Տավուշ Մեդիան մշակել է խոցելիության գնահատման, ճգնաժամային հաղորդակցության և հանրային իրազեկման պլան, որը նպատակ ունի հզորացնել տեղեկատվական անվտանգությունը, բացառել կեղծ ու սուտ լուրերի, ինչպես նաև՝ խուճապի տարածումը, նպաստել ճշգրիտ և օպերատիվ ճգնաժամային հաղորդակցությանը, ամրապնդել պետական կառավարման, տեղական ինքնակառավարման մարմինների, հասարակական ու միջազգային կազմակերպությունների և բիզնեսների հետ սահմանամերձ մարզային մեդիայի համագործակցությունն արտակարգ իրավիճակներից առաջ, դրանց ժամանակ և հետո։
Մարտի 11-ին Իջևանում ներկայացվեց «Ճգնաժամային հաղորդակցության և հանրային իրազեկման» պլան-նախագիծը։ Բացման խոսքով հանդես եկավ ճգնաժամային հաղորդակցության ու տեղեկատվության կառավարման միջազգային փորձագետ, փրկարարական ծառայության գեներալ-մայոր Նիկոլայ Գրիգորյանը․
«Վերջին շրջանում՝ անցած 35 տարիներին, մենք և պատերազմ ենք տեսել, և աղետներ՝ երկրաշարժի տագնապ, հեղեղումներ, անտառային հրդեհներ, սողանքներ, համաճարակներ։ Այս ամբողջ ընթացքում կարևորվել է բնակչության հետ ճիշտ հաղորդակցվելու, ճշգրիտ տեղեկություններ փոխանցելու և կառույցների միջև արդյունավետ համագործակցելու խնդիրը», – նշեց Նիկոլայ Գրիգորյանը։
Այնուհետև Էռնեստ Խանումյանը ներկայացրեց «Ճգնաժամային հաղորդակցության և հանրային իրազեկման» պլանը՝ նպատակն ու առաքելությունը, բովանդակությունը, պլան-նախագծի մշակման կարևորությունն ու անհրաժեշտությունը։
Հանդիպմանը ներկա էին ՀՀ ՆԳՆ Փրկարար ծառայության, ոստիկանության Համայնքային ոստիկանության գլխավոր վարչության, Քրեական ոստիկանության գլխավոր վարչության Տավուշի մարզային ստորաբաժանումները, պետական կառավարման, տեղական ինքնակառավարման մարմինների, միջազգային ու հասարակական կազմակերպությունների ներկայացուցիչներ, հանրապետության մարզային հեռուստաընկերությունների ղեկավարներ, լրագրողներ, ինչպես նաև երիտասարդներ։
Հանդիպումն ընթացավ տեղեկատվական ուսումնավարժանքի իրականացմամբ՝ նախապես մշակված ուսումնական սցենարի հիման վրա, ըստ որի՝ «սույն թվականի մարտի 1-ին՝ տեղական ժամանակով ժամը 07։45-ին, Տավուշի մարզի Իջևան համայնքի Ազատամուտ բնակավայրում տեղի է ունեցել 7 մագնիտուդ ուժգնությամբ երկրաշարժ։ Հիպոկենտրոնը գտնվել է 15 կմ խորության վրա։ Երկրաշարժի հետևանքով բնակավայրում և հարակից տարածքներում արձանագրվել են մի շարք ավերածություններ»:
Ուսումնական սցենարի բարդությանը համահունչ կառույցների ներկայացուցիչները քննարկումների արդյունքում ներկայացրին իրենց գործողությունները։
Հանդիպմումն ավարտվեց հարցուպատասխանով։
«Ճգնաժամային հաղորդակցության և հանրային իրազեկման» պլանի մշակումը քայլ էր ստեղծելու ավելի անվտանգ ու հուսալի տեղեկատվական միջավայր՝ Տավուշի մարզում ճգնաժամային հաղորդակցության ամրապնդման, մեդիայի ազդեցության բարձրացման և տեղեկատվական անվտանգության ապահովման համար։
«Արտակարգ ալիքն» ու Տավուշ Մեդիան իրենց խորին երախտագիտությունն են հայտնում «Իրական դպրոցին»՝ տարածքի սիրահոժար տրամադրման, աջակցության և համագործակցության համար:
