Հայաստանում Հունաստանի դեսպանն այցելել է Տավուշի մարզ

Հայաստանում Հունաստանի արտակարգ և լիազոր դեսպան Խրիստոս Սոֆիանոպուլոսը դեկտեմբերի 15-ին Տավուշի մարզում էր:

Այցի շրջանակում դեսպանը հանդիպել է Տավուշի մարզպետ Հ. Ղալումյանին։ Հանդիպման ընթացքում քննարկվել են Հայաստանի և Հունաստանի միջև երկկողմ համագործակցության հնարավորությունները՝ մասնավորապես մշակութային, կրթական և տնտեսական ոլորտներում։ Կողմերը անդրադարձել են նաև համագործակցության զարգացման հեռանկարներին և համատեղ ծրագրերի իրականացման հնարավոր ուղիներին։

Այնուհետև դեսպանն այցելել է Նոյեմբերյան համայնք, հանդիպել համայնքի ղեկավար Ա. Աղաբաբյանի հետ։ Այցի ընթացքում դեսպանը հանդիպել է նաև տեղի հույն համայնքի ներկայացուցիչների հետ, ծանոթացել նրանց խնդիրներին և քննարկել հնարավոր համագործակցության հարցեր։

Նոյեմբերյանում իրականացվել է նաև շրջայց մի շարք հաստատություններում, այդ թվում՝ Թումո տեխնոլոգիական կենտրոնում, Կողբի գեղարվեստի դպրոցում և նորաբաց մարզասրահում։

Այցի ընթացքում կատարվել է նաև այցելություն նոյեմբերյանցիների և հույն համայնքի համատեղ ստեղծած այգու հուշակոթող։

Սահմանամերձ 3 դպրոցի տրամադրվել է աղետների ռիսկի կառավարման պատրաստվածության համար անհրաժեշտ գույք

Տավուշի մարզի սահմանամերձ երեք գյուղերի՝ Սարիգյուղի, Ոսկեպարի և Արծվաբերդի հիմնական դպրոցները համալրվել են աղետների ռիսկի կառավարման պատրաստվածության համար անհրաժեշտ գույքով։ Դպրոցները գույքը ստացել են Ճապոնիայի միջազգային համագործակցության գործակալության (JICA) «Աղետների ռիսկի կառավարման պատրաստվածություն» փոքր դրամաշնորհային ծրագրի շրջանակում։ Ծրագրի նպատակն է բարձրացնել դպրոցներում աշակերտների և ուսուցիչների անվտանգության մակարդակը, ձևավորել գիտելիքներ ու կարողություններ աղետների ռիսկի նվազեցման և արտակարգ իրավիճակների կառավարման ոլորտում, ինչպես նաև ամրապնդել դիմակայունությունը հնարավոր աղետների դեպքում։

«Ճապոնիան հաճախ է բախվում բնական աղետների, և տարիների ընթացքում կուտակած փորձը կարող է օգտակար լինել նաև այլ երկրների համար։ Ծրագրի շրջանակում դպրոցներին տրամադրվել է անհրաժեշտ գույք ու տեխնիկա, ինչը կնպաստի կրթական հաստատությունների անվտանգության բարելավմանը։ Բացի այդ, ուսումնասիրվել են դպրոցների քաղաքացիական պաշտպանության պլաններն ու սխեմաները, կատարվել են անհրաժեշտ թարմացումներ» ,- Տավուշ Մեդիայի հետ զրույցում նշեց Վրաստանում Ճապոնիայի միջազգային համագործակցության գործակալության (JICA) մշտական ներկայացուցիչ Ջունջի Վակուին:

Կարճ ժամանակահատվածում Տավուշի մարզի երեք դպրոցները համալրվել են հակահրդեհային վահանակներով, առաջին օգնության արկղերով, պատգարակներով, բարձրախոսներով, տարահանման սխեմաներով և պայմանական նշաններով։ Մշակվել և բոլոր դասասենյակներում ու համապատասխան վայրերում փակցվել են նաև տարահանման պլանները։

Ծրագրի ավարտին Սարիգյուղի միջնակարգ դպրոցում կազմակերպվեց նաև ուսումնական վարժանք՝ անձնակազմի և աշակերտների պաշտպանությունը ուժեղ երկրաշարժի դեպքում թեմայով։

