իմանալով Աստվածամոր վերափոխման մասին:



2022-2023 ուս.տարվան ընդառաջ Տավուշի մարզում առաջին անգամ մեկնարկում է «Իրական դպրոց» նախագիծը:

Դպրոցի գործունեության սկիզբը տրվում է մարզկենտրոն Իջևանից. oգոստոսի 12-ին կայացավ բաց դաս-հանդիպում, որի ընթացքում բոլոր հետաքրքրված անձինք հնարավորություն ստացան մանրամասն ծանոթանալու Իրական դպրոցի կառուցվածքին, նպատակին, գաղափարներին և իրականացված ու իրականացվելիք նախագծերին:

Բացի դպրոցի գործունեությանը մասնակիցներին ծանոթացնելը, Իրական դպրոցը ամռան ամիսների ընթացքում Իջևանում հանդես էր եկել կրթամշակութային մի քանի նախաձեռնություններով:

«Իրական դպրոց» նախագիծը իրականացվում է ԵՄ «Համայնքի ղեկավարները՝ հանուն տնտեսական զարգացման» տարածաշրջանային դրամաշնորհային ծրագրի շրջանակներում: Ծրագրի գլխավոր հայտատուն Իջևանի համայնքապետարանն է, որը, համագործակցելով Առաջատար տեխնոլոգիաների ձեռնարկությունների միության (ԱՏՁՄ) և COWO համայնքային աշխատամիջավայրի հետ, նպատակ ունի ծավալել պետություն-մասնավոր գործընկերության երկխոսություն՝ ուղղված զբոսաշրջության, բարձրարժեք գյուղատնտեսության և սննդի վերամշակման ոլորտներում նորարար ձեռներեցության զարգացման համար կայուն էկոհամակարգի ստեղծմանը։

Ծրագիրն առաջարկում է առաջադեմ կրթական հնարավորություններ՝ Իրական դպրոցի գործարկման և մասնագիտական դասընթացների մեկնարկի միջոցով՝ հիմնված նախագծային կրթության մոդելի վրա:
Իրական դպրոցի սաներն ունեն մասնագիտական վերապատրաստում ստանալու հնարավորություն` վարժանքների, աշխատանքի վրա հիմնված ուսուցման և կոշտ ու փափուկ հմտությունների զարգացման միջոցով:



Նորաշենից մեր թղթակից Էսթեր Զաքարյանն այսօր գյուղից 15 պատանի-երիտասարդների հետ գնացել է արշավի դեպի «Կիլի պներ» («Գայլի բներ») բնական հուշարձան։

Ընթացքում երիտասարդներն ունեցել են նաև տեղեկատվական զրույց՝ տավուշեցի մշակութային գործիչներին ճանաչելու թեմայով։



Օգոստոսի 11-ին Նոյեմբերյանում բացվեց հուշաղբյուր՝ նվիրված 44-օրյա պատերազմում զոհված ավագ լեյտենանտ Հայկ Ղարսյանի հիշատակին:

Հուշաղբյուրի բացման և խաչքարի օծման արարողությանը ներկա էին Հայկի հարազատները, ընկերները, ծառայակիցները: Խաչքարն օծվեց Տավուշի թեմի առաջնորդ Բագրատ Եպիսկոպոս Գալստանյանի ձեռամբ:

Միջոցառման ընթացքում ներկայացվեց Հայկ Ղարսյանի կյանքը, անցած մարտական ուղին: «Հայկի կերպարն ուրվագծվում է որպես ժպտերես, հարգալից ու հայրենասեր մարդու»,- իրենց հիշողություններով կիսվում են ներկաները

Հայկ Ղարսյանը մասնակցել է նաև Ապրիլյան քառօրյա պատերազմին, իսկ 44-օրյա պատերազմի օրերին եղել է ամենածանր ճակատներում՝ 30 օր կռվելով թշնամու դեմ:

Հայրենիքին մատուցած ծառայությունների համար ՀՀ Պաշտպանության նախարարի հրամանով Ավագ լեյտենանտ Հայկ Ղարսյանին հետմահու շնորհվեց կապիտան զինվորական կոչում:

Հայկը ծնվել է 1995թ. դեկտեմբերի 26-ին, Տավուշի մարզի Նոյեմբերյան քաղաքում: 2009-2013 թթ. սովորել է Մոնթե Մելքոնյանի անվան ռազմամարզական վարժարանում, 2013-2017 թթ.՝ Վազգեն Սարգսյանի անվան ռազմամարզական համալսարանում:

Մինչև ավարտելը մասնակցել է Ապրիլյան պատերազմին՝ կռվելով Ջրականում: Համալսարանն ավարտել է լեյտենանտի կոչումով և ծառայության անցել Ասկերանի շրջանի Իվանյան (Խոջալու) բնակավայրում: 2 տարի անց գերազանց ծառայության համար ստացել է ավագ լեյտենանտի կոչում: Հայ Ղարսյանը հերոսաբար զոհվել է Վարանդայում՝ անօդաչու թռչող սարքի հարվածից։



«Պատերազմից հետո մոտ երկու տարի է անցել, ու շատ հերոսների ընտանիքներում զավակներ են ծնվում, շատ աղջիկներ փորձում են նոր ընտանիքներ կազմել, շատ մայրիկներ փորձում են ապրել այս դժվար ժամանակներում, և դա ինձ համար վերածննդի լավագույն օրինակն է․․․»․ պարուսույց Մերի Չիբուխչյանի նոր ներկայացումը կրում է «44-ի Վերածնունդը» խորագիրը։

Սա Մերիի և M Dance Studio-ի երկրորդ ներկայացումն է, որ կայանում է Իջևանի Մշակույթի պալատում։ Նախորդ տարի նույն վայրում բեմին էր մեկ այլ՝ «Չբացված հույսի առավոտը» խորագրով պարային ներկայացումը։

Մերին պատմում է, որ կան զգացմունքներ, որոնք հնարավոր է արտահայտել միայն արվեստի լեզվով, և այդ զգացմունքերից կազմված պատմության մասերից էլ ծնվել են երկու ներկայացումները։ 44-օրյա պատերազմում անմահացած Մանվելի նորածին եղբորը՝ Էմանուելին և նրա՝ կրկին ապրող ընտանիքը տեսնելով է Մերին հասել վերածննդի պատկերին, որին էլ նվիրված է նոր ներկայացումը։

«Ինձ համար ամենակարևոր խորհուրդն այն է, որ յուրաքանչյուրիս մեջ էլ տղերքն ապրում են․ այսինքն՝ քանի դեռ մենք կանք, քանի դեռ հիշում ենք, խոսում իրենց մասին՝ իրենց պատմություններն անավարտ չեն մնացել»․ ասում է Մերին։

Ուղիղ եթերով հեռարձակված ներկայացումը՝ այստեղ։

Յուրաքանչյուր չորեքշաբթի՝ ժամը 17:00-ին, Նոյեմբերյանի Մշակույթի կենտրոնը մանուկներինն է։

Մշակույթի կենտրոնի տնօրեն Սոնյա Զուրաբյանի նախաձեռնությամբ Նոյեմբերյան համայնքի մանուկների համար մեծ էկրաններին ցուցադրվում են հայկական և արտասահմանյան սիրված մուլտֆիլմեր։

Մանրամասները պատմում է Նոյեմբերյան համայնքից մեր թղթակից Հրանուշ Անանյանը։



Օգոստոսի 7-ին Կոթի գյուղում «Արարատ» հիմնադրամի հովանավորությամբ կազմակերպված եռօրյա ճամբարի վերջին օրն էր։

Ճամբարի ընթացքում մանուկների զբաղմունքների, ստացած նվերների ու ճամբարի աջակիցների մասին պատմում է Նոյեմբերյան համայնքից մեր թղթակից Վերա Սահակյանը։



Հայաստանում էքստրեմալ զվարճանքների առաջին համալիր՝ «Յելլ էքստրիմ պարկ»-ը 7 տարեկան է։

Երկու տարվա դադարից հետո այս տարի կրկին նշվեց Yell Extreme Park-ի տարեդարձը։ Օգոստոսի 6-ին «Ապագա ռեզորթի» տարածքում հավաքվել էին բնության ու արկածների սիրահար բազմաթիվ մարդիկ՝ Հայաստանի մարզերից և արտերկրից։ Yell’up խորագիրը կրող միջոցառման ընթացքում հյուրերի համար նախատեսվել էին հետաքրքիր խաղեր և բազմաթիվ զբաղմունքներ՝ հաճելի ժամանցն ապահովվելու համար:

«Յելլ էքստրիմ պարկ»-ը ստեղծվել է 2015 թվականին․ այն առաջին էքստրիմալ զվարճանքի վայրն է Հայաստանում, որը հնարավորություն է ընձեռում զբաղվել էքստրիմալ սպորտով՝ առանց պրոֆեսիոնալ լինելու անհրաժեշտության․ այն միավորում է արկածներ, բնություն և ակտիվ հանգիստ սիրող մարդկանց։

«Յելլ էքստրիմ պարկ»-ի նպատակը Հայաստանում արկածային զբոսաշրջության զարգացմանը նպաստելն է, նոր աշխատատեղեր ստեղծելը, հասարակական կյանքն ակտիվացնելը և առողջ ապրելակերպը խթանելը: Այդ նկատառումներից ելնելով՝ այն իրականացնում է ոլորտի զարգացմանն ուղղված մի շարք ծրագրեր՝ ձգտելով տարածաշրջանում զբոսաշրջության խոշոր կենտրոն դառնալ:

Միջոցառման կազմակերպիչները մտադիր են յուրաքանչյուր տարի մեծ ու տարբերվող միջոցառում կազմակերպել՝ ավելի ու ավելի շատ մարդկանց ներգրավելով, և Ենոքավանի բնության գրկում միասին տոնել «Յելլ»-ի տարեդարձը՝ խելահեղ ռիթմերի ու բազմաթիվ արկածային խաղերի ուղեկցությամբ։

«Մենք փորձում ենք ստեղծել միջավայր, որ մեր հյուրերից ամեն մեկը ևս կարողանա այստեղ նշել իր ծնունդը»,- ասում է «Ապագա Փրոջեքթս»-ի տնօրեն Տիգրան Չիբուխչյանը։



«Քննարկում Տավուշ TV-ով» շարքում կլոր սեղան-քննարկման թեման գյուղատնտեսությունն է։
Գյուղատնտեսությունը Հայաստանի տնտեսության զարգացման գերակա ուղղություններից մեկն է։ Տավուշի մարզը համարվում է գյուղատնտեսական մեծ ներուժ ունեցող մարզ։

Գյուղատնտեսությունը Տավուշում․ խնդիրների ու հեռանկարների մասին զրուցում ենք «Mountain High Angus» ծրագրի ղեկավար Աշոտ Պողոսյանի հետ։



«Մեր բարբառն ու բարքերը» հաղորդման երկրորդ երաժշտական պրեմիերան՝ Իտալիաներում ապրող իջևանցի Միզատելլայի, կամ էլ ոչ մի բանի ու ամեն ինչի՝ «մի զատ էլ ա»-ի մասին։

Ստեղծագործական թիմը՝ Հրանտ Ղազումյան և «Հատիկ բենդ»։