Դովեղի դպրոցի շինհրապարակում վերջապես սպասված շինարարական աղմուկ է։ Սահմանամերձ գյուղում նոր դպրոցի կառուցման ձգձգված ու անհանգիստ ընթացքով աշխատանքներն այլևս նոր փուլում են։ Դեռ 2020 թվականին Քաղաքաշինության կոմիտեի հետ կնքված պայմանագրով կապալառու ընկերությունը սկսել էր Դովեղի նոր դպրոցի կառուցման ծրագիրը, որը, սակայն, չարդարացրեց ոչ աշակերտների, ոչ ուսուցիչների, ոչ էլ բնակչության սպասումները։ Այժմ արդեն նախկին կապալառուն աշխատանքներն իրականացրել էր էական խախտումներով՝ շեղվելով և նախագծից, և որակի պահանջներից։ Քաղաքաշինության կոմիտեն, հիմնվելով մասնագիտական հանձնաժողովի եզրակացության և տեսչական մարմնի միջնորդագրի վրա, միակողմանի լուծել էր պայմանագիրը։ Դատարանը ևս հաստատել էր այս որոշումը՝ մերժելով նախկին կապալառուի բողոքները։
Ամիսներ առաջ դպրոցն ահազանգում էր և հույս հայտնում, որ օրերից մի օր սահմանամերձ Դովեղի աշակերտները դպրոց կգնան նոր ու հարմարավետ դպրոցում։ Ահազանգում էին նաև բնակիչները՝ առաջ քաշելով մեկ այլ խնդիր՝ գյուղի միակ ճանապարհի հնարավոր փլուզումը։
Այժմ նոր կապալառու է ներգրավվել կառուցման աշխատանքներում։ Նախատեսվում է առաջնահերթ իրականացնել հենապատի կառուցումը՝ գյուղի միակ ճանապարհի հնարավոր փլուզումը կանխելու նպատակով։ Աշխատանքների արժեքը՝ 985 մլն դրամ է։
Բնակչության և պատկան մարմինների պահանջն է՝ կառույցել որակով և սահմանված ժամկետում։ Աշխատանքն ավարտելու համար մեկ տարի ժամկետ է սահմանվել։ Արդյունքում՝ սահմանամերձ գյուղը կունենա նորակառույց, սեյսմակայուն և ժամանակակից դպրոց։
