Նոյեմբերյանում անցկացվեց «Ի՞նչ, որտե՞ղ, ե՞րբ» ինտելեկտուալ խաղի համայնքային աշակերտական փառատոնը: Այն կազմակերպվել էր «Սմարթ Նոյեմբերյան» ծրագրի շրջանակներում ու նպատակ ուներ խթանելու երիտասարդների ինտելեկտուալ զարգացումն ու ստեղծելու երկխոսության յուրահատուկ հարթակ: Փառատոնին մասնակցելու հայտ էր ներկայացրել 19 թիմ՝ Նոյեմբերյան խոշորացված համայնքի 17 դպրոցներից, պետական քոլեջից և N զորամասից:
Համայնքային կարողությունների զարգացման գործնական կենտրոնը, համագործակցելով Նոյեմբերյանի Ինտելեկտուալ Կրթության Ակումբի (ՆԻԿԱ) հետ, կազմակերպել էր մրցույթ-փառատոնը, որի ընթացքում աշակերտները իրենց ունակությունները ցույց տվեցին տարբեր անվանակարգերում:
Մրցույթ-փառատոնում 1-ին հորիզոնականը զբաղեցրեց Կողբի թիվ 2 միջնակարգ դպրոցի «Նեմեսիս» թիմը, 2-րդ մրցանակը ստացավ N զորամասի «Սպարապետ» թիմը, իսկ 3-րդ տեղը զբաղեցրեց Նոյեմբերյանի վարժարանի «Սելեն» թիմը: Մրցանակներ էին սահմանել Նոյեմբերյանի համայնքապետարանը, «Քմյունիթի սենթր ֆոր դիվելոփմենթ» հասարակական կազմակերպությունն ու բազմաթիվ այլ հաստատություններ։
«Սմարթ Նոյեմբերյան» ծրագրի շրջանակում կազմակերպված փառատոնն իրականացվում է ԱՄՆ Միջազգային զարգացման գործակալության աջակցությամբ․ ծրագրի նպատակն է ամրապնդել համայնքի կարողությունները և հարթակ ստեղծել երիտասարդների համար, որպեսզի նրանք կարողանան մասնակցել համայնքային կյանքին: «Ի՞նչ, որտե՞ղ, ե՞րբ» ինտելեկտուալ խաղի փառատոնը երիտասարդների համար հետաքրքիր հնարավորություն էր՝ զարգանալու և ձևավորելու նոր հարաբերություններ, որոնք ի վերջո բերելու են համայնքի բարեկեցության և զարգացման։
