Հարավ-արևմուտքից ցիկլոնի ներթափանցմամբ պայմանավորված՝ հունվարի 22-ի ցերեկը, 23-ին Տավուշի նախալեռներում, Շիրակում, Լոռիում, Արագածոտնում, Կոտայքում, Գեղարքունիքում, Վայոց ձորում, Սյունիքում սպասվում է ձյուն տեղ-տեղ՝ ինտենսիվ, առանձին հատվածներում քամու ուժգնացում՝ 14-18 մ/վ արագությամբ, բուք, ճանապարհներին՝ մերկասառույց: Այս մասին տեղեկացնում է «Հիդրոօդերևութաբանության և մոնիթորինգի կենտրոն» ՊՈԱԿ-ը։

Հյուսիս-արևմուտքից արկտիկական ցուրտ օդային հոսանքների ներխուժմամբ պայմանավորված՝ օդի ջերմաստիճանը հունվարի 22-ի ցերեկը, 23-ին աստիճանաբար կնվազի 7-9, Տավուշում, Լոռիում և Սյունիքում 14-16 աստիճանով:

Այսօր՝ հունվարի 21-ին, Բերդ համայնքի զորակոչիկների ևս մի խումբ մեկնել է պարտադիր ժամկետային զինվորական ծառայության:

Նրանց ծառայության ճանապարհելու արարողությանը մասնակցել են Բերդ համայնքի ղեկավար Աստղիկ Հակոբյանը, համայնքի ղեկավարի առաջին տեղակալ Սևակ Բադալյանը, մի շարք բնակավայրերի վարչական ղեկավարներ, զորակոչիկների հարազատները:

«Սիրելի’ զորակոչիկներ, ծնողներ, հարազատներ, ողջունում եմ բոլորիդ։ Զորակոչիկների հարգելի’ ծնողներ, երախտապարտ եմ ձեզ հայրենասեր որդիներ դաստիարակելու համար։ Բանակը մեր ժողովրդի մեծագույն ձեռքբերումներից մեկն է, մեր խաղաղությունն է, արժանապատվությունն ու սրբությունը։ Սիրելի’ տղաներ, այսօր ձեր հերթն է` ստանձնելու հայրենիքի պաշտպանության սուրբ գործը։ Վստահ եմ, որ արժանապատվորեն եք իրականացնելու ձեր ծառայությունը։ Թո՛ղ մայրերի աղոթքն ու Աստծո օրհնությունը ձեզ հետ լինեն։ Խաղաղությամբ իրականացնեք ձեր ծառայությունը և վերադառնաք` շենացնելու ձեր տունն ու համայնքը։ Աստված պահապան բոլորիդ։ Փա’ռք մեր բանակին»,- իր ելույթում նշել է Բերդ համայնքի ղեկավար Աստղիկ Հակոբյանը։

Զորակոչիկներին իր բարեմաղթանքն է հղել նաև ՀՀ ՊՆ զորակոչային և զորահավաքային համալրման ծառայության Տավուշի մարզի Բերդի տարածքային ստորաբաժանման ղեկավարի պաշտոնակատար, կապիտան Վարդան Աբրահամյանը:

Հունվարի 22-ին՝ ժամը 10:00-ից մինչև 15:00-ն ընկած ժամանակահատվածում, Տավուշի մարզի Իջևան համայնքի Սարիգյուղ բնակավայրում անցկացվելու է ««Օդային տագնապ» ազդանշանի դեպքում բնակչության պատսպարումը» թեմայով վարժանք, որի ընթացքում գործարկվելու է էլեկտրական շչակ:

Խնդրում ենք չանհանգստանալ։

Աչաջուր գյուղից Պավել Աբազյանը հավերժի ճամփան բռնեց 1 տարի առաջ՝ 2023 թվականի հունվարի 19-ին՝ Ազատ գյուղի զինվորական կացարանում բռնկված հրդեհի պատճառով։ Նա ընտանիքի միակ որդին էր։ Պավլիկը մինչ ծառայության գնալը սովորում էր Հայաստանի պետական ճարտարագիտական համալսարանում, զուգահեռաբար զբաղվել է կարատեով՝ ավելի քան տասը տարի։

