Արդեն 8-րդ օրն է Կիրանցում փակ է գյուղի ճանապարհը։ Հայաստանի տարբեր հատվածներում բողոքի ակցիաներ են տեղի ունենում, բնակիչները ընդվզում են սահմանազատման դեմ: Այս ընթացքում Կիրանցի բնակիչների հետ հանդիպել են ոստիկանության բարձրաստիճան սպաներ՝ նպատակ ունենալով բացել ճանապարհը։ Այսօր երեկոյան Կիրանց այցելեց նաև Տավուշի մարզպետ Հայկ Ղալումյանը, ով համոզում էր գյուղացիներին կտրուկ գործողությունների չդիմել և համատեղ քննարկել ստեղծված իրավիճակը, սակայն գյուղացիները չցանկացան լսել նրան։

Այնուհետև փոխոստիկանապետ Կ․ Հակոբյանը և Տավուշի մարզի ոստիկանապետ Ա․ Մկրտչյանը կոչ արեցին բնակիչներին բացել ճանապարհը, որպեսզի սահմանագծման աշխատանքները իրականացվեն։ Քաղաքացիները թույլ չտվեցին մեքենայի տեղաշարժը, որից հետո հատուկ ջոկատայինների ու քաղաքացիների միջև քաշքշուկ և հրմշտոց տեղի ունեցավ։

Ոստիկանական ուժերը տեղում հայտնեցին, որ բերման ենթարկվածներ չկան։

Տավուշի թեմի առաջնորդ Բագրատ Սրբազանը հանդես եկավ հանդարտեցման կոչով, բնակչությանը հորդորելով չտրվել սադրանքների և բացել ճանապարհը։ Ճանապարհը մի քանի րոպեով բացվեց և կրկին փակվեց։ Բողոքի ակցիան Կիրանցում շարունակվում է․ առջևում 9-րդ օրն է։

Հայաստանի Հանրապետության և Ադրբեջանի Հանրապետության սահմանին գեոդեզիական չափումների հիման վրա, կոորդինատների ճշգրտման աշխատանքների շրջանակներում 2024 թվականի ապրիլի 26-ի դրությամբ տեղադրվել է թվով 28 սահմանային սյուն, ինչը կազմում է նախատեսված աշխատանքների մոտ 35 տոկոսը։ Երկու երկրների փորձագիտական խմբերի աշխատանքները շարունակվում են։

Այսօր վաղ առավոտից բնակիչները փակել են Կիրանց գյուղի կամուրջը:
Ըստ բնակիչների` այսօր ականազերծման և այլ աշխատանքներ են իրականացնելու այս հատվածում։

Փակ է մնում նաև Հայաստան-Վրաստան միջպետական ճանապարհի Կիրանց-Ոսկեպար հատվածը։

—

Բաղանիսի դպրոցի աշակերտները այսօր դասադուլ են հայտարարել:
Լուսանկարը` «Տավուշը հանուն հայրենիքի» շարժման էջից:

«Քո իրավունքը» հաղորդաշարի տասներորդ թողարկմանը Վիկտորյա Սիմոնյանը ներկայացնում է առուվաճառքի պայմանագրի դրույթները։
—
Կարող եք ուղարկել Ձեզ հետաքրքրող հարցերն ու բողոքները: Մենք կբարձրաձայնենք Ձեր իրավական խնդիրները, կհուշենք լուծումներն ու կպաշտպանենք Ձեր իրավունքը: Գրեք մեզ՝ head@tavushmedia.am / vikasimonyan95@gmail.com էլ. հասցեներին, ք. Իջևան, Բլբուլյան 5 հասցեին կամ զանգահարեք՝ 055 01 04 01 հեռախոսահամարով:

«Փաստերի ստուգման հարթակը» գրել է, որ Google Maps-ում ներկայացված՝ Տավուշում սահմանազատման ենթակա հայ-ադրբեջանական սահմանը համընկնում է 1976 թվականի Խորհրդային Միության Գլխավոր շտաբի համապատասխան տեղանքի՝ խորհրդային Հայաստանի ու խորհրդային Ադրբեջանի վարչական սահմանների վերաբերյալ քարտեզին։

6-7-րդ դարերում կառուցված Ոսկեպարի Սուրբ Աստվածածին եկեղեցին ԽՄ ԳՇ քարտեզով սահմանազատման դեպքում կմնա հայկական կողմում, սակայն ադրբեջանական սահմանից ընդամենը 10-20 մետր հեռավորության վրա։

Ինչպես ԳՇ քարտեզում, այնպես էլ Google Maps-ում, Կիրանցի դպրոցը տեղակայված է Ադրբեջանի հետ սահմանից ուղիղ գծով մոտ 360 մետր հեռավորության վրա։

Այսպիսով, Տավուշում 1976 թվականի՝ ԽՄ ԳՇ քարտեզներով սահմանազատման հետևանքով, չնայած Ոսկեպարի եկեղեցին ու Կիրանցի դպրոցը մնում են հայկական կողմում, սակայն հայտնվում են Ադրբեջանի սահմանից չնչին հեռավորության վրա։

Նոյեմբերյանի համայնքապետարանը հայտարարություն է տարածել` վերջին շրջանում տեղի ունեցող իրադարձությունների շուրջ:

Նոյեմբերյան համայնքի Բաղանիս, Ոսկեպար գյուղերի տարածքում Հայաստանի և Ադրբեջանի միջև սահմանազատման աշխատանքները պարունակում են ծայրահեղ վտանգավոր ռիսկեր։ Մասնավորապես, նոր սահմանի առկայությունը համայնքի տարածքի կարևորագույն հատվածներ դարձնում է խոցելի, որը էական վտանգ է ներկայացնելու համայնքի բնակչության համար։ Մենք աջակցում ենք խաղաղության հաստատմանը, սակայն սահմանազատման այս գործընթացը փաստացի Հայաստանի կողմից միակողմանի զիջում է, այն պարագայում, երբ ադրբեջանական զինուժը Հայաստանի Հանրապետության բազմաթիվ տարածքներ շարունակում է պահել օկուպացված, այդ թվում Տավուշի մարզում։ Այս պարագայում իրատեսական չէ խոսել մի քանի գյուղի տարածքում խաղաղության մասին։

Մեզ համար ընդունելի չէ նման ձևաչափով սահմանազատման իրականացումը, հետևաբար Նոյեմբերյան համայնքը, համայնքի ղեկավար կազմը, այդ թվում սահմանամերձ գյուղերի վարչական ղեկավարները, չեն աջակցում սահմանազատման գործընթացին և չունեն որևէ մասնակցություն դրան:

Ապրիլի 30–ին, ժամը 13։30-ին Բերդ համայնքի Բերդի բազմագործառութային պետական քոլեջի 1-ին մասնաշենքում (Թեհլերյան 43) կկայանա «Երիտասարդական քաղաքականության մասին» օրենքի նախագծի վերաբերյալ խորհրդատվական հանդիպում-քննարկում։

Հանդիպումը իրականացվելու է ինտերակտիվ, ոչ ֆորմալ կրթության մեթոդաբանությամբ՝ խրախուսելով երիտասարդներին բարձրաձայնել օրենքի վերաբերյալ իրենց մտքերը, մտահոգությունները և
առաջարկությունները, որոնք կներկայացվեն համապատասխան գերատեսչությանը։

Հանդիպմանը մասնակցելու համար անհրաժեշտ է անցնել հղումով և գրանցվել մինչև ս․թ ապրիլի 25–ը ներառյալ։

Հայաստանի և Ադրբեջանի սահմանազատման հանձնաժողովների ապրիլի 19-ին կայացած նիստին հաջորդած հայտարարությունից ժամեր անց բնակիչները փակել էին Կիրանց գյուղի ճանապարհը: Բնակչության ընդվզումը շարունակվում է. 3-րդ օրն է փակ է գյուղի ճանապարհը, բնակիչները դեմ են սահմանազատմանը:

Ապրիլի 22-ին՝ ժամը 20:10-20:30-ն ընկած ժամանակահատվածում, Ոսկեպար – Աշաղը Ասկիպարա միջտարածքում` գետից ձախ հատվածում և Բաղանիս Այրումից 750մ հյուսիս-արևելք հատվածում, ականազերծման աշխատանքների շրջանակում տեղի կունենան պայթեցման աշխատանքներ՝ վերը նշված հատվածներից յուրաքանչյուրում մեկական պայթյուն. ՀՀ ՊՆ

Հարակից հատվածի բնակչությանը խնդրում ենք խուճապի չմատնվել:

Արծվաբերդի մշակույթի տանը Ապրիլի 20-ին մեծ շուքով նշվեց հանրապետության վաստակավոր գյուղատնտես, կոլտնտեսային արտադրության լավագույն կազմակերպիչ, անվանի արծվաբերդցի Արմենակ Ուզունյանի ծննդյան 100-ամյակը։
Մինչ միջոցառման սկսվելը Մշակույթի տան նախասրահում բացվեց Արմենակ Ուզունյանի կյանքը և գործունեությունն արտացոլող լուսանկարների ցուցահանդեսը։

Այնուհետեւ տեղի ունեցավ հանդիսավոր միջոցառումը, որը վարեց ասմունքողների հանրապետական մրցույթների դափնեկիր, «Հայաստանի վետերանների միավորում» ՀԿ-ի նախագահ, պահեստազորի գնդապետ Սիմոն Եսայանը։

Միջոցառման սկզբում Բերդի տարածաշրջանի հոգևոր հովիվ Տեր Արամ քահանա Միրզոյանը Տերունական աղոթք հնչեցրեց, որից հետո ներկաները մեկ րոպե լռությամբ հարգեցին հայրենիքի պաշտպանության սրբազան մարտերում նահատակված հայորդիների հիշատակը։

Միջոցառման ընթացքում Սիմոն Եսայանը ներկայացրեց Արմենակ Ուզունյանի կենսագրությունը և գործունեությունը։
Այնուհետև իրենց գնահատանքի խոսքը հնչեցրին Մանվել Բադալյանը, Իշխան Հայրապետյանը, Ռազմիկ Մխիթարյանը, Լուսյա Փալանդուզյանը, Լևոն Մադյանը, Հասմիկ Ուզունյանը։ Ելույթ է ունեցել նաեւ «Արծվաբերդ» պարային համույթը։

Անգնահատելի է Արմենակ Ուզունյանի ներդրումը հայրենի Արծվաբերդի գյուղատնտեսության զարգացման, առողջապահության, կենցաղի բարելավման, կրթական, մշակութային կյանքի աշխուժացման և այլ ոլորտներում։