ՀՀ Ազգային անվտանգության ռազմավարության անկյունաքարը հայի ինքնության պահպանումն է ամբողջ աշխարհում, հիմքում՝ լեզուն և հավատը: Լեզվի ճանաչումը, խորն իմացությունը ծնում-սնում են արմատ նետած լեզվամտածողություն՝ պատմության, գրականության դարս-դարս շտեմարանով: Գրաբարը մեր լեզվի արմատն է, մեր լեզվի գանձարանը: Իսկ բարբառները, և գանձարան են, և կենդանի քայլող պատմություն: Տավուշ Մեդիայի Դիմակայուն Տավուշ ծրագրի կարևորագույն բաղկացուցիչն է լեզուն, հայոց լեզուն՝ մայրենին: Ինչպես հայրենասիրությունն է սկսվում հայրենաճանաչությունից, այնպես էլ սերն առ լեզուն սկսվում է լեզվի իմացությունից: Ժամանակի փորձությունների ու մարտահրավերների հետ կռիվ տվող մեր լեզուն կենսունակ կարող է մնալ, եթե սնվում է արմատ գրաբարից ու չի կորցնում, չի հրաժարվում իր քայլող պատմություն բարբառներից:
Մայրենիին նվիրված միջոցառումների շրջանակում Հաղարծնի դպրոցը հանդիպում էր նախաձեռնել Տավուշ Մեդիայի ստեղծագործական խմբի հետ։ Հայոց լեզվին նվիրված տողերի միաձուլմամբ դպրոցականների գրական-գեղարվեստական ցերեկույթը կազմակերպվել էր հիշեցնելու թե որքան հարուստ է մեր լեզուն, որքան արժեքավոր ու զորավոր:
Աշակերտները ներկայացրին նաև հայերենի բարբառով իրենց բեմադրությունը:
Դպրոցականները հետևելով Տավուշ հեռուստաընկերությանը, նկատել էին, որ մենք կարևորում ենք բարբառների պահպանությունն ու տարածումը, և ցանկություն հայտնել հանդիպել մեզ հետ: Սիրով մասնակցեցինք միջոցառմանն ու խոսեցինք հեռուստաընկերության աշխատանքների մասին, որոնք միտված են մայրենիի պահպանմանն ու տարածմանը: Ջերմ ու անկեղծ հանդիպման առանցքում նորից ու նորից մայրենին էր, որը մեր հարստությունն է, իսկ մենք նրա պաշտպանը:
