Հունիսի 5-ին՝ Շրջակա միջավայրի համաշխարհային օրվա առիթով, Տավուշի մարզի Բերդ քաղաքում կազմակերպվեց բնության ու շրջակա միջավայրի պահպանությանը նվիրված միջոցառում։ Այն տեղի ունեցավ «Սորաններ» դենդրոպարկում՝ Հայաստանի բնության պետական թանգարանի և ՀՀ շրջակա միջավայրի նախարարության «Արգելոցապարկային համալիր» ՊՈԱԿ-ի նախաձեռնությամբ։
Միջոցառման նպատակն էր հանրության, հատկապես երիտասարդ սերնդի շրջանում բարձրացնել իրազեկվածությունը բնապահպանական խնդիրների վերաբերյալ, խթանել բնության նկատմամբ հոգատար ու գիտակցված վերաբերմունքը։
Օրվա ընթացքում դենդրոպարկում կազմակերպվել էին բազմաբովանդակ էկո-ակտիվություններ՝ ծառատունկ, ուսուցողական կանգառներ՝ նվիրված Հայաստանի կենդանական և բուսական աշխարհին, ստեղծագործական գոտիներ՝ վերամշակվող նյութերից պատրաստված աշխատանքներով, վիկտորինաներ ու բնապահպանական խաղեր, իսկ օրվա եզրափակիչ մասը վերածվեց բացօթյա կինոդիտման՝ բնապահպանական ֆիլմի ցուցադրությամբ։
Միջոցառումը համախմբեց տարբեր տարիքի քաղաքացիների, դպրոցականների ու բնության սիրահարների՝ ձևավորելով համագործակցային ու գիտելիքներով հագեցած միջավայր։
Շրջակա միջավայրի համաշխարհային օրը ևս մեկ հիշեցում էր, որ բնությունը մեր համատեղ պատասխանատվությունն է, և յուրաքանչյուր փոքր քայլ կարևորվում է մեծ փոփոխությունների ճանապարհին։
