Առաջին ձմեռն է, որ Չորաթան գյուղի դպրոցն անցկացնում է գազիֆիկացված և ջեռուցված: Թեև կապույտ վառելիքը գյուղ վաղուց է մտել, բայց, ինչպես ասում են, անցել է դպրոցի կողքով՝ դեռ խորհրդային տարիներից: Մի քանի ամիս առաջ կրթօջախին ձեռք մեկնեցին Հայ օգնության ֆոնդը և ամերիկյան «Փարոս» հիմնադրամը՝ Տավուշի մարզպետարանի աջակցությամբ: Անցկացվել է դպրոցը սնուցող գազատար խողովակ և կառուցվել կենտրոնացված ջեռուցման համակարգ:
Վազգեն Զարգարյան (Բերդ համայնքի Չորաթան գյուղի միջնակարգ դպրոցի տնօրեն) – Շատ մեծ ձեռքբերում է մեր դպրոցի համար, մեզ աջակցություն ցուցաբերեց մարզպետարանը, իսկ ֆինանսական ներդրումը՝ մոտ 6 մլն դրամի չափով, կատարվել է «Փարոս» հիմնադրամի կողմից 350 մ առանձին գազագծի անցկացման համար, որի արդյունքում ունենք նաև գազով ապահովված խոհանոց, Հայ օգնության ֆոնդի մոտ 10 մլն դրամի ներդրման արդյունքում դպրոցն ունեցավ ջեռուցման համակարգ:
55 տարի առաջ կառուցված շենքը տաքացվում էր փայտի վառարաններով, 11-րդ դասարանցի Մանյան ուսման 10 ձմեռները այսպես է հիշում:
Մանյա Ասատրյան (Չորաթան գյուղի միջնակարգ դպրոցի աշակերտ) – Տաքություն կար, բայց ծուխ էր, տհաճ էր դասասենյակում նստելը, 45 րոպե ֆիզիկապես էլ ա անհնար էդ ծխի մեջ անցկացնելը, բայց հիմա հաճելի ա:
Նախորդ պայմանների հետ համեմատելի չեն, ասում են ուսուցիչները:
Պայծառ Ուդումյան (Չորաթան գյուղի միջնակարգ դպրոցի ուսուցիչ) – Առաջին՝ այս դասարանում վառարան չի վառվել, լավ է պահպանվել, ավելի բարվոք պայմաններում են սովորում մեր երեխաները, և հաճելի մտնել այսպիսի դասասենյակներ:
Լավ պահպանված դասասենյակներ էլի կան, իսկ մի քանիսը, որտեղ վառարան է եղել, մասնակի նորոգել են, ասում է տնօրենը: Դպրոցի խոհանոցում էլ է շատ բան փոխվել, ամենափոքրերի համար «Դպրոցական սնունդը» հասցնում են արագ և դյուրին:
Նաիրա Քալանթարյան (խոհարար) – 12 տարի ա՝ աշխատում եմ, վառարան էր, դժվար պայմաններում աշխատել ենք, հիմա հասել ենք էս բարեկարգ վիճակին:
100 աշակերտ ունեցող դպրոցն իր առաջնային խնդրին հրաժեշտ է տվել՝ ապագայի նոր ծրագրերով:
