Հունիսի 5-ին ՀՀ կառավարությունը հաստատել է թմրամիջոցների և հոգեմետ նյութերի ոչ բժշկական օգտագործման ու ապօրինի շրջանառության դեմ պայքարի ռազմավարությունն ու դրանից բխող 2025-2027 թթ. գործողությունների ծրագիրը։
Ռազմավարությունը նախատեսում է երեք հիմնական ուղղություն՝
- Թմրամիջոցների չարաշահման կանխարգելում,
- Ապօրինի շրջանառության դեմ պայքար,
- Կախվածություն ունեցող անձանց բուժում, վերականգնում և հանրային առողջության պաշտպանություն։
Նախատեսված են միջոցառումներ 13 ռազմավարական ուղղությամբ՝ հանրային իրազեկումից մինչև օրենսդրական բարեփոխումներ, երիտասարդների, դատապարտյալների և զինծառայողների շրջանում կանխարգելման ծրագրեր, ինչպես նաև կախվածություն ունեցող անձանց վերաինտեգրում։
ՆԳ նախարար Արփինե Սարգսյանը նշել է, որ ծրագիրը միտված է ոչ միայն առողջապահության, այլև հանրային անվտանգության ոլորտի բարելավմանը։ Նա ընդգծել է, որ վերջին տարիներին թմրամիջոցների հետ կապված հանցագործությունների թիվն աճել է՝ 2018-ի 877 դեպքից հասնելով 2023-ի 5070-ի։ Սակայն 2024-ին նկատվել է որոշակի նվազում՝ 3639 դեպք։ Նախարարի խոսքով՝ ավելի մեծ ուշադրություն է դարձվելու ներմուծման ու արտադրության շղթաներին։ Արդյունքում 2024-ին ապօրինի շրջանառությունից հանվել է շուրջ 426 կգ թմրամիջոց՝ 200 կգ-ով ավելին, քան նախորդ տարում, իսկ 2025-ի առաջին ամիսներին՝ արդեն 173 կգ։
Ռազմավարությունն անցել է հանրային քննարկումների փուլ՝ քաղաքացիական հասարակության և պետական մարմինների մասնակցությամբ։
Արտակարգ Ալիքի «Փակուղի» ֆիլմաշարն այժմյան իրականության մեջ առավել արդիական է: Ֆիլմաշարում իրական ճակատագրեր են, կենդանի մարդիկ, խորտակված երազներ, ողբերգությունների հիման վրա թմրամոլությունից խուսափելու դասընթացներ: Թմրամոլությունը սոցիալական չարիք է՝ փակուղի:
Փակուղի. «Թմրամոլի խոստովանությունը»
Փակուղի. «Թմրամոլությունը՝ հանցագործություն»
Փակուղի. «Թմրամոլությունը՝ հիվանդություն»
Փակուղի․ «Հայաստանը ոսկյա կիսալուսնի երթուղի»
