Հուլիսի 17-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Բերդ համայնքի Այգեպար բնակավայրում անցկացվելու է ««Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների կազմակերպումը» թեմայով վարժանք, որի ընթացքում ժամը 12:00-ին գործարկվելու է էլեկտրական շչակ։

Խնդրում ենք չանհանգստանալ։

«Այն էներեգիան, որ զգում եմ Հայոց աշխարհում, որևէ տեղ չեմ զգում։ Այս երկիրը աստվածատուր երկիր է», – նշում է գեղանկարիչը։

Ցուցահանդեսի մասին՝ Տավուշ Մեդիայի թղթակից Հրանուշ Անանյանի տեսանյութում։

Սոցցանցերում տեղեկություններ են շրջանառվում Տավուշում զինվորական բեռնատարի և ուղևորատար միկրոավտոբուսի վթարի ու վիրավորների վերաբերյալ:

Պաշտպանության նախարարությունը հայտնում է, որ ճանապարհատրանսպորտային պատահարի հետևանքով որևէ զինծառայող չի հոսպիտալացվել:

Մի շարք ԶԼՄ-ներ տվյալ տեղեկությունը շրջանառում են զինվորական վթարված մեքենաների լուսանկարներով և 6 վիրավորների մասին հայտնող վերնագրերով՝ փորձելով տպավորություն ստեղծել, թե զինծառայողներ են վիրավորում ստացել:

ՃՏՊ վերաբերյալ ԶԼՄ ներկայացուցիչները կարող են ստույգ տեղեկություններ ստանալ ՆԳՆ-ից:

ՆԳՆ-ից հայտնում են.
Հուլիսի 15-ին՝ ժամը 13։35-ի սահմաններում, Տավուշի մարզի Բերդավան համայնքի մոտակայքում բախվել են «ԿամԱԶ» և «ԳԱԶել» մակնիշի մեքենաներ։

8 անձ դիմել է բժշկական կենտրոն, որոնք առաջին օգնություն ստանալուց հետո դուրս են գրվել։

Հուլիսի 15-ին Իջևանից ու Դիլիջանից նորակոչիկների հերթական խումբը մեկնել է պարտադիր զինվորական ծառայության:

Նորակոչիկներին ճանապարհելու էին եկել նրանց ծնողները, հարազատներն ու ընկերները։ Միախառնվել էին բոլորի զգացմունքները։

Ապագա զինվորները գիտակցում են, որ հեշտ չի լինելու բանակային կյանքի տարիները, բայց պատրաստ են իրականացնելու հայրենիքի
պաշտպանի առաքելությունը:

Առաջարկում ենք կարդալ՝

Հուլիսի 13-ին, ժամը 23:14-ին Ճգնաժամային կառավարման ազգային կենտրոն ահազանգ է ստացվել, որ Դիլիջանի ոլորանների մոտակայքում քաղաքացին սայթաքել և ընկել է մոտակա ձորակը։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:

Փրկարարները պատգարակով մոտ 5 մետր ձորից դուրս են բերել Ժ. Զ.-ին (ծնված 1995 թ.) և մոտեցրել շտապօգնության ավտոմեքենային. տուժածը հոսպիտալացվել է բժշկական կենտրոն:

Հուլիսի 13-ին, ժամը 16:24-ին Տավուշի մարզային փրկարարական վարչության ճգնաժամային կառավարման կենտրոն տեղեկություն է ստացվել, որ Այրում կայարանում՝ մաքսատան մոտակայքում, այրվում է մեկհարկանի սեփական տուն․ ներսում կա քաղաքացի:

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ:

Պարզվել է, որ հրդեհը բռնկվել է Այրում կայարանի Երկաթուղայինների փողոցի տներից մեկում:

Հրդեհը մեկուսացվել է ժամը 17։28-ին, մարվել՝ 19:27-ին: Այրվել է տունը (մոտ 60 քմ)՝ գույքով: Տան ներսում հայտնաբերվել է Լ․ Դ․-ի (ծնված 1941թ.) դին:

Վերջին տվյալներով՝ մայիսին տեղի ունեցած հեղեղումների հետևանքով Լոռու և Տավուշի մարզերում վնասվել է 269 բնակարան և անհատական բնակելի տուն: Սակայն, կառավարության հատկացրած փոխհատուցման ծրագրի շահառուների վերջնական թիվը պարզ կլինի դիմումների ընդունման ավարտին, որի վերջնաժամկետն է այս տարվա սեպտեմբերի 30-ը: «Արմենպրես»-ի մամուլի սրահում տեղի ունեցած ասուլիսում այդ մասին տեղեկացրեց ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը:

Նա նշեց, որ աղետի առաջին իսկ օրից տարածքային կառավարման և ենթակառուցվածքների նախարար Գնել Սանոսյանի գլխավորությամբ ձևավորվել և գործել է վնասների գնահատման հանձնաժողով: Համայնքային, մարզային և հանրապետական հանձնաժողովները տեղերում կատարել են ուսումնասիրություններ, վնասների և ազդեցությունների գույքագրում և համապատասխան փաստաթղթավորում՝ փորձելով ստանալ ամբողջական և համապարփակ պատկեր: Այդ աշխատանքների արդյունքում հաջողվել է գտնել վնասների փոխհատուցման այն մեխանիզմերն ու կարգավորումները, որոնք հնարավորինս արտացոլում են իրական խնդիրները ու վնասների պատկերը: Ամփոփված տվյալները սահմանված կարգով կներկայացվեն կառավարություն:

Նշվեց, որ այս պահին գրանցված են հեղեղումից տուժած 269 բնակարաններ և անհատական բնակելի տներ, սակայն շահառուների վերջնական թիվը պարզ կլինի դիմումների ընդունման ավարտին:

«Փորձելու ենք փոխհատուցման տրամադրման գործընթացը բավականին դյուրին դարձնել: Քննարկվել է նաև համայնքներում, հնարավոր հասանելի վայրերում դիմումների ընդունման կետեր ունենալու անհրաժեշտությունը: Դիմումի մեջ պետք է նշվի դիմողի անուն-ազգանունը, անձը հաստատող փաստաթղթի, հաշվառման վայրի վերաբերյալ տվյալներ, սեփականության իրավունքը հավաստող փաստաթուղթ, հետադարձ կապի տվյալներ և նախընտրելի բանկը, որը պետք է ընտրել կառավարության ներկայացրած ցանկից: Ուսումնասիրությունն ավարտելուց հետո 10-օրյա ժամկետում որոշում է կայացվելու տվյալ դիմումի վերաբերյալ:

Դիմումը ենթակա է մերժման, եթե դրանում ներկայացված տվյալները հավաստի չեն, օրինակ, չեն համապատասխանում պետական ռեգիստրում առկա տվյալներին, մահվան պետական գրանցման վերաբերյալ տվյալներ են առկա քաղաքացիական ակտերի գրանցման մարմիններում, դիմողը այդ կարգի մասով չի հանդիսանում շահառու և այլ դեպքերում:

Սահմանվել է նաև դիմումի մերժումը բողոքարկելու կարգ, որի իրացման համար անհրաժեշտ է դիմել տարածքային կառավարման և ենթակառուցվածքների նախարարություն: Այդ դեպքում դիմողին հնարավորություն կտրվի ներկայացնել լրացուցիչ տվյալներ և փաստաթղթեր: Նշվեց, որ դիմողին տրամադրվելու է համակողմանի աջակցություն:

Դիմումի հաստատվելուց հետո բանկերը պետք է սահմանված կարգի համապատասխան հնգօրյա ժամկետում շահառուին փոխանցեն հատկացված գումարը:

Ասուլիսին մասնակցած ներքին գործերի նախարարի տեղակալ Արփինե Սարգսյանն էլ հավելեց, որ փոխհատուցման սահմանված չափից ցածր գնով բնակարան ձեռք բերելու դեպքում գումարի մնացորդը փոխանցվելու է շահառուի բանկային հաշվին: Վերջինս ազատորեն կկարողանա տնօրինել այն: Իսկ, եթե շահառուն ցանկանա ձեռք բերել ավելի թանկ բնակարան, ապա պետք է ինքնուրույն լրացնի գումարի տարբերությունը:

Արփինե Սարգսյանի խոսքով, կառավարությունն  արդեն իսկ 269 բնակելի տարածքների հաշվարկով 1 մլրդ դրամ է հատկացրել ՏԿԵ նախարարությանը: Եթե այդ գումարն ավելացնելու անհրաժեշտություն առաջանա, ապա կլինեն բյուջետային լրացուցիչ հատկացումներ:

