ՇՄՆ էկոպարեկային ծառայության Տավուշի մարզային վարչության Իջևանի և Արծվաբերդի տեղամասի աշխատակիցը, իր ծառայողական պարտականությունները կատարելիս, սույն թվականի նոյեմբերի 4-ին Տավուշի մարզի Գանձաքար բնակավայրի գերեզմանատան հարակից տարածքում հայտնաբերել է հատված 13 հատ գերան, ինչի վերաբերյալ հաղորդում է ներկայացրել ՆԳՆ ոստիկանության տարածքային բաժին:
Համայնքային ոստիկանները, մեկնելով վերոնշյալ վայր, նկատել են տարածքից հեռացող «Ուրալ» մակնիշի առանց պետհամարանիշի ավտոմեքենա, որը շուրջ 1 կմ ընթանալուց հետո կողաշրջվել է: Մեքենայից շուրջ 20 մ հեռավորության վրա հայտնաբերվել է 4 հատ գերան:
Ձեռնարկված միջոցառումների արդյունքում պարզվել է մեքենայի սեփականատիրոջ ինքնությունը:
Դեպքի վերաբերյալ կազմվել է համապատասխան արձանագրություն, փաստաթղթերն ուղարկվել են ՔԿ Տավուշի մարզային քննչական վարչություն:
