Այսօր՝ ժամը 18:20-ին, Տավուշի մարզի Կիրանց բնակավայրից 2500 մ հյուսիս տեղի է ունենալու պայթեցման աշխատանք՝ 1 (մեկ) պայթուն:

Հարակից հատվածի բնակչությանը խնդրում ենք ընդունել ի գիտություն և խուճապի չմատնվել:

ՀՀ պաշտպանության նախարարությունը Հայաստան-Ադրբեջան պետական սահմանի Տավուշի մարզի Կիրանց գյուղի և Ադրբեջանի Հանրապետության Ղազախի շրջանի Խեյրեմլի գյուղի հատվածում իրականացնում է ականազերծում, պետական սահմանի տվյալ հատվածի վերարտադրության նպատակով Հայաստանի Հանրապետության և Ադրբեջանի Հանրապետության փորձագիտական խմբերի կողմից գեոդեզիական չափումների հիման վրա՝ կոորդինատների ճշգրտման աշխատանքների իրականացումը ապահովելու համար:

ՀՀ ՆԳՆ ոստիկանությունը ականազերծման գոտիներում իրականացնում է ուժեղացված ծառայություն` ականապատ գոտիներ քաղաքացիական անձանց մուտքը թույլ չտալու և նրանց անվտանգությունն ապահովելու համար:

Մայիսի 2-ին՝ ժամը 10։00-ից մինչև 15:00-ն ընկած ժամանակահատվածում, Տավուշի մարզի Դիլիջան համայնքի Հաղարծին բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12:00-ին գործարկվելու է էլեկտրական շչակ:
Խնդրում ենք չանհանգստանալ։

Դիլիջանում բազմաթիվ շենք-շինությունների կողքին իր նշանակությամբ, դիրքով ու ճարտարապետությամբ առանձնանում է Աղասի Խանջյանի ամառանոցը։ Դիլիջանյան ինքնատիպ համայնապատկերներով շրջապատված շենքն ականատես է եղել պատմական շատ իրադարձությունների։ Այսօր շենքը, գտնվելով ՀՀ ԿԳՄՍՆ հուշարձանների ցանկում՝ ունենալով հանրապետական նշանակություն՝ կանգնած է փլուզման եզրին։

Սողանքների ու մարդկային գործոնի հետևանքով շենքի պատերն այժմ թուլացած կամ արդեն փլուզված են։ Լոկ կիսավեր պատերի վրա մնացած նկարազարդումներն են, որ հուշում են շենքի երբեմնի ճոխության մասին։ Այս պահին ճարտարապետ Դավիթ Նահատակյանն ու իտալացի մասնագետները, ովքեր մեծ փորձ ունեն հենց վերականգնողական ճարտարապետության ոլորտում, ամառանոցի հարակից տարածքում իրականացնում են փորձագիտական աշխատանքներ, որոնք կավարտվեն այս տարի աշնանը։ Դրանից հետո միայն վերջնական պարզ կդառնա ճարտարապետական հուշարձանի ճակատագիրը։

Եթե հետազոտության արդյունքները լինեն դրական, ապա կսկսվեն շենքի վերանորոգման աշխատանքներն ու այն կօգտագործվի նաև այլ նպատակներով։ Սակայն եթե հետազության արդյունքները ցույց տվեցին, որ ցանկացած միջամտություն կարող է վնասել կառույցին, ապա «Խանջյանի ամառանոցը» կամրացվի՝ շարունակելով մնալ միայն որպես տեսարժան վայր։

«Ռեստարտ Իջևան» գիտակրթական-հասարակական կազմակերպության նախաձեռնությամբ ապրիլի 27-ին Հայստանի հյուսիսային 3՝ Տավուշի, Լոռու և Շիրակի մարզի ուսանողները մասնակցեցին «Ակադեմիական քաղաք. մարզային բարձրագույն ուսումնական հաստատությունների տեսլականը» խորագրով աշխատարանին:

Աշխատարանի նպատակն էր բաց քննարկման շրջանակում ներկայացնել «Ակադեմիական քաղաք» ստեղծելու նպատակներն ու խնդիրները, այս համատեքստում անդրադարձ կատարվեց մարզերում գործող բարձրագույն ուսումնական հաստատությունների գործունեությանը: Շուրջ 75 ուսունողներ իրենց հարցերն ուղղեցին բանախոսներին՝ բարձրաձայնելով իրենց մտահոգությունները, դիտարկումներն ու շեշտադրումները:

«Ակադեմիական քաղաք» նախագծի կյանքի կոչումը արդեն իսկ մտել է գործնական փուլ․ 2023 թվականից մեկնարկել է նախագծման փուլը, իսկ ողջ աշխատանքները կավարտվեն 2030 թվականին։

Սիրելի երիտասարդներ, նշե՛ք ձեր օրացույցում մայիսի 17-ը, քանի որ այդ օրը Երևանում մեկնարկելու է «Երիտասարդական էքսպո 2024-ը», որի նշանաբանն է «Հզորացրո՛ւ, ոգեշնչի՛ր, գործի՛ր»։ Էքսպոն կազմակերպվում է «Քաղաքացիական կրթություն և մասնակցություն» ծրագրի շրջանակներում։

«Քաղաքացիական կրթություն և մասնակցություն» ծրագիրը կկազմակերպի միայն Վանաձորից, Գյումրիից, Գորիսից, Եղեգնաձորից և Իջևանից 18-29 տարեկան այն երիտասարդների տեղափոխումը դեպի Երևան և հետ, որոնք մինչև մայիսի 3-ը կգրանցվեն իրենց բուհի անվան դիմաց նշված հղմամբ։ Նշված յուրաքանչյուր համայնքից մասնակցելու հնարավորություն կունենան միայն մինչ վերջնաժամկետը առաջին 25 գրանցվողները։ Պարտադիր չէ, որ գրանցվողները լինեն տվյալ ուսումնական հաստատությունների ուսանողներ։

Եվ այսպես, մայիսի 17-ին հավաքվում ենք «Էլիտ Պլազա» բիզնես կենտրոնում (հասցե՝ ք․ Երևան, Մ. Խորենացու փող. 15)՝ մասնակցելու հետաքրքիր քննարկումների, թեմատիկ ներկայացումների և նոր ծանոթությունների համար։

Եկե՛ք, մասնակցե՛ք, ոգեշնչվե՛ք, միավորվե՛ք, գործե՛ք և հզորացրե՛ք ձեր թաղը, ձեր համայնքը, մեր երկիրը։

ԷՔՍՊՈՅԻ ՄՈՒՏՔՆ ԱԶԱՏ Է:
——————-
Գրանցաթերթիկների հղումները ըստ բուհերի՝

ԵՊՀ Իջևանի մասնաճյուղ – YSUIB / ԵՊՀ Իջևանի մասնաճյուղ՝

https://docs.google.com/forms/d/1xUdek9aA4LxITbZGr-X4QG0ugqVRSvXbNh_WG9lSoWY/viewform

Էքսպոյի 2-րդ և 3-րդ օրերի միջոցառումները կանցկացվեն օգոստոսին` 2024 թվականի երիտասարդական մայրաքաղաք Գավառում։

—
Շիրակի պետական համալսարան/Shirak State University / Շիրակի պետական համալսարան՝

https://docs.google.com/forms/d/e/1FAIpQLSeXG5EkmhhO9Bz-1m1fL5fgdFQSFTA4-vSFSv-tdvnK9Y1stA/viewform

—
Վանաձորի պետական համալսարան / Վանաձորի պետական համալսարան՝

https://docs.google.com/forms/d/e/1FAIpQLSeFSxKemtFB4-KFFoENIMZACdlOxS4MSq5Z85YR6s8ZpjKhog/viewform

—
Vayots Dzor Regional State College/Վայոց ձորի տարածաշրջանային պետական քոլեջ / Վայոց Ձորի տարածաշրջանային պետական քոլեջ՝

https://docs.google.com/forms/d/e/1FAIpQLSeBAWKCOvy9uuNWeBj70H3ShwaETnSxDXt-Tp7tfQLhSCe5pw/viewform

«ԴՈՒԿՈ» երիտասարդական կենտրոնում տեղի է ունեցել հանդիպում-քննարկում, որտեղ հավաքվել էին Դիլիջան համայնքի 25 երիտասարդներ տարբեր հաստատություններից՝ քննարկելու Հայաստանում «Երիտասարդական քաղաքականության մասին» օրենքի նախագիծը:

Դպրոցների, քոլեջների, համալսարանների և համայնքի գործընկեր ՀԿ-ների մասնակիցները համախմբվեցին՝ ուսումնասիրելու երիտասարդական քաղաքականության մասին օրենքը և դրա հնարավոր ազդեցությունները:

Հանդիպումը մեկնարկեց առաջարկվող օրենքի ներածությամբ՝ հիմք հանդիսանալով ընդգրկուն քննարկումների համար: Կիրառելով «World Café»(Համաշխարհային սրճարան)-ի դինամիկ մեթոդը՝ մասնակիցները խմբային քննարկումների միջոցով փոխանակվեցին իրենց գաղափարներով և առաջարկներով։

Մասնակիցները ներկայացրեցին իրենց առաջարկները՝ ամփոփելով խմբային աշխատանքի արդյունքները, որոնք արտացոլում էին Հայաստանի երիտասարդական համայնքի հավաքական ձգտումները:

ՀՀ վարչապետ Նիկոլ Փաշինյանը ԱՄՆ պետքարտուղար Էնթոնի Բլինքենի հետ ապրիլի 28-ի հեռախոսազրույցում դրական է արտահայտվել Հայաստան-Ադրբեջան սահմանի սահմանազատման գործընթացի վերաբերյալ, հայտնում են կառավարությունից։

Ըստ կառավարության հաղորդագրության՝ Նիկոլ Փաշինյանն ընդգծել է, որ Տավուշի մարզի Ոսկեպար, Կիրանց ու Բերքաբեր գյուղերի բնակիչների մտահոգությունները հասկանալի են, և ամեն ինչ կարվի նրանց լեգիտիմ մտահոգությունները հասցեագրելու համար:

Ըստ Երևանի ու Բաքվի հայտարարության՝ նրանք «նախնական համաձայնեցրել են»՝ Տավուշ-Ղազախ սահմանի որոշ հատվածներ համապատասխանեցնել «Խորհրդային Միության փլուզման պահի դրությամբ գոյություն ունեցող միջհանրապետական սահմանին»։ Տավուշում սահմանազատման գործընթացն ուղեկցվում է բողոքի ակցիաներով ինչպես սահմանի տվյալ հատվածի, այնպես էլ Հայաստանի այլ շրջաններում, այդ թվում՝ Երևանում:

Ամերիկյանի կողմի փոխանցմամբ՝ Բլինքենը վերահաստատել է ԱՄՆ աջակցությունը Հայաստանի և Ադրբեջանի միջև կայուն և արժանապատիվ խաղաղության պայմանագրի ուղղությամբ առաջընթացին: Պետքարտուղարը կրկնել է, որ Միացյալ Նահանգները ողջունում է Ալմա-Աթայի հռչակագիրը որպես սահմանազատման հիմք օգտագործելու Հայաստանի և Ադրբեջանի համաձայնությունը։
Բլինքենը նաև ընդգծել է Հայաստանի ինքնիշխանությանն ու տարածքային ամբողջականությանը, ինչպես նաև Հայաստանի բարգավաճ, ժողովրդավարական և անկախ ապագայի վերաբերյալ վարչապետ Փաշինյանի տեսլականին աջակցելու Նահանգների շարունակվող ջանքերը։

Արդեն 10-րդ օրն է փակ է Հայաստան-Վրաստան միջպետական մայրուղու Կիրանց գյուղի հատվածը։ Բնակիչները իրենց բողոքն են արտահայտում սահմանազատման դեմ։ Բագրատ Սրբազանը կրկին հիշեցնում է՝ սա միայն Տավուշի խնդիրը չէ, սա ողջ հայության ու Հայաստանի հարցն է։ Այս օրերին Կիրանցի բնակիչների կողքին են նաև հանրապետության այլ շրջանների քաղաքացիները։

Լուրջ դժվարությամբ շարունակում ենք ճանապարհը Կիրանցից դեպի Ոսկեպար, ապա՝ Բաղանիս։ Բաղանիսում առօրյան սովորականի նման չէ․ վերջին շրջանում գյուղ շատ են այցելում լրատվամիջոցներ, որոնք ըստ բնակիչների խանգարում են իրենց։ Մարդիկ, թեպետ առկա իրողություններին, ապրում են իրենց սովորական կյանքով՝ խնամում այգին, ջուր բերում, հավաքվում ու զրուցում։

Բաղանիսի գյուղացիների համար իրավիճակը փոքր-ինչ անորոշ է, մարդիկ խճճվում են տարբեր տեղերից իրենց հասնող տեղեկատվական հոսքերի մեջ։

Այսօր Բաղանիսում սահման են գծում, բայց մարդկանց հիշողություններից չի հեռանում ավելի քան 35 տարվա սահմանային կյանքը, որը հաճախ անհանգիստ էր, թեժ ու վտանգավոր։