Իջևանի համայնքապետարանն ամփոփել է 2023 թվականի ընթացքում կատարած աշխատանքները․ փետրվարի 29-ին տեղի ունեցած Իջևան համայնքի ավագանու արտահերթ նիստի ընթացքում ներկայացվել է համայնքի 2023 թվականի բյուջեի կատարման հաշվետվությունը: Ավագանին հաստատել է նաև համայնքի 2024 թվականի տարեկան աշխատանքային պլանը:
2023 թվականին Իջևան խոշորացված համայնքում կատարվել են մեծածավալ աշխատանքներ։ Կառուցվել են նոր ճանապարհներ և պուրակներ,մանկապարտեզներ, ընդլայնվել է լուսավորության ցանցը, կազմակերպվել են մշակութային, երիտասարդական և մարզական միջոցառումներ։ 2023 թվականին համայնքի բյուջեն փաստացի կազմել է 2.807.693.000 դրամ: Տարվա ընթացքում սոցիալական աջակցություն է տրամադրվել 462 բնակչի՝ 9.366.000 դրամի չափով: 183 զինծառայող ստացել 5.490.000 դրամ ֆինանսական աջակցություն: Սպորտի և մշակույթի բնագավառում բարձր արդյունքներ ցուցաբերած մարզիկները,մարզիչները, սաներն ու ուսուցիչները պարգևատրվել են ընդհանուր՝ 3.790.000 դրամի չափով: Ֆինանսական աջակցությունների և դրամական պարգևների ընդհանուր բյուջեն կազմել է 18.646.000 դրամ: Ընդհանուր առմամբ 2023 թվականին համայնքում իրականացվել է 744 միլիոն դրամի սուբվենցիա, որից համայնքի ներդրումը կազմել է 335 միլիոն դրամ: Սրանք կատարված աշխատանքերի մի մասն են կազմում, իսկ ամբողջական հաշվետվությունը ներկայացվեց ավագնու անդամներին: Նիստի ավարտին ավագանու անդամները իրենց առաջարկությունները ներկայացրեցին համայնքի ղեկավարին` օրակարգում ներառված այլ հարցերի վերաբերյալ:
