Հունվարի 15-ին Տավուշի մարզից պարտադիր ժամկետային զինվորական ծառայության է մեկնել ՀՀ զինված ուժերի կազմը համալրող զորակոչիկների հերթական խումբը։

Տավուշ Մեդիայի ֆոտոշարքը՝ Իջևանից։

Կարդացեք նաև՝

Տավուշի մարզում շարունակվում է ձմեռային զորակոչը։ Հունվարի 12-ին Իջևան, Նոյեմբերյան, Բերդ և Դիլիջան համայնքներից պարտադիր ժամկետային զինվորական ծառայության է մեկնել ՀՀ զինված ուժերի կազմը համալրող զորակոչիկների հերթական խումբը։

Զորակոչիկներին ճանապարհելու էին եկել նրանց ընտանիքի անդամները, հարազատները, ընկերներն ու համայնքի բնակիչները։ Նրանք զորակոչիկներին մաղթեցին խաղաղ ու արժանապատիվ ծառայություն, ամուր կամք, առողջություն և անվտանգ վերադարձ՝ վստահ լինելով, որ տղաները պատվով կկատարեն իրենց զինվորական պարտքը։

Տավուշ Մեդիայի ֆոտոշարքը՝ Իջևանից։

Բերդ համայնքից լուսանկարները՝ Բերդի համայնքապետարանի։

Կարդացեք նաև՝

Համայնքային ոստիկանության Նոյեմբերյանի բաժնի ծառայողները հունվարի 7-ին օպերատիվ տեղեկություն էին ստացել, որ Երևանյան փողոցում մի խումբ քաղաքացիներ վիճաբանում են:

Մեկնած օպերատիվ խումբը պարզել է, որ ճանապարհը չզիջելու հարցի շուրջ վիճաբանություն-քաշքշուկ է եղել «Նիսանի» 43-ամյա վարորդի, երկու ուղևորների և «Մերսեդեսի» 24-ամյա վարորդի և ուղևորի միջև: Բացահայտ անհարգալից վերաբերմունք դրսևորելով հասարակության նկատմամբ՝ նրանք հնչեցրել են հայհոյանքներ, փակել ճանապարհը՝ խոչընդոտելով մյուս տրանսպորտային միջոցների երթևեկությանը։

Համայնքային ոստիկանները վիճաբանության մասնակիցներին ձերբակալել և ավտոմեքենաներով հանդերձ՝ տեղափոխել են բաժին, ապա կազմված փաստաթղթերի հետ ներկայացրել նախաքննական մարմին։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Հունվարի 7-ին, ժամը 14։49-ին Տավուշի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Աչաջուր գյուղի 11-րդ փողոցի տներից մեկի բակում այրվում է կուտակած անասնակեր։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։

Պարզվել է, որ հրդեհը բռնկվել է տներից մեկին մոտակա կիսակառույց շինությունում:
Հրդեհը մեկուսացվել է ժամը 16:50-ին, մարվել՝ 20:20-ին: Այրվել է մոտ 500 հակ պահեստավորած և մոտ 3 տոննա կուտակած անասնակեր:

Հունվարի 7-ին Նոյեմբերյանից պարտադիր ժամկետային զինվորական ծառայության է մեկնել ՀՀ զինված ուժերի կազմը համալրող զորակոչիկների առաջին խումբը։

Զորակոչիկներին ճանապարհելու էին եկել նրանց ընտանիքի անդամները, ընկերները, քաղաքացիները, որոնց բարեմաղթանքը մեկն է՝ արժանապատիվ ու խաղաղ ծառայություն հայրենիքի զինվորներին։

Լուսանկարները՝ Նոյեմբերյանի համայնքապետարանի։

Հունվարի 6-ին, ժամը 17։39-ին Տավուշի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Բագրատաշեն գյուղում այրվում է տուն։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։

Պարզվել է, որ հրդեհը բռնկվել է Բագրատաշեն բնակավայրի 17-րդ փողոցում գտնվող երկհարկանի տան առաջին հարկում։

Հրդեհը մեկուսացվել է ժամը 19:30-ին մարվել՝ 21:01-ին: Այրվել են առաջին հարկի սենյակներից մեկը (մոտ 25 ք.մ)՝ գույքով և փայտե առաստաղը։

Հրշեջ-փրկարարներին հաջողվել է կանխել հրդեհի տարածումը դեպի տան մյուս հատվածներ և երկրորդ հարկ։

Սահմանամերձ Այգեձոր գյուղում տեղի ունեցավ ավանդական Նոր տարվան նվիրված մշակութային միջոցառում, որը միավորեց համայնքի տարբեր տարիքի բնակիչներին՝ ազգային արժեքների և ավանդույթների շուրջ։

Միջոցառման ընթացքում ներկաները միասին զարդարեցին ավանդական Կաղանդի ծառը, որը խորհրդանշում է բարեկեցություն, նոր սկիզբ և ընտանեկան օջախի ջերմություն։ Մասնակիցները հնարավորություն ունեցան նաև համտեսելու ավանդական տարեհացը՝ որպես առատության և բարության խորհրդանիշ։

Տոնը ուղեկցվեց հայկական ժողովրդական երգերով ու պարերով․ շուրջպարերը, ազգային խաղերն ու համատեղ երգեցողությունը ստեղծեցին ուրախ և միավորող մթնոլորտ։

Ավելին՝ Տավուշ Մեդիայի թղթակից Անահիտ Մակյանի տեսանյութում։

Տոնական տրամադրություն Ամանորի նախաշեմին՝ Իջևանի Շատրվանների հրապարակում։

Ձեզ ենք ներկայացնում խճանկար՝ ամանորյա միջոցառման մասին։

Իջևանի համայնքապետարանն ավանդույթի համաձայն ամփոփեց տարեվերջը՝ ներկայացնելով մարզական ոլորտում 2025 թվականին արձանագրված հաջողությունները և ոգևորելով տարվա լավագույն մարզիկներին ու մարզիչներին։ Միջոցառմանը ներկա էին Տավուշի մարզպետ Հայկ Ղալումյանը և Իջևանի համայնքի ղեկավար Արթուր Ճաղարյանը, ովքեր անձամբ հանձնեցին պատվոգրեր և խրախուսական նվերներ միջազգային և հանրապետական մրցաշարերում լավագույն արդյունքներ գրանցած մարզիկներին ու մարզիչներին։

Նրանք շնորհավորական խոսքերով ընդգծեցին մարզական ձեռքբերումների կարևորությունը և վստահեցրին, որ համայնքը շարունակելու է ապահովել մարզիկների համար աջակցություն, ինչպես նաև զարգացնել մարզական ենթակառուցվածքները համայնքում։

Միջոցառումն ամփոփեց անցնող տարվա հաջողությունները և ոգեշնչեց մարզական համայնքին՝ նշանավորելով առաջիկա տարվա նպատակները և ձգտումները։

Իջևանի խոշորացված համայնքի կրթամշակութային հաստատությունների սաներն ու ուսուցիչները, ովքեր տարվա ընթացքում հաջողություններ են գրանցել հանրապետական և միջազգային մրցույթներում, արժանացել են դրամական պարգևների՝ համայնքի ղեկավար Արթուր Ճաղարյանի կողմից։

Տարվա ընթացքում գրանցված ձեռքբերումների ամփոփմանը նվիրված միջոցառումը տեղի է ունեցել դեկտեմբերի 26-ին՝ Իջևանի երաժշտական դպրոցում։ Միջոցառմանը մասնակցել են համայնքապետարանի ենթակայությամբ գործող կրթամշակութային հաստատությունների սաներ, ուսուցիչներ, ծնողներ և հյուրեր։

Տոնական մթնոլորտում ներկայացվել են բազմաժանր երաժշտական կատարումներ, որոնք ևս մեկ անգամ ընդգծել են համայնքի մշակութային կյանքի ակտիվությունն ու ստեղծագործական ներուժը։ Միջոցառման ավարտին համայնքապետարանի կողմից դրամական պարգևներով խրախուսվել են այն սաներն ու ուսուցիչները, ովքեր իրենց նվաճումներով բարձր են պահել Իջևանի անունը տարբեր մրցահարթակներում։

Պարգևատրումը նպատակ ունի խթանել ստեղծագործական գործունեությունը, արժևորել կրթության և մշակույթի ոլորտում արձանագրված հաջողությունները և շարունակական աջակցություն ցուցաբերել տաղանդավոր սաներին ու նվիրված մանկավարժներին։