Նա հայտնեց, որ շահառու չեն ճանաչվի անօրինական բնակելի տարածք ունեցող քաղաքացիները, որոնք, սակայն, դեռ ժամանակ ու հնարավորություն ունեն օրինականացնելու նման կառույցները:

«Դա բոլորովին չի բացառում սոցիալական աջակցության տարբեր ծրագրերում քաղաքացիներին ընդգրկելու հնարավորությունը: Եթե, օրինակ, նկատենք, որ կա որևէ ինքնակամ կառույց, որը քաղաքացու միակ բնակելի տարածքն է եղել կամ նկատի ունենանք այլ հանգամանքներ՝ կառավարությունը կարող է իրականացնել սոցիալական աջակցության որոշակի ծրագրեր»,- նշեց Արփինե Սարգսյանը:

Նա հայտնեց նաև, որ փոխհատուցման գումարի վերջին վճարումը կարող է կատարվել 2025 թվականի հուլիսի 1-ին: Այդ ընթացքում շահառուն պետք է ամբողջությամբ սպառի տրամադրված գումարը, հակառակ պարագայում՝ մնացորդը պետք է վերադարձնի պետական բյուջե:

Ի տարբերություն փոխհատուցման մնացած տեսակների՝ բնակարանների գնման վկայագրերը տրամադրվելու են դիմումի հաստատելուց հետո երկամսյա ժամկետում:

Առաջարկում ենք դիտել Տավուշ Մեդիայի պատրաստած ամփոփ ռեպորտաժը՝ Տավուշի մարզում աղետի հետևանքների մասին․ Արտակարգ օրեր․ աղետի հետևանքները՝ Տավուշի մարզում

Իջևան համայնքից 15 երիտասարդներ EUDigitLAB նախագծի շրջանակում ձեռք են բերել շարժական գրաֆիկայի և գրաֆիկ դիզայնի անհրաժեշտ հմտություններ: 8 ամսյա դասընթացներն անցկացվել են երեք գործընկերների՝ Տավուշի ինովացիոն կենտրոնի, ԻննոԻջևանի և Վրաստանի անիմատորների ասոցիացիայի՝ «Սաքանիմայի» համատեղ ջանքերով, որոնք Իջևան քաղաքում հիմնել են թվային տեխնոլոգիաների ուսուցման լաբորատորիա։

Ուսումնական ծրագիրը կենտրոնացած էր «Շրջակա միջավայրի պահպանություն» թեմայի վրա՝ ընդգրկելով տարածաշրջանային բնապահպանական այնպիսի խնդիրներ, ինչպիսիք են գլոբալ տաքացումը, ջրի և օդի աղտոտումը, կենսաբազմազանության կորուստը, անտառահատումը, կենդանիների շահագործումն ու Աղստև գետի աղտոտումը: Հուլիսի 9-ին Վերնատուն պատկերասրահում բացվեց աշխատանքների ցուցահանդեսը, որի ընթացքում մասնակիցները պատմեցին ծրագրի շրջանակում ստացած ստեղծագործական ունակությունների ու հմտությունների մասին։

EUDigitLAB նախագծի վերջնական փուլը ներառում էր վրացական «Սաքանիմայի» հետ փորձի փոխանակում, որը ենթադրում է վստահության ձևավորում, ընդհանուր նպատակների բացահայտում, ռեսուրսների փոխանակում և երկարաժամկետ գործընկերության հնարավորություն, ինչն էլ իր հերթին խթանում է նորարարությունը, տնտեսական աճը և սոցիալական ազդեցությունը:

Ցուցահանդեսի հաջորդ օրը տեղի ունեցավ համաժողով՝ երկու երկրների փորձագետների մասանկցությամբ, ովքեր քննարկեցին շարժական գրաֆիկայի և գրաֆիկ դիզայնի ժամանակակից զարգացումներին վերաբերվող հարցեր: EUDigitLAB նախագիծը ֆինանսավորվել է Եվրոպական միության կողմից՝ EU4Culture նախագծի շրջանակներում:

https://www.youtube.com/watch?v=mbXoq_FXQOk

Հուլիսի 11-ին տեղի ունեցած ողբերգական ավտովթարի մասին որոշ մանրամասներ է հաղորդել Սիսիան համայնքի Գորայք բնակավայրի վարչական ղեկավար Կարեն Պետրոսյանը։

