Զբոսաշրջության ոլորտի ներկայացուցիչների և համախոհների ընկերակցությամբ կայացավ Տավուշի տուրիզմի ակումբի երկրորդ հանդիպումը․ ներկայացվեցին ծրագրի նպատակները, ակնկալվող արդյունքները, ինչպես նաև շահագրգիռ կողմերի հետ քննարկվեցին տուրիզմի զարգացմանը խոչընդոտող հիմնական խնդիրները՝ հատուկ ուշադրություն դարձնելով մարզում առկա խնդիրներին։
«Տավուշի տուրիզմի ակումբի նպատակն է, որ բոլոր բիզնեսները կարողանան միմյանց հետ լավ կապեր հաստատել, ինչու ոչ՝ միասին նոր պրոդուկտներ մշակել և փաթեթային վաճառքներով հանդես գալ։ Այսօրվա մեր հանդիպման նպատակն է ներկայացնել՝ ինչ է ակումբը, մեր մասնակիցների համար լինելու են նաև հետաքրքիր անակնկալներ՝ որոշակի մրցույթներ, ինչպես նաև լինելու է ընդհանուր ծրագրի՝ մինչ այժմ կատարված աշխատանքների ամփոփում և առաջիկայում նախատեսված քայլերի ներկայացում»,- հանդիպման մասին Տավուշ ՀԸ-ին պատմում է «Զբոսաշրջային բիզնեսների կարողությունների հզորացում» ծրագրի դասընթացների բաղադրիչի համակարգող Ֆենյա Եփրեմյանը։
Հանդիպման ժամանակ մասնակիցները հնարավորություն ունեցան ներկայացնելու իրենց գործունեությունը, ճանաչելու ոլորտի դերակատարներին և հաստատելու նոր կապեր։
Նախաձեռնությունն իրականացնում է Modus Consulting ընկերությունը՝ «Զբոսաշրջային բիզնեսների կարողությունների հզորացում Տավուշի տուրիզմի ակումբի ստեղծման միջոցով» ծրագրի շրջանակներում։
