Հուլիսի 17-ին կայացել է Տավուշի թեմի հոգևոր առաջնորդ, Բարձրաշնորհ Տեր Բագրատ արքեպիսկոպոս Գալստանյանի «Ավետյաց երկրի տեսլիքով» գրքի բաց քննարկում-շնորհանդեսը:
Շնորհանդեսին ներկա են եղել Բերդ համայնքի ղեկավար Աստղիկ Հակոբյանը, համայնքի ղեկավարի տեղակալ Մհեր Պապյանը, 44-օրյա պատերազմի ընթացքում հանուն հայրենիքի նահատակված զինծառայողների հարազատները, մշակույթի գործիչներ, այլ հյուրեր:
Հանդիպումը մեկնարկել է Տերունական աղոթքով:
Ներկայացնելով «Ավետյաց երկրի տեսլիքով» գրքի գեղարվեստական արժեքն ու նշանակությունը՝ վերլուծական զեկույցներով հանդես են եկել Բերդի տարածաշրջանի հոգևոր հովիվ Տեր Արամ քահանա Միրզոյանը, անվանի մանկավարժ, մտավորական Ալբերտ Պապյանը, Բերդի ավագ դպրոցի տնօրենի՝ ուսումնական գծով տեղակալ Լուսինե Թումանյանը, «Բերդ» պատմամշակութային արգելոցի Բերդի պատմության և կենցաղի թանգարանի տնօրեն Արթուր Երկանյանը:
Գրքի մասին իր խոհերն է ներկայացրել Տավուշի թեմի հոգևոր առաջնորդ Բագրատ արքեպիսկոպոս Գալստանյանը:
Բերդ համայնքի ղեկավար Աստղիկ Հակոբյանն իր երախտագիտությունն է հայտնել Բագրատ արքեպիսկոպոս Գալստանյանին՝ գիրքը հեղինակելու և հայրենանվեր գործունեության համար. «Գերաշնո՛րհ Սրբազան Հայր, մեզ համար պատիվ է լինել Ձեր՝ հայրենիքի հոգսերով մշտապես ապրող ազգանվեր հայի, հոգևորականի, փիլիսոփայի, մարդկային բոլոր առաքինություններով օժտված մարդու ժամանակակիցը»:
«Ավետյաց երկրի տեսլիքով» գրքում հրապարակագրության և զրույցների տեսքով բարձրաձայնվում են այսօրվա կարևոր խնդիրներն ու հաճախ տրվում դրանց հաղթահարման բանալիները:
___________
Նախաբանում նշված է «…Սիրելի՛ ընթերցող, հուսամ՝ քեզ համար ևս այս գիրքը հետաքրքիր ճանապարհորդության, խորհելու և մտորելու առիթ կլինի՝ միշտ վառ պահելով Ավետյաց Երկրի Տեսլիքը՝ կառուցելու այնպիսի երկիր, որը կդառնա մեր բոլոր իղձերի և ձգտումների, երջանկութան ու անսպառ ուրախության ՄԵԾ ՏՈՒՆԸ: Ցանկանում եմ մեր այս խոսքը ամփոփել մեծն Թումանյանի մարգարեական շնչով, որն ինձ համար հնչում է որպես աղոթք և կյանքի բանաձև՝ հուսամ նաև քեզ համար:
Բայց հին ու նոր քո վերքերով կանգնած ես դու կենդանի,
Կանգնած խոհո՜ւն, խորհըրդավոր ճամփին նորի ու հընի.
Հառաչանքով սըրտի խորքից խոսք ես խոսում Աստծու հետ
Ու խորհում ես խորին խորհուրդ տանջանքներում չարաղետ,
Խորհում ես դու էն մեծ խոսքը, որ տի ասես աշխարհքին
Ու պիտ դառնաս էն երկիրը, ուր ձըգտում է մեր հոգին։
Հույսի՜ հայրենիք,
Լույսի՜ հայրենիք…