Նրա մարզիչը պատմում է, որ Պավլիկը մի շարք միջազգային մրցույթներերի հաղթող էր, նա ոչ միայն իր լավագույն աշակերտներից էր, այլ նաև ամբողջ Հայաստանի լավագույն մարզիկներից մեկը։ «Անկրկնելի մարդ էր, բոլորից տարբերվում էր, համեստ էր ու շատ ուժեղ», – ասում է մարզիչը։

Հիշեցնենք, որ 2023 թվականի հունվարի 19-ին՝ ժամը 01:30-ի սահմաններում, հրդեհ էր բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Հրդեհի հետևանքով զոհվել էր 15 զինծառայող։

«Քաղաքացիական երիտասարդական կենտրոն» համայնքային զարգացման ՀԿ նախաձեռնությամբ մեկնարկում է «Կանանց Առաջնորդության Ակադեմիա» նախագիծը: Այն միջոցառումների համալիր է, որը ներառում է՝

1․ Եռօրյա դասընթաց Իջևանում
Ակադեմիայի մասնակից կանայք և աղջիկները հնարավորություն կունենան բարելավելու իրենց գիտելիքներն այնպիսի թեմաների վերաբերյալ, ինչպիսիք են՝ առաջնորդությունը, համայնքային ակտիվությունը, կարիերայի պլանավորումն ու ռազմավարական մտածողությունը, հանրային կառավարումն ու ջատագովությունը:

2․ Մենթորություն
Ակադեմիայի մասնակիցները մրցակցային հիմքով կստանան ֆինանսական աջակցություն՝ Իջևանի կին ավագանիների հետ համագործակցությամբ իրականացնելու համայնքային ծրագրեր:

3․ Համագործակցություն
Ծրագիրը հնարավորություն կընձեռնի ընդլայնելու Ակադեմիայի մասնակիցների մասնագիտական ցանցերը և համագործակցելու իրենց ոլորտում լավագույն մասնագետների և համայնքի տարբեր դերակատարների հետ:

«Կանանց Առաջնորդության Ակադեմիա» նախագծին կարող են մասնակցել այն կանայք ու աղջիները, ովքեր՝

▪️ 17-35 տարեկան են,
▪️ Բնակվում են Իջևան խոշորացված համայնքում (որոշ բացառություններով կդիտարկվեն նաև հարակից համայնքներից ստացվող հայտերը),
▪️ Հետաքրքրված են համայնքային առաջնորդությամբ և ցանկանում են ակտիվ դերակատարում ունենալ իրենց համայնքում տեղի ունեցող գործընթացներում:
Բոլոր հետաքրքրված անձինք կարող են լրացնել առցանց հայտադիմումը․

Հայտերն ընդունվում են մինչև փետրվարի 20-ը․ ծրագրին մասնակցությունն անվճար է։ Հարցերի դեպքում կարող եք դիմել «Քաղաքացիական երիտասարդական կենտրոն» համայնքային զարգացման ՀԿ +374 43 94 39 02 հեռախոսահամարով։

Եկե՜ք ձեզ մեր գյուղեր տանենք․․.

Կոթեցի Անդրանիկ Մանթաշյանի տեսանյութը թույլ կտա տեսնել ու վայելել Կոթին՝ իր մշուշային հմայքով:

Հունվարի 17-ին զորակոչիկների հերթական խումբը Իջևանից մեկնեց պարտադիր զինվորական ծառայության․ զորակոչիկները շուտով համալրելու են մեր բանակի շարքերը՝ պատվով ծառայելու, հայրենիքը պաշտպանելու ամուր կամքով ու վճռականությամբ:
Բարի ծառայություն, տղե՛րք ջան:

Ներկայացվել է Բերդ համայնքի հնգամյա զարգացման ծրագիրը. հանրային լսում

Հունվարի 15-ին Բերդի համայնքապետարանում կայացել է հանրային լսում, որի ընթացքում հանգամանորեն ներկայացվել է Բերդ խոշորացված համայնքի հնգամյա զարգացման ծրագիրը:

Հանդիպմանը ներկա են եղել Բերդ համայնքի ղեկավար Աստղիկ Հակոբյանը, համայնքի ղեկավարի առաջին տեղակալ Սևակ Բադալյանը, համայնքի ղեկավարի տեղակալ Մհեր Պապյանը, համայնքապետարանի աշխատակազմի քարտուղար Մարտին Ապրեսյանը, ոլորտային պատասխանատուները, համայնքապետարանի, համայնքային ենթակայության հիմնարկների աշխատակիցները, ներկայացուցիչներ՝ համայնքում գործող հասարակական կազմակերպություններից:

Բերդ համայնքի ղեկավար Աստղիկ Հակոբյանն իր երախտագիտությունն է հայտնել ներկաներին մասնակցության համար և արդյունավետ աշխատանք է մաղթել:

Համայնքի ղեկավարի տեղակալ Մհեր Պապյանը ներկայացրել է Բերդ խոշորացված համայնքի հնգամյա զարգացման ծրագիրը:

Ըստ ոլորտների` հանգամանորեն ներկայացվել են համայնքի բնակավայրերում իրականացվելիք աշխատանքները, համայնքի ուժեղ և թույլ կողմերը, հնարավորությունների և սպառնալիքների վերլուծությունը, ռազմավարությունը և տեսլականը:

Ծրագիրն արժանացել է ներկաների հավանությանը:

Այսօր՝ հունվարի 10-ին, Բերդ համայնքում մեկնարկել է 2024թ.-ի ձմեռային զորակոչը:
Պարտադիր ժամկետային զինվորական ծառայության է մեկնել Բերդ համայնքից ՀՀ զինված ուժերի կազմը համալրող զորակոչիկների առաջին խումբը:
Նրանց ծառայության ճանապարհելու արարողությանը մասնակցել են Բերդ համայնքի ղեկավար Աստղիկ Հակոբյանը, համայնքի ղեկավարի առաջին տեղակալ Սևակ Բադալյանը, մի շարք բնակավայրերի վարչական ղեկավարներ, զորակոչիկների հարազատները:

Դիմելով զորակոչիկների ծնողներին՝ Բերդ համայնքի ղեկավար Աստղիկ Հակոբյանն իր երախտագիտությունն է  հայտնել նրանց՝ հայրենասեր զավակներ դաստիարակելու համար:
Նա խաղաղ ծառայություն և բարի վերադարձ է մաղթել զորակոչիկներին. «Մեր հայրենիքը  սիրո, հոգածության, պաշտպանության կարիք ունի, և այսօր,  տղանե՛ր, ձեր հերթն է ստանձնելու այդ սուրբ գործը: Խնդրում եմ ձեզ, եղե՛ք զգոն, ուշադիր, հոգատար՝ միմյանց ու հայրենիքի նկատմամբ, և,  համոզված եմ, որ կունենանք հզոր բանակ:  …Թո՛ղ Աստծո աջն ու մայրերի աղոթքը  հովանի լինեն ձեզ, խաղաղությամբ իրականացնեք ձեր ծառայությունը: Որպես զինծառայողի մայր՝ ուրախությամբ ու հուզմունքով եմ նշում, որ այսօր ավարտվում է որդուս զինվորական ծառայությունը,  և Աստծո հաջողությամբ վաղը կվերադառնա տուն:  Սիրելի՛ մայրեր,  իմ աղոթքը միացնում եմ ձեր աղոթքներին, ձեզ հետ միասին աղոթում եմ, որ ձեր  զավակները խաղաղ պայմաններում  ծառայեն և ուրախությամբ վերադառնան ձեր օջախները: Աստծո օրհնությունը բոլորիդ հետ: Փառ՛ք մեր բանակին»:

Զորակոչիկներին անփորձանք ծառայություն ու բարի վերադարձ է մաղթել նաև ՀՀ ՊՆ զորակոչային և զորահավաքային համալրման ծառայության Տավուշի մարզի Բերդի տարածքային ստորաբաժանման ղեկավարի պաշտոնակատար, կապիտան Վարդան Աբրահամյանը:

Հունվարի 10-ին, 11-14-ը հանրապետության շրջանների զգալի մասում սպասվում են տեղումներ և մառախուղ, հունվարի 10-14-ին տեղումները լեռնային գոտիներում կլինեն ձյան, հովտային և նախալեռնային շրջաններում անձրևի և ձնախառն անձրևի տեսքով։

Քամին՝ հարավարևմտյան 3-5 մ/վ, հունվարի 10-ին, 12-14-ին՝ 15-20 մ/վրկ արագությամբ։

Օդի ջերմաստիճանը հունվարի 10-ի ցերեկը Տավուշում, Լոռիում և Սյունիքում կնվազի 10-12 աստիճանով։