Օգոստոսի 10-ին հանդիսավորությամբ նշվել է Մովսես գյուղի օրը։ Այն նշանավորվել է մարզական և մշակութային մի շարք միջոցառումներով։ Միջոցառումների մեկնարկը տրվել է Մովսեսի Սբ. Աստվածածին եկեղեցում կայացած մոմավառության արարողությամբ։ Տեղի են ունեցել վոլեյբոլի, նարդու միցաշարեր։ Կարատեի խմբի սաները հանդես են եկել ցուցադրական ելույթներով։
Ներկայացվել է մովսեսցի ստեղծագործող Գայանե Ապերյանի «Կյանքն իր գույներով» գիրքը։
Այնուհետև բնակավայրի մշակույթի տան անձնակազմի, տեղաբնակ և ռուսաստանաբնակ մովսեսցի երեխաների համատեղ ջանքերով կայացել է մշակութային միջոցառում։
Հնչել են ՀՀ պետական օրհներգը և Մովսես գյուղի հիմնը։ (հեղ.` Ռոբերտ Փոլադյան)։
Ելույթ են ունեցել Բերդ համայնքի ղեկավար Աստղիկ Հակոբյանը, Մովսես գյուղի վարչական ղեկավար Արմեն Փոլադյանը, ՀՀ ԳԱԱ Պատմության ինստիտուտի առաջատար գիտաշխատող, «Հայոց պատմության հարցեր» հանդեսի գլխավոր խմբագիր Արտաշես Շահնազարյանը, «Ռուսաստանաբնակ Մովսես համայնք» կազմակերպության ներկայացուցիչ Սոնա Անդրեասյանը։
Իրենց ելույթներով հանդիսատեսին ջերմացրել են նաև կոմպոզիտոր, միջազգային մրցույթների դափնեկիր Ալեքսանդր Հարությունյանը, երգչուհի, «Ազգային երգիչ» նախագծի մասնակից Անի Խառատյանը։
Միջոցառումներն ամփոփվել են միասնական շուրջպարով։
Լուսանկարներն ու տեղեկատվությունը՝ Բերդի համայնքապետարանից։
