ԵՊՀ Իջևանի մասնաճյուղում ապրիլի 15-ին մեկնարկեց «Սոցիալ-մանկավարժական նորարարությունները կրթության մեջ» միջազգային գիտագործնական 2-րդ համաժողովը: Համաժողովի նպատակը ուսանողական հետազոտությունների խթանումն է, ուսանողների՝ մագիստրոսների, ասպիրանտների ստեղծագործական ներուժի բացահայտումը, երիտասարդության ուշադրության կենտրոնացումը ժամանակակից մանկավարժական հետազոտությունների կարևորության վրա:

Երիտասարդ գիտնականների միջազգային գիտագործնական 2-րդ համաժողովին մասնակցում էին բակալավրիատի և մագիստրատուրայի տարբեր մասնագիտությունների ուսանողներ, երիտասարդ դասախոսներ և գիտնականներ` Հայաստանից և աշխարհի 62 համալսարաններից:

Արտերկրից ժամանած երիտասարդ հետազոտողները կիսվեցին նաև իրենց տպավորություններով ու ակնկալիքներով:

Համաժողովի շրջանակում  քննարկվեցին մանկավարժության արդի հիմնախնդիրները, ներկայացվեցին սոցիալական մանկավարժության, դասավանդման մեթոդիկայի, մանկավարժական հոգեբանության ասպարեզում գիտական հետազոտությունները,  քննարկումներ ծավալվեց նաև մանկավարժության զարգացման հիմնական միտումների, արժեքների ու հեռանկարների վերաբերյալ:

Գիտագործնական համաժողովի շրջանակում  ԵՊՀ Իջևանի մասնաճյուղի և Մոսկվայի պետական մանկավարժական համալսարանի միջև ստորագրվեց համագործակցության հուշագիր, որը հետագայում ևս  բազմակողմանի հնարավորություններ է ընձեռելու ուսանողներին և դասախոսներին:

Նախաձեռնողների հավաստմամբ՝ նմանօրինակ համաժողովները կրելու են շարունակական բնույթ՝  նպաստելով ուսանողների և դասախոսների ներբուհական և միջբուհական համագործակցության զարգացմանը:



Հայտնի երաժշտագետ, ջութակահար, գրող, մանկավարժ Միխայիլ Կազինիկը ստեղծագործական մեծ ծրագրով ժամանել է Հայաստան։ Ապրիլի 12-ին Դիլիջանի արվեստի պետական քոլեջում տեղի ունեցավ նրա համերգ-դասախոսությունը՝ «Մշակույթի գաղտնի նշանները» թեմայով։

Համերգը կազմակերպվել էր Դիլիջանի դպրոցների, միջնակարգ մասնագիտացված ուսումնական հաստատությունների աշակերտների և տեղական ինքնակառավարման մարմինների աշխատակիցների համար։ Համերգին հրավիրված էին նաև Երևանի Չայկովսկու անվան երաժշտական միջնակարգ մասնագիտացված դպրոցի սաներն ու ուսուցիչները։

Ծրագրում ընդգրկված էին Մոցարտի, Վիենավսկու, Շոպենի և այլ հայտնի կոմպոզիտորների ստեղծագործություններ։

Խոսելով իր Հայաստանյան շրջագայության մասին՝ Միխայիլ Կազինիկը նշել է. «Հայաստանը մի ամբողջ Տիեզերք է։ Պատահական չէ, որ ներկայիս Միջազգային Ակադեմիան անվանեցի «Հայաստան՝ մոլորակի բաբախող սիրտը»: Հայաստանը ուղղակի մոլորակի վրա գտնվող մի երկիր չէ․ այն ժամանակների կապն է։ Հայաստանը հին տաճարներն են։ Յուրաքանչյուր տաճարում՝ զգացմունքային հուզմունք: Հայաստանը եզակի մասունքներն են։ Հայաստանի գույներն անհավանական են։ Նրանք ջերմացնում են մարդկանց հոգիները»:



Սմբատ Ցուցուլյանի «Ոսկու խամրած փայլը» գիրքն արդեն ընթերցողի սեղանին է։ Ապրիլի 15-ին Տավուշի մարզային գրադարանում կայացավ գրքի շնորհանդեսի միջոցառումը:  «Ոսկու խամրած փայլը» գիրքը նվիրված է գրող, հրապարակախոս, Խորհրդային Հայաստանի ՆԳՆ քրեկան հետախուզության գլխավոր վարչության պետի տեղակալ, ոստիկանության գնդապետ Սամվել Ցուցուլյանին։

Շնորհանդեսի միջոցառմանը ներկաներին տեսաֆիլմով ներկայացվեցին գրքի համառոտ նկարագիրը, գրքի հերոսի կերպարը։

Միջոցառման ավարտին հեղինակի և ներկաների միջև հարցուպատասխան է եղել գրքի ստեղծման, իրադարաձությունների ու կերպարների վերաբերյալ։



Ապրիլի 15-ին առաջին ընտանիքներին է ընդունել ՀԱԵ Տավուշի թեմի նախաձեռնությամբ ստեղծված Քաղցկեղին առերեսված երեխաների և իրենց ընտանիքների հոգևոր-վերականգնողական կենտրոնը։

Կենտրոնը կառուցվել է Գետահովիտ գյուղի բարձունքում՝ Տավուշի ամենաչնաշխարհիկ ու խաղաղ անկյուններից մեկում։ 

Հարուստ բնությամբ շրջապատված կենտրոնը հագեցած է կեցության, բուժման, վերականգնման, սնվելու և ժամանցի բոլոր միջոցներով։ Ծանր բուժումից հետո այստեղ երեխաներն ու իրենց ընտանիքներն վերականգնման ընթացք են անցնում։

Կենտրոնը կառուցվել է Իտալիայում բնակվող Լուսի Պալյանի հովանավորությամբ՝ ի հիշատակ իր եղբայրներ հոգելույս Անդրանիկ և Օհաննես Ճեմճեմյանների։



Ապրիլի 21-ին՝ ժամը 10:00-ից 15։00-ն ընկած ժամանակահատվածում, Տավուշի մարզի Իջևան համայնքի Սարիգյուղ բնակավայրում անցկացվելու է «Օդային տագնապ ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում գործարկվելու է էլեկտրական շչակ:

Խնդրում ենք չանհանգստանալ։

«ԴիջիԿոդ» կիրառական ծրագրավորման պատանեկան հանրապետական մրցույթն արդեն 8-րդ անգամ միավորում է նորարարական խաղեր ու ծրագրեր ստեղծող պատանիներին: Ապրիլի 15-ին հանրապետության ևս 4 շրջանների հետ միաժամանակ Տավուշում մեկնարկեց «ԴիջիԿոդ 2023»-ը։

«ԴիջիԿոդ 2023» մրցույթին այս տարի մասնակցում է 400 աշակերտ՝ Հայաստանի տարբեր մարզերից։ Մրցույթի հիմնական նպատակն է խրախուսել ու զարգացնել դպրոցականների ալգորիթմային մտածողությունը, աշակերտներին խաղ սպառողից վերածել խաղ ստեղծողի, բացահայտել տաղանդավոր պատանիներին ու հնարավորություն տալ զարգացնել ստեղծագործական ունակությունները։ Մասնակից պատանիները ժյուրիի կազմին ներկայացրին իրենց գաղափարները։ 

Մրցույթի կազմակերպիչն է Առաջատար տեխնոլոգիաների ձեռնարկություննների միությունը, իսկ Տավուշում որպես տարածքային գործընկեր՝ ԵՊՀ Իջևանի մասնաճյուղը։ 

«ԴիջիԿոդ 2023» մրցույթին մասնակցող այն պատանիները, որոնք կհաղթահարեն մարզային փուլը, ապրիլի 30-ին մայրաքաղաք Երևանում կմասնակցեն «ԴիջիԿոդ»-ի եզրափակիչ փուլին։

Ապրիլի 19-ին՝ ժամը 10:00-ից 15։00-ն ընկած ժամանակահատվածում, Տավուշի մարզի Իջևան համայնքի Լուսաձոր բնակավայրում անցկացվելու է «Օդային տագնապ ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում գործարկվելու է էլեկտրական շչակ:

Խնդրում ենք չանհանգստանալ։

Բաղադրատոմս`

Խոզի եփած գլխամիս(կարող եք փոխարինել սովորական խոզի մսով,ցանկալի է, որ յուղոտ կտորներ լինեն)
Սխտոր
Սև պղպեղ
Կարմիր չորացրած պղպեղ(ցանկալի է կծու)
Արգանակ
Աղ