Ապրիլի 10-ին, ժամը 17։04-ին Տավուշի մարզային ճգնաժամային կառավարման կենտրոն ահազանգ է ստացվել, որ Վազաշեն գյուղի մոտակայքում տեղի է ունեցել ՃՏՊ․ անհրաժեշտ է փրկարարների օգնությունը:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Բերդ-Իջևան ավտոճանապարհի 30-րդ կմ-ին «Opel Zafira» մակնիշի ավտոմեքենան (վարորդ՝ Վ․ Ու․, ծնված 1981 թ․) դուրս է եկել ճանապարհի երթևեկելի գոտուց և մոտ 600 մետր գլորվել հարակից ձորը։

Վարորդը շտապօգնության աշխատակիցների կողմից տեղում ստացել է համապատասխան բուժօգնություն։

Փրկարարները հոսանքազրկել են ավտոմեքենան և հատուկ տեխնիկայի օգնությամբ դուրս բերել ձորից։

Ի՞նչը կարող է միավորել Դիլիջանից Ստելլային, շվեյցարահայ Լեռնային, սիրիահայ Ջոնիին, ֆրանսահայ Ցողիկին․ իհա՛րկե՝ «Թամզարա» նախաձեռնությունը։ 

Ապրիլի 9-ին Իջևանի Շատրվանների հրապարակը մարդաշատ էր․ Սուրբ Հարության տոնի առթիվ կազմակերպված «Թամզարա – 3»-ը մեծ սիրով ու լույսով բոլորին վարակելու նպատակ ուներ․ ներկաները հավաստում են՝ լիովին հաջողված նպատակ։

Իջևանի կենտրոնում մշակութային մեծ տոնախմբությունից Տավուշ TV-ն իհարկե, անմասն չի մնացել․ Հրանտ Ղազումյանը և մեր թիմը պատմում են միջոցառման մասին՝ հատուկ ձեզ համար։ 

Արցախյան 44-օրյա պատերազմում նահատակված Լևոն Մանթաշյանը ապրիլի 3-ին կդառնար 22 տարեկան։ Լևոնի ծննդյան օրը Դիլիջանի մանկական երաժշտական դպրոցում կայացավ «Գարունը երկնքում» հուշ-ցերեկույթը։

Դեռևս 15 տարեկանում Լևոնը սկսել է նվագել կիթառ, ավելի ուշ սկսել է նաև ստեղծագործել։ 2018 թվականին ընկերների հետ ստեղծել են «Եղևնուտ» երաժշտական խումբը, որտեղ ստանձնել է առաջնորդ-կիթառահարի, վոկալիստի ու երգերի հեղինակի դերը։ Այդ ընթացքում գրել է մի շարք հեղինակային երգեր ու բանաստեղծություններ, որոնք ամբողջացվել են և շուտով կհրատարակվեն։

Լևոն Մանթաշյանին նվիրված «Գարունը երկնքում» հուշ-ցերեկույթը նախաձեռնել էր Դիլիջանի համայնքապետարանը։ 

Լևոնը ծնվել է 2001 թվականի ապրիլի 3-ին, Ռուսատանի Դաշնության Պերմ քաղաքում: 2007 թվականին տեղափոխվել է Դիլիջան, ընդունվել քաղաքի թիվ 4 հիմնական դպրոց, ուսումը շարունակել է Դիլիջանի ավագ դպրոցում։ 2019 թվականին զորակոչվել է բանակ` ծառայության անցնելով Արցախի Հանրապետության առաջին պաշտպանական շրջանում։ Լևոնը զինակից ընկերների հետ կռվել և զոհվել է մարտի դաշտում՝ 2020 թվականի հոկտեմբերի 10-ին։

Բեզուն սկսում է նոր սեզոնը շատ հաճելի միջոցառումներով: Մենք ներկայացնում ենք հեծանիվները մարզային քաղաքներում:

Այսպես, ապրիլի 8-ին ուղևորվում ենք Իջևան՝ Տավուշի մարզ։ Հրավիրում ենք բոլոր տավուշեցիներին Իջևանի քանդակների այգի՝ հեծանիվ քշելու և լավ ժամանակ անցկացնելու։

Մենք նաև հետաքրքիր առաջարկ ունենք քաղաքային առաքմամբ զբաղվողների, ինչպես նաև հյուրատների համար, այնպես որ եթե այս ոլորտներում զբաղված եք, ապա առանց մտածելու եկեք:

Գալու է նաև Տավուշ ՀԸ նկարահանող խումբը, այնպես որ հեռուստացույցով էլ մեզ կտեսնեք
Կհանդիպենք այս շաբաթ օրը՝ Ապրիլի 8-ին, ժամը 13։00 Իջևանի քանդակների այգում։

Մեզ գտնելու համար զանգեք 098 222 389 հեռախոսահամարով։

Մինչ հանդիպում

Աչաջուր, Ծաղկավան, Կիրանց ու Բերքաբեր գյուղերի բնակիչները հավաքվել էին Մակարավանքում․ Հայ առաքելական եկեղեցին տոնում էր Ծաղկազարդը։

Տոնը նշվում է Զատկից մեկ շաբաթ առաջ։ Այս տարի այն նշվեց ապրիլի 2-ին։ Ծաղկազարդի առավոտյան եկեղեցիներում Պատարագ է մատուցվում, օրհնվում են ձիթենու կամ ուռենու ճյուղերն ու նվիրում ժողովրդին, որոնք, ըստ սովորության, պետք է պահվեն մինչև հաջորդ Ծաղկազարդ, քանի որ իրենց հետ առատություն, պտղաբերություն ու բարիք են բերում ։

Արարողության ժամանակ Իջևանի թիվ 1 երաժշտական դպրոցի ժող. գործիքների համույթը հանդես եկավ տոնական համերգով։

Ծաղկազարդի երեկոյան կատարվում է Դռնբացեքի արարողությունը, որի ընթացքում «Բաց մեզ, Տէր զդուռն ողորմութեան» շարականի ներքո բացվում են եկեղեցիների խորանների վարագույրները՝ խորհրդանշելով Տիրոջ երկրորդ գալուստը, աշխարհի վախճանը և Վերջին դատաստանը։

Այսօր՝ ապրիլի 3-ին, Հեռուստատեսության և ռադիոյի հանձնաժողովը գումարել է նիստ, օրակարգում՝ լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի մասնակիցների հայտերի վարկանիշային քվեարկության և հաղթողի ընտրության վերաբերյալ հարցը։

Նիստի օրակարգի հաստատումից հետո Հանձնաժողովի անդամները փակ և գաղտնի քվեարկության միջոցով գնահատել են լսողական ծրագրի մրցույթի մասնակիցներին:

Վարկանիշային քվեարկության արդյունքում մասնակցության համար հայտ ներկայացրած «ԷՖ-ԷՄ» ՍՊ ընկերությունը ստացել է 81, «ՏԱՎՈՒՇ ՄԵԴԻԱ» ՍՊ ընկերությունը՝ 85, իսկ «ՄԵԴԻԱ ՄԱՐՍԵՏ» ՍՊ ընկերությունը՝ 66 միավոր:

Այսպիսով, վարկանիշային քվեարկության միջոցով լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի հաղթող է ճանաչվել «ՏԱՎՈՒՇ ՄԵԴԻԱ» ՍՊ ընկերությունը:

«Զրույցներ գնդապետի հետ»․ Տավուշ TV-ի եթերում այսօր նոր շարք է մեկնարկում։

Հեռուստադիտողին հրավիրում ենք մեզ հետ միասին տեղափոխվելու Մոնթե Մելքոնյանի անվան ռազմավարժարանի լսարան․ այստեղ միասին ունկնդրելու ենք վարժարանի հիմնադիր գնդապետ Ալեքսան Մինասյանի զրույցներն իր սաների և արդեն նաև՝ մեզ հետ հետ։

Առաջին թողարկման թեման է՝ «Դաստիարակություն»։

Անթալիա քաղաքում ընթացող աշխարհի երիտասարդների 2-րդ առաջնության նժույգթափերի վարժության եզրափակչում Համլետ Մանուկյանը հավաքել է 14.633 միավոր և զբաղեցրել առաջին հորիզոնականը: Մամիկոն Խաչատրյանը, 14.100 միավորով, դարձել է արծաթե մեդալակիր:

Անթալիա քաղաքում ընթացող աշխարհի երիտասարդների 2-րդ առաջնության նժույգթափերի վարժության եզրափակչում Համլետ Մանուկյանը հավաքել է 14.633 միավոր և զբաղեցրել առաջին հորիզոնականը: Մամիկոն Խաչատրյանը, 14.100 միավորով, դարձել է արծաթե մեդալակիր: Հայաստանի ներկայացուցիչները երեկ մասնակցել էին աշխարհի երիտասարդական առաջնության բազմամարտի եզրափակչին։ Համլետ Մանուկյանը 78.666 միավորով գրավել է 6-րդ, իսկ Էրիկ Բաղդասարյանը՝ 12-րդ տեղը։

«Եթե բոլորը ձգտեն քաղաք, այստեղի մշակույթն ո՞վ կպահի»։

Դերասանուհի Նաիրա Աբրահամյանը Նոյեմբերյանի Մշակույթի կենտրոնում է 1991 թվականից, խաղացել է 30-ից ավելի ներկայացումներում, վերջերս պարգևատրվել է նաև ՀՀ մշակույթի նախարարության ոսկե մեդալով։

Տավուշ Մեդիայի թղթակից Հրանուշ Անանյանի տեսանյութը գծում է Նաիրա Աբրահամյանի դիմանկարը՝ այն նվիրյալներից մեկի, ում շնորհիվ կենդանի և բաբախող է Նոյեմբերյան համայնքի մշակութային սիրտը։

«Քեզ համար»․ այս խորագիրն է կրում մարտի 20-ին Կողբում բացված խմբակային ցուցահանդեսը, որտեղ ներկայացված են մի շարք արվեստագետների աշխատանքներ։

Կողբի գեղարվեստի դպրոցում ընթացող ցուցահանդեսի խորագիրը՝ «Քեզ համար», ընտրված է այնպես, որ յուրաքանչյուր այցելու ներկայացված աշխատանքներում և միջավայրում գտնի այն, ինչն իրեն հոգեհարազատ է՝ գույները, նախասիրությունները, տրամադրությունը։ 

Ցուցահանդեսը բաց կլինի 20 օր, այնպես որ շտապե՛ք այցելել։

Բացման մասին մանրամասները պատմում է Տավուշ Մեդիայի թղթակից Հրանուշ Անանյանը։