ՀՀ ԱԺ հերթական ընտրությունների քվեարկության օրը շարունակվում է Տավուշի մարզում։ Տավուշ Մեդիայի նկարահանող խումբն այցելել է Իջևան համայնքի Խաշթառակ, Աչաջուր և Ազատամուտ բնակավայրերի ընտրատեղամասեր՝ տեղում հետևելու ընտրական գործընթացին։

Այցելած բոլոր տեղամասերում քվեարկությունն ընթանում էր կազմակերպված և հանգիստ պայմաններում։ Տեղամասային ընտրական հանձնաժողովների անդամների փոխանցմամբ՝ ընտրական գործընթացի ընթացքում որևէ արտառոց դեպք, միջադեպ կամ խախտում չի արձանագրվել։ Քաղաքացիները շարունակում են մասնակցել քվեարկությանը՝ կատարելով իրենց ընտրությունը։

Ժամը 17:00-ի դրությամբ Տավուշի մարզում արդեն քվեարկել է 55 հազար 096 ընտրող, ինչը կազմում է ընտրողների ընդհանուր թվի 53,27 տոկոսը։

Իջևան համայնքի Խաշթառակ, Աչաջուր և Ազատամուտ բնակավայրերի ընտրատեղամասերում ևս ընտրողների հոսքը պահպանվում է, իսկ ընտրական գործընթացը շարունակվում է օրենքով սահմանված կարգով։ Ընտրական օրվա ավարտին կամփոփվեն նաև մասնակցության վերջնական տվյալներն ու քվեարկության արդյունքները։

Այսօր՝ 2026 թվականի հունիսի 7-ին, Հայաստանի Հանրապետությունում անցկացվում են Ազգային ժողովի հերթական ընտրությունները։ Առավոտյան ժամը 08:00-ին, ՀՀ ընտրական օրենսգրքով սահմանված կարգով, բացվել են ընտրությունների համար ձևավորված բոլոր 2005 ընտրական տեղամասերը, որոնցից 9-ը գործում են քրեակատարողական հիմնարկներում։ Ընտրողների էլեկտրոնային գրանցման գործընթացն ապահովելու նպատակով հանրապետության ողջ տարածքում կիրառվում է շուրջ 4000 տեխնիկական սարքավորում, իսկ 1758 ընտրատեղամասերում տեղադրված են համաժամանակյա հեռարձակում իրականացնող տեսախցիկներ։ Ընտրական գործընթացի մատչելիությունն ապահովելու նպատակով 1996 ընտրատեղամասերից 612-ը հարմարեցված են հենաշարժական խնդիրներ ունեցող քաղաքացիների համար։ Ընտրությունների ընթացքը լուսաբանելու նպատակով հավատարմագրվել են 71 տեղական զանգվածային լրատվության միջոցներ և շուրջ 180 օտարերկրյա լրատվամիջոցների ներկայացուցիչներ։

Տավուշ Մեդիան ընտրական օրվա լուսաբանումը սկսել է Դիլիջան քաղաքից։ Մեր նկարահանող խումբն այցելել է քաղաքի մի շարք ընտրատեղամասեր, զրուցել ընտրողների, տեղամասային ընտրական հանձնաժողովների անդամների, վստահված անձանց և դիտորդական առաքելությունների ներկայացուցիչների հետ։

Առավոտյան ժամերի դրությամբ ընտրատեղամասերում աշխատանքը կազմակերպված էր բնականոն ռեժիմով։ Ընտրական գործընթացի մասնակիցների փոխանցմամբ՝ էական խնդիրներ կամ խոչընդոտներ չեն արձանագրվել, իսկ քաղաքացիների մասնակցությունն աստիճանաբար ակտիվանում էր։ Դիտորդական առաքելությունների ներկայացուցիչները նշում էին, որ հետևում են քվեարկության ընթացքին և արձանագրում ընտրական գործընթացի բոլոր փուլերը։ Տեղամասային հանձնաժողովների անդամների խոսքով՝ ընտրությունները մեկնարկել են կազմակերպված պայմաններում, իսկ տեխնիկական սարքավորումներն աշխատում են անխափան։

Օրվա ընթացքում Տավուշ Մեդիան շարունակաբեր հետևել ընտրությունների ընթացքին,հետևեք թարմացվող տեղեկատվությանը՝ Տավուշն ընտրում է։

Ժամը 17։00-ի դրությամբ ընտրական իրավունք 2 միլիոն 505 հազար 102 քաղաքացիներից քվեարկությանը մասնակցել է 1 մլն 224 հազար 957-ը կամ ընտրական իրավունք ունեցող քաղաքացիների 48,92%-ը: Այս մասին տեղեկացնում են ԿԸՀ-ից:

Ընտրական օրը Տավուշում շարունակվում է․ արդեն քվեարկել է 55 հազար 096 տավուշեցի (53,27%)։

Քվեարկության մասնակիցների պատկերը՝ ըստ համայնքների։

• Իջևան՝ 19 հազար 183 քաղաքացի (54,66%),
• Դիլիջան` 9 հազար 631 քաղաքացի (49,52%),
• Բերդ՝ 12 հազար 636 քաղաքացի (52,94%),
• Նոյեմբերյան՝ 13 հազար 646 քաղաքացի (54,54%),

Ժամը 14:00-ի դրությամբ, ընտրական իրավունք 2 միլիոն 505 հազար 102 քաղաքացիներից քվեարկությանը մասնակցել է 847 հազար 226 ընտրող կամ ընտրական իրավունք ունեցող քաղաքացիների 33.84 %-ը: Այս մասին տեղեկացնում են ԿԸՀ-ից:

11:00-ի դրությամբ ընտրական իրավունք 2 միլիոն 505 հազար 102 քաղաքացիներից քվեարկությանը մասնակցել է 362 հազար 657-ը կամ ընտրական իրավունք ունեցող քաղաքացիների 14.48%-ը: Այս մասին տեղեկացնում են ԿԸՀ-ից:

Հայաստանի Հանրապետությունում ժամը 08:00-ից մեկնարկել է հերթական խորհդարանական ընտրությունների քվեարկությունը. ընտրատեղամասերը կփակվեն 20։00-ին:

2026թ․ հունիսի 7-ին կայանալիք Ազգային ժողովի ընտրությունների քվեարկության նախորդ օրվա դրությամբ՝ ՀՀ ընտրողների ռեգիստրում ընդգրկված ընտրողների ընդհանուր թիվը կազմել է 2.485.851, որից ըստ գտնվելու վայրի ընտրական տեղամասերում ընդգրկված ընտրողների թիվը՝ 22734, հաշվառում չունեցող ընտրողների թիվը՝ 492, ընտրական տեղամասեր գործուղվող ոստիկանության ծառայողների թիվը՝ 5239, ստացիոնար բուժում իրականացնող բժշկական հաստատությունում գտնվող ընտրողների ընդհանուր թիվը՝ 627, տեղաշարժման դժվարություն ունեցող ընտրողների թիվը՝ 8:

Տավուշի մարզում ընտրության իրավունք ունի 101 695 քաղաքացի։

Հանրապետության ողջ տարածքում 38 ընտրատարածքներում գործում է 2005 տեղամաս, որից 93-ը Տավուշի մարզում։

Հայաստանում ընտրությունների լուսաբանման համար հավատարմագրվել են տեղական 71 լրատվամիջոցներ: Դիտորդական առաքելություն կիրականացնեն միջազգային 8 և տեղական 19 կազմակերպություններ։

Սիրելի հայրենակիցներ,

ընտրական օրվա ընթացքում Տավուշ Մեդիան աշխատում է արտակարգ ռեժիմով՝ ապահովելով ընտրական գործընթացի օպերատիվ և բազմակողմանի լուսաբանումը Տավուշի մարզի համայնքներից և ընտրատեղամասերից։

Մեր նկարահանող խմբերը ողջ օրվա ընթացքում պարբերաբար կներկայացնեն ռեպորտաժներ, ուղիղ եթերներ, հարցազրույցներ՝ ընտրությունների ընթացքի, մասնակցության ցուցանիշների, արձանագրվող իրադարձությունների և քաղաքացիների կարծիքների վերաբերյալ։ Տավուշ Մեդիայի կայքում և սոցիալական հարթակներում շարունակաբար կթարմացվեն տեղեկությունները՝ ընտրողների մասնակցության, քվեարկության ընթացքի, ինչպես նաև ընտրական գործընթացի կարևոր զարգացումների մասին։

Հետևե՛ք մեր աշխատանքին, եղե՛ք իրազեկված և առաջինն իմացե՛ք ընտրական օրվա կարևոր նորությունները Տավուշից։

Ընտրական օրվա ընթացքում Տավուշ Մեդիայի լրահավաք հեռախոսահամարը կգործի շուրջօրյա ռեժիմով։ Եթե ունեք տեղեկություններ հնարավոր խախտումների, միջադեպերի կամ ընտրությունների ընթացքին վերաբերող այլ դեպքերի մասին, զանգահարեք՝ 060460202։

Տավուշն է ընտրում