Բերդ-Վերին Կարմիրաղբյուր գյուղ տանող ճանապարհին այրվել է ավտոմեքենա. կա տուժած

Դեկտեմբերի 12-ին, ժամը 19։53-ին Տավուշի մարզային փրկարարական վարչության ճգնաժամային կառավարման կենտրոն տեղեկություն է ստացվել, որ Բերդ-Վերին Կարմիրաղբյուր գյուղ տանող ավտոճանապարհին այրվում է ավտոմեքենա:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Հրդեհը մեկուսացվել է ժամը 20:29-ին, մարվել՝ 20:38-ին: Այրվել է «VAZ» մակնիշի ավտոմեքենա։

Հրդեհի հետևանքով կա մեկ տուժած․ վերջինս տեղափոխվել է բժշկական կենտրոն։

Հելունագործությունը՝ ինքնարտահայտման ճանապարհ․ Շուշան Ղալեչյանի պատմությունը

Տավուշի մարզի Վերին Կարմիրաղբյուր գյուղի բնակիչ Շուշան Ղալեչյանը հելունագործությամբ սկսել է զբաղվել ազատ ժամանակը օգտավետ ու հետաքրքիր դարձնելու նպատակով։ Այն, ինչ սկզբում պարզապես հոբբի էր, ժամանակի ընթացքում վերածվեց սիրելի և մշտական զբաղմունքի։ Շուշանը միշտ սիրել է ձեռագործ աշխատանքները, և հենց այդ սերն էլ նրան մղել է սեփական ուժերով փորձել ստեղծել յուրօրինակ հելունագործ գործեր։ Թեև սկզբնական փուլում դժվարություններ եղել են, սակայն համբերությունը, հետաքրքրությունը և անընդհատ փորձարկումները նրան առաջ մղեցին, զարգացան հմտությունները։

Ընտանիքը մշտապես նրա կողքին է։ Ժամանակի ընթացքում Շուշանը կատարել է իր առաջին վաճառքները, և հաճախորդների աչքերի վառ փայլը նրա համար ապացույց էր, որ իր աշխատանքը սիրվել է և ընտրած ճանապարհը ճիշտ է։ Դրանից հետո հելունագործությունը դարձավ ոչ միայն զբաղմունք, այլ նաև ինքնարտահայտման միջոց։ Նա ցանկություն ունի հետագայում փոխանցել իր փորձը երեխաներին և, ինչու ոչ, ունենալ խանութ, որտեղ կներկայացվեն իր յուրօրինակ խաղալիքներն ու աշխատանքները։ Նրա խոսքով՝ ցանկացած բարդ աշխատանք հնարավոր է հաղթահարել, եթե այն անում ես սիրով և վստահությամբ սեփական ուժերի հանդեպ։

Հեղինակ՝ Անահիտ Մակյան

Չինարիում գործարկվելու է էլեկտրական շչակ. իրազեկում

Դեկտեմբերի 9-ին՝ ժամը 10:00-ից 15:00-ն ընկած ժամանակահատվածում, Տավուշի մարզի Բերդ համայնքի Չինարի բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12։00-ին գործարկվելու է էլեկտրական շչակ։

Խնդրում ենք չանհանգստանալ։

Բերդավանում նշվել է Ավետիք Իսահակյանի 150-ամյակը

«80 տարին բնության կողմից մեծ զիջողություն է արված մարդուն։ Պետք է, որ այս շնորհը լավագույն ձևով օգտագործվի։ Իհարկե, մարդ չպետք է մտածի աշխարհից բան տանելու մասին, այլ աշխարհում բան թողնելու մասին։ Մնացածն ունայնություն է…»․ Ավետիք Իսահակյանի այս խոսքերն այսօր էլ հնչում են նույն ուժով՝ մարմնավորելով նրա թողած անգնահատելի ժառանգությունը։

Հայ գրականության մեծերից՝ Ավետիք Իսահակյանը, իսկապես արժեքավորը թողեց աշխարհում։ Ժամանակի փորձությունը միայն ավելի պայծառ է դարձնում նրա պոեզիայի մարգարիտները․ յուրաքանչյուր նոր սերունդ բացահայտում է Իսահակյանի մշտադալար տողերի շերտերը, նրա երկերի արժեքները։

Վարպետի ծնունդից անցել է մեկուկես դար։ Այդ ժամանակը նրան կանգնեցրել է ժողովրդական մեծ պատվանդանի վրա՝ որպես անզուգական հայրենասեր, վեհ բանաստեղծ և համաժողովրդական Վարպետ։

Ավետիք Իսահակյանի 150-ամյակին նվիրված միջոցառումը Բերդավանում կազմակերպվել էր Գեղագիտական կենտրոնի աշխատակազմի և Բերդավանի միջնակարգ դպրոցի ուսուցչուհի Լուսինե Խոջոյանի նախաձեռնությամբ։ Միջոցառման ընթացքում հանդիսատեսը տեղափոխվեց մեծ գրողի ապրած ժամանակաշրջան, հաղորդվեց նրա արվեստի անգին գոհարներին, դիտեց նաև «Աամենապիտանի բանը» ներկայացումը։

Կազմակերպիչները շնորհակալություն հայտնեցին բոլոր մասնակիցներին՝ բարձր արվեստով հանդես գալու և միջոցառումը հագեցած ու հիշարժան դարձնելու համար։

Դիլիջանում նշեցին ուսուցիչ Արտուշ Սահակյանի 100-ամյակը

«Մարդն ապրում է այնքան, որքան հիշում են նրան», և Դիլիջանի կրթական կյանքի ֆենոմենալ կերպարներից մեկը՝ Արտուշ Սահակյանը, շարունակում է ապրել իր աշակերտների, գործընկերների և իրեն ճանաչած բոլոր դիլիջանցիների հիշողություններում։

Դիլիջանի համայնքապետարանը հայտնում է, որ Դիլիջան համայնքի ավագանու անդամ Նունե Սանթրոսյանի նախաձեռնությամբ, ինչպես նաև Դիլիջանի ավագ դպրոցի, «Դիլիջանի համայնքային կենտրոն» կազմակերպության և Դիլիջանի համայնքապետարանի աջակցությամբ, կայացավ «Արտուշ Սահակյան – 100» հոբելյանական ոգեկոչման հանդիսավոր միջոցառումը։ Միջոցառումը մեկ հարկի տակ միավորել էր Արտուշ Սահակյանի անվանի և սիրելի աշակերտներին, գործընկերներին ու ընտանիքի անդամներին, ովքեր շարունակում են փոխանցել նրա թողած մեծ ժառանգությունն ու մարդկային արժեքները։

«Միջոցառման ընթացքում խոսվեց ուսուցչի անցած փառավոր ճանապարհի, նրա անմոռանալի դասերի, սերունդ կերտող տեսակի, ինչպես նաև քաղաքի կրթական ու մշակութային կյանքում ունեցած նշանակալի ներդրման մասին։
Արտուշ Սահակյանը մնաց և շարունակելու է մնալ այնպիսի ուսուցիչների, մարդկանց շարքում, ում անունը տարիների հետ ավելի լուսավոր է դառնում», – հայտնում է Դիլիջանի համայնքապետարանը։

Այգեձոր գյուղում գործարկվելու է էլեկտրական շչակ. իրազեկում

Դեկտեմբերի 5-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Բերդ համայնքի Այգեձոր բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12։00-ին գործարկվելու է էլեկտրական շչակ։

Խնդրում ենք չանհանգստանալ։

«Ֆուտբոլը բոլորի համար». անցկացվեց ներառական մարզական միջոցառումը

Դեկտեմբերի 3-ին, Հաշմանդամություն ունեցող անձանց իրավունքների պաշտպանության միջազգային օրվա կապակցությամբ, «Հայկական հատուկ օլիմպիադաներ» ՀԿ-ն և Հայաստանի ֆիզիկական կուլտուրայի և սպորտի պետական ինստիտուտը համատեղ կազմակերպեցին «Ֆուտբոլը բոլորի համար» ներառական մարզական միջոցառումը։

Միջոցառման նպատակն էր խթանել ներառական սպորտի զարգացումը, բարձրացնել հասարակության իրազեկվածությունը հաշմանդամություն ունեցող անձանց կարողությունների մասին և ստեղծել հավասար մասնակցության հնարավորություններ։

Միջոցառմանը մասնակցեցին տարբեր հանրակրթական հաստատությունների և հասարակական կազմակերպությունների ֆուտբոլային թիմեր՝ Երևանի Վ. Վաղարշյանի անվան Հ. 80 հիմնական դպրոցը, «ArevModels» ՀԿ-ն, «Մխիթար Սեբաստացի» կրթահամալիրը, Երևանի Դ. Դեմիրճյանի անվան հ. 27 հիմնական դպրոցը և «Հույսի կամուրջ» ՀԿ-ն։

Տավուշի մարզի Իջևան համայնքից ժամանած «Հույսի կամուրջ» ՀԿ-ի թիմն առանձնացավ թիմային խաղով, արագ արձագանքմամբ և տեխնիկապես հագեցած մոտեցմամբ։ Թիմի կազմում էին Իջևանի Մ. Մարտիրոսյանի անվան թիվ 5 հիմնական դպրոցի և Գանձաքարի միջնակարգ դպրոցի աշակերտները։ Թիմը պարգևատրվեց Հաշմանդամային սպորտի ֆեդերացիայի նախագահ Սարգիս Ստեփանյանի կողմից, ով ընդգծեց ներառական ֆուտբոլի կարևորությունն ու նման նախաձեռնությունների շարունակականության անհրաժեշտությունը։

Միջոցառման ավարտին բոլոր թիմերը ստացան խրախուսական պարգևներ՝ իրենց ակտիվ մասնակցության և ներառական արժեքների տարածման համար։

«Հույսի կամուրջ» ՀԿ Իջևանի մասնաճյուղի աշխատակից Վահե Առուստամյանն իր խոսքում նշեց. ««Ֆուտբոլը բոլորի համար» միջոցառումը դարձավ այն հարթակը, որտեղ սպորտը դարձավ հավասարության, հարգանքի և փոխընդունման գաղափարների տոն», և շնորհակալություն հայտնեց գործընկերներին նախաձեռնությունը կյանքի կոչելու համար։

Վերադարձ․ ցուցադրություն Իջևանի «Վերնատանը»

Իջևանի «Վերնատուն» պատկերասրահում մեկնարկել է նկարիչ Նիկոլ Աղաբաբյանի անհատական ցուցահանդեսը՝ «Վերադարձ» խորագրով։ Սա Աղաբաբյանի երկրորդ ցուցահանդեսն է Տավուշում․ առաջինը օրեր առաջ կայացել էր Կողբում՝ մեծ հետաքրքրություն առաջացնելով արվեստասերների շրջանում:

Ցուցասրահում ներկայացված են հեղինակի 33 աշխատանքները, որոնք միավորում են հայրենիքի կարոտը, բնապատկերների հանդեպ սերը և տարիների ընթացքում ձևավորված ստեղծագործական նոր հայացքը։

Նիկոլ Աղաբաբյանը երկար տարիներ ապրել և ստեղծագործել է ԱՄՆ-ում։ Չնայած հեռավորությանը՝ ասում է, որ հայրենի բնությունը և մանկության հիշողությունները մշտապես ուղեկցել են իրեն։ «Վերադարձ» խորագիրը խորհրդանշում է իր կապը արմատների, տան ու ինքնության հետ։

Նկարչի վերադարձը հայրենիք կարևոր մշակութային իրադարձություն է։ Աղաբաբյանը նշում է, որ այս ցուցադրությունը ոչ միայն արվեստի ներկայացում է, այլև մարդկանց հետ հաղորդակցվելու հնարավորություն, որից երկար տարիներ հեռու է եղել։

Ցուցահանդեսը Վերնատանը բաց կլինի մի քանի օր, և այցելուները կարող են իրենց աչքով տեսնել նկարչի ներաշխարհի բազմաշերտությունը, գույների միջոցով արտահայտված նրա զգացողություններն ու հայրենիք վերադառնալու ներքին ճանապարհը։

Կարդացեք նաև՝

«Կարոտը վրձնի վրա․ Կալիֆորնիական շարք». տավուշեցի գեղանկարիչ Նիկոլ Աղաբաբյանի անհատական ցուցահանդեսը