Տավուշում արևը ջերմացնում է ու նաև փոխակերպվում էներգիայի՝ համայնքների համար նոր հնարավորություններ ստեղծելով։ ՄԱԿ-ի Զարգացման ծրագրի «Դիմակայունություն ի սկզբանե» ծրագրի շրջանակում Իջևան համայնքում տեղադրվում են արևային համակարգեր։ Նախաձեռնությունը կյանքի է կոչվում Սերբիայի կառավարության աջակցությամբ և մաս է կազմում ավելի մեծ ծրագրի, որի նպատակն է արձագանքել տեղահանված բնակիչներին ընդունող համայնքների և տեղահանված բնակիչների կարիքներին՝ առաջարկելով կայուն լուծումներ, որոնք ուղղված են սոցիալական միասնականության խթանմանը։
Հայաստանում Սերբիայի դեսպան Տատյանա Պանայոտովիչ Ցվետկովիչը Տավուշ Մեդիայի հետ զրույցում նշում է․
«Ուրախ եմ կրկին Տավուշի մարզում լինել։ «Դիմակայունություն ի սկզբանե» նախագիծը և մարդասիրական է, և միտված է զարգացմանը։ Առաջին անգամ Սերբիան դառնում է զարգացման գործընկեր և մենք որոշեցինք ՄԱԿ-ի զարգացման ծրագրի միջոցով մի քանի նախագիծ իրականացնել այստեղ՝ Հայաստանում։ Այս 1 միլիոն եվրոյից, որը Սերբիայի կառավարությունը տրամադրում է Հայաստանին, մեծ մասը կուղղվի Տավուշի մարզին։ Ուրախ եմ, որ այս նախագծերը նախատեսված են կանանց կարողությունների հզորացման համար, կանաչ էներգիայի, նաև ջրային ռեսուրսների կառավարման համար»
Ծրագրի շրջանակում Իջևան, Բերդ ու Նոյեմբերյան համայնքներում տեղադրվում են արևային ֆոտովոլտային և ջրատաքացման համակարգեր՝ ավելի քան 213 կՎտ ընդհանուր հզորությամբ։ Սա կրճատում է ծախսերը և ապահովում կայուն էներգամատակարարում՝ անգամ արտակարգ իրավիճակներում։ Ծրագրի կարևոր բաղադրիչ է նաև ջրային ռեսուրսների կառավարումը։ Աչաջուրում կառուցվում է օրվա կարգավորվող ջրամբար՝ ավելի քան 5,600 խորանարդ մետր օգտակար ծավալով։ Դրա շնորհիվ ոռոգվող հողատարածքները կավելանան մոտ 120 հեկտարով՝ հնարավորություն տալով համայնքի գյուղատնտեսությանը զարգանալ նոր մակարդակով։
«Առաջնահերթությունը տրվում է այն բնակավայրերին և ընտանիքներին, համայնքներին, որոնք ամենաշատն ունեն աջակցության կարիք: Այս նախագծի հիմնական նպատակն է ամրապնդել կանանց մասնակցությունը համայնքային կյանքում, ստեղծել ջրամբարներ, ինչպես նաև ներդնել արևային համակարգեր՝ էներգաարդյունավետության համար: Նախ, այն արտադրում է էլեկտրաէներգիա և կարող է օգտագործվել որպես էլեկտրաէներգիայի անկախ աղբյուր, երկրորդ՝ արևային վահանակները խնայում են էներգիա, և վերջապես, երեխաները, ովքեր փոքր տարիքից արդեն կարող են հասկանալ, թե որոնք են վերականգնվող էներգիայի և արևային համակարգերի առավելությունները իրենց համայնքում», – իր խոսքում նշում է Հայաստանում ՄԱԿ-ի Զարգացման ծրագրի մշտական ներկայացուցիչ Նաթիա Նացվլիշվիլին։
Ծրագիրն ունի նաև սոցիալական ուղղվածություն։ Սարիգյուղում բազմազավակ ընտանիքի տանիքին տեղադրված արևային համակարգը բավարարում է թե՛ կենցաղային, թե՛ ձեռնարկատիրական կարիքները։ Իսկ Այգեհովիտում մանկապարտեզի 10 կՎտ հզորությամբ արևային համակարգն ամբողջությամբ կհոգա հաստատության էներգետիկ պահանջները։
Ծրագրի արդյունքում համայնքներն ստանում են կայուն էներգետիկ և ջրային լուծումներ, որոնք նվազեցնում են ծախսերը և բարելավում բնակիչների կենսապայմանները։ «Կանաչ» լուծումները նաև հնարավորություններ են՝ կառուցելու կայուն ապագա։
