Աչաջրի միջնակարգ դպրոցին կից կառուցվում է նոր հիդրոպոնիկ ջերմոց՝ «Հիդրոգրին Տավուշ» ծրագրի շրջանակում։ Ծրագիրը մեկնարկել է նախորդ տարի՝ 2024 թվականին, Էստոնիայի Հանրապետության ֆինանսավորմամբ և Փախստականների հարցերով էստոնական խորհրդի հայաստանյան մասնաճյուղի նախաձեռնությամբ։ Ծրագիրը կյանքի է կոչվում միաժամանակ համադրելով բնապահպանական նորարարությունը, կրթությունն ու սոցիալական ներգրավվածությունը։
«Ինչպես Էստոնիայում, այնպես էլ այստեղ՝ Հայաստանում, բազմաթիվ նախաձեռնություններ ու միջոցառումներ հիմնականում կենտրոնացած են մայրաքաղաքում, այս դեպքում Երևանում։ Որպես կազմակերպություն՝ մենք ցանկանում ենք հասնել այն վայրերին, որոնք դժվար հասանելի են։ Տավուշը հենց այդպիսի շրջաններից է, ինչպես նաև Լոռին և Շիրակը, որտեղ մենք նույնպես իրականացրել ենք ծրագրեր։ Տավուշի մարզում մեր ներկայության նախադրյալն այն է, որ այստեղ նմանատիպ նախաձեռնությունները քիչ են, առկա է մեծ բաց, և մենք այստեղ ենք՝ այդ բացը լրացնելու համար։ Տավուշի մարզում իրականացվող մեր այս ծրագիրը կենտրոնացած է դպրոցների վրա: Դպրոցներին կից ներդրվում են ջերմոցներ, ջրախնայման համակարգեր և կոմպոստացման լուծումներ՝ միասնաբար նպաստելով ավելի կայուն և բնապահպանական ապագայի կերտմանը», – նշում է Փախստականների հարցերով էստոնական խորհրդի տնօրեն Էերո Յանսոն։
Ծրագրի արդյունքներն շուտով տեսանելի կլինեն Աչաջրում, իսկ Սևքարի և Կողբի դպրոցներում աշխատանքները նույնպես ընթացքի մեջ են։ Այսպիսով, ջերմոցները դառնում են նախ՝ բերքատու տարածքներ, ապա բաց դասարաններ, որտեղ դպրոցականները հնարավորություն կունենան սովորելու ջրային ռեսուրսների արդյունավետ օգտագործման, թափոնների կառավարման, ու ընդհանրապես՝ բնության հետ հաշտ ապրելու սկզբունքները։
Ծրագրի սոցիալական բաղադրիչը նախատեսում է նաև Լեռնային Ղարաբաղից տեղահանված անձանց ներգրավում ջերմոցային աշխատանքներում՝ նպաստելով նրանց զբաղվածությանը և համայնքներում ինտեգրմանը։ Իսկ էստոնական փորձը հուշում է՝ վաղ տարիքում էկոլոգիական գիտելիքների ձեռքբերումը կայուն զարգացող ապագայի գրավականներից է։
