Հայրենական մեծ պատերազմում հաղթանակի 80-ամյակի առիթով Տավուշի մարզում անցկացվելու են մի շարք միջոցառումներ՝ խնկարկում և հիշատակի արարողություն, կրթական միջոցառումներ դպրոցներում ու բնակավայրերում, ինչպես նաև մշակութային և հայրենասիրական ծրագրեր։
Բերդ համայնքում մայիսի 9-ին կանցկացվի «Տավուշը հիշում է…» խորագրով միջոցառումը։ Տոնական օրը համախմբելու է համայնքի բոլոր 17 բնակավայրերի ներկայացուցիչներին՝ հարգանքի տուրք մատուցելու հաղթանակը կերտած սերնդին և հիշելու բոլոր նրանց, ովքեր զոհվեցին հանուն Հայրենիքի։
Ժամը 10:30-ին, Բերդ քաղաքի Մաշտոցի փողոցի՝ թիվ 3 դպրոցի հարակից տարածքից կմեկնարկի հանդիսավոր քայլերթը դեպի համայնքապետարանի հարակից հրապարակ։ Հրապարակում կկայանա տոնական միջոցառում՝ նվիրված Հայրենական մեծ պատերազմի հաղթանակի 80-րդ տարեդարձին։ Քայլերթի մասնակիցները ծաղիկներ կխոնարհեն Արցախյան պատերազմների ընթացքում նահատակված տավուշցիների, 44-օրյա պատերազմի ընթացքում հերոսացած հայորդիների հիշատակը հավերժացնող հուշակոթողների և Անհայտ զինվորի հուշարձանի մոտ։
Նոյեմբերյանում կկազմակերպվի հայրենասիրական-մշակութային միջոցառում։ Այն կանցկացվի ժամը 11:30-ին, Հայրենական պատերազմի զոհերին նվիրված հուշարձանի տարածքում։ Միջոցառմանը կմասնակցեն Նոյեմբերյանի համայնքի կրթամշակութային հաստատությունները։
Իջևանի Սահմանադրության հրապարակից ժամը 11։00-ին կմեկնարկի հանդիսավոր քայլերթը դեպի Հայրենական պատերազմի զոհերի հիշատակը հավերժացնող հուշահամալիր։ Հուշահամալիրի տարածքում օրվա խորհրդով նախատեսված է միջոցառում։
Հաղթանակի տոնի կապակցությամբ ժամը 11։00-ին Դիլիջան քաղաքի հուշահամալիրի տարածքում՝ Արցախյան պատերազմում զոհված ազատամարտիկներին նվիրված խաչքարի մոտ, կկայանա հարգանքի արարողություն և ծաղիկների խոնարհում։
