Գորիսի համայնքապետարանի գյուղատնտեսության և հողօգտագործման բաժնի պետ Արմեն Ավետիսյանը, Խնձորեսկի վարչական ղեկավար Երվանդ Մալունցը և գյուղոլորտի այլ ներկայացուցիչներ 2023 թվականի հունվարի 24-ից 27-ը Տավուշի մարզում էին։
Նրանք նախ եղան Բերդ համայնքի Նորաշեն բնակավայրում ՄԱԿ-ի պարենի համաշխարհային ծրագրի շրջանակում կառուցված հատիկընդեղենի գործարանում՝ փորձի փոխանակման նպատակով, որպեսզի այդ փորձը, ստացած գիտելիքները կիրառեն Գորիսի Խնձորեսկ բնակավայրում կառուցվող համանման հատիկընդեղենի գործարանում։ Վերջինս նույնպես կառուցվում է ՄԱԿ-ի պարենի համաշխարհային ծրագրի շրջանակում՝ Գորիսի համայնքապետարանի հետ համագործակցությամբ։
Պատվիրակության անդամները ծանոթացան Նորաշենի հատիկընդեղենի գործարանի աշխատանքի ընթացքին, սարքավորումներին, արդեն վերջնական արտադրանքին՝ փաթեթավորված լոբի, հաճար, ոսպ և այլն։
Գործարանին կից ջերմոցային տնտեսությունում եղան, որտեղ հիդրոպոնիկ եղանակով ելակ է մշակվում։
Եղան նաև Իջևանի «Կենաց տուն» ամբողջահատիկի ակադեմիայում, որտեղ ծանոթացան արտադրական, խոհանոցային գաղտնիքներին։
Գորիսի պատվիրակությունը նաև քննարկում-զրույց ունեցավ Տավուշի մարզպետարանում՝ համապատասխան վարչության աշխատակիցների հետ։
Հիշեցնենք, որ Գորիսի Խնձորեսկ բնակավայրում կառուցվող հատիկընդեղենի գործարանը ոլոռի, ոսպի, սիսռեի, լոբու մշակում ու փաթեթավորում է անելու, ապահովելու է առնվազն 50 աշխատատեղ։ Բացի այդ՝ շուրջ 150 հոգի հնարավորություն կունենա գործարանի համար հատիկընդեղեն ապահովելու։
