Հունիսի 27-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Աչաջուր բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում՝ ժամը 12:00-ին, գործարկվելու է էլեկտրական շչակ:

Խնդրում ենք չանհանգստանալ։

Հայաստանի Հանրապետությունում մեկնարկել է 2024 թվականի ամառային զորակոչը: Իջևանից պարտադիր ժամկետային զինվորական ծառայության մեկնեց նորակոչիկների առաջին խումբը` համալրելու հայոց բանակի շարքերը, պարտքը տալու սրբազան հայրենիքին և կատարելու սահմանադրորեն ամրագրված իրենց պարտականությունը:

Ճանապարհաշինական աշխատանքներով պայմանավորված՝ հունիսի 26-ին, ժամը 10:00-ի սահմաններում, Կիրանց-Աճարկուտ ավտոճանապարհին կիրականացվեն պայթեցման աշխատանքներ։

Հանրությանը հորդորում ենք չանհանգստանալ։

Հունիսի 24-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Բերդ համայնքի Վարագավան բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում՝ ժամը 12:00-ին, գործարկվելու է էլեկտրական շչակ:

Խնդրում ենք չանհանգստանալ։

Ճանապարհաշինական աշխատանքներով պայմանավորված՝ այսօր՝ հունիսի 24-ին, ժամը 14:00-ի սահմաններում, Կիրանց-Աճարկուտ ավտոճանապարհին կիրականացվեն պայթեցման աշխատանքներ։

Հանրությանը հորդորում ենք չանհանգստանալ։

Անվճար կրթական փորձառություն, որով պատանիները կարող են կառուցել իրենց կրթական ճանապարհը։ «ԹՈւՄՈ»-ն արդեն Կողբում է:

«ԹՈՒՄՈ» ստեղծարար տեխնոլոգիաների  կենտրոնը շարունակում է ընդլայնել իր աշխարհագրությունը՝ Հայաստանի տարբեր անկյուններում բացելով «ԹՈՒՄՈ» տուփեր ու կենտրոններ։ Կողբ գյուղում կառուցված կենտրոնը միացավ «ԹՈՒՄՈ»-յի ցանցին՝ ամբողջացնելով Տավուշի մարզում իր ներկայությունը։ Նորաստեղծ կենտրոնը հունիսի 22-ին՝ իր առաջին հանրային միջացառմանն ընդունեց առաջին հյուրերին։

Կողբի «ԹՈՒՄՈ» կենտրոնը նախատեսված է Հայաստանի հյուսիս-արևելքում բնակվող մոտ 1200 ուսանողի համար։ Այստեղ հաճախում են Տավուշի, նաև Լոռու մարզի ուսանողները։

«ԹՈՒՄՈ»-ն պատանիներին տալիս է հնարավորություն՝ լինել իրենց ուսուցման պատասխանատուն: Կենտրոնի առկայությունը Կողբում նոր շունչ կբերի տարածաշրջանին ու կնպաստի ստեղծարար պատանիների առաջխաղացմանը։

Կենտրոնի առաջին միջոցառումը հագեցած էր ու բազմաբովանդակ․ «Բացահայտիր Կողբի լաբիրինթը» խորագրի ներքո ցուցադրված էր «Թումոյի» ուսանողների և շրջանավարտների ստեղծագործությունները, առանձին սրահում ստեղծվել էր Հայաստանի հուշարձանները նորագույն տեխնոլոգիաների օգտագործմամբ վիրտուալ տեսնելու ու այցելելու հարթակը, կենտրոնի հյուրերը Կողբի մեծ էկրանին դիտեցին «Թումոցիների» ստեղծած կարճամետրաժ անիմացիաներն ու ֆիլմերը, զուգահեռաբար մասնակցելով գեղագրության վարպետաց դասի, բացօթյա համերգների։

«ԹՈՒՄՈ Կողբում» ուսումնառությամբ պատանիները հանձնառու են արդեն կառուցել իրենց կրթական ուղին՝  զինված տպավորիչ ու ժամանակակից գործիքակազմով։

