Հայ Առաքելական եկեղեցին այսօր՝ ապրիլի 5-ին, նշում է մեր Տեր և Փրկիչ Հիսուս Քրիստոսի Հրաշափառ Սուրբ Հարության տոնը:

Հիսուս Քրիստոսի հրաշափառ Հարության տոնը կոչվում է նաև Զատիկ, որը նշանակում է զատում, բաժանում, հեռացում մեղքերից և վերադարձ առ Աստված: Զատիկը Հայ Առաքելական Ս. Եկեղեցու 5 տաղավար տոներից մեկն է:

Հիսուս Քրիստոսի խաչելությունից և մահից հետո` երեկոյան, բարեպաշտ մարդիկ Նրա մարմինը իջեցրին խաչից և դրեցին վիմափոր գերեզմանի մեջ՝ փակելով մեծ քարով: Երեք օր հետո` կիրակի առավոտյան, յուղաբեր կանայք` Մարիամ Մագդաղենացին, Հակոբի մայր Մարիամը և Սողոմեն, գնացին գերեզման՝ անուշաբույր յուղերով օծելու Քրիստոսի մարմինը, սակայն զարմանքով տեսան, որ քարայրի մուտքի քարը հեռացված է, իսկ գերեզմանը` թափուր: Մինչ նրանք տարակուսում էին, երևացին երկու հրեշտակ և ասացին. «Ինչո՞ւ եք ողջին մեռելների մեջ փնտրում: Այստեղ չէ, այլ Հարություն առավ» (Ղուկ. 24:5-6):

Հարության լուրը կանայք ավետեցին առաքյալներին, որից հետո Հիսուսը երևաց նրանց: Քրիստոսի Հարությունը դարձավ քրիստոնեական վարդապետության և հավատի հիմքը: «Եթե մեռելների հարություն չկա, ապա և Քրիստոս հարություն չի առել: Եվ եթե Քրիստոս Հարություն չի առել, իզուր է մեր քարոզությունը, իզուր է և ձեր հավատը» (Ա Կորնթ. 15:13-14):

Սբ. Հարության տոնի նախընթաց երեկոյան եկեղեցիներում մատուցվում է Ճրագալույցի Սբ. Պատարագ, որով սկսվում են զատկական տոնակատարությունները: Առավոտյան եկեղեցիներում կատարվում է ժամերգություն, Անդաստանի արարողություն, ապա մատուցվում տոնական Սբ. Պատարագ: Սբ. Հարության տոնին հավատացյալները միմյանց ողջունում են «Քրիստոս Յարեաւ ի մեռելոց» ավետիսով, պատասխանում՝ «Օրհնեալ է Յարութիւնն Քրիստոսի»:

Զատկի տոնին հավատացյալները ձու են ներկում: Ներկված ձուն համարվում է Հարության և նոր կյանքի խորհրդանիշ: Կարմիր գույնը խորհրդանշում է խաչյալ Հիսուսի կենդանարար արյունը, որ թափվեց մարդկության փրկության համար: Ըստ Սբ. Գրիգոր Տաթևացու՝ «Միայն Զատկին ենք ձու ներկում, որովհետև ձուն օրինակ է աշխարհի», և ինչպես իմաստուններն են ասում. «Դրսի կեղևը նման է երկնքին, թաղանթը՝ օդին, սպիտակուցը՝ ջրին, դեղնուցն էլ երկիրն է: Իսկ կարմիր գույնը խորհրդանշում է Քրիստոսի արյունը: Եվ մենք կարմիր ձուն մեր ձեռքերի մեջ առնելով` հռչակում ենք մեր փրկությունը»:

Հիսուս Քրիստոսի հրաշափառ Հարության տոնը Հայ Եկեղեցին նշում է 50 օր՝ մինչև Հոգեգալստյան տոն (Պենտեկոստե): Այս ընթացքը կոչվում է Հինանց շրջան կամ Հինունք, որը ծագում է «հիսունք» բառից:

Հինանց շրջանի քառասուն օրերը Հարուցյալ Քրիստոսի՝ աշակերտներին երևալու և Աստծո արքայության մասին վկայություններ տալու հիշատակությունն են (Գործք 1:3), իսկ վերջին տասն օրերը նվիրված են Քրիստոսի Համբարձմանը:

Հինանց շրջանը ավարտվում է Հոգեգալստյան տոնով:

Համբարձումից տասն օր հետո, ըստ Քրիստոսի խոստման, առաքյալների վրա իջավ Աստծո Սբ. Հոգին, և զորացած առաքյալները վկայեցին Քրիստոսին ամբողջ աշխարհով:

Դիտեք նաև՝

Ապրիլի 2-ին, ժամը 14։35-ին Տավուշի մարզային օպերատիվ կառավարման կենտրոն ահազանգ է ստացվել է, որ Մովսես բնակավայրի սկզբնամասում տեղի է ունեցել քարաթափում, ինչի հետևանքով ժայռաբեկորը հարվածել է ճանապարհին կայանված ավտոմեքենային, որը բախվելով ծառերին ու քարերին հայտնվել է ձորում։

Դեպքի վայր է մեկնել ՆԳՆ ՓԾ Տավուշի մարզային փրկարարական վարչության հրշեջ-փրկարարական ջոկատի օպերատիվ խումբը։

Փրկարարները պարեկային ծառայողների հետ համատեղ հեռացրել են թափված քարերը ճանապարհի երթևեկելի հատվածից։ Քարաթափման հետևանքով տուժածներ չկան։

Նոյեմբերյան համայնքի Կոթի բնակավայրի 41-ամյա բնակիչը վիրավորվել է ականի պայթյունից։ Տեղեկությունը Տավուշ Մեդիայի հետ զրույցում հաստատեց Կոթիի վարչական ղեկավար Անդրանիկ Հախվերդյանը։ Դեպքը տեղի է ունեցել ապրիլի 2-ին՝ ժամը 15։00-ի սահմաններում, երբ գյուղացին փորձել է գտնել կորած անասունին։

Տուժածը տեղափոխվել է «Նոյեմբերյան» բժշկական կենտրոն, որտեղ բժիշկներն իրականացրել են ոտնաթաթի անդամահատում։ «Նոյեմբերյան» ԲԿ տնօրեն Էդուարդ Գրիգորյանը մեզ հետ զրույցում հայտնեց, որ քաղաքացու կյանքին վտանգ չի սպառնում։

Դիլիջան քաղաքն առաջադրվել է World Travel Awards 2026 հեղինակավոր մրցանակաբաշխությանը՝ «Եվրոպայի առաջատար զարգացող զբոսաշրջային ուղղություն» անվանակարգում։ Այս առաջադրումը կարևոր ձեռքբերում է քաղաքի համար՝ որպես արագ զարգացող և մեծ զբոսաշրջային ներուժ ունեցող ուղղության։

World Travel Awards-ը համարվում է ոլորտի ամենահեղինակավոր հարթակներից մեկը և հաճախ բնութագրվում է որպես «զբոսաշրջային արդյունաբերության Օսկար»։ Այն միավորում է այն ուղղությունները, կազմակերպություններն ու նախաձեռնությունները, որոնք առանձնանում են բարձր որակով և այցելուների համար ստեղծվող բացառիկ փորձառություններով։

Քաղաքի օգտին քվեարկելու կամար կարող եք անցնել հետևյալ հղմամբ։

Ինչո՞ւ Դիլիջան

Դիլիջանը հայտնի է իր հարուստ բնությամբ, ազգային պարկով, լեռնային արշավային արահետներով, պատմամշակութային հուշարձաններով, հին վանքերով և ինքնատիպ մշակութային փորձառություններով։

Վերջին երեք տարիների ընթացքում Դիլիջան այցելողների թիվն աճել է շուրջ 30 տոկոսով, իսկ գիշերակացի հնարավորություններ տրամադրող օբյեկտների թիվը՝ շուրջ 35 տոկոսով։ Այս ցուցանիշները վկայում են, որ Դիլիջանը գնալով ավելի մեծ հետաքրքրություն է առաջացնում այն ճանապարհորդների շրջանում, ովքեր նախընտրում են բնության, հանգստի, բարեկեցության և դանդաղ ճանապարհորդության վրա հիմնված փորձառություններ։

«Եվրոպայի առաջատար զարգացող զբոսաշրջային ուղղություն» անվանակարգը կարևորում է նաև կայուն և համայնքակենտրոն զարգացման մոդելը, որի դեպքում զբոսաշրջությունից ստացվող եկամուտները վերաներդրվում են շրջակա միջավայրի պահպանության, մշակութային ծրագրերի և տեղական նախաձեռնությունների իրականացման մեջ՝ ապահովելով երկարաժամկետ արդյունք ինչպես բնակիչների, այնպես էլ շրջակա միջավայրի համար։

Այս անվանակարգում Դիլիջանի առաջադրումը նաև ընդգծում է Հայաստանի հարուստ մշակութային ժառանգությունը, ինքնատիպությունը և զբոսաշրջիկներին առաջարկվող բազմազան փորձառությունները՝ պատմամշակութային արժեքներից ու ավանդույթներից մինչև ժամանակակից և զարգացող զբոսաշրջային ուղղություններ։

Հայաստանում մեկնարկել է «Էներգաարդյունավետության և վերականգնվող էներգիայի լուծումների և խորհրդատվության խթանում Հայաստանում» (SAFER) նախաձեռնության շրջանակում դիմումների ընդունման գործընթացը։ Ծրագրի նպատակն է աջակցել բնակչությանը՝ բարելավելու բնակարանների էներգաարդյունավետությունը, նվազեցնելու էներգետիկ ծախսերը և բարձրացնելու կենցաղային հարմարավետությունը։

Նախաձեռնությանը կարող են դիմել Շիրակի, Տավուշի, Սյունիքի և Գեղարքունիքի մարզերի խոցելի և կին գլխավորությամբ տնային տնտեսությունները, որոնք որպես ջեռուցման հիմնական միջոց օգտագործում են վառելափայտ կամ աթար՝ վառարանների միջոցով։

Դիմումների ընդունման ժամկետը սահմանված է 2026 թվականի ապրիլի 1-ից մինչև ապրիլի 30-ը։

Ծրագրի շրջանակում նախատեսվում է աջակցություն տրամադրել շուրջ 300 տնային տնտեսության՝ նպաստելով էներգետիկ ծախսերի կրճատմանը, բնակարանների էներգաարդյունավետության և հարմարավետության բարձրացմանը, ինչպես նաև շրջակա միջավայրի պահպանությանը։

Շահառուներին կտրամադրվի հետևյալ աջակցությունը․

•  բնակարանների ջերմամեկուսացում (դռների և պատուհանների փոխարինում, պատերի, տանիքի և հատակի մեկուսացում),
• արևային ֆոտովոլտային համակարգերի տեղադրում,
• արևային ջրատաքացուցիչների տեղադրում,
• էներգաարդյունավետ վառարանների տրամադրում։

Ընտրված շահառուները պարտավոր են ապահովել նվազագույնը 10% համաֆինանսավորում ընդհանուր ներդրման արժեքից՝ բացառությամբ էներգաարդյունավետ վառարանների տրամադրման դեպքերի։

Դիմումները ընդունվում են բացառապես առցանց՝ SAFER նախաձեռնության պաշտոնական safer.am կայքի միջոցով, որտեղ ներկայացված են նաև մասնակցության չափանիշները և դիմելու ընթացակարգը։

Ծրագիրն իրականացվում է Գերմանական խնայողական բանկերի միջազգային համագործակցության հիմնադրամի հայաստանյան ներկայացուցչության կողմից՝ Եվրոպական միության և Գերմանիայի կառավարության համաֆինանսավորմամբ, GIZ-ի կողմից իրականացվող «Կայուն էներգիա հանուն Հայաստանում կլիմայակայուն համայնքային զարգացման» (SE4Resilience) ծրագրի շրջանակում։