Տավուշի մարզի հարուստ մշակութային կյանքում հին ու արժեքավոր պատմությունների պակաս չկա․ այս շարքում առանձնահատուկ է շուլալ կարպետը, դրա ստեղծման ընթացքը, որը տարիների դադարից հետո նորից հայտնվել է ուշադրության կենտրոնում՝ կենդանանալով «Թելիկ» սոցիալ-մշակութային ՀԿ-ի կանանց ու աղջիկների ջանքերով։
Շուլալ կարպետը հնում գործվել է գրեթե յուրաքանչյուր տավուշեցու տանը։ Բայց դրա ստեղծումը երբեք պարզապես ավանդույթ չի եղել․ այն արվեստ է, որ պահանջում է ձեռքի անթերի ճշգրտություն, տեսողական հաշվարկ, գեղարվեստական ճաշակ և տեխնիկայի խորքային տիրապետում։ Ընթացիկ տարվա ընթացքում կազմակերպությունը ՀՀ կրթության, գիտության, մշակույթի և սպորտի նախարարության աջակցությամբ իրականացրեց «Շուլալ կարպետի ուսուցում և հանրահռչակում» ծրագիրը Խաշթառակ, Գանձաքար և Աչաջուր գյուղերում։ Մի քանի ամսվա ընթացքում տասնյակ կանայք ու աղջիկներ սովորեցին հին տեխնիկայի գաղտնիքները, և դարձան դրա կրողները՝ ստեղծելով սեփական աշխատանքները։
Շուլալն այսօր վերադարձել է և որպես արհեստ, և որպես ինքնության ու շարունակականության ուղերձ։ Իջևան համայնքի համար սա կարևոր է նաև զբոսաշրջության ու մշակութային կյանքի աշխուժացման տեսանկյունից։
Շուլալի վերածնված նախշերի ներսում, թել առ թել, շարունակում է ներկայանալ հայկական ձեռագործության դարավոր շունչը։