Կարդացեք նաև՝  Թումո տուփը Բերդում 

2007 թվականի հունվարի 9-ին, Երևանի մամուլի ակումբը տարածեց Հայաստանի լրագրողական համայնքին ուղղված դիմում, որում առաջարկ էր արվում համատեղ մշակել մասնագիտական էթիկայի հիմնական նորմերը: Դիմումի տարածմանը հաջորդած գործընթացների արդյունքում ձևավորվեց զանգվածային լրատվամիջոցների էթիկայի Դիտորդ մարմինը։ Հանրային իրազեկման նպատակով Երևանի մամուլի ակումբը հունիսի 21-ին Իջևանում հանդիպում էր նախաձեռնել՝ հասարակության շահագրգիռ կողմերին ներկայացնելով Դիտորդ մարմնի դերն ու նշանակությունը, գործունեությունը, դիմելու ընթացակարգը։

Տարիների ընթացքում Դիտորդ մարմինը շուրջ 200 դիմում է ստացել, իսկ էթիկական սկզբունքների կանոնագիրը 2024 թվականի մայիսի դրությամբ ստորագրել է հայաստանյան 82 լրատվամիջոց՝ պարտավորվելով պահպանել ճշգրտություն և անկողմնակալություն, ազնվություն՝ տեղեկությունների աղբյուրների հետ հարաբերություններում, խմբագրական անկախություն, հարգանք մարդկանց անձնական կյանքի և այլ իրավունքների նկատմամբ, հարգանք զանազան խմբերի ներկայացուցիչների և համամարդկային արժեքների նկատմամբ, ազնվություն հանրության հետ հարաբերություններում, ազնվություն ընտրությունները և հանրաքվեները լուսաբանելիս։

ՀՀ Կրթության տեսչական մարմինը կրթության որակի վերահսկողությունը առավել նպատակային և բովանդակային դարձնելու համար ստեղծել է ստուգաթերթերին կից նոր գործիքակազմ։ Նոր գործիքակազմի ներդման, դրա կիրառման արդյունավետության, հնարավոր ռիսկերի ու խնդիրների վերբերյալ Դիլիջանում հունիսի 22-23-ին կրթության տեսչության մարմինը նախաձեռնել էր աշխատանքային քննարկում։  Ըստ տեսչական մարմնի ղեկավարի՝ նոր գործիքակազմով իրականացվող ստուգումներն առավել ամբողջական պատկեր կապահովեն ուսումնական հաստատությունների գործունեության որակի, մասնավորապես չափորոշիչների կատարման նկատմամբ վերահսկողության առումով։

Երկօրյա քննարկմանը մասնակցում էին նաև «Դասավանդիր Հայաստան» կրթական հիմնադրամի ներկայացուցիչները։ Սա յուրատեսակ համագործակցությունն է, որի նպատակն է փորձի փոխանակման միջոցով լավարկել  վերահսկողական գործիքակազմը, որն էլ իր հերթին կնպաստի կրթության որակի բարելավմանը։

Գործիքակազմն ընդգրկում է նախադպրոցական, դպրոցական և մասնագիտական կրթության ոլորտները։ Այն կկիրառվի իրավական համապատասխան կարգավորումների ուժի մեջ մտնելուց  հետո։

Հունիսի 21-ին Ներքին գործերի նախարարության փրկարար ծառայության ճգնաժամային կառավարման ազգային կենտրոնում և Տավուշի մարզային փրկարարական վարչության ճգնաժամային կառավարման կենտրոնում անցկացվեց «Տավուշի մարզում սողանքի ակտիվացում» թեմայով գործնական պարապմունք: Ձևավորված խաղարկման խմբերում ներգրաված էին շահագրգիռ ստորաբաժանումներն ու անձնակազմը:

Միջոցառման նպատակն էր ստուգել սողանքի ակտիվացման դեպքում Ճապոնիայի միջազգային համագործակցության գործակալության (JICA) ծրագրի շրջանակներում մշակված «Ճգնաժամային հաղորդակցման և աղետների կանխարգելման իրազեկման կարողությունների բարելավմանն» ուղղված գործողությունների ստանդարտ ընթացակարգով
սահմանված գործողությունների պլանի իրատեսականությունը, մասնակիցների հմտություններն ու ունակությունները:

Գործնական պարապմունքի շրջանակում մշակվել էր սցենար, որի համաձայն Տավուշի մարզային փրկարարական վարչության ճգնաժամային կառավարման կենտրոնում ահազանգ էր ստացվել, որ Հովք բնակավայրում տեղի է ունեցել սողանք: Հողազանգվածն իր ամբողջ երկայնքով սահել էր Մ-4 միջպետական մայրուղու ուղղությամբ` աստիճանաբար լցվելով Աղստև գետի հունը: Գյուղում վնասվել էին բազմաթիվ առանձնատներ, շինություններ` իրենց տնտեսություններով, կենսապահովման ենթակառուցվածքներ, իսկ մի մասն ամբողջությամբ հայտնվել էր հողաշերտի տակ:

Վարժանքի սցենարով ՆԳՆ փրկարար ծառայության տնօրեն-ներքին գործերի նախարարի տեղակալի հրամանով ձևավորվել և դեպքի վայր էր գործուղվել մասնագիտական խումբ՝ տեղում սողանքի գիտահետազոտական ուսումնասիրություններ իրականացնելու նպատակով:

Գործնական պարապմունքը սկսվեց ու ավարտվեց համաձայն սցենարի. 911 ահազանգման կենտրոնի և ՓԾ Տավուշի մարզային փրկարարական վարչության ճգնաժամային կառավարման կենտրոնի ծառայողները կազմակերպեցին ահազանգերի գրանցումը, տվյալների մշակումը և համակարգումը՝ ըստ սահմանված ձևաչափի։
Օպերատիվ հերթափոխերի բաժնի ծառայողները համակարգեցին մարզի կողմից տրամադրված առաջնային, ինչպես նաև հետևանքների, ձեռնարկված միջոցառումների վերաբերյալ տեղեկատվությունը:

Տեղեկատվության ապահովման և վիճակագրության բաժնի ծառայողների կողմից մշակվեց ստացված օպերատիվ տեղեկատվությունը, հրապարակվեց պաշտոնական հարթակներում և տրամադրվեց ԶԼՄ-ներին։ Խաղարկման ընթացքում իրականացվեց նաև մշտադիտարկում՝ ապատեղեկատվության կանխարգելման, կեղծ, խուճապ առաջացնող, ստահոդ լուրերի տարածման կանխման և ՓԾ գործառույթների պատշաճ լուսաբանման նպատակով, իսկ պաշտոնական տիրույթներում զետեղվեցին օգտակար նյութեր հնարավոր վտանգների և վարվելականոնների վերաբերյալ:

Մոնիտորինգի և կանխատեսման բաժնի ծառայողներն ապահովեցին իրավիճակն արտապատկերող թեմատիկ քարտեզները, առանձին ներկայացրեցին սողանքի գտնվելու հնարավոր տարածքը, սահքի ենթակա հողազանգվածը և տարածման դեպքում զբաղեցրած մակերեսը։

Գործնական պարապմունքի ավարտից հետո անցկացվեց արդյունքների ամփոփում։ Անդրադարձ կատարվեց աշխատանքների արդյունավետ կազմակերպմանն ու հսկողությանը՝ նշվեցին դրական կողմերն ու առկա բացթողումները, տրվեցին համապատասխան ցուցումներ և հանձնարարականներ իրականացվող միջոցառումների արդյունավետությունը բարձրացնելու նպատակով:

Հունիսի 22-ին, ժամը 04։00-ին Տավուշի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Հաղարծնի վանք տանող ավտոճանապարհին ծառն ընկել երթևեկելի հատված՝ երկկողմանի փակելով ճանապարհը:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:

Փրկարարները մասնատել են ծառը և հեռացրել ճանապարհի երթևեկելի հատվածից. երթևեկությունը վերականգնվել է: