Իջևանի «Լոֆթ» երիտասարդական կենտրոնի հունվարի 29-ի երեկոն պարզապես գերհագեցած էր բառերի ու մեղեդիների գրական-գեղարվետական միաձուլմամբ։ «Սիրո համանվագ» երեկույթը իջևանցիներին հրավիրել էր գրական-երաժշտական ճամփորդության՝ լսելու և վայելելու դասական ու ժամանակակից պոեզիան։ Մեր մեծերից ժառանգած, հոգու հետ զրուցող ստեղծագործությունները՝ հոգեպարար մեղեդիների համադրությամբ դարձել էին ավելի շոշափելի, ավելի կենդանի ու իրական։
Երեկոյի ընթացքում հնչող դասական ու ժամանակակից մեղեդիներից յուրաքանչյուրը սրտի մի զարկ էր, հոգու մի շունչ։ Պատմություններ, որ ապրել ենք կամ դեռ պիտի ապրենք, որոնք սովորեցնում են սիրել, սպասել, տխրել ու կրկին հավատալ։
Նման երեկոները հայկական պոեզիայի և դասական երաժշտության տարածման համար են,իսկ նախաձեռնողները խոնարհվում են հանդիսատեսի առջև ու խոստանում՝ «Սիրո համանվագը» դեռ երկար է հնչելու՝ մտքերի, հիշողությունների ու զգացմունքների վերապրումով։