Գորայք բնակավայրի վարչական ղեկավար Կարեն Պետրոսյանը Տավուշ Մեդիայի հետ զրույցում զորացրված զինծառայողներին տեղափոխող մեքենայի ավտովթարի հետ կապված հայտնեց, որ տվյալ ճանապարհահատվածը ուղիղ է եղել, և ոչ մի խոչընդոտ չի եղել, որը կդառնար մեքենայի գլորվելու պատճառ։

Կ․ Պետրոսյանի խոսքով՝ Մեղրիից տղաները տուն էին վերադառնում․ 6 զինծառայողներից միայն մեկն է ի վիճակի եղել իջնել մեքենայից, ձորից դուրս գալ ու առաջին օգնություն կանչել։ Վարչական ղեկավարը կարծում է, որ 39-ամյա վարորդը կամ քնած է եղել, կամ հանկարծամահ է եղել։ «Չեմ բացառում, որ շատ արագ է եղել ու հանդիպակաց մեքենա է դուրս եկել դիմացից, որն էլ փորձել է շրջանցել, բայց այս դեպքում արգելակման հետքեր չկան»,- ասում է Պետրոսյանը։

Հիշեցնենք, որ Սյունիքի մարզում՝ Գորայք բնակավայրի հատվածում, ողբերգական ավտովթար է տեղի ունեցել: Սիսիան-Երևան ավտոճանապարհի 34-րդ կմ-ին «Միցուբիշի» մակնիշի ավտոմեքենան դուրս է եկել ճանապարհի երթևեկելի հատվածից և մոտ 300 մ գլորվել հարակից ձորը:

Լուսանկարները` Գորայքի վարչական ղեկավար Կարեն Պետրոսյանի:

Քննությունը կպարզի ճանապարհատրանսպորտային պատահարի առաջացման պատճառն ու նպաստող հանգամանքները:

Հուլիսի 11ին՝ ժամը 11։04-ին Երևանի բնակիչ 39-ամյա Արթուր Մնացականյանն իր վարած «Mitsubishi Grandis» մակնիշի ավտոմեքենայով Երևան-Մեղրի ավտոճանապարհի 175 կմ հատվածում, դեռևս անհայտ հանգամանքներում կորցրել է ավտոմեքենայի կառավարումը, դուրս եկել ճանապարհի երթևեկելի գոտուց, բախվել քարերին և մի քանի մետր գլորվելով կողաշրջված վիճակում հայտնվել ձորում։

Ավտովթարի հետևանքով Ա․ Մնացականյանն ու ուղևորը՝ Տավուշի մարզի բնակիչ Արմեն Մամյանը (ծնվ․ 2004թ․) տեղում մահացել են։ Մյուս ուղևորները՝ Տավուշի մարզի բնակիչներ Նորայր Դանիելյանը (ծնվ․ 2004թ․) և Հայկ Սառիկյանը (ծնվ․ 2004թ․), ու Շիրակի մարզի բնակիչներ Ազատ Առաքելյանը (ծնվ․ 2004թ․), Սամվել Մամիկոնյանը (ծնվ․ 2004թ․) , Ռաֆիկ Ոսկանյանը (ծնվ․ 2003թ․), մարմնական վնասվածքներով տեղափոխվել են Զանգեզուրի կայազորային հոսպիտալ։

Տուժած անձանցից 2-ի վիճակը ծանր է, երկուսինը՝ միջին ծանրության, մեկինը՝ բավարար։

Տավուշ Մեդիայի տեղեկություններով՝ «Mitsubishi» ավտոմեքենան շահագործվում էր որպես տաքսի, մահացածներից մեկն ու մյուս վիրավոր ուղևորները զորացրվել էին ու վերադառնում էին տուն։ Ավտովթարից տուժած Հայկ Սառիկյանը Իջևան համայնքի Սարիգյուղ բնակավայրից է, Նորայր Դանիելյանը Գանձաքար բնակավայրից։ Իսկ վթարին զոհ դարձած Արմեն Մամյանը Տավուշի մարզի Իջևան քաղաքից էր։