Հայրենական մեծ պատերազմում տարած հաղթանակի 80-րդ տարեդարձի կապակցությամբ Իջևանի Սահմանադրության հրապարակից մեկնարկեց քայլերթ` դեպի Հայրենական մեծ պատերազմի զոհերի հիշատակը հավերժացնող հուշահամալիր:
Հուշահամալիրի տարածքում օրվա խորհրդով անցկացվեց տոնական միջոցառում։
Սահմանամերձ Դովեղ գյուղի միջնակարգ դպրոցը դեռևս գտնվում է հիմնանորոգման փուլում, իսկ շինարարական աշխատանքները հետաձգվում են։ Նախատեսված էր, որ նոր դպրոցը շահագործման պետք է հանձնվի 2024 թվականի դեկտեմբերին, սակայն ներկայիս վիճակը մտահոգում է համայնքի բնակիչներին։
Ստեղծված իրավիճակում ահազանգում է Դովեղի միջնակարգ դպրոցը․
«Ահա մեր դպրոցի նոր կառուցվող շենքի վիճակը, այս ամենն արդյունք է շինարարի «բարեխիղճ» վերաբերմունքի և հետևողականության։ Շենքը պետք է պատրաստ լիներ 2024 թվականի դեկտեմբերի 27-ին։ Նույնիսկ նկարելու պահին ճանապարհի այս հատվածը նորից փլուզվեց, որին նպաստում են ամենօրյա անձրևները։ Այսքան ապրանքները` արդեն ոչ պիտանի շինարարական աշխատանքի համար, դարձել են շինարարական աղբ։
Հուսանք, գուցե, մի օր այս ամենը հուշ կդառնա և մեր աշակերտները դպրոց կգնան նոր ու հարմարավետ դպրոցում, նրանք ևս ունեն այդ իրավունքը»,- նշված է դպրոցի հայտարարության մեջ։
Կարդացեք նաև՝
Առաջատար Տեխնոլոգիաների Ձեռնարկությունների Միության Տավուշի մարզի ենթակառուցվածքներում և նախագծերում ՀՀ ԲՏԱ նախարար Մխիթար Հայրապետյանը
ԱՏՁՄ տնօրեն Սարգիս Կարապետյանի ուղեկցությամբ նախարարն այցելեց «ԻննոԻջևան» նորարարական հանգույց, Իջևանի թիվ 1 հիմնական դպրոցի «Արմաթ» ճարտարագիտական աշխատանոց և Իջևանի «Իրական դպրոց» ապա ԱՏՁՄ անդամ աշխարհահռչակ «Microchip Technology» ընկերության մասնաճյուղ։
Ընտրված երթուղին պատահական չէ, և մանրամասնորեն ցուցադրում է Հայաստանի տեխնոլոգիական համայնքում տաղանդի զարգացման ընթացքը։
Հայաստանի ավելի քան 600 դպրոցներում գործող «Արմաթ» աշխատանոցներում է տեղի ունենում երեխաների առաջին ծանոթացումը տեխնոլոգիական աշխարհին։ Ապա «Արմաթի» ծրագրերով անցած պատանիները կրթությունը շարունակում են «Իրական դպրոցներում», որոնց թիվը պլանավորվում է հասցնել 60-ի, ինչից հետո, որպես երիտասարդ մասնագետներ կամ տեխնոլոգիական ձեռներեցներ, հայտնվում են նորարարական հաբերում․ «ԻննոԻջևանն» այդպիսի հաբերից է։ Իսկ, թերևս, ամենահաջողակները՝ ժամանակի ընթացքում համալրում են «Microchip Technology»-ի պես առաջատար ընկերությունները։
Նախարարը կարևորել է մարզերում տեխնոլոգիաների զարգացմանն ուղղված ծրագրերի ներդրումը և իրականացումը, առանձնահատուկ շեշտել «Արմաթ» ճարտարագիտական աշխատանոցների ծրագրի բացառիկությունը, նաև որպես պետություն-մասնավոր համագործակցության ամենամասշտաբային և հաջողված օրինակներից մեկը։
Տեղի ունեցած քննարկման ընթացքում անդրադարձ է կատարվել պետություն-մասնավոր արդյունավետ համագործակցության կարևորությանը։ Քննարկվել և պարզաբանվել են նաև բարձր տեխնոլոգիաների ոլորտի պետական աջակցությունների տրամադրման, նոր ծրագրերի ընձեռած հնարավորություններին առնչվող մի շարք հարցեր։
ՀՀ կառավարության՝ մարզերում մշակութային-ժամանցային միջավայրերի ապահովման, սոցիալական ձեռներեցության կարողությունների զարգացման, ինքնազարգացման հնարավորությունների ընդլայնման, կրթական, մշակութային, տեղեկատվական իրադարձությունների իրականացմանն ուղղված միջոցառումների ծրագրի շրջանակում Նոյեմբերյանում կբացվի և կգործի երիտասարդների ինքնազարգացման, մշակութային-ժամանցային, նորարարական LOFT կենտրոնը:
Նախանշվում է, որ բազմաֆունկցիոնալ կենտրոնը պետք է ունենա տեխնիկական, տեխնոլոգիական և բովանդակային հագեցվածություն, որը մարզի երիտասարդության համար կապահովի ոչ ֆորմալ կրթության և մշակութաժամանցային միջավայր: Այս կերպ «Լոֆթն» ընդլայնում է իր գործունեությունը Տավուշի մարզում՝ արդեն գործելով Իջևանում և Նոյեմբերյանում:
34 տարի շարունակ այս օրը՝ մայիսի 6-ը, Նոյեմբերյան համայնքի համար հերոսացման և ցավի օր է:
Համայնքի բնակիչները հարգանքի տուրք են մատուցում 1991 թ. Խորհրդային Միության բանակի և Խորհրդային Ադրբեջանի օմոնականների «Կոլցո» օպերացիայի հետևանքով զոհված ոստիկանների հիշատակին:
—
1991 թվականի մայիսի 6-ի լուսաբացին Ոսկեպար գյուղի մերձակա անտառում խորհրդային բանակի ու ադրբեջանական օմոնի ծուղակն ընկավ Նոյեմբերյանի ոստիկանության 24 աշխատակից:
Մայիսի 5-ի ուշ երեկոյան Նոյեմբերյանի ներքին գործերի բաժնում ահազանգ է ստացվում, որ ադրբեջանցիները հատել են Նոյեմբերյանի սահմանն ու շարժվում են դեպի Ոսկեպար: Ոստիկանների խումբը ավտոբուսով ու «Նիվայով» գնում է պաշտպանելու գյուղի խաղաղ բնակչությանը: Գնում են սարերով, որովհետև գյուղ տանող ճանապարհը ադրբեջանցիների գնդակոծության տակ էր:
Գյուղ չհասած՝ անսպասելի հայտնվում են խորհրդային բանակի զինվորականներն ու սկսում կրակել: Տխրահռչակ «Կոլցո» օպերացիան ընթացքի մեջ էր… 11 ոստիկան զոհվում է տեղում, մյուսները գերեվարվում են. նրանցից երեքը մահանում են ադրբեջանական բանտերում: Այս դեպքից ժամեր անց խորհրդային զինվորները խաբեությամբ զինաթափում ու գերի են վերցնում նաև Ոսկեպարը պաշտպանող 45 ոստիկանների ու դարձյալ հանձնում ադրբեջանցի օմոնականներին:
Ոսկեպար․ 1991թ. մայիսի 6 | Կոլցո օպերացիայի ամենաարյունոտ էջը
Լուսանկարները` Տավուշ Մեդիայի թղթակից Հրանուշ Անանյանի:
Տավուշի մարզի սահմանամերձ Բարեկամավան գյուղի միջնակարգ դպրոցը գրում է․
«Դպրոցն ապրում է, երբ շունչ կա սահմանում…
Այսօր մեր համայնքը կանգնած է լրջագույն վտանգի առաջ՝ փակման եզրին է Բարեկամավանի դպրոցը։ Դպրոց, որը ոչ միայն կրթության օջախ է, այլև համայնքի հոգին։ Այն միակ լույսն է, որ փայլում է մեր սահմանին՝ ապացուցելով, որ հայրենիքը չի լքվել, որ հայ մարդը ապրում, արարում, սովորում ու սովորեցնում է։ Փակել դպրոցը՝ նշանակում է փակել մի ամբողջ պատմություն, ապագա ու երազանքներ»։
Բարեկամավան գյուղը հայ-ադրբեջանական սահմանից հեռու է մոտ 1000 մետր։ 1930-ական թվականներին գյուղի բնակչությունը կազմում էր շուրջ 900 մարդ, իսկ այսօր Բարեկամավանում 150 մարդ է ապրում։
«Տավշո աշխարհում, բարձրաբերձ լեռների մեջ, այնտեղ, որտեղ հողն ու երկինքը ձուլվում են, հպարտ կանգնած է Բարեկամավանի դպրոցը։ Սա պարզապես շենք չէ՝ քարերով ու պատերով կառուցված. սա գիտելիքի ջահն է, որ լուսավորում է սերունդների ճանապարհը, ուժ է տալիս համայնքին ու պահպանում գյուղի շունչը։
Այս դպրոցում ամեն դասասենյակ պատմություն ունի՝ լի երազանքներով, հաջողություններով ու անկոտրում կամքով։ Այստեղ աշակերտները միայն տառերը չեն սովորում, այլև հայրենիքի սիրո դասերը, որովհետև սահմանին գիտելիքը ոչ միայն ուժ է, այլև զենք։
Դպրոցի պատերից ներս անցյալի ու ապագայի ձայները խառնվում են իրար. առաջին ուսուցիչների խորհուրդներն ու նոր սերնդի նպատակները միաձուլվում են այստեղ։ Եվ քանի դեռ այս դպրոցում ծիծաղում են երեխաները, արձագանքում են զանգերը, և ուսուցիչները ջանասիրաբար փոխանցում են իրենց գիտելիքը, Բարեկամավանը կապրի, կշնչի ու կշարունակի իր պատմությունը գրել․․․»
Բարեկամավանի միջնակարգ դպրոց
Կարդացեք նաև՝
Այսօր՝ ապրիլի 28-ին Տավուշի մարզի Նոյեմբերյան համայնքի Պտղավան բնակավայրում անցկացվեց հրշեջ-փրկարարական ուսումնական վարժանք՝ գյուղում ձևավորված կամավոր հրշեջ-փրկարարական խմբի մասնակցությամբ։
Վարժանքը ղեկավարում էր Ավստրիական Կարմիր խաչի հրահանգիչ, փորձառու փրկարար Բերնարդ Ժանինին։
Խմբին առաջադրանք էր տրվել իրականացնել հրդեհաշիջում երկհարկանի կառույցում, տարհանել տուժածներին երկրորդ հարկից, և իրականացնեել տարածքի մշտադիտարկում՝ հրդեհի հնարավոր օջախները լիովին չեզոքացնելու նպատակով։
Վարժանքի ավարտին մասնակիցները քննարկեցին առաջադրանքի կատարման ընթացքը և ներկայացրին բարելավման առաջարկներ։
Լավագույն արդյունքներ ցուցաբերած կամավոր հրշեջ-փրկարարները պարգևատրվեցին պատվոգրերով։
Ապրիլի 29-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Դիլիջան համայնքի Հաղարծին բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում՝ ժամը 12:00-ին, գործարկվելու է էլեկտրական շչակ։
Խնդրում ենք չանհանգստանալ։
Ապրիլի 25-ին և 26-ին Դիլիջանի կենտրոնական դպրոցի նախաձեռնությամբ կայացավ արդեն ավանդույթ դարձած «Ծիլ» թատերական ամենամյա փառատոնը։ Այս տարի «Ծիլ»-ը նշում էր իր հոբելյանական հինգերորդ տարին։
Փառատոնին հայտնի և սիրված ստեղծագործությունների թատերական ներկայացումներով հանդես եկան Դիլիջանի կենտրոնական դպրոցի, Դիլիջանի թիվ 2 հիմնական դպրոցի, Լերմոնտովոյի Ե․Ուդալցովի անվան միջնակարգ դպրոցի, «ԷՎՐԻԿԱ» դպրոցի, «Արեգնազան» կրթահամալիրի և Ավետիսյան դպրոցի սաները։ «Ծիլ» թատերական փառատոնի նպատակն է միավորել և բեմական միջավայրում ներկայացնել շնորհաշատ այն երեխաներին, որոնք մեծ ցանկություն ունեն հանդես գալու թատերական ներկայացուներով։ Այն միտված է բացահայտելու բեմական հմտություններին տիրապետող դպրոցականներին։
Երկօրյա փառատոնի օրերին բեմի վրա ներկայացվեցին և արժևորվեցին ճանաչված գրողների ստեղծագործությունները հայերեն, ռուսերեն և անգլերեն լեզուներով՝ բոլորն էլ գունեղ և հետաքրքիր լուծումներով, ամեն մեկը ինքնատիպ մոտեցմամբ։
