Վերջին օրերին տեղացած ինտենսիվ կարկուտը զգալի վնասներ է առաջացրել Տավուշի մարզում։ Հունիսի 14-ին և 15-ին Նոյեմբերյան, Բերդ ու Դիլիջան համայնքների բնակավայրերում վնասվել են գյուղատնտեսական հողատարածքները, այգիները, բերքն ու տները։ Կարկուտը ծեծած տեղն է ծեծում․ ժողովրդական այս խոսքով են բնութագրում մարդիկ վերջին 2 օրերի իրողությունը։ Բնակիչների ահազանգի հետքերով մենք այսօր կներկայացնենք կարկուտի հասցրած վնասները։
Վնասված այգիներ, հողատարածքներ, տանիքներ, մեքենաներ, արևային ջրատաքացուցիչներ․ կարկուտի հասցրած վնասներն են Նոյեմբերյան համայնքում։ Հունիսի 14-ի և 15-ի ուժեղ քամու, հորդառատ անձրևի և կարկուտի հետևանքներին գնահատելու նպատակով Նոյեմբերյանի համայնքապետարանում ձևավորվել է հանձնաժողով։
«Կազմել ենք հանձնաժողովներ՝ անկախ նրանից, որ օրը կիրակի էր, այցելեցինք Բերդավան, ստացանք ընդհանուր պատկերը, իսկ հունիսի 16-ից խմբերը շրջում են և արձանագրում խնդիրները։ Գույքագրում ենք առկա իրավիճակը, որը մարզպետարանի միջոցով կփոխանցենք կառավարությանը, վստահ եմ, որ կառավարությունը կարձագանքի»,- նշում է Նոյեմբերյան համայնքի ղեկավար Արսեն Աղաբաբյանը։
Նոյեմբերյան համայնքում կարկուտի վնասները տեսանելի են Բերդավան, Կողբ, Դովեղ, Արճիս, Լճկաձոր գյուղերում ու Նոյեմբերյան քաղաքում։ Հատկապես մեծ է վնասը Բերդավանում, այդ մասին են վկայում համայնքապետարանում մարդկանց բազմությունը․ բնակիչները եկել են արձանագրելու կրած վնասները։
Բերդավանում վնասներն առավել շատ են․ բնակիչների խոսքով կարկուտը րոպեների ընթացքում ոչնչացրել է տարիների աշխատանքը։ Բնակիչներից Էրիկ Հախվերդյանը ցույց է տալիս իր հյուրատան բակը, որը սեփական ձեռքերով էր ստեղծել-բարեկարգել։ Յուրահատուկ ծառատեսակներն ու ծաղկատեսակները, որոնք աշխարհի տարբեր անկյուններից հասցրել է Բերդավան ու փորձել աճեցնել, կարկուտը վնասել է։
Մինչ հանձնաժողովի այցը, Էրիկն արդեն գույքագրում է վնասի չափը։ Փոխատուցում լինի թե չլինի, փաստ է՝ առաջիկա զբոսաշրջային սեզոնին դժվար կարողանա առաջվա պես հյուրեր ընդունել։
Բնակիչների թիվ մեկ մտահոգությունը վնասված տանիքներն են, որ նախորդ ժամանակներում կրակոցներից էին վնասվում՝ հիմա կարկուտից։ Հեկտարներով ու բազմատեսակ խաղողի դաշտերը ևս վնաս են կրել։ Հողի մեջ կյանք դրած աշխատավոր գյուղացին այս տարի դժվար թե տոննաներով բերք մթերի։
Բերդավանի վարչական գրասենյակում շարունակվում են դիմումներ ընդունվել․ երկու օրվա ընթացքում ավելի քան 200 դիմում է ստացվել։
Վնասների գույքագրումը դեռ կշարունակվի, մինչև պարզ լինի վնասի համընդհանուր պատկերը։
