«Լինում է մի սար, որն ամենքիս է հավասար»․ շատերին հայտնի այս տողերով բեմում մի ներկայացում է, որը խոսում է ոչ միայն բարու և չարի պայքարի մասին, այլ՝ հավասարության, ընկալման և ներառման մասին։ «Ապրել միասին, սովորել միասին» խորագրով ներառական թատերախումբը հերթական ներկայացմամբ է հանդես գալիս։ Բեմում են դպրոցականները՝ տարբեր համայնքներից, տարբեր հնարավորություններով, բայց մեկ նպատակով՝ միասին խոսել բարու հաղթանակի մասին։
Ներկայացումը մի մասն է ներառական թատերախմբերի արդեն ավանդական դարձած փառատոնի, որն 5-րդ անգամ է կազմակերպում «Հույսի կամուրջ» հասարակական կազմակերպությունը։ Նպատակն է ձևավորել դրական վերաբերմունք հաշմանդամություն և կրթության առանձնահատուկ պայմանների կարիք ունեցող երեխաների նկատմամբ, և ամենակարևորը՝ ապահովել նրանց լիարժեք մասնակցությունը կրթությանն ու համայնքային կյանքում։
