Իջևանում գործող «Իրական դպրոց» կրթական կառույցn ամփոփում է գործունեության մեկ տարին։ Ունենալով հագեցած մեկ ուսումնական տարի` մայիսի 13-ին «Իրական դպրոցում» հայտարարված էր բաց դռների օր՝ սովորողների ծնողներին, համայնքի բնակիչներին  ներկայացնելու անցող տարվա կատարած աշխատանքները, ունեցած հաջողություններն ու ձեռքբերումները։ Բաց դռների օրը հատուկ էր դպրոցի համար, քանի որ կառույցը ԿԳՄՍ նախարարության կողմից ստացել էր պետական հավատարմագրում՝ միջին մասնագիտական կրթական ծրագրեր իրականացնելու համար։ Իրական դպրոցն ունի Հայաստանի ուսումնական այլ հաստատություններից՝ հանրակրթական դպրոցներից ու քոլեջներից բավական տարբերվող ծրագրեր և մոտեցումներ: Այստեղ շեշտը դրվում է փորձառական ուսուցման վրա, ստացած գիտելիքը ամրապնդվում է փորձով, իրական նախագծի վրա աշխատանքով, ինչը հնարավորություն է տալիս գիտելիքը վերածել մնայուն արժեքի:

Դպրոցում կարևորվում է բազմակողմանի զարգացումը, ուսանողի՝ որպես անհատի կայացումը, ազգային մշակույթին հաղորդակից լինելը, ռազմական գիտելիքները, ֆիզիկական պատրաստականությունը, քաղաքացիական գիտակցությունը։ Հանդիպման մասնակիցները նաև ծանոթացան դպրոցի գաղափարներին և ընդունելության ընթացակարգին։

Իջևանի «Իրական դպրոց» կարող են հաճախել 9-րդ դասարանն ավարտած աշակերտները։ Ընդունելությունը կսկսվի մայիս ամսից։

Դպրոցն ավարտելիս ուսանողները ստանալու են համակարգաբանի որակավորում տնտեսական, քաղիրավական կամ կրթամշակութային ոլորտում: Որակավորման ոլորտը կախված է լինելու ուսանողի կատարած գիտահետազոտական աշխատանքների բնույթից։

Տավուշ TV-ի եթերում մեկնարկում է նոր հաղորդաշար՝ «Խոսք ու զրույց»: Հաղորդման առաջին հյուրը երգիչ, հումորիստ, մեր հայրենակից Արթուր Մուսայելյանն է։ Նրա հետ խոսել ենք հումորային հոլովակների ստեղծման գաղափարի, կյանքի նպատակների մասին, կատակել ենք, և իհարկե, անդրադարձել տարածված խոսք ու զրույցներին։

Այսուհետ սիրված ու ճանաչված տավուշցիների հետ ջերմ, անկեղծ, անմիջական զրույցի միջոցով փորձելու ենք նրանց բացահայտել ու ներկայացնել նորովի։

Մայիսի 15-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Աչաջուր բնակավայրում անցկացվելու է «Օդային տագնապ ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12:00-ին գործարկվելու է էլեկտրական շչակ:

Խնդրում ենք չանհանգստանալ։

Կողբի թիվ 2 միջնակարգ դպրոցում տեղադրվել է անվանի մանկավարժ Բագրատ Սահակյանի կիսանդրին Կողբի Բագրատ Սահակյանի անվան թիվ 2 միջնակարգ դպրոցում վերջերս տեղադրվել է անվանի մանկավարժ, վաստակաշատ ուսուցիչ Բագրատ Սահակյանի կիսանդրին:

Մայիսի 12-ին հանդիսավորությամբ կայացավ կիսանդրու բացման արարողությունը: Կիսանդրու տեղադրումը Սահակյանների ընտանիքի ու դպրոցի համատեղ նախաձեռնությամբ է կյանքի կոչվել: Հանդիսավոր միջոցառմանը դպորցի ուսուցչական և աշակերտական կազմը ներկայացրեց Բագրատ Սահակյանի կյանքը, նրա անցած ճանապարհը:

Ներկայացվեց նաև նրա զավակների կյանքը, ովքեր այսօր հանրապետության լավագույն և օրինակելի մասնագետներն են: Արարողությանը ներկա էին Բագրատ Սահակյանի ժամանակակից գործընկերները, ովքեր պատմեցին ուսուցչի մարդկային բարձր որակերի մասին: Բագրատ Սահակյանը ավելի քան 50 տարի աշխատել է Կողբի թիվ մեկ և թիվ երկու դպրոցներում:

«Մեր ազգաբնակչությունը պիտի կպած մնան մեր սահմանին, որպեսզի հարատևի հայալեզու տարրը այս հողի վրա», – նշում է Բագրատ Սահակյանի որդին՝ ՀՀ գլխավոր միկրովիրաբույժ Արտավազդ Սահակյանը: Միջոցառումը ուղեկցվեց ազգային, հայրենասիրական երգ ու պարով, որոնք պատրաստել էին դպրոցի սաները:

Կողբի Բագրատ Սահակյանի անվան թիվ 2 միջնակարգ դպրոցը այս տարի կտոնի հիմնադրման 50-ամյակը: Այսօր դպրոցը հանրապետության լավագույն դպրոցների շարքին է դասվում, աշակերտները մշտապես մասնակցում են օլիմպիադաների և վերադառնում հաղթանակներով: Դպրոցի տնօրենը վստահեցնում է, որ Կողբի թիվ երկրոդ դպրոցը աժանապատվորեն կկրի Բագրատ Սահակյանի անունը:

ՀՀ ՆԳ նախարար Վահե Ղազարյանը Տավուշի մարզպետարանում հանդիպեց մարզի 12-րդ դասարանի աշակերտուհիների հետ։ Հանդիպման նպատակը պարեկային ծառայությունը կանանցով համալրելն ու ծառայության գրավչությունը բարձրացնելն էր։

Հանդիպմանը ներկա էին նաեւ Տավուշի մարզպետ Հայկ Ղալումյանը, ՀՀ ՆԳՆ ոստիկանության պետի տեղակալ, ոստիկանության գնդապետ Կարեն Հակոբյանը, ՀՀ ՆԳՆ ոստիկանության Տավուշի մարզային վարչության պետ, ոստիկանության գնդապետ Արթուր Մկրտչյանը եւ այլ բարձրաստիճան անձինք։

Նախարարը աշակերտներին ներկայացրեց պարեկային ծառայությունում աշխատանքի անցնելու վերաբերյալ տեղեկատվություն` ընդունելության կարգի, փուլային ստուգումների, ինչպես նաև ուսումնառության գործընթացի իրականացման մասին։

Քննարկվեց նաև հասարակական կարգի պահպանության և հասարակական անվտանգության ապահովման գործում ոստիկանի դերը։

ՀՀ սննդամթերքի անվտանգության տեսչական մարմնի Տավուշի մարզային կենտրոնի տեսուչները ստուգում են իրականացրել անհատ ձեռնարկատեր Ռ․ Մինասյանին պատկանող խմորեղենի արտադրամասում (Տավուշի մարզ, ք․ Իջևան) և պարզել, որ արտադրամասում առկա են իրավական ակտերով սահմանված սանիտարահիգիենիկ նորմերի կոպիտ խախտումներ:

ՀՀ բարձր տեխնոլոգիական արդյունաբերության նախարարությունը 2023 թվականի «Գաղափարից մինչև բիզնես» դրամաշնորհային ծրագրի շրջանակներում հայտարարում է «Գաղափարի փուլ» բաղադրիչով դրամաշնորհային մրցույթի մեկնարկի մասին: Այդ մասին հայտնում են ԲՏԱՆ-ից:

Ծրագրի շրջանակում նախատեսվում է դրամաշնորհների տեսքով ֆինանսավորում տրամադրել գաղափարի փուլում գտնվող սկսնակ ընկերություններին, որոնց կողմից ներկայացվող արտադրանքի և (կամ) ծառայության գաղափարը միտված է բարձր տեխնոլոգիաների ոլորտում նոր արժեքի ստեղծմանը և (կամ) տեխնոլոգիաների կիրառմամբ արդի խնդիրների և մարտահրավերների լուծմանը:

Դրամաշնորհային ծրագրի ընդհանուր բյուջեն կազմում է 150.000.000 (հարյուր հիսուն միլիոն) ՀՀ դրամ:  Նախատեսվում է մրցույթը հաղթահարած յուրաքանչյուր ընկերությանը տրամադրել մինչև 5.000.000 (հինգ միլիոն) ՀՀ դրամ:

Մրցույթի վերաբերյալ բոլոր մանրամասները՝ անցկացման կարգը, հայտ կազմելու և ներկայացնելու պայմանները, ներկայացված են նախարարության պաշտոնական կայքում՝ հետևյալ հղումով:

Մայիսի 13-ին Իջևանի Իրական դպրոցում հայտարարված է բաց դռների օր: Դպրոցի թիմը իր հյուրերին կներկայցնի կրթական կառույցի գաղափարները, ընդունելության գործընթացը և այն ամենը ինչ կապված է դպրոցի հետ:

Եթե ցանկանում եք տեսել Իրական դպրոցի «իրական կողմերը» բաց մի թողեք այս հանդիպումը։

Մանրամասները դիտեք մեր հարցազրույցում

Մայիսի 30-ին Իջևանի մշակույթի պալատում տեղի ունեցավ  «Հավերժ Չեմպիոնը»  խորագրով միջոցառում՝ նվիրված Պավել Աբազյանին:

Պավելը հավերժի ճամփան է բռնել այս տարվա հունվարի 19-ին՝ Ազատ գյուղի զինվորական կացարանում բռնկված հրդեհի պատճառով։ Մինչ ծառայության գնալը Պավել Աբազյանը սովորում էր Հայաստանի պետական ճարտարագիտական համալսարանում, զուգահեռաբար կարատեով էր զբաղվում՝ ավելի քան տաս տարի։

Նրա մարզիչը պատմում է, որ Պավելը մի շարք միջազգային մրցույթներերի հաղթող էր, նա ոչ միայն իր լավագույն աշակերտներից էր, այլ նաև ամբողջ Հայաստանի լավագույն մարզիկներից մեկը։ 

Միջոցառմանը ներկա էին նրա ընտանիքի անդամները, ընկերներն ու ուսուցիչները, հոգևորականներ, այդ թվում Տավուշի թեմի առաջնորդ Տեր Բագրատ արքեպիսկոպոս Գալստանյանը։

Ներկաները հուզմունքով ու կարոտով էին հիշում Պավել Աբազյանին, նշելով, որ հիշատակը վառ կմնա՝ քանի դեռ ապրում են հիշողությունները։

«Հույսի կամուրջ» ՀԿ Իջևանի մասնաճյուղի «Ապրել միասին, սովորել միասին» համամարզային թատերական փառատոնի ամփոփիչ միջոցառումը տեղի ունեցավ մայիսի 12-ին, ԵՊՀ Իջևանի մասնաճյուղում: 

Մայիսի 10-ից մեկնարկած փառատոնն անցկացնում է «Հույսի կամուրջ» հասարակական կազմակերպությունը ՀՀ կրթության, գիտության, մշակույթի և սպորտի նախարարության ֆինանսավորմամբ և գործընկերությամբ Տավուշի մարզում իրականացվող «Մանկավարժահոգեբանական աջակցության ծառայություններ և կրթության առանձնահատուկ պայմանների կարիք ունեցող երեխաների կրթության կազմակերպմանն օժանդակող ծառայություններ» ծրագրի շրջանակներում: 

Փառատոնին մասնակցում էին Իջևան խոշորացված համայնքի 11 հանրակրթական դպրոցներ. նպատակը համընդհանուր ներառական և որակյալ կրթություն ստանալու իրավունքի իրացման շուրջ հասարակության իրազեկվածության մակարդակի բարձրացումն էր և կրթությանն աջակցող ծառայությունների և ներառականության գաղափարի տարածմանը նպաստելը:

Համամարզային թատերական փառատոնի ամփոփիչ միջառման վերջում բոլոր դպրոցները պարգևատրվեցին մասնակցության հավաստագրերով: