Տավուշ Մեդիան միացել է միջազգային հեղինակավոր հարթակներից մեկին՝ «Լրագրողներ առանց սահմանների» կազմակերպության նախաձեռնած Լրագրողական վստահության նախաձեռնությանը։ Նախաձեռնության շրջանակում իրականացվել է հեռուստաընկերության ինքնագնահատում, որի արդյունքները հրապարակված են ինչպես նախաձեռնության պաշտոնական կայքում, այնպես էլ մեր կայքում և բաց են հանրության համար։
Բացի այդ, Տավուշ Մեդիան ստորագրել է նաև ԶԼՄ-ների էթիկական սկզբունքների Կանոնագիրը՝ վերահաստատելով իր հանձնառությունը գործելու թափանցիկ, հաշվետու և հանրության առաջ պատասխանատվության սկզբունքով։ Այս կարևոր քայլով մենք միանում ենք ԶԼՄ-ների ինքնակարգավորման նախաձեռնությանը, որը միտված է մեդիա դաշտի առողջացմանը և մասնագիտական բարձր չափանիշների ներդրմանը։ Այս առիթով Տավուշ Մեդիայի կայքի գլխավոր էջում տեղադրվել է Էթիկայի նշանը, որը հանրության վստահության խորհրդանիշն է և նույնականացնում է Կանոնագիրը ստորագրած լրատվամիջոցներին։
Տեղեկատվության որակի, թափանցիկ աշխատանքի, էթիկական չափանիշների և վստահելիության հարցում Տավուշ Մեդիայի դիրքորոշումը հստակ է և անփոփոխ․ նախաձեռնություններին միանալը բարձրացնում է մեր լրատվամիջոցի հեղինակությունն ու վստահելիությունը, ընդգծում մեր պատասխանատվությունը հասարակության հանդեպ